O Kwila wa mu Langa Kyambote o “Ngubu [yé] ya Kuxikana”?

1-2. (a) Kala kilondekesa Efezu 6:16, mukonda dyahi twa bhindamena o “ngubu ya kuxikana”? (b) Ibhwidisu yebhi i twanda dilonga?

O KWILA eye wala ni “ngubu ya kuxikana”? (Tanga Efezu 6:16.) Twejiya kwila eye wala. O ngubu i langa o mukutu. O kixikanu kyé kyanda kulanga we mu ima yayibha ya mundu yú, kala o ufusa, usweya ni ifunyisu yengi ya bolo.

² Maji, etu twala “mu izuwa isukidila-ku,” o kixikanu kyetu anda kilola. (2 Tim. 3:1) Kyebhi ki u tena kutongina o kixikanu kyé, phala kwijiya se kya kolo mwene? Ihi i u tena kubhanga phala kukolesa o kixikanu kyé? Twanda dilonga o itambwijilu ya ibhwidisu yiyi.

TONGININA KYAMBOTE O NGUBU YÉ

3. Ihi yexile mu bhanga o masoladi ku ngubu, ni mukonda dyahi?

³ M’ukulu, o masoladi exile mu kala ni ngubu yo vungine ni kiba kya yama. O masoladi exile mu ta maji ku ngubu, phala o kiba ki ki bole, o ji mbandu ja fwelu ki ji kwate feluju. Se disoladi di mona kwila, o ngubu yê ya zanganya, mwene wexile mu i yudika ni lusolo lwoso. Kyenyiki, mwene weji kala polondo, se kumoneka jinguma. O kifika kiki, kya lungu kyebhi ni kixikanu kyé?

4. Mukonda dyahi wa tokala kutonginina o ngubu yé ya kixikanu ni kyebhi ki u tena kubhanga kiki?

⁴ Kala o disoladi m’ukulu, eye wa tokala kutonginina ni kulanga o ngubu yé ya kuxikana. Se kyene ki ubhanga, wanda kala polondo phala o ita. Kuma tu Jikidistá, twene mu bhânga ita mu nzumbi, ni jinguma kala o jinzumbi ja phulu. (Efe. 6:10-12) Eye ngó wa tokala kwambata o ngubu yé ya kuxikana, muthu wengi, kana. Kyebhi ki u tena kukolesa o kixikanu kyé phala kukolokota mu jipolova? Kya dyanga, wa tokala kubhinga o kikwatekesu kya Nzambi mu musambu. Mu kusuluka, tanga o Mak’â Nzambi, phala u dimone kala ki ku mona Nzambi. (Jihe. 4:12) O Bibidya yamba: “Dyelela kwa Jihova ni muxima wé woso; kana kudyelela o kilunji kyé.” (Jisa. 3:5, 6) Mu kifika, xinganeka kyebhi ki wa batula o maka a sukina u wa dimana na-wu? O kwila wa dibhana ni maka a lungu ni kitadi? O kwila wa lembalala o kikanenu kya Jihova mu Jihebelewu 13:5: “Eme nuka nga kà mi xisa, ki nga kà mi ehelela we, kana”? O kwila o kikanenu kiki, kya ku dyelelesa kwila, Jihova wanda kukwatekesa jinga? Se wa tambwijila kyene, kilondekesa kwila, o ngubu yé ya kixikanu yala kyambote.

5. Mu kutonginina o kixikanu kyé, ihi i u tena kusanga?

⁵ Mu kutonginina o kixikanu kyé, u tena kusanga kima ki ku bhangesa kudiwana. U tena kumona kilwezu ki wa kambele kumona m’ukulu. Mu kifika, u tena kutonginina kwila, o hele, o makutu ni kuluwala kwa zozesa o kixikanu kyé. Se kiki kya mu bhita n’eye, kyebhi ki wa tokala kulanga o ngubu yé, phala ku hádya o kixikanu kyé ki kizoze dingi?

DILANGE KU HELE, KU MAKUTU NI KULULWALA

6. Bhana phangu ya hele yambote i twene mu kala na-yu.

⁶ Sayi hele i twene mu kala na-yu, hele yambote. Mu kifika, twene mu kala ni hele yambote, ya kumesena kusangulukisa Jihova ni Jezú. (1 Kol. 7:32) Se tu ta kituxi kya dikota, tu kala ni hele yambote ya kubhanga yoso phala kubhulula o ukamba wetu ni Nzambi. (Jisá. 38:18) Twala we ni hele ya kuwabhesa o muxima wa kazola k’etu, kulanga o mwiji wetu ni abhezi ni akwetu.—1 Kol. 7:33; 2 Kol. 11:28.

7. Kala kilondekesa Jisabhu 29:25, mukonda dyahi ki twa bhingi kukala ni wôma wa athu?

⁷ Maji-phe se o hele yavulu, itena kuzanga o kixikanu kyetu. Mu kifika, nange ithangana yoso tu thandanganya kyavulu, mu kuxinganeka se twanda kala ni kudya kwa soko mba izuwatu. (Mat. 6:31, 32) Phala kusosolola o hele yiyi, tu tena kulunga o muxima wetu mu kukalakala phala kukala ni jimbote javulu. Katé tu tena mwene kuzola o kitadi. Se twehela kiki kubhita n’etu, o kixikanu kyetu kwa Jihova kyanda zoza, twanda zanga o ukamba wetu ni mwene. (Mál. 4:19; 1 Tim. 6:10) O kima kya mukwá ki tena kuzozesa o kixikanu kyetu, o kumesena kwila, akwetu a tu xikina. Tu tena ku mateka kukala dingi ni wôma wa ku tu sebhulula ni ku tu zukutisa, o wôma wa ku luwalesa Jihova ndenge. Phala kudilanga ku kilwezu kiki, twa tokala kubhinga kixikanu ni kuswina kwa Jihova. Se tu bhanga kiki, twanda tena kukolokota mu ibhidi.—Tanga Jisabhu 29:25; Luka 17:5.

8. Ihi i twa tokala kubhanga se twivwa makutu?

⁸ Satanaji “mwène tata o ya makutu.” Mwene wene mu tumina o jiselevende jê, phala kumwanga makutu a lungu ni Jihova ni jiphange jetu. (Nzwá 8:44) Mu kifika, akwa kulungulula o kidi, a soneka makutu a lungu ni kilunga kya Jihova, a bhilula o kidi, mu ji sayte jâ, mu televizá, ni minangu ya ka mukwá. O makutu yâ edi kala “mifula ya Dyabhu ya wama tubhya.” (Efe. 6:16) Ihi i wa tokala kubhanga se muthu u mesena kuzwela n’eye o makutu yâ? Kana kwívwa! Mukonda dyahi? Mukonda twa xikana kwa Jihova, twa dyelela o jiphange jetu. Mu kidi, etu ki tu zwela né ngó ka diba kamoxi ni akwa kulungulula o kidi. Etu ki twehela muthu mba o hanji ya kwijiya dingi, ku tu bhangesa kudikwata ni ene.

9. O kuluwala kutena ku tu bhekela ima yebhi yayibha?

⁹ O Kuluwala kwa muxima kutena kuzozesa o kixikanu kyetu. Mu kidi, kubhinga kubatula o maka a moneka ku mwenyu wetu. Ku xita o matwi ku ibhidi ya mwenyu wetu, ndenge. Maji, ki twa tokala kuxinganeka kya ngo ku ibhidi yetu mu ola joso. Se tu bhanga kiki, twanda jimba o ikanenu yoso yambote, yayuka ya tu bhana Jihova. (Dij. 21:3, 4) Kuluwala kyavulu, ku tena kuzubha o nguzu yetu ni ku tu bhangesa kuxisa o ubhezelu wetu kwa Jihova. (Jisa. 24:10) Maji kiki ki kyanda bhita n’etu.

10. Ihi i wa dilongo ku mukanda wa soneka phang’yetu ya muhatu?

¹⁰ Tala ya bhiti ni phange ya muhatu ku ixi ya Estados Unidos. Mwene wexile mu langa mwadi’wê wa katele kyavulu. Ihi ya kwatekesa phange yiyi ku kala ni kixikanu? Mu mukanda wa tumikisa ku Sede mundial, mwene wambe: “O kya mu bhita n’etu, kyene mu katula o kutululuka, kyene mu tu luwalesa kyavulu. Maji o kidyelelu kyetu kya kolo. Ngi sakidila o milongi yoso yene mu kolesa o kixikanu kyetu, i tu bhangesa kukolokota mu ukunji wetu. Twa bhindamena mwene o itendelesu ni iximbakatesu yiyi. Yene i tu bhangesa kusuluka ni kwenda kupholo, ni kukolokota mu jipolova ji tunda kwa Satanaji” O izwelu ya phang’yetu yú ilondekesa kwila, etwenyoso tu tena kutolola o kuluwala kwa muxima. Kyebhi? Tala o ibhidi yé kala jipolova ja mu tunda kwa Satanaji. Dyelela kwila, Jihova u tena ku kubhana o kiximbakatesu ki wa bhindamena. Bhana valolo ku kudya mu nzumbi kwene mu tu bhana Jihova.

11. Phala kwijiya se kixikanu kyetu kyala kyambote mba kana, ibhwidisu yebhi i twa tokala kudibhanga?

¹¹ O kwila wa mono kima kya bhingi kuyudika ku ngubu yé ya kuxikana? Mu tu mbeji kudima, o kwila wa tena kukatula o hele ku muxima? O kwila wa tena kudituna kuzwela ni akwa kulungulula o kidi ya lungu ni makutu ene mu mwanga ene? O kwila wa tena kutolola o kuluwala kwa muxima? Se wa tambwijila “kyene”, o kixikanu kyé kyala kyambote. Maji twa bhingi kujikula o mesu, mukonda Satanaji wala ni mawuta engi, phala kusota kuzozesa o kixikanu kyetu. Tu tale-bhu amoxi.

DILANGE PHALA KI U ZOLE O JIMBONGO

12. Ihi i tena kubhita se tu zola o jimbongo?

¹² Kuzola o jimbongo ku tena ku tu landukisa, ni ku tu bhangesa kukamba kulanga o ngubu yetu ya kixikanu. Poxolo Phawulu wambe: “Kana muthu wayi mu usoladi u landukila dingi mawenji a bhata, phala a tene kuwabhela kumandande yó woso wa mu sendalesa.” (2 Tim. 2:4) Mu kidi, o disoladi dya Loma kexile mu a ehela kudibhakula mu mawenji moso-moso. Ihi i tena kubhita ni disoladi di bhukumukina o kitendelesu kiki?

13. Mukonda dyahi o disoladi ka kexile mu dibhakula mu mawenji?

¹³ Xinganeka mu kifika kiki. Kibuka kya masoladi a disokeja ni xibhata yâ phala o ita mu kamene. Maji umoxi mudyâ wa tundu. wayi mu kitanda kusumbisa kudya. Mu suku o kibuka kya masoladi ki tonginina o jifalamenda ni kuzwika o ji xibhata jâ. Maji o disoladi dya ile mu sumbisa mu kitanda, dya mu lamba dingi kudya phala kusumbisa mu kizuwa kya mungu. Maji mu kamene, o jinguma ji bhixila phala ku luwa ita, ene ka kijidile. Mudyé disoladi dyebhi dyala polondo phala o ita? Mu ita wanda mesena kubhânga ku mbandu dya disoladi dyebhi? Dya yó wa dipelepalala kyambote inga dya yó wa landukile ni ima yengi?

14. Kuma tu masoladi a Kidistu, ku kima kyahi ki tu bhana Valolo?

¹⁴ Kala o disoladi dyambote, etu ki tu landuka o mbambe yetu ya beta-kota—o ku tu xikina kwala o ji Komandande jetu, Jihova ni Jezú Kidistu. Ku tu xikina kwala ene kya beta-kota, kima kyoso-kyoso kibhana o mundu wa Satanaji ndenge. Tu bhanga yoso phala kukala ni nguzu ni kithangana kya kusidivila Jihova, ni kulanga kyambote kikale o ngubu yetu ya kixikanu kikale o jimbandu joso ja kibhakatu kyetu mu nzumbi.

15. Kidimwinu kyahi kya tu bhana Phawulu ni mukonda dyahi?

¹⁵ Twa tokala ku di langidila ithangana yoso! Mukonda dyahi? O poxolo Phawulu wa tu dimuna, wixi: “Oso-phe a bhindamena kukala jimvwama” anda “jimbila o kuxikana.” (1 Tim. 6:9, 10) O izwelu ku “jimbila o kuxikana” kilondekesa kwila, etu tu tena kulanduka ni kusota jimbote ki twa ji bhindamena. Mu ku suluka, tu tena kwehela “jihânji javulu jayibha ji tobhesa,” kukula ku muxima wetu. Mu veji dya kwehela kukula ku muxima, wa tokala kulembala kwila, Satanaji u sota kuzozesa o kixikanu kyetu bhu kaxi ka jihânji jiji.

16. O musoso wosoneke mu divulu dya Máluku 10:17-22 wa tokala ku tu bhangesa kuxinganeka mu ibhwidisu yebhi?

¹⁶ Xinganeka kwila, wala ni kitadi kya soko phala kusumba ima yavulu. O kwila kima kyayibha kusumba kima ki wa mesena, maji mu kidi ki wa ki bhindamena? Nange kana. Maji xinganeka mu ibhwidisu yiyi: Né mwene wala ni kitadi phala kusumba kima, o kwila wanda kala ni kithangana ni nguzu phala ku kalakala nakyu ni ku ki langa? O kumbandu yengi, kwala o kilwezu kya kuzola o jimbote jetu? O kwila o kuzola o jimbote kutena ku tu bhangesa kukayela o phangu yayibha ya munzangala wa ditunu o kixanu kya Jezú, kya kusanzumuna dingi o sidivisu yê kwa Nzambi? (Tanga Máluku 10:17-22.) O kima ki twa tokala kubhanga, o kubhakula o kithangana ni nguzu yetu mu kubhanga o vondadi ya Nzambi!

KWATA NI MAKU AYADI O NGUBU YÉ YA KUXIKANA

17. Kima kyahi ki twa tokala ku ki jimba?

¹⁷ Ki twa tokala kujimba kwila twala mu ita. Izuwa yoso twa tokala kukala polondo phala kubhânga. (Dij. 12:17) O jiphange jetu, ka tena ku twambatela o kibhakatu kyetu. Twa tokala kukolesa o kixikanu kyetu ni ku ki kwata ni maku ayadi.

18. Mukonda dyahi o mosaladi m’ukulu exile mukwata kyambote o jingubu jâ?

¹⁸ M’ukulu, o disoladi dilondekesa o kuswina mu ita, dyexile mu tambula kijingu. Maji kuxisa o ngubu mu ita, kyexile jisonyi. Tasitu mukwa misoso ku ixi ya Loma wa soneka, wixi: “Kubwazeka o ngubu mu ita, kyexile kima kya jisonyi.” Kiki kyene kyexile mu bhangesa o masoladi kukwata kyambote o jingubu jâ.

19. Kyebhi ki tu tena kukwata ni maku ayadi o ngubu yetu ya kixikanu?

¹⁹ Tu kwata ni maku ayadi o ngubu yetu ya kuxikana, kyoso ki tuya jinga mu yônge, kubokela akwetu ya lungu ni dijina ni Utuminu wa Jihova. (Jihe. 10:23-25) Twa tokala we kutanga o Mak’â Nzambi, kusamba izuwa yoso, ni kutumaka o itendelesu ya Nzambi mu yoso i tu bhanga. (2 Tim. 3:16, 17) Se kyene ki tu bhanga, uta mba falamenda yoso-yoso yòbhange phala ku tu kwama, yanda lweza. (Iza. 54:17) O “ngubu yetu ya kixikanu” yanda tu langa. Twanda suluka ni kukalakala ni jiphange jetu mu kilunga. Ki twanda tolola ngó o ibhidi yetu ya kizuwa ni kizuwa, maji twanda kala ni ujitu wa kumona Jezú, kyoso kyanda tambula o kikowe mu ita yanda luwa ni Satanaji ni oso ala ku mbandu ya Satanaji.—Dij. 17:14; 20:10.