IBHUIDISU IA BIBIDIA IO TAMBUIJILE

O kuila Nzambi uivua o misambu ioso?

Nzambi uivua o misambu ia athu a ifuxi ioso. (Jisálamu 145:18, 19) O Maka mê, o Bibidia, i tu suínisa ku takula kua muéne o ibhindamu ietu. (Filipe 4:6, 7) Maji saí misambu, Nzambi ua i iibhila. Mu kifika, muéne ka uabhela o misambu io bhitulule.—Tanga Matesu 6:7.

Jihova ua zembe ué o misambu ia athu a xibhaka o itumu iê mu vondadi iâ. (Jisabhu 28:9) Mu kifika, m’ukulu Nzambi ka kexile mu kuívua o misambu ia kexile mu bhanga akua Izalaiele mukonda akexile mu bhanga ima ia iibha, kala o ujibhangânga. Kienhiki, phala Nzambi kuívua o misambu ietu, tua tokala ku kumbidila o itumu iê.—Tanga Izaia 1:15.

Ihi i tua tokala o ku bhanga phala Nzambi kuívua o misambu ietu?

Ki tu tena ué ku zukama kua Nzambi se ki tuala ni kixikanu kua muéne. (Tiiaku 1:5, 6) Tua tokala ku xikina kuila, kuene Nzambi, ni kuila muéne ua tu zolo. Tu tena ku kolesa o kixikanu kietu mu ku di longa o Bibidia, mukonda o kixikanu kia kidi, kijila mu jipolova ji tu sanga mu Mak’â Nzambi.—Tanga Jihebeleu 11:1, 6.

Tua tokala ku samba ni muxima uoso ni ku lenduka. Katé muene Jezú, o Mon’a Nzambi, ua sambe ni ku lenduka kuoso. (Luka 22:41, 42) Kienhiki, mu veji dia kuzuela kua Nzambi ihi ia tokala ku bhanga, tua tokala ku tendela o itumu iê mu ku tanga o Bibidia. Mu kiki, tu tena ku samba kala ki tuma o vondadi ia Nzambi.—Tanga 1 Nzuá 5:14.