O Ungijiie ua Athu ki u Tena ku Bhanga Ioso

Mu izuua ietu, ene mu sumbisa madivulu avulu a mu lombolola o ibanzelu ia ió ka xikina Nzambi. Athu avulu ene mu tanga o madivulu enhá ni ku bhangesa o athu kuzuela kiavulu o maka enhá ni kua zokela. Ia lungu ni maka enhá, o ngijiie mukua ku di longa o uongo, ngana David Eagleman, ua soneka: “Saí atangi a banza kuila o jingijiie ejiia o ima ioso ia ngongo. Maji o jingijiie ja kidi a sota kuijiia dingi ima ia mukuá, mukonda kuala jinga ima ia ubhe phala ene kuijiia.”

Mu mivu iavulu, o jingijiie jene mu bhanga ima iavulu iambote mu kusota o itambuijilu ia ibhuidisu iâ ia lungu ni ngongo. Maji a mukuá, ene mu tondala kiavulu mu kusota o itambuijilu ia ibhuidisu iâ. O ngana Isaac Newton, katé lelu a muijiia kála ngijiie ia dikota. Muéne ua londekesa kiebhi o nguzu ia kambe kumoneka ku mesu i bhangesa o ixi, o jithéthembua ni ima ia mukuá ku diulu ku kala kumoxi mu ngongo. Muéne ua bhange ué ukexilu ua katunda ua kukondala, o jingijiie ene mu kaiela o ukexilu iú ua kukondala phala kubhanga o ji komputadolo, iphululu ienda bhulu, ni kuijiia kiambote o ima iala moxi ia atomo. Maji o ngana Newton ua di longo ué ku bhilula o xumbu ni ima ia mukuá mu ulu.

Midi ni hama jitanu ja mivu ande dia ngana Newton kumoneka, o ngijiie mukua Ngeléxia ngana Ptolemy ua soto kuijiia kiambote kiebhi kiala o maúlu. Muéne ua tonginina kiambote o ixi ni ima ia mukuá ku diulu m’usuku, iu ua soneka mu ifikula ioso ia mono muéne. Maji muéne ua xikinine kuila o ixi ia kexile mu kaxi ka ima ioso mu ngongo. O ngijiie ngana Carl Sagan ua soneka ia lungu ni ngana Ptolemy, muéne uambe: “Mu kuijiia kuila o ia longo Ptolemy ia lungu ni ixi, sumbala ki iexile kidi maji mu 1.500 ja mivu athu a i xikina kuila kidi, ilondekesa kuila katé muene o ngijiie ia katunda u tena ku lueza mu ima ia bhanga.”

Lelu ué o jingijiie ene mu dibhana ni ibhidi kala íii mu kusota kuijiia o ima. O kuila hádia ene a-nda tena kuijiia kiambote o ngongo ni ku ijimbulula? Sumbala kima kiambote kuxikina kuila o jingijiie ene mu bhanga ima iambote phala o athu, maji tua tokala kuijiia ué kuila ene ka tena kubhanga ioso. O ngijiie ngana Paul Davies uambe: “Kana-ku muthu u tena kujimbulula o ima ioso mu ngongo ni kuila o ijimbuluilu íii i kala ia kidi mu ithangana ioso.” O izuelu íii, kidi muene mukonda: O athu ka tena kutendela ioso ia lungu ni ngongo. Kienhiki, mu kuzuela ia lungu ni ima iene mu bhanga o jingijiie phala kujimbulula o ima iene mu ngongo, kima kiambote kuijiia kuila ene kejiia ioso.

O Bibidia i zuela ia lungu ni ima ia madiuanu iene mu ngongo: “Iii-phe ngoho, kífua o mizumbu ia jinjila jê [Nzambi] i tuene mu kuívua kua muene iòfelefele ngoho!” (Jobe 26:14) Mu ngongo muene hanji ima iavulu o athu ka tena ku i tendela. O izuelu ia poxolo Phaulu, ia soneka 2.000 ja mivu ku dima, katé lelu izuelu ia kidi: “O jimbongo ja Nzambi kuvula kuahi! Ku zonga kuahi o unjimu ua Nzambi, ni kuijiia kuê! Mu kuahi u tena ku lombolola o kaiula kê? Nanhi u tena kutongolola o ikutu iê?”—Loma 11:33.