‘O Dijina Dia Nzambi a Dixile’
1. Diebhi o diambu phala o kiônge kia ilunga kia muvu ua sidivisu ua 2012, ni kuebhi kua i katula?
1 Tuala ni kijingu, kia kuambata o dijina dia Suke-ku ia Ngongo ioso, Jihova! Nzambi, muene ua tu bhana o dijina diê, bhenge-bhenge, tundé ku muvu ua 1931, a tu ijiia kuma tu Jimbangi ja Jihova, dijina ki dia difu. (Iz 43:10) O mona umoxi-élele ua Nzambi Jezú, ua bhana valolo ia dikota ku dijina dia Nzambi, mu ku ta ku pholo mu musambu uê, ua Tata ietu. (Mat 6:9) Ku izuelu ia Jezú, kuene kua tundu o diambu dia kiônge kietu kia ilunga phala o muvu ua sidivisu ua 2012. O diambu diene didi, ‘O Dijina Dia Nzambi a Dixile.’
2. Njimbu iebhi i tuala na-iu phala ku i kingila ni kisangusangu kioso?
2 Ihi i Tua-nda Kuívua: O diskursu dia Sábhalu, “Ejidise-nu o Dijina Dia Nzambi mu ku Kala Aboki a Thembu Ioso” dia-nda londekesa se, mukonda diahi o sidivisu ia thembu ioso ukexilu ua muenhu u bhekela mabesá. Tua-nda kuívua ué o diskursu dia jimbandu, “Dilange Phala ki u Xidise o Dijina Dia Jihova,” dia-nda tu kuatekesa phala ka tu kuate mu ibhetu iuana ia Satanaji. O ibhuidisu, ihi ia-nda tu kuatekesa ku boka ni ku suína kioso o athu alondekesa kuila ka mesena kuívua? Ni ihi ia-nda tu kuatekesa ku di tunda kiambote mu ukunji uetu? A-nda i tambuijila mu diskursu, “Mukonda Diahi o Dijina Dia Nzambi Dia Tokala ku Dixila.” Kia Lumingu, tua-nda kuívua o diskursu dia mbandu jiuana, ja lungu ni kiebhi ki tu tena ku xila o dijina dia Nzambi mu, ibanzelu ietu, uzuelelu uetu, ima i tu sola, ni ukexilu uetu. Bhenge-bhenge o athu u tua exana a-nda kuívua o diskursu, “Jihova Ua-nda Zelesa o Dijina Diê ku Alumajedone.”
3. Kijingu kiahi, ki tuala na-kiu, ni kiebhi o milongi ia-nda tu kuatekesa?
3 Kua kambe ngó, Jihova ua-nda bhanga kima phala ku zelesa o dijina diê. (Ize 36:23) Mu kithangana kiki kiofele, tuala ni kijingu kia ku kuatekesa ioso ilondekesa o dijina dikola dia Nzambi. Tuala ni kidielelu kuila, o milongi ia kiônge kiki kia ilunga, ia-nda kuatekesa kala muthu mudietu, ku kumbidila o kikalakalu kietu, kala tu azokeledi a dijina dia Nzambi.