Ibhuidisu ia Bibidia io Tambuijile
Ihi i bhanga o tata iambote?
O kuila ua mu longa an’ê kuzola Nzambi?
Se mu dibhata o jitata a zola ni kuxila oso ku muiji, o tuana tu kula kiambote. (Kolose 3:14, 19) O tata iambote u zola ni kuximana o tuana, kála kia ximana Jihova Nzambi Mon’ê.—Tanga Matesu 3:17.
O Tata ietu ia diulu uivua o jiselevende jê, muéne u suua o ibanzelu ietu. O jitata a tokala ku kaiela o phangu iê, mu kuívua o tuana kioso kia zuela. (Tiiaku 1:19) Ene a tokala kuijiia o ibanzelu ia tuana tuâ, né muene se ibanzelu ia iibha.—Tanga Dialuilu 11:11, 15.
Kiebhi ki u tena ku sasa an’ê n’a kule ni kilunji?
Mukonda u tata, eie ua tokala kulondekesa kiebhi kia tokala kuenda o ima kubhata. (Efezo 6:1) Katula phangu kua Nzambi. Muéne u londekesa henda ku an’ê, mu kua londekesa ihi ia tokala kubhanga, ni ibhidi ijila mu kukamba kubelesela. (Dimatekenu 3:3) Maji muéne ka jijidika o athu ku mu belesela, muéne u a longa o mbote ijila mu ku belesela.—Tanga Izaia 48:18, 19.
Suua mbambe ia ku kuatekesa o tuana tuê ku zola Nzambi. Ene a-nda bhanga ima iambote né muene kioso kia kala ubheka uâ. Nzambi u bhana phangu kioso kia longa, sota ué ku longa mon’ê ku zola Nzambi mu ku mu bhana phangu iambote.—Tanga Matendelelu 6:5-7; Efezo 4:32; 5:1.