O Kuila Kuene Muthu Uene mu Kuívua o Misambu?

Saí athu amba kuila o kusamba kuzanga ngó kithangana, mukonda se-ku muthu uivua o misambu. A mukuá a samba, maji a mona kuila ka mu a tambuijila. Saí diiala dia kambe kuxikina Nzambi, ua xinganeka kima, ua ki mono kuila Nzambi iu ua sambe, uixi: “Ngi fuetele ngó.” Maji muéne uambe kuila, Nzambi “ka mu vutuile kima.”

Maji o Bibidia i tu tangela ni kidi kioso kuila, kuene Nzambi uivua o misambu ietu. O Bibidia iala ni izuelu a i tangele ku mundu uavulu mu xahulu, ixi kiki: “Kidi kiene, muene ua kà ku kuatela henda, kabasa eie u dikola, o muéne [Nzambi] kia ku ivua dizui, uá kuitaia.” (Izaia 30:19) Velusu ia mukua ia Bibidia, iambe kiki: ‘Muéne u uabhela o kuivuidila o musambu ua athu a iuka.’—Jisabhu 15:8.

Mu Bibidia, muala ué misoso ia athu a sambele kua Nzambi ia a evu. Saí velusu mu Bibidia iamba kuila, Jezú u “dionda . . . kua Nzambi u tena ku mu kudila . . . anga a mu ivua.” (Jihebeleu 5:7) Misoso ia mukua ia lungu ni misambu, tu i sanga mu divulu dia Daniiele 9:21 ni 2 Malunda 7:1.

Mukonda diahi-phe saí athu a mona kuila, o misambu iâ ka mu i tambuijila? Phala ku tuivua, tua tokala kusambela ngó Nzambi ia kidi, Jihova,a kana kusambela jinzambi jengi mba jikuku jetu jafu kiá. Nzambi ué ua mesena kuila, kima “kioso ki tu mu bhinga, ki kala mu vondadi iê” mba ima i xikina muéne. Se tu bhinga o ima i xikina muéne, tu tena ku dielela kuila, “muène u tu ivua.” (1 Nzuá 5:14) Kienhiki, phala Nzambi kuivua o misambu ietu, tua tokala ku muijiia kiambote ni kudilonga o ima ia uabhela muéne.

Athu avulu a xikina kuila, ka samba ngó mukonda kiene kia a longo mu ngeleja iâ kana, maji a samba mukonda ejiia kuila Nzambi uivua o misambu iâ. Isaac, mukua Kenya, uambe: “Nga kexile mu samba phala kutendela kiambote o Bibidia. Mu kubhita ithangana, saí muthu ueza ko kuami iu ua ngi kuatekesa.” Mu ixi ia Philippinas, Hilda ua mesenene kiavulu kuxisa o makanha. Muéne ua bhange nguzu iavulu maji ka tenene, saí kizuua muadi uê ua muambela: “Mukonda diahi kusambe kua Nzambi phala ku ku kuatekesa?” Muéne uevu muadi uê, muéne uambe: “Nga diuanene kiavulu, Nzambi ua ngi kuatekesa. Ki ngi kexile dingi ni vondadi ia kubuakula. Kienhiki, nga xisa o makanha.”

O kuila Nzambi uivua o ima i u mu bhinga mu vondadi iê?