Kana ku Kala ni Hele ia ku Boka
1. Ihi i bhinga o ku kolokota, ni mukonda diahi?
1 O kuila ua kexile kiá ni hele ia ku bhana umbangi mu xikola, mukonda dia ku ku sebhulula? Mu kidi, ku bhinga ku kolokota phala kuzuela, bhenge-bhenge se eie u mukua jisonhi (tímido). Ihi ia-nda ku kuatekesa?
2. Kioso o Mbangi ia Jihova kiaia bhu xikola, kiebhi kia londekesa unjimu uambote?
2 Londekesa Unjimu: Sumbala o xikola kididi kiambote phala ku bhana umbangi ku athu, lembalala kuma ku tokala kuzuela ni athu oso o maka a Nzambi, kála kioso ki u boka inzo, ni inzo. Londekesa unjimu phala kuijiia o kithangana kia kuzuela. (Ndo. 3:1, 7) O ku di pelepalala kumoxi mu ibuka ni ibuka bhu xikola, ku tena ku bhana kithangana kia kulondekesa o kixikanu kiê. Mba o koleka iê u tena ku ku ibhuidisa, mukonda diahi saí itonokenu ia xikola eie kuene mu bhanga mbandu. Saí Jikidistá, mu dimatekenu dia xikola, a bhana itendelesu ku alongexi iê, kuma ene Jimbangi ja Jihova, ni kuia ni ku bhana madivulu ku alongexi â, a jimbulula o kixikanu kiâ. A mukua ene mu xisa madivulu ku meza, a bhangesa o jikoleka jê ku bhanga ibhuidisu.
3. Kiebhi ki u tena ku di pelepalala phala ku bhana umbangi bhu xikola?
3 Kala Polondo: Se u di pelepalala, o kidielelu kiê kia-nda dimendala. (1 Phe. 3:15) Mu kiki, xinganeka mu ibhuidisu i tena ku ku bhanga, ni ku banza kiebhi ki ueji tambuijila. (Jisa. 15:28) Se bhu bhana, ambata o Bibidia iê ni madivulu a mukua, kála o divulu Raciocínios, Jovens Perguntam, ni madivulu a xikola a zuela ia lungu ni ibhangelu, phala ku kuatekesa kioso ki u mesena. Bhinga ku jitata jê, ku bhanga ifika mu kizuua kia ubhezelu uenu ku muiji.
4. Mukonda diahi ua tokala ku kolokota ku bhana umbangi bhu xikola?
4 Kala ni Kidielelu: Kana ku banza kuila o jikoleka jê izuua ioso a-nda ku sebhulula kioso ki ua-nda zuela ia lungu ni kidi. Nange saí athu a-nda diuana o ku kolokota kuê, katé muene a tena ku kuívua. Maji kana ku bhuila se a kamba ku xikina. Jihova ua-nda sanguluka mukonda dia eie ku fikisa. (Jihe. 13:15, 16) Kolokota ni ku bhinga kikuatekesu kua muéne, phala u ‘kolokota mu kuia ni ku boka o maka mê.’ (Ikalakalu 4:29; 2 Tim. 1:7, 8) Xinganeka kiebhi ki ua-nda divua, kioso o muthu u kuívua. O muthu ió ku hádia, u tena ku kituka mbangi ia Jihova!