Se Kaza Dyé u ta Phanda

“Nga mesenene kufwa kyoso mwadi wami kya ngi tangela kwila wa mu ngi xisa mukonda wa mu zola muhatu wengi, wexile munzangala. Kiki kya ngi xixima ku muxima benge-benge dingi kyoso ngexile mu lembalala o mbote yoso i nga mu bhangele.”—Madiya, mukwa Espanha.

“Kyoso muhatu wami kya ngi xi, kyedile kala kwa tundu kima moxi dyami. O ima yoso i twa bakanene, o kidelelu kyetu, ni ima yenge nga mono kwila ya dibotele. Sayi izuwa, nga fikile kwila, ki ngeji kala dingi ni hele, maji makutu, mu kidi nga kexile dingi ni kikote ku muxima.”—Bill, mukwa Espanha.

O PHANDA mu ukaza kima ki bhekela ndolo yavulu. Kidi, sayi makaza a mono kwila a tena kuloloka kaza dyâ wa te phanda maji wa dyela, ya a bhange yoso phala kukala dingi ni ukamba wambote mu ukaza.a Maji ki kale se o makaza a dibhana dingi kyambote mba kana, o yô ejiya kwila kaza dyê wa te phanda, a tala hadi yavulu. Kyebhi o athu yá kya tena ku di bhana ni ndolo?

O BIBIDYA I TENA KU KWATEKESA

Sumbala ni ndolo ku muxima, athu avulu ala ni makaza a tele phanda— a lengela mu Mikanda Ikôla. Ene a di longo kwila Nzambi u mona o masoxi mâ, ni kwa kwatela henda.—Malakiya 2:13-16.

“Hele jivula jandekele ku ngi kwata ku muxima, maji mu ukamba wé, muxima wami wa batama dingi.”—Jisálamu 94:19.

Bill wambe: “Kyoso ki nga tange o velesu yiyi, nga xinganeka Jihova kusosolola o ndolo yami, kala ki bhanga o tata ya henda.”

‘Mukwa henda, eye we u mu idikisa henda.’—Jisálamu 18:25.

Carmen wavu o dyala dya tele jiphanda mu mbeji javulu wambe: “Mwadi wami kexile fiyele. Maji nga dyelele mu ufiyele wa Jihova. Mwene nuka weji ngi bhana dikunda.”

“Ki mu kale ni hele ya kima, ki mu ile bhidibhidi, maji ima yoso-phe iyiza-ku, mu ila ni kusamba ni kudyonda . . . mu ende ni kubhinga kwa Nzambi yoso i mwa mesena. Bhenyobho o kutululuka kwa Nzambi kwa somboka o kitongolwelu kyoso kya muthu, kwanda ku mi bateka mixima.”—Filipe 4:6, 7.

Sasha wambe: “Eme nga tange o velesu yiyi mu ithangana yavulu. Mukonda dya kusamba lwavulu, Nzambi wa ngi bhana o kutululuka ku mwenyu.”

Sayi ithangana o athu a a tumbula kudima, ka mesenene dingi kukala ku mwenyu. Maji ene a dyelela kwa Jihova Nzambi, ya a sange nguzu mu ku tanga o Maka mê. Bill wambe kiki: “O kixikanu kyami kya bhangesa o mwenyu wami kukala ni valolo mu kithangana, kyoso ima yoso yedile kála ya diboto. Sumbala sayi ithangana nga bhitile ‘mu dikôlo dya kithômbe kya kalunga,’ maji Nzambi wexile ku mbandu yami.”—Jisálamu 23:4.

a Phala kwijiya dingi se u loloka mba kana, tala o milongi mu Despertai! dya 22 de Abril de 1999, ni dyambu “Quando o Cônjuge é Infiel.”

Ihi Ya-nda ku Kwatekesa Kukolokota?

Tanga u xinganeke mu jivelusu ja Mikanda Ikôla ji swinisa.

Bill u jimbulula: “Eme nga tange o divulu dya Jobe ni dya Jisálamu, nga xindi o jimbandu joso ji nga mono kwila ja ngi tokala. Nga mono kwila o asoneki yá a Bibidya evwile we o ndolo ni kikote ki ngexile mu kwivwa.”

Sanga kikwatekesu mu kwivwa o mimbu.

Carmen u dilembalala: “Kyoso ki nga kambele kilu mu usuku, ngexile mu kwivwa mwimbu wexile mu ngi kwatekesa kyavulu.” Danyele wambe: “Nga dilongo kuxika kambanza, o mimbu ya ngi kwatekesa kusanga o kutululuka ku muxima wami.”

Dikunde ni akwenu kyoso ki wa mu divwa.

Danyele wambe:“ Ki ngexile ni kifwa kya kuzwela ya lungu ni ixinganeku yami, maji ngexile ni makamba ambote, ngexile mu zwela na-u izuwa yoso. Nga a tangela yoso i nga kexile mu divwa, mu kwa sonekena mikanda ni kuzwela na-u. Kubhanga kiki kwa ngi kwatekesa.” Sasha wambe: “O jindandu jami ja ngi kwatekesa kyavulu. Mam’etu wexile jinga ku mbandu yami ithangana yoso. Se nga mesenene kuzwela, mwene wexile polondo phala ku ngivwa. Tat’etu wa ngi bhangesa we kudivwa kyambote, yu wa ngi kwatekesa kukolokota.”

Kolokota mu kusamba.

Carmen wambe “Ngexile mu samba ithangana yoso, nga divu kwila Nzambi wa ngi zukama dingi, mu ku ngivwa ni ku ngi kwatekesa. Mu ithangana yiyi ya bhonzo, nga zukama dingi kwa Nzambi.”