Kiebhi ki u Divua mu Kutanga ia Lungu ni Kiuana Kia Mala a Mondala ku Jikabalu?

Jene ja moneka ni kukaba-kaba! O jikabalu jiuana ja mazônda ni mala a mondala-ku jedi kala jikabalu ja kidi muene ja-nda tuka mu Bibidia, phala kuiza bhu uala! O kabalu kadianga kazele, o ua mondala-ku uala ni fuma, a zubha ku mu bhana o kitundu kia sobha. Ku dima diê kua mu kuiza kabalu ka kusuka o ua mondala-ku u katula o kutululuka mu ngongo ioso. Anga ku kaiela o kabalu ka xiketela, o ua mondala-ku ua kuata pezu bhu lukua-ku, ni kutula o njimbu iaiibha ia lungu ni nzala mu ngongo ioso. O kabalu ka kauana ka kolo ia mukéte mba uthôkua, ka lombolola uhaxi ni malebhu a mukuá a bhekela o Kalunga. O Mbila, o mbila muia o mundu uoso, i kaiela mu kutambula o mienhu ia athu afu!​—Dijingunuinu 6:1-8.

“Kioso ki nga tange mu veji ia dianga o musoso ua kiuana kia maiala a mondala ku jikabalu nga ngaxile ni uôma. Nga divu kuila o Kizuua kia Kufundisa kia zukama, kuma ki nga kexile polondo, nga mono kuila ki ngeji bhuluka.”​—Crystal.

“Nga diuanene kiavulu, mu kutanga o musoso ua kiuana kia maiala a mondala ku jikabalu jala ni jikolo javulu.”​—Ed.

O kuila u divua kala kia divu Crystal kioso ki u tanga o musoso ua kiuana kia maiala mu divulu dia Dijingunuinu? Mba u divua kala kia divu Ed? O musoso ua lungu ni maiala enhá a mondala ku jikabalu u tu sanga mu divulu dia Dijingunuinu, o divulu dia sukina mu Bibidia, a uijiia kiambote kuala o athu. Ua kijidile kiá kuila eie u tena kukatula mbote mu kuijiia kiambote o kisuma kiki? Kiebhi? Nzambi u kanena kuila eie ua-nda sanga o kusanguluka kua kidi se u tanga, ni kuijiia o maka enhá ni kubelesela o ima io soneke mu divulu dia Dijingunuinu.​—Dijingunuinu 1:1-3.

Sumbala amoxi a teketa ni uôma mu kutanga o kisuma kia kiuana kia mala a mondala ku jikabalu, maji o kisuma kienhókio ka ki bhana phala ku ku kuatesa uôma, kana. Mu kidi, o kisuma kiki kiene mu suínisa kiavulu o kixikanu kia jimidi ni jimidi ja athu ni ku a bhana kidielelu kia dikota. Kiki ki tena ue kubhita n’eie! Tua ku dióndo suluka mu kutanga o kadivulu kaka.