Ibhuidisu ia Bibidia io Tambuijile
Mukonda diahi tua tokala ku lembalala o kufua kua Jezú?
Ku hádia mbote iahi i tua-nda katula mu kufua kua Jezú?—Izaia 25:8; 33:24
O kufua kua Jezú, o kizulukutu kia beta-o-kota kia bhiti mu ixi—muéne uafu phala ku bhulula o muenhu ua athu. O athu ka a bhange ni ukexilu ua ku bhanga ima ia iibha, ku kata mba kufua, kana. (Dimatekenu 1:31) Maji o kituxi kia bokona mu ixi mukonda dia diiala dia dianga, Adá. Jezú ua bhana o muenhu uê phala ku tu bhulula ku ituxi ni kufua.—Tanga Matesu 20:28; Loma 6:23.
Nzambi ua londekesa o henda iê mu ku tumikisa mon’ê mu ixi phala ku tu kula. (1 Nzuá 4:9, 10) Jezú uambela o akaiedi’ê kuila a tokalele ku lembalala o kufua kuê, mu lembalasa íii, mua tokalele ku kala mbolo ni vinhu. O ku bhanga o lembalasa íii kueji londekesa kuila tua sakidila o henda ia tu londekesa Nzambi ni Jezú.—Tanga Luka 22:19, 20.
Nanhi ua tokala kudia o mbolo ni kunua o vinhu?
Kioso kia dianga ku zuela ni maxibulu mê phala ku lembalala o kufua kuê, Jezú ua tumbula kikutu. (Matesu 26:26-28) Kiki kia bhana kidielelu kua ene ni ku akuâ kia ku kala akunji ni jisobha, mu ku tumina nê ku diulu. Sumbala athu avulu aia mu fesa ia lembalasa, maji o a tokala kudia ku mbolo ni kúnua ku vinhu, ió ngó ala moxi ia kikutu kiki.—Tanga Dijingunuinu 5:10.
Mu 2.000 ja mivu, Jihova uene mu sola o athu a-nda kala jisobha. (Luka 12:32) O muxinda ua athu enhá uofele ki u sokela ni ua athu a-nda tambula o muenhu ua kalelaku mu ixi.—Tanga Dijingunuinu 7:4, 9, 17.