Ua Fuama u Kala Muthu ua Kídifua Kiahi?

1, 2. Ihi i tua tokala ku bhanga phala ku tu xikina kua Nzambi?

ATHU avulu a mesena kuijiia ihi i banza akuâ ia lungu ni ene. Mukonda tu Jikidistá, ki ki beta-kota ku thandanganha ni ukexilu u xikina Jihova? Muéne Suke-ku mu ngongo ioso, kua muéne kuene ‘ku tunda o muenhu.’—Jisá. 36:9.

² Mu kuzuela ia lungu ni ‘kídifua ki tua fuama ku kala na-kiu’ ku pholo ia Jihova, o poxolo Phetele ua tu tendelesa, “mu kuuabha uendelu, mienhu ienu ia fuama mu i bhakula mu kuzela, ni uôma ua Nzambi.” (Tanga 2 Phetele 3:11.) Phala ku tu xikina kua Nzambi, o ‘uendelu’ uetu ua tokala u fuama, u zela, kiki kia lungu ni ukexilu uetu ua ku xinganeka, ua ku bhanga o ima, ni ku bheza Nzambi. Tua tokala ué ku kala ni “uôma ua Nzambi,” mukonda dia henda ietu kua muéne. Phala ku tu xikina kua Nzambi, ki tu tokala kulondekesa ngó o uendelu uetu ua fuama, maji tua tokala ué kulondekesa o ukexilu uetu moxi. Mukonda Nzambi u ‘solokota o mixima,’ muéne uejiia se o uendelu uetu ua fuama muene mba kana, ni kuila se tua mu bheza ngó muéne mba kana.—1 Mal. 29:17.

3. Ia lungu ni ukamba uetu ni Nzambi, ibhuidisu iahi i tua tokala o ku bhanga?

³ Satanaji ka mesena kuila Nzambi u tu xikina. Mu kiki, muéne u bhanga ioso phala ki tu kale ni ukamba uambote ni Jihova. Ithangana ioso Satanaji u ta makutu, phala ku tu nganala ni ku tu sondolokesa kua Nzambi. (Nzuá 8:44; 2 Kol. 11:13-15) Mu kiki, kima kiambote ku dibhuidisa: ‘Kiebhi Satanaji kiene mu nganala o athu? Ihi i nga tokala ku bhanga phala ku langa o ukamba uami ni Jihova?’

KIEBHI SATANAJI KIENE MU NGANALA O ATHU?

4. Phala ku zanga o ukamba uetu ni Jihova, ihi i bhanga Satanaji, ni mukonda diahi?

⁴ O dixibulu Tiiaku uambe: “Muthu-phe u dianguka, ki mu sanga o hânji iê-muène iaiibha, anga i mu bhomba. Kienhiki, o hânji iaiibha ienhi’ii, ki i zubha o kuimita, i vuala kituxi. O kituxi k’ila kiza ku kitala, ki vuala kalunga.” (Tiia. 1:14, 15) Phala ku zanga o ukamba uetu ni Nzambi, Satanaji u bhanga nguzu phala ku bokona bhu kididi bhu tunda o jihanji jetu—o muxima.

5, 6. (a) Kiebhi Satanaji kia zozesa o mixima ietu? (b) Jebhi o jindunge ja Satanaji phala ku tu bhangesa ku kala ni jihanji ja iibha ku mixima, ni uhete uahi uala na-u phala ku tu tendala bhu kaxi ka jihanji jiji?

⁵ Kiebhi Satanaji kia zozesa o mixima ietu? O Bibidia i zuela: “O mundu uoso-phe ua zeka mua Kadiaphemba ió mukua ku tondalesa.” (1 Nzu. 5:19) O ibhetu ia Satanaji ia lungu ni “ima iene ku mundu.” (Tanga 1 Nzuá 2:15, 16.) Ku mazunda ni mazunda a mivu, o Diabhu uene mu ta ibhetu ku mundu phala ku nganala o athu. Mukonda tua tungu ku mundu iú, tua bhingi tu di langa mu jindunge jê.—Nzuá 17:15.

⁶ Satanaji uene ni jindunge javulu phala ku tu bhangesa ku kala ni jihanji ja iibha ku mixima ietu. Poxolo Nzuá ua tumbula ibhetu itatu ia Satanaji: (1) ‘jihanji ja luímbi lua xitu,’ (2) o ‘luímbi lua ku mesena o ima ioso i mona o mesu,’ (3) o ‘izala mu ima ioso iene ku muenhu ua muthu.’ Satanaji ua tendala Jezú ni ibhetu íii mu kikangalakata. Mukonda Satanaji uene mu tendala o athu ni ibhetu íii ku mivu iavulu, muéne ua kituka hete, mu kiki, muéne uejiia kiambote o kibhetu kia fuama ku muthu ni muthu. Ande dia ku di longa kiebhi ki tu tena ku di langa, tu mone kiebhi Diabhu kia di tundu kiambote mu ku nganala Eva, maji ka tena ku nganala o Mona Nzambi.

‘JIHANJI JA LUÍMBI LUA XITU’

7. Kiebhi Satanaji kia nganala Eva ni ‘jihanji ja luímbi lua xitu?’

⁷ O athu oso a bhingi kudia phala ku kala ku muenhu. O Mubhangi ua bhange o ixi phala ku bhana idima iavulu. Mukonda Satanaji uejiia o jihanji jetu ja xitu, muéne u tu tendala mu ku tu bhangesa ku bhanga ima ia zembe Nzambi. Tua mono kiebhi muéne kia bhangele ni Eva. (Tanga Dimatekenu 3:1-6.) Satanaji uambela Eva kuila, keji fuá se muéne ua dile o kibundu kia “muxi ua kuijiia kiauabha ni kiaiibha.” Muéne uambe kuila, se u dia ku kibundu ua-nda sokela ni Nzambi. (Dim. 2:9) Diabhu ua longesa kuila, Eva ka bhingile ku belesela Nzambi phala ku kala ku muenhu. Iá exile makutu a dikota! Kioso Satanaji kia mu zuelela o ima íii, Eva ua tokalele ku sola ima iiadi: Ku dituna o izuelu íii, mba kuehela o jihanji jê ja kudia o kibundu ku di bandekesa. Sumbala muéne ua kexile ni ufôlo ua kudia o ibundu ia mixi ia mukuá, muéne ua solo ku xinganeka mu muxi ua kexile bhu kaxi ka jaludim, mu kiki muéne ua ‘kanze o kibundu anga u dia.’ Satanaji ua mu bhangesa ku kala ni jihanji ja kima kia mu fidisile o Mubhangi uê.

8. Kiebhi Satanaji kia tendala Jezú ni ‘jihanji ja luímbi lua xitu,’ ni mukonda diahi Satanaji ka di tundu kiambote?

⁸ Satanaji ua bhange ué kiki kioso kia tendala Jezú mu kikangalakata. Kioso kia bhiti 40 a izuua ni 40 a usuku, Jezú a mu tendala ni jihanji ja kudia. Satanaji uambe: “O ki kala eie-muène u Mon’a Nzambi, tuma ditadi didi di kituke mbolo.” (Luka 4:1-3) Jezú ua kexile ni ima iiadi phala ku sola: O kulondekesa o kutena kué phala ku langa o ibhindamu iê ia kudia, mba kana. Jezú uejidile kuila muéne ka tokalele kulondekesa o kutena kué phala ku bhanga o vondadi iê. Sumbala ua kexile ni nzala, o ukamba uê ni Jihova ua betele kota, o nzala iê iexile ndenge. Jezú ua tambuijila: “Kiòsoneke mu Mikanda ia Ngana, kuma muthu ki ku mbolo ngó kua muena o muenhu.”—Luka 4:4.

‘O LUIMBI LUA KU MESENA O IMA IOSO I MONA O MESU’

9. Ihi i lombolola o izuelu ‘luímbi lua ku mesena o ima ioso i mona o mesu’ ni kiebhi Satanaji kia kuata Eva mu hanji íii?

⁹ Nzuá uambe ué kuila o ‘luímbi lua ku mesena o ima ioso i mona o mesu,’ tendasá. O izuelu íii, i lombolola kuila o muthu u tena ku mateka ku mesena kima, kioso kia ki mona. Satanaji ua kuata Eva mu hanji íii, muéne ua zuela: ‘Mua-nda ku tona mesu.’ Kioso o Eva kiai ni ku mona o kibundu, o jihanji jê ku kibundu kiki ja dibandekesa dingi. Eva ua mono kuma muxi ‘uambote phala kudia, ua uabha ué ku mesu.’

10. Kiebhi Satanaji kia tendala Jezú ni ‘luímbi lua ku mesena o ima ioso i mona o mesu,’ ni kiebhi kia tambuijila Jezú?

¹⁰ Ihi ia bhange ni Jezú? Satanaji ua “mu londekesa jixi joso mu ngongo, mu kathangana kòfele ngó. Anga u mu ambela uixi: Ngi ku bhana o ukota uoso ni maungana ma jixi joso jiji.” (Luka 4:5, 6) Jezú ka mono o maungana oso mu kithangana kieniókio, maji Satanaji nange, ua banze kuila muéne ueji uabhela o ukota ua maungana oso a mu londekesa mu kisuma. Sé jisonhi, Satanaji uambe: “Se u ngi bheza bhu pholo iami, moso muene ma kala mê-eie.” (Luka 4:7) Jezú ka mesenene ku bhanga o vondadi ia Satanaji. Muéne ua tambuijila ni lusolo. Muéne uambe: “Kiòsoneke mu Mikanda ia Ngana kuma: Ngana dia Nzambi ié, muène ngó u mu bheza, muène ngó u mu bhikila.”—Luka 4:8.

‘O IZALA MU IMA IOSO IENE KU MUENHU UA MUTHU’

11. Kiebhi Eva kia mu nganala kua Satanaji?

¹¹ Mu ku tumbula o ima ia mundu, Nzuá ua tumbula ué o ‘izala mu ima ioso iene ku muenhu ua muthu.’ Adá ni Eva ka tenene ku kala ni ‘izala mu ima ioso ia kexile na-iu ku mienhu iâ’ ku pholo ia athu, mukonda ene ngó akexile mu ixi. Maji ene a londekesa o luímbi. Kioso kia tendala Eva, Satanaji ua mu longesa kuila Nzambi ua mu suekele kima. Diabhu ua mu tangela kuila o kizuua kieji kudia ku “muxi ua kuijiia kiauabha ni kiaiibha,” muéne ueji ‘sokela ni Nzambi, mu kuijiia kia uabha ni kia iibha.’ (Dim. 2:17; 3:5) Satanaji ua mesenene kuila, Eva u banza kuila muéne ueji tena ku kala ku muenhu sé kikuatekesu kia Jihova. O luímbi luene lua mu bhangesa ku xikina o makutu. Muéne uadi o kibundu kia mu fidisile, mu ku xinganeka kuila keji kufuá. Muéne ka xinganeka kiambote!

12. Ukexilu uebhi ua fikisa Satanaji ku tendala Jezú, ni kiebhi kia tambuijila Jezú?

¹² Jezú ka bhange kála kia bhangele Eva, mukonda muéne ua xisa phangu ia ku lenduka! Satanaji ua fikisa ku tendala Jezú ni ukexilu uéngi, maji Jezú ua ditunu, mukonda ka mesenene ku lokalala Nzambi. Se ua bhangele kiki, muéne ueji londekesa o luímbi! Maji mu veji dia ku bhanga kiki, Jezú ua tambuijila: “Kiòzuele mu Mikanda Ikôla kuma: Ngana dia Nzambi iè ku mu lokalale.”—Tanga Luka 4:9-12.

KIEBHI KI TU TENA O KU LANGA O UKAMBA UETU NI JIHOVA?

13, 14. Ibhetu iahi iene mu ta Satanaji lelu phala ku tu nganala?

¹³ Lelu, Satanaji u tendala o athu ni ibhetu ia tele kua Eva ni Jezú. O Diabhu u ta o kibhetu kia ‘jihanji ja luímbi lua xitu,’ phala ku bhangesa o athu ku bhanga o ufusa mba kudia ni kúnua kiavulu. Mu ku ta o kibhetu kia ‘luímbi lua ku mesena o ima ioso i mona o mesu,’ muéne u bhangesa o athu ku mona o ufusa, bhenge-bhenge mu Internete. Muéne u ta o kibhetu kia ‘izala mu ima ioso iene ku muenhu ua muthu,’ phala ku bhangesa o athu ku kala ni luímbi, lua ku mesena o fuma, ni jimbongo!

¹⁴ “O kibhetu kia Satanaji kia “ima iene ku mundu,” kia difu ni ixika ia mutambi. O ixika iene mu kala ima ia uabha maji i kala ku nzolo. O ibhetu iene mu kuoleka Satanaji, nange i moneka kala ki kituxi, mba ima i tua bhindamena, muéne u bhanga kiki phala ku tu bhangesa ku bhukumukina o itumu ia Nzambi. O jindunge jiji, a ji bhange phala ku tu bhangesa ku kala ni jihanji ja iibha ni ku zozesa o mixima ietu. Mu kidi, o jindunge jiji jitendasá phala ku tu bhangesa ku xikina kuila, o ku langa o ibhindamu ietu ni ku kala ni jimbongo kota, o ku bhanga o vondadi ia Nzambi ndenge. O kuila tua-nda dibhala mu ibhetu íii?

15. Kiebhi ki tu tena ku kaiela o phangu ia Jezú ia ku dituna o jitendasá ja Satanaji?

¹⁵ Sumbala Eva ua dibhale mu jitendasá ja Satanaji, maji Jezú ua di tundu kiambote. Mu ji veji joso ja mu tendala, Jezú ua tambuijila ni kikuatekesu kia Mikanda Ikôla mu kuzuela: “Kiòzuele” mba “Kiòsoneke.” Se tu di longa kiambote o Mikanda Ikôla, tua-nda kuijiia kiambote o ibatulu i tena ku tu kuatekesa kioso ki ku moneka tendasá. (Jisá. 1:1, 2) O ku di lembalala o phangu ia jiselevende ja fiiele ja Nzambi, io soneke mu Mikanda Ikôla, ia-nda tu kuatekesa ué kulondekesa o ufiiele uetu kua Nzambi kála ene. (Loma 15:4) O ku kala ni uôma ua ku luualesa Jihova, ku uabhela o ima ia uabhela muéne, ni ku zemba o ima ia zembe muéne kua-nda tu kuatekesa ku bhuluka.—Jisá. 97:10.

16, 17. Ihi i tena ku bhanga o ‘kilunji kia fuama,’ ko kuetu?

¹⁶ O poxolo Phaulu ua tu suínisa kulondekesa o ‘kilunji kia fuama,’ phala tu kale tu athu a banza kála Nzambi, kana kála o mundu. (Loma 12:1, 2) Mu ku tendelesa kuila tua tokala ku langa o ima i tu banza, Phaulu uambe: “Ni ima ioso ia ukumbu ua xitu ki i ehela athu ku’ijiia Nzambi. Tu tolola ixinganeku ioso ia athu phala n’a tumaka Kristu.” (2 Kol. 10:5) O ima i tu banza iala ni kutena kuavulu mu ukexilu uetu, mu kiki, tua tokala ku ‘kolokota ku xinganeka’ mu ima i tu kuatekesa ku kula mu nzumbi.—Fil. 4:8.

¹⁷ Se tua mesena ku kala tu athu a fuama, tua tokala ku dituna o ibanzelu ni jihanji ja iibha. Tua tokala ku zola Jihova ni “muxima uazele.” (1 Tim. 1:5) Maji o muxima ua muthu u bhomba kinene, mukonda dia kiki, nange ki tu mono kuila o “ima iene ku mundu,” ia mu tu thandanganhesa. (Jel. 17:9) Mu kiki, ki tu tokala ku ‘di tonginina phala ku mona se tuala mu kixikanu ni kuijiia’ se tua mu belesela o milongi i tua mu di longa mu Bibidia?—2 Kol. 13:5.

18, 19. Mukonda diahi tua tokala ku bhanga nguzu phala ku kala tu athu a mesena Jihova?

¹⁸ O kima kia mukuá ki tena ku tu kuatekesa ku dituna o “ima iene ku mundu,” o ku di lembalala o izuelu ia Nzuá: “O mundu-phe u buila, ni ima iê ioso iene mu kuinda athu. Maji uoso-phe u bhanga o vondadi ia Nzambi, ió muène o muthu u nangenena.” (1 Nzu. 2:17) O mundu ua Satanaji u moneka kála ua-nda nangenena. Maji saí kizuua ua-nda buika. Se-ku kima ki bhana o mundu ua Satanaji, ki nangenena. O kuijiia o kidi kiki, ki tu kuatekesa ku di langa mu ibhetu ia Diabhu.

¹⁹ O poxolo Phetele u tu tendelesa ku kala tu athu a a xikina kua Nzambi, kuma ‘tua mu kinga o kizuua kia Nzambi kia-nda tukuluka kindala. O kizuu’okio kia kà bhinga o maúlu ma kà uama, hé ma bhuila ku túbhia, o iiudikilu iê ia kà sengumuka ku munza ua tema.’ (2 Phe. 3:12) Kua kambe ngó, o kizuua kiki kia-nda bhixila, Jihova ua-nda buika o mundu uoso ua Satanaji. Katé ki bhixila o kizuua kieniókio, Satanaji ua-nda kolokota ku ta o kibhetu kia “ima iene ku mundu,” phala ku tu tendala kála kia bhangele ni Eva ni Jezú. Ki tu tokala ku bhanga kála Eva, ua sotele ku bhanga ngó o jihanji jê. Se tu bhanga kiki, tua-nda londekesa kuila Satanaji nzambi ietu. Tua tokala ku bhanga kála Jezú ua ditunu o jitendasá joso, né muene se ja lungu ni ima i tua uabhela kiavulu. Tu bhangienu nguzu phala tu kale tu athu a mesena Jihova.