O Utuminu ua Nzambi ua Mateka ku Tumina Thembu Kuxi?—Mbandu 2

KU BHITULULA O NZOJI IA NABUKODONOZOLO

Nzuá: Matesu, kima kiambote ku ku sanga dingi. Nga uabhela kiavulu ku di longa o Bibidia n’eie semana joso.a Mu mukutu muala kiebhi?

Matesu: Muala kiambote, nga sakidila.

Nzuá: Ngi sanguluka mu ku mona kuila uala kiambote. O veji ia dianga i ngejile bhabha tua zuela se mukonda diahi o Jimbangi ja Jihova a xikina kuila o Utuminu ua Nzambi ua mateka ku tumina ku muvu ua 1914.b Kála ki tua di longo, saí kima ki tua mono mu kikanenu ki tu sanga mu kibatulu kia 4 mu divulu dia Daniiele. O kuila u dilembalala hanji i ua tange-mu?

Matesu: Nga tange ia lungu ni nzonji ia Nabukodonozolo ia muxi ua dikota.

Nzuá: Kiene muene. Mu nzoji iê Nabukodonozolo ua mono muxi ua tula ku diulu. Muéne uevu anju ia Nzambi ku tumina ku batula o muxi, maji a tokalele kueha o kixinji ni jindanji jê. Kioso kieji bhita o “sambuadi dia jithembu,” o muxi ueji sabhuka dingi.c Tua di longo ué kuila, o kikanenu kiki kia dikumbidila mu luuadi. O kuila ua mu dilembalala hanji kiebhi kia dikumbidila mu veji ia dianga?

Matesu: Kia dikumbidila kua Nabukodonozolo, ki kiene? Muéne ua saluka mu sambuadi dia mivu.

Nzuá: Kiene muene. Nabukodonozolo ua bhiti kithangana mu ku saluka, kienhiki ka kexile dingi mu tumina. Maji mu dikumbidilu dia beta-o-kota dia kikanenu kiki, o Utuminu ua Nzambi eji ku u fidisa ku tumina mu sambuadi dia jithembu. Kála ki tua mono, o sambuadi dia jithembu ja mateka kioso kia buika o mbanza ia Jeluzaleme ku muvu ua 607 A.K.K. , tundé o kithangana kieniókio ki mu kexile dingi jisobha ja kexile mu lombolola Jihova Nzambi mu ku tumina o mundu uê. Maji kioso kieji bhua o sambuadi dia jithembu, Nzambi ueji sola Sobha ua ubhe ku diulu, ueji tumina o mundu uê. Tu tena kuzuela ué kuila, o Utuminu ua Nzambi ku diulu ueji mateka o ku tumina kioso kieji bhua o sambuadi dia jithembu. Kindala tua mono kiá se thembu kuxi kia mateka o sambuadi dia jithembu. Kienhiki se tuijiia thembu kuxi ia bhange o sambuadi dia jithembu, tua-nda tena kuijiia o muvu ua mateka ku tumina o Utuminu ua Nzambi. O kuila ua mu tendela i nga mu zuela?

Matesu: Xe nga mu tendela, o ku bhitulula kua ngi kuatekesa ku lembalala i tua zuelele kiá.

Nzuá: Kiambote, ndoko-phe tu suluke ni milongi ietu, ni tu mone se thembu kuxi ia bhange o sambuadi dia jithembu. Nga zubhu ku di longa o milongi íii phala ngi tene ku di lembalala o milongi ia beta-o-kota. Nga-nda di suinisa phala ngi tene ku i jimbulula kiambote.

Matesu: kia uabha.

O SAMBUADI DIA JITHEMBU JIBHUA—O IZUUA ISUKIDILA-KU I MATEKA

Nzuá: Kioso o kikanenu kia di kumbidila kua Nabukodonozolo, o sambuadi dia jithembu ja kexile mu lombolola sambuadi dia mivu ia kidi. Maji mu di kumbidilu dia dikota dia lungu ni Utuminu ua Nzambi, o sambuadi dia jithembu kithangana kiavulu, ki sambuadi dia mivu ngó.

Matesu: Mukonda diahi ua mu zuela kiki?

Nzuá: Kia dianga, lembalala kuila o sambuadi dia jithembu ja mateka kioso kia buika o mbanza ia Jeluzaleme ku muvu ua 607 A.K.K. Se tu mateka ku tanga tundé ku muvu uenhó, sambuadi dia mivu ia kidi, tueji tula ku muvu ua 600 A.K.K. Maji ku muvu uenhó ki ku bhitile kima kia dikota kia lungu ni Utuminu ua Nzambi. Kala ki tua mono ué, kioso Jezú kia kexile mu ixi muene ua londekesa kuila o sambuadi dia jithembu ki ji bhuile luua.

Matesu: Kidi muene, nga mu di lembalala.

Nzuá: Kienhiki, mu veji dia kulombolola mivu ia kidi, ji lombolola thembu iavulu o sambuadi dia mivu ndenge.

Matesu: Mivu ikuxi-phe ilombolola o sambuadi dia jithembu?

Nzuá: O divulu dia Dijingunuinu, di jimbulula ué maka ala mu divulu dia Daniiele, di tu kuatekesa kuijiia ihi ilombolola o sambuadi dia jithembu. Dilondekesa kuila thembu jitatu ni kaxaxi, jilombolola 1.260 a izuua.d Kienhiki, o sambuadi dia jithembu—ji lombolola 2.520 a izuua. U xikina?

Matesu: Ngi xikina. Maji ki nga mu mona kiebhi kiki kilondekesa kuila o Utuminu ua Nzambi ua mateka ku muvu ua 1914.

Nzuá: Tu sange o dijimbuluilu diê. Sai ithangana, mu Bibidia o kizuua kimoxi, kilombolola muvu.e Se tu tanga kizuua kimoxi kála muvu umoxi, sambuadi dia jithembu dieji tu bhana 2.520 a mivu. Se tu mateka o ku tanga tundé ku muvu ua 607 A.K.K., o 2.520 a mivu i tuambata ku muvu ua 1914.f Kiene ki tuejiia kuila o 1914, o muvu kia bhu o sambuadi dia jithembu, ni kuila kiene kia mateka Jezú ku tumina kala Sobha ku Utuminu ua Nzambi. Tundé ku muvu ua 1914 o izulukutu ia makota iene mu bhita—izulukutu ia kanena o Bibidia kuila ieji di kumbidila mu izuua isukidila-ku.

Matesu: Izulukutu iebhi?

Nzuá: Xinganeka ia zuela Jezú mu divulu dia Matesu 24:7. Jezú uambe ihi ieji bhita kioso muéne kieji mateka ku tumina ku diulu: “Mbata akua’xi imoxi a kà di kuata ni akua’xi iamukuá; kilômbo kia kà balukila kilômbo kiamukuá; kua kà kala nzala, ni oxi kutunguta mu ididi iavulu.” Jezú uambe kuila kueji kala nzala ni oxi ku tunguta mu kithangana kieniókio. O izulukutu íii, ia dikumbidila mu hama ia bhiti, ki kiene?

Matesu: Kidi muene.

Nzuá: Mu velusu íii Jezú ua tumbula ué ita ieji bhita kioso muéne kieji mateka o ku tumina ku Utuminu ua Nzambi. O divulu dia Dijingunuinu ki di tanga kuila o ita ieji bhita ngó ku kididi kimoxi, maji o ita ieji bhita mu ngongo ioso mu izuua isukidila-ku.g Ua lembalala se muvu uebhi ua bhiti o ita ia dianga ku bhita ku Mundu?

Matesu: Ku muvu ua 1914, o muvu u ua mu zuela kuila Jezú ua mateka o ku tumina! Nuka nga banzele kiki.

Nzuá: Se tu tendela kiambote o ikanenu íii—o kikanenu kia sambuadi dia jithembu ni ikanenu ia mukua ia lungu ni izuua isukidila-ku—tua-nda mona kuila kidi muene. O Jimbangi ja Jihova a xikina muene kuila Jezú ua mateka ku tumina ku Utuminu ua Nzambi ku muvu ua 1914, ni kuila o izuua isukidila-ku ia mateka ué ku muvu uenhó.h

Matesu: Ki nga ki tendela luua kiambote.

Nzuá: Nga kijiia. Kala ki nga ku tangela kiá, kua bhiti ué kithangana phala eme kuijiia kiambote o maka enhá. Maji ngi dielela kuila nga ku kuatekesa kuijiia kuila sumbala o muvu ua 1914 ki u moneka mu Bibidia, o milongi ia Jimbangi ja Jihova ia lungu ni muvu iú ia tundu muene mu Bibidia.

Matesu: Ngi diuana kiavulu ni enu, mukonda milongi ioso i mu longa mu ilondekesa mu Bibidia. Ki mu longenu o ibanzelu ienu. Maji ngi dibhuidisa se mukonda diahi o maka enhá a bhonzo kiki. Mukonda diahi Nzambi ka tu tangela mu Bibidia kuila o muvu ua 1914, uene o muvu ueji mateka Jezú ku tumina ku diulu?

Nzuá: Kibhuidisu kiambote. Mu kidi, saí ima iavulu mu Mikanda Ikola ka i jimbulula kiambote. Mukonda diahi-phe Nzambi ua sonekesa o Bibidia mu ukexilu u bhonzesa o athu ku i tendela? Se ua mesena tu tena ku zuela o maka enhá mu kizuua kiéngi.

Matesu: Nga mesena muene.