O Kuila Uene mu Bhanga i ku Bhinga Nzambi?

“Kima kioso-kioso ki ua mesena, ngi tangele ngó nga-nda ku bha-kiu ni muxima uoso.” Eie nange kueji tanga o izuelu íii ku muthu ua kambe ku muijiia mba muthu ua muijiia ngó o pholo. Maji eie kueji kala ni hele ia kuzuela kiki se o muthu iú kamba diê dia kazola. O makamba a kidi, a di tuma kiambote.

O Bibidia i tu londekesa kuila, Jihova izuua ioso u bhanga ima iejiia kuila ia-nda sangulukisa o abhezi’ê. Mu kifika, o Sobha Davidi, ua kexile ni ukamba uambote ni Nzambi, uambe: ‘Jihova, Nzambi iami, madiuanu mê mavulu mu ua kalakala ni mabanzelu mê ma ku tu banza etu. Ki bhuala muthu u tena ku a kuata konda!’ (Jisálamu 40:5) Jihova u bhanga ué mbote katé muene kua ió ka muijiia hanji, u a bhana ‘kúdia, phala o mixima iâ izale ni kusanguluka.’—Ikalakalu 14:17.

Kuma Jihova ua uabhela ku bhanga ia uabhela o athu, kima kiambote ué se oso a mesena ku kala makamba a Nzambi, a bhanga ima i ‘sangulukisa o muxima uê.’ (Jisabhu 27:11) Maji ihi i u tena o ku bhanga phala ku sangulukisa o muxima ua Nzambi? O Bibidia i tu tambuijila: “O kubhanga o mbote ni ku di bhindumuna mudienu ki ku mi jimbe, mukonda ilumbu kala iii Nzambi ia mu uabhela kiavulu.” (Jihebeleu 13:16) O kuila kiki kilombolola kuma, o ku bhanga mbote ni ku di bhindumuna mudietu, iene ngó o ima i tua tokala o ku bhanga phala ku sangulukisa o muxima ua Jihova?

O Bibidia i zuela: “Muthu-phe ua kambe o kuxikana ka tena kuuabhela Nzambi.” (Jihebeleu 11:6) O Bibidia i zuela ué kuila “Mbalahamu ua xikana Nzambi” mu ku xikana kuê “Nzambi anga u mu ixana, uixi: Kamba diami Mbalahamu.” (Tiiaku 2:23) Jezú Kristu ua londekesa ué kuila tua tokala ku ‘kala ni kixikanu kua Nzambi’ se tua mesena ku tambula o mabesá mê. (Nzuá 14:1) Kienhiki, kiebhi ki u tena ku kala ni kixikanu kia mesena Nzambi kuila oso a-ndala ku kala makamba mê, a tokala ku kala na-kiu? U tena ku kala ni kixikanu kiki mu ku di longa izuua ioso o Mak’â Nzambi, o Bibidia. O ku bhanga kiki, kia-nda ku kuatekesa ku kala ni “kuijiia kua kutongolola o vondadi iê muene” ni kuijiia kiebhi ki u tena “kubhanga jinga ioso ia mu uabhela kiambote muène.” Kienhiki, kioso ki ua-ndaia ni ku bandekesa o kuijiia kuê kua lungu ni Jihova ni ku belesela o itumu iê, o kixikanu kiê kua muéne kia-nda di bandekesa dingi, muéne ua-nda ku zukama dingi.—Kolose 1:9, 10.