O Kuila Tua Tokala ku Samba Kua Jezú?

SAÍ MUKUA ku tokuesa ua zuela ni 800 a minzangala ia ji ngeleja javulu ua ebhuidisa se Jezú u tambuijila o misambu mba kana. 480 a minzangala a xikina kuila kidi. Maji munzangala umoxi ua ditunu mukonda, “Nzambi” ngó u tena ku tambuijila o misambu ietu.

Ihi i u Banza? O kuila o misambu ietu ia tokala kua Jezú mba kua Nzambi?a phala ku tambuijila, kia dianga tua-nda di longa kiebhi Jezú kia longo o maxibulu mê o ku samba.

JEZÚ UA TU LONGO KU SAMBA KUA NANHI?

Jezú ua tu longo ni kulondekesa kua nanhi tua tokala o ku samba.

ULONGELU UÊ: Saí dixibulu ua bhingi kua Jezú: “Ngana, tu longe o kusamba.” Jezú uambe: “Ki mu samba, muila kiki: Tata ietu.” (Luka 11:1, 2) Mu Diskursu dia bhange ku Mulundu, Jezú ua longo ué o athu o ku samba. Muéne uambe: ‘sambele-nu tat’enu.’ Muéne uambe uê: “Tat’enu uejiia kiá ima ioso i mua bhindamena, kioso enu kiluua ngó mu bhinga.” (Matesu 6:6, 8) Mu usuku ande dia kufua, Jezú uambe ku maxibulu mê: “Kioso ki mu bhinga Tata mu dijina diami, muène u mi bhana-kiu.” (Nzuá 16:23) Kienhiki, Jezú ua tu longo ku samba kua tat’etu Jihova Nzambi—Nzuá 20:17.

PHANGU IÊ: Mu ima ia kexile mu longa, Jezú ua sambe mudiê: “Nga ku ximana Tata, Ngana ia diulu ni ixi.” (Luka 10:21) Mu kithangana kiéngi, “Jezú anga u bhetula mesu bhulu, uixi: Tata, nga ku sakidila kuma eie ua ng’ivu.” (Nzuá 11:41) Mu disukilu dia muenhu ué, muéne ua sambe: “Tata nzumbi iami nga i bhana bhu maku mé.” (Luka 23:46) Mu ku samba kua Tat’ê ia diulu—o “Ngana ia diulu ni ixi”—Jezú ua tu xisa phangu iambote phala ku i kaiela. (Matesu 11:25; 26:41, 42; 1 Nzuá 2:6) O kuila o maxibulu a Jezú a tendela kiambote o milongi iê?

O JIKIDISTÁ JA DIANGA AKEXILE MU SAMBA KUA NANHI?

Kioso Jezú kia vutuka ku diulu, o maxibulu mê akexile mu a zukutisa kuala jinguma jê. (Ikalakalu 4:18) Kienhiki, ene a sambe, maji kua nanhi? “Iá, ki a zubha ku k’ívua, a zangula dízui mu kusamba kua Nzambi”, ene a bhingi phala Nzambi ku a kuatekesa “mu dijina dia Selevende ié Ukôla, Jezú.” (Ikalakalu 4:24, 30) O maxibulu a kaiela o milongi ia Jezú ia lungu ni ku samba. Ene a sambe kua Nzambi, kana kua Jezú.

Mu ku bhita mivu, o poxolo Paulu ua soneka kiebhi muéne ni akua exile mu samba. Mu ku soneka ku jiphange, muéne uambe: “Tua mu sakidila Nzambi, Tata ia Ngana ietu Jezú Kristu, kioso ki tu kala mu ku mi sambela jinga enu.” (Kolose 1:3) Phaulu ua sonekena o Jikidistá ni akuâ kuila a tokalele “kusakidila jinga ima ioso kua Nzambi, muène Tata, mu dijina dia Ngana ietu Jezú Kristu.” (Efezo 5:20) Ni izuelu ienií, tu mona kuila Phaulu ua suínisa akuâ kusamba mu “kusakidila jinga ima ioso kua Nzambi”—maji, muéne ua bhange kiki mu dijina dia Jezú.—Kolose 3:17.

Kala o Jikidistá ja dianga, tu tena kulondekesa o henda ietu kua Jezú, mu ku kaiela o milongi iê ia lungu ni ku samba. (Nzuá 14:15) Kioso ki tuia mu samba kua tat’etu ia diulu—o izuelu ia divulu dia Jisálamu 116:1, 2 ia-nda tu kuatekesa: ‘Nga zolo Jihova, mukonda u ngivua . . . ngi di kola jinga kua muéne, kioso ki ngi kala ku muenhu.’b