Sota Kikuatekesu Phala Kuijiia Kiambote o Bibidia

Xinganeka kuila uai ku ixi iéngi. O ki u bhixila, u mona kuila o ifua ni ijila ia athu, ni kudia kuâ ni kitadi kiâ ku kiijiia. Nange u thandanganha.

Kiene kimoxi ué kioso ki u mateka kutanga o Bibidia. Eie u kala kála uai ku ixi ki ua ijiia. Mu Bibidia ua-nda tanga-mu athu a exana akua Fidíxia, ua-nda tanga ué ijila ia ‘kutandujula o izuatu,’ mba kudia a kuixana maná, ni kitadi a k’ixana talendu. (Makatukilu 16:31; Josuué 13:2; 2 Samuuele 3:31) O ima ioso iii ieji ku thandanganhesa. Sé phata ueji sanguluka se kua monekene muthu u ku jimbulula o ima ioso íii.

O ATHU M’UKULU AKEXILE MU A KUATEKESA

Tundé kia soneka o Bibidia ku hama ia 16 A.K.K., kuene athu ene mu kuatekesa akuâ kuijiia o Bibidia. Mu kifika, Mozé uexile o mutuameni ua dianga ua akua Izalaiele, “uandeka kulombolola “ o mikanda ikola.— Matendelelu 1:5.

Né muene mu kubhita midi ia mivu, kuexile hanji jimesene ja kulonga o Mikanda Ikôla. Ku muvu ua 455 A.K.K, Jijudé javulu ni ana-ndenge, a diongekele mu Jeluzaleme. O jimesene ja kulonga o Bibidia bhene bhua kexile “anga a tanga mu divulu dia kitumu kia Nzambi.” Maji ene ka tange ngó. “A lombolola o njimbu iê, a ki bhangela kuila mbé ki a tanga, ki lomboloke.”—Nehemiia 8:1-8.

Mu kubhita hama jitanu ja mivu, Jezú Kristu ua kexile ué mu bhanga kikalakalu kia kujimbulula o Mikanda Ikola. Muéne a dianga ku muijiia kuala athu kuila mesene ia kulonga. (Nzuá 13:13) Muéne ua longo mundu uavulu mu kithangana kimoxi, maji ua longo ué muthu ni muthu. Saí kithangana muéne ua bhange Diskursu ku Mulundu, o ‘ifuxi ia diuanene ni ulongelu ué.’ (Matesu 5:1, 2; 7:28) Ku muvu ua 33 K.K, kioso o maxibulu mê aiadi kia kexile múia mu sanzala ia Emaú ia zukama ku Jeluzaleme, Jezú ua dikundu nâ “ni ku [a] jimbuila o maka mòsoneke” mu Mikanda ia Ngana!—Luka 24:13-15, 27, 32.

O maxibulu a Jezú, exile ué jimesene ja kulonga o Mak’â Nzambi. Saí kizuua diiala mukua ixi ia Etiiopia ua kexile mu tanga kibatulu mu Mikanda Ikola. O dixibulu Filipe ua mu zukama iu ua mu ibhuidisa: ‘Eie i ua mu tanga ia ku jimbulukila?’ O diiala ua mu tambuijila: ‘I nga mu tanga i ngi jimbulukila kiebhi, sé muthu ku ngi lomboluela-kiu?’ Filipe-phe ua mu jimbuluila kiambote.—Ikalakalu 8:27-35.

LELU UÉ SAÍ KIKUATEKESU

Kála o jimesene ja kulonga o kitumu m’ukulu, lelu o Jimbangi ja Jihova a mu longa o Bibidia mu 239 ja jixi. (Matesu 28:19, 20) Semana joso ene a kuatekesa divua dia mazunda a athu ndenge kuijiia o Bibidia. ku athu enhá, avulu a tundu mu jingeleja jengi. O athu a longa o Bibidia kene mu bhinga kitadi, se muthu ua mesena kudilonga u tena kudilonga kubhata diê, mba bhu kididi kiéngi. Athu avulu a uabhela kudilonga bhu kaxi ka mutelembe ua kafuetele, bhu kaxi ka jividiu mba bhu kaxi ka komputadolo.

Tua ku dióndo bhinga Mbangi ia Jihova n’a ku jimbuluile kiambote kiebhi ki u tena kutambula o kikuatekesu kiki. Ua-nda mona kuila o Bibidia ki divulu dia bhonzo, ni kuila “mikanda ia kubhandulula, ni kulonga o kidi, ni kubazela itondalu, ni kuiukisa iabhengalala,” phala “[u] tenene . . . mu kubhanga madimu moso mambote.”​—2 Timote 3:16, 17.