Kaiela o Ukexilu ua ku Bhanga ku Athu o Ima i ua Mesena ia ku Bhanga mu Ukunji Uê

1. O kuila o ukexilu uetu ua ku di bhana ni athu kioso ki tuia mu ukunji, u kuatekesa o athu ku tuívua? Bhana kifika. (Tala o foto ia dianga.)

MIVU ku dima, saí dikaza Kidistá dia kexile mu boka mu ixi ia Fiji, mu kuixana o athu phala kuia mu Fesa ia Lembalasa ia Kufua Kua Jezú. Kioso kia kexile mu zuela ni muhatu bhu kanga, kua mateka o ku noka. O phang’etu ua bhana o dikumbi diê ku muhatu, muéne ni kaza diê a di futu ngó ni dikumbi dimoxi. O muhatu ua sangulukile kiavulu, mu kiki muéne uai mu Lembalasa. Muéne uambe kuma ka di lembalala o ima ioso ia mu tangela o Jimbangi ja Jihova, kioso kia mu kundu. Maji muéne ua uabhela kiavulu o kima kia mu bhangele, mukonda dia kiki, ua xikina kuia mu Lembalasa. Ihi ia mu bhangesa ku xikina kuia mu Lembalasa? O dikaza dia kaiela o ukexilu ua ku Bhanga ku Athu, o Ima ia Mesena kua Bhanga Ene.

2. Ihi i lombolola o ku Bhanga ku Athu o Ima i ua Mesena ia ku Bhanga, ni kiebhi ki tu tena ku kaiela o kitendelesu kiki?

² Ihi i lombolola o ku Bhanga ku Athu o Ima i ua Mesena ia ku Bhanga? Jezú ua tu tendelesa kioso kiambe: “Ima ioso-phe i mua mesena kuila athu a mi bhanga-iu enu, iene ué muene i mua bhanga ene.” (Mat. 7:12) Kiebhi ki tu tena ku kaiela o kitendelesu kiki? Mu ku bhanga ima iiadi: Kia dianga, tua tokala ku dibhuidisa: ‘Se ng’exile o muthu muenhó, ihi i ngeji mesena i ngi bhanga o athu?’ Kaiiadi, tua tokala ku suína phala tu bhange ku akuetu o ima i tu mesena ia tu bhanga.—1 Kol. 10:24.

3, 4. (a) Jimbulula se mukonda diahi ki tu tokala ku kaiela ngó o kitendelesu kia ku Bhanga ku Athu o Ima i tua Mesena ia tu Bhanga, kioso ki tu di bhana ni jiphange? (b) Ihi i tua-nda di longa mu milongi íii?

³ Tuene mu kaiela o kitendelesu kia ku Bhanga ku Athu o Ima i tua Mesena ia tu Bhanga, kioso ki tu di bhana ni jiphange. Maji Jezú ka tendelesa ku kaiela ngó o kitendelesu kiki, kioso ki tu di bhana ni jiphange jetu. Muéne ua tendelesa o ku kala ni ukexilu ua ku Bhanga ku Athu o Ima i tua Mesena ia tu Bhanga, kioso kia kexile mu zuela ia lungu ni ukexilu ua ku di bhana ni athu. (Tanga Luka 6:27, 28, 31, 35.) Mu kiki, kima kiambote ku kaiela o ukexilu ua ku Bhanga ku Athu o Ima i tua Mesena ia tu Bhanga mu ukunji uetu, mukonda avulu nange a xikina o njimbu iambote, phala ku tambula “o muenhu ki uabhua!”—Ika. 13:48.

⁴ Tua-nda di longa ibhuidisu itatu, ki tu tokala ku i jimba kioso ki tuia mu ukunji: Nga mu zuela ni nanhi? Kuebhi ku ngiia mu zuela ni athu? Kithangana kiebhi ki ngi zuela ni athu? Kiebhi ki nga tokala kuzuela ni athu? Kala ki tua-nda mona, o ibhuidisu íii, i tena ku tu kuatekesa kuijiia ihi ia mesena o athu.—1 Kol. 9:19-23.

NGA MU ZUELA NI NANHI?

5. Ibhuidisu iahi i tua tokala o ku di bhanga?

⁵ Mu ukunji uetu, tu zuela ni athu. O athu ka difu, kala muthu uala ué ni ibhidi iê. (2 Mal. 6:29) Kioso ki u zuela ni muthu, dibhudise: ‘Se ng’exile o muthu iú, ihi i ngeji mesena ia ngi bhanga? O kuila ngeji sanguluka se muthu u ngi tala kala ka ngijiia? Anga ngeji mesena kuila o muthu iú u ngijiia?’ O ku di longa o ibhuidisu íii, ku tena ku tu kuatekesa ku bhanga o mbote kabasa muthu tu mu sanga mu ukunji.

6, 7. Ihi i tua tokala ku bhanga se tu sanga muthu mu ukunji uala ni njinda mba u tu zuela ima ki i tokala?

⁶ Se-ku muthu ua uabhela ku mu ixana ‘muthu ua iibha.’ Mu kifika, o Jikidistá a bhanga ioso phala ku kaiela o kitendelesu kia Bibidia kia ‘ku zuela ni ujitu.’ (Kol. 4:6) Mukonda tu akua ituxi, saí ithangana tu zuela ima i tu bhangesa ku diela. (Tiia. 3:2) Se tu zuela kima kia iibha ku muthu ki tu ki mesenene ku ki zuela, mukonda ki tu nange kiambote, tueji kingila kuila o muthu iú ka banze kuila tu ‘athu a iibha.’ Tueji mesena kuila muéne uejiia kuila ki tu mesenene kuzuela kima kia iibha. O kuijiia o kidi kiki, ki tu kuatekesa kuijiia kuila, o athu a zuela ima ia iibha, mu ku bhita kithangana nange a diela o ima ia zuela.

⁷ Se u sanga muthu mu ukunji u moneka kuma uala ni njinda mba u zuela ima ki i tokala, o kuila u sota kuijiia se mukonda diahi muéne ua mu zuela o ima íii? O kuila muéne uala ni maka bhu xikola mba ku salu? O kuila ua mu kata? Athu avulu akexile ni njinda ia Jimbangi ja Jihova kioso kia dianga o ku a kunda, maji a xikina o kidi mukonda dia ku a xila.—Jisa. 15:1; 1 Phe. 3:15.

8. Mukonda diahi tua tokala kuboka o njimbu iambote ia Utuminu ku ‘athu oso?’

⁸ Mu ukunji uetu tu zuela ni athu a itala ioso. Mu mivu ia bhiti, a tange 60 a misoso ndenge, mu milongi ia Mulangidi iambe: “O Bibidia i Lungulula o Mienhu ia Athu.” Avulu a a tange mu misoso íii, akexile mu nhana, exile jihôlua, akexile mu ibuka ia jibandi, akexile mu xibha diamba. A mukuá exile jinguvulu, exile atuameni a jingeleja mba akexile ngó mu sota salu iambote. A mukuá exile jindumbu. Maji né kiki, ene oso evu o njimbu iambote, a xikina o ku di longa o Bibidia, a lungulula o ukexilu uâ, iá eza mu kilunga kia Nzambi. Mu kiki, ki tu tokala ku banza kuila saí athu ka-nda xikina o njimbu ia Utuminu. (Tanga 1 Kolindu 6:9-11.) Mu veji dia kiki, tuejiia kuila ‘athu oso’ a tena ku xikina o njimbu iambote.—1 Kol. 9:22.

KUEBHI KU NGIIA MU ZUELA NI ATHU?

9. Mukonda diahi tua tokala ku xila o jinzo ja akuetu?

⁹ Kuebhi ku tuia mu zuela ni athu mu ukunji? Tuene mu zuela ni athu mu jinzo jâ. (Mat. 10:11-13) Ki tu uabhela se akuetu a xila o inzo ietu ni ima ietu. Mu kidi, o inzo ietu kima kia valolo phala etu. Tua mesena ku divua kiambote mo’nzo ietu. Mu kiki, kioso ki tu zuela ni athu mu ukunji, tua tokala ué ku xila o jinzo jâ.—Ika. 5:42.

10. Ihi i tua tokala ku bhanga phala o athu mu ukunji uetu ka teme?

¹⁰ O mundu mu tuala, uezala ni ujibhangânga, mukonda dia kiki, athu avulu ala ni uôma ua athu ka ejiia. (2 Tim. 3:1-5) Ki tu tokala ku bandekesa dingi o uôma uâ. Mu kifika, nange u pupa ku dibhitu dia inzo. Se ka ku tambuijila, nange u mesena ku zongojola mu njanela, mba u kondoloka o inzo phala ku sota o mukua dibhata. Mu ixi iê, o kuila o mukua dibhata kieji mu uabhela? Ihi ia-nda banza o jivizinhu jê? Nange u bhanga kiki mukonda ua mesena ku sanga athu avulu kioso ki uia mu boka. (Ika. 10:42) Tua mesena ku kuatekesa o athu kuijiia o kidi kia lungu ni Nzambi. (Loma 1:14, 15) Maji tua tokala tu aluka, tu kala ni unjimu phala ki tu bhange kima ka ki uabhela ku athu mu diembu dietu. Kála kia soneka poxolo Phaulu: “Kana kubhanga kima kioso-kioso ki bhangesa mukuenu ku di bhala, phala o ungunza uetu ki u kale ni malebhu.” (2 Kol. 6:3) Se tu xila o inzo ni ima ia athu mu diembu dietu, nange ene a-nda xikina o kuívua o kidi.—Tanga 1 Phetele 2:12.

KITHANGANA KIEBHI KI NGI ZUELA NI ATHU?

11. Mukonda diahi tu sakidila se o athu a xila o kithangana kietu?

¹¹ Mukonda tu Jikidistá, etu enioso tu bhanga ima iavulu. Phala ku kumbidila o kikalakalu kietu, tua tokala ku bhanga o ima ia beta-o-kota ni ku di sokejeka kiambote phala ki tu zange o kithangana kietu. (Efe. 5:16; Fil. 1:10) Se ku moneka kima ki tu fidisa ku bhanga o kima ki tua mesena, nange tu luuala. Mu kiki, tu sakidila se akuetu a xila o kithangana kietu, ni kioso kia xikina kuila saí bhabha ki tu kala ni kithangana kiavulu phala ku kala nau. Mu kuijiia kuila tua tokala ku kala ni ukexilu ua ku Bhanga ku Athu o Ima i Tua Mesena ia tu Bhanga, kiebhi ki tu tena ku xila o athu u tu bokela?

12. Kiebhi ki tu tena kuijiia o kithangana kia tokala kia kuzuela ni athu mu diembu dietu?

¹² Tua tokala kuijiia se kithangana kiebhi ki tua tokala kuzuela ni athu. Mu diembu dietu, kiebhi o kithangana kiene mu kala o athu ku bhata? Kithangana kiebhi kia mesena ku tuívua? Tua tokala ku di sokejeka phala kuzuela nau mu kithangana kieniókio. Saí jixi ku mundu, kima kiambote ku boka mu inzo ni inzo, mu ngoloxi mba se kua mu vunda kiá. Se kiene ué mu ixi iê, o kuila u tena kuzuela ni athu mu kithangana kiki? (Tanga 1 Kolindu 10:24.) Tu tena ku dielela kuila, Jihova ua-nda besoala o nguzu ioso i tu bhanga phala ku bokela o athu mu diembu dietu, mu kithangana kia mesena ku tuívua.

13. Kiebhi ki tu tena ku xila muthu u tu mu bokela mu diembu dietu?

¹³ Kiebhi dingi ki tu tena ku xila o muthu tu mu sanga ku bhata? Kioso ki tu sanga muthu uivua o njimbu ietu, tua tokala ku mu bokela, maji ki tu tokala kuzuela nê kithangana kiavulu. Nange o muthu iú ua mesena ku bhanga kima kia valolo mu kithangana kieniókio. Se muéne u zuela kuma ua mu bhanga kima, tu tena kuzuela kuma ki tua-nda laleka, maji tua tokala ku kumbidila o kikanenu kietu. (Mat. 5:37) Kioso ki tu zubha kuzuela nê, kima kiambote kuibhula o kithangana ki tua tokala ku vutuka, phala ku mu kunda dingi. Saí aboki a zuela: “Nga mesena ku vutuka dingi. O kuila ngi tena ku kuixana mu mutelembe ua kafuetele mba ku ku tumikisa njimbu ande dia kuíza?” Kioso ki tu xila o kithangana kia athu mu diembu dietu mu kuijiia kuila, ene ala ni ima iavulu ia ku bhanga, tua mu kaiela o phangu ia poxolo Phaulu ua kexile mu ‘sota ku a uabhesa mixima mu ima ioso ia kexile mu bhanga, kuma ka bhindamene muéne ngó kubhanduluka, maji ua mesenene kuila oso a bhanduluke, phala n’a bhuluke.’—1 Kol. 10:33.

KIEBHI KI NGA TOKALA KUZUELA NI ATHU?

14-16. (a) Mukonda diahi tua tokala ku tangela o muthu ihi ia tu bheka? Bhanga kifika. (b) Ihi i bhanga o kafunga ka ilunga phala ku di tunda kiambote mu ukunji uê?

¹⁴ Xinganeka muthu u kuixana, maji kuijiia o dízui diê? Eie ki u muijiia, maji u kuibhula se kudia kuahi ku ua mesena. Eie u dibhudisa se muthu iú nanhi, ni ihi ia mesena muéne. Kua mesena ku mu zuela ima ia iibha, mu kiki u zuela nê bhofele, anga u mu xalesa. Kindala, xinganeka muthu u kuixana, maji o veji íii o muthu u tumbula o dijina diê, ni kuila o kikalakalu kiê o ku kuatekesa o athu kudia o huta i bheka sauidi. Ni henda ioso muéne u ku tangela kuila uala ni njimbu iambote phala eie, i tena ku ku kuatekesa. Nange eie u mesena ku muivua. Mu kidi, tu sanguluka se o athu a dijimbulula kioso kia zuela n’etu. Kiebhi ki tu tena kulondekesa o ukexilu iú ku athu u tu sanga mu ukunji?

¹⁵ Saí ixi, tua tokala ku tangela o muthu tu mu sanga ku bhata, o kima kia tu bheka. Sé phata, tuala ni njimbu iambote phala o muthu tu mu sanga ku bhata. Maji xinganeka se ki tu di jimbulula ku muthu, mba se ki tu tangela o muthu o kima kia tu bheka, anga tu mateka kiá ku mu ibhuidisa kiki: “Se uexile ni kutena kua ku batula maka ku mundu maka ebhi ueji batula?” Tu ibhula kiki phala kuijiia ihi i banza o muthu, ni tu mu kuatekese bhu kaxi ka Bibidia. Maji o muthu nange u dibhudisa: ‘O muthu iú nanhi, mukonda diahi muéne ua ngi bhudisa kiki? Ihi ia mesena?’ Tua mesena kuila o muthu u divua kiambote kioso kia zuela n’etu. (Fil. 2:3, 4) Kiebhi ki tu tena ku bhanga kiki?

¹⁶ Saí kafunga ka ilunga u bhanga kiki: Kioso kia zubha ku menekena o muthu, muéne u mu bhana o kamukanda Ua Mesena Kuijiia o Kidi? anga u zuela: “Lelu tua mu bhana o tumikanda tutu ku athu oso. Ka zuela ia lungu ni ibhuidisu isamanu iene mu bhanga o athu. Kaka phala eie.” O phange ua zuela kuila, se o athu ejiia se mukonda diahi ua mu ku a kunda, ene a tululuka, mu kiki, ki ku bhonza kuzuela nau. Mu ku suluka o phange uibhula: “O kuila ua di bhangele kia o ibhuidisu íii?” Se o muthu u sola kibhuidisu, o phange u jikula o kamukanda, anga u jimbulula i zuela o Bibidia ia lungu ni kibhuidisu kieniókio. Se o muthu ka solo kibuidisu, o phange muéne u sola, anga u suluka ni ku mu jimbulula se ku mu kuatesa jisonhi. Mu kidi, kuene maukexilu avulu a ku mateka kuzuela ni athu. Saí madiembu, o athu u tu sanga, nange a kingila kuila tu belesela o ijila iâ kioso ki tu a menekena ande dia ku a tangela ihi ia tu bheka. Tua tokala kuijiia kuila, ku tena ku bhinga ku lungulula o milongi i tua mesenene ku tangela o athu mu ukunji, phala ene evué o njimbu ietu.

KOLOKOTA KU BHANGA KU ATHU O IMA I UA MESENA IA KU BHANGA MU UKUNJI UÊ

17. Kala ki tua di longo mu milongi, maukexilu ebhi mu tu tena ku kaiela o ukexilu ua ku Bhanga ku Athu o Ima i Tua Mesena ia tu Bhanga mu ukunji uetu?

¹⁷ Ihi i tua di longo i tena ku tu kuatekesa ku kaiela o ukexilu ua ku Bhanga ku Athu o Ima i Tua Mesena ia tu Bhanga mu ukunji uetu? Kabasa muthu tu mu sanga, tu mu bhana valolo. Tu xila o inzo ni ima iê. Tu suína phala ku bokela o athu mu kithangana kia kala ku bhata, kia mesena ku tuívua. Tu tula o njimbu iambote mu ukexilu u bhangesa o athu ku mesena kuívua.

18. Mukonda diahi kima kiambote ku bhanga ku athu mu diembu dietu, o ima i tua mesena ia tu bhanga?

¹⁸ Se tu bhana valolo ku athu mu diembu dietu kioso ki tuia mu ukunji, mu ku a londekesa o henda, tu londekesa kuila tua mu kaiela o itumu ia Bibidia, mu kiki tu bhana kijingu kua Tata ietu ia diulu. (Mat. 5:16) Athu avulu a xikana ku di longa o Bibidia kioso ki tu a xila. (1 Tim. 4:16) Ki kale se athu a xikana o njimbu iambote ia Utuminu mba kana, tuejiia kuma tua bhange ioso phala ku kumbidila o ukunji uetu. (2 Tim. 4:5) Tu kaiele o phangu ia poxolo Phaulu ua soneka: “Ima ioso iii ngi i bhanga mukonda dia Njimbu Iambote, phala ngi tambule ku mbote iê kumoxi ni akuetu.” (1 Kol. 9:23) Mu kiki, tu kaiele o ukexilu ua ku Bhanga ku Athu o Ima i tua Mesena ia tu Bhanga mu ukunji uetu.