O Kídifua Kia Beta Dingi Kota ku Mulongexi ua Uhete
1. Kiebhi o kídifua kia beta dingi kota ku mulongexi ua uhete?
1 Kídifua kiebhi kia beta dingi kota, ki bhangesa o muthu ku kala mulongexi ua uhete ua Bibidia? O kuila o ku di longa bhu xikola? Kuijiia? Uhete ua ku vualela na-u? Mu kidi, uene o kídifua kilondekesa o Kitumu kuila iâ maxibulu a Jezú, kiene ué o kídifua kia beta dingi kota ku ídifua ioso ia Jihova. (Nzuá 13:35; Nga. 5:14; 1 Nzuá 4:8) O kídifua kiki, o henda. O alongexi a uhete alondekesa o henda.
2. Mukonda diahi kima kiambote ku kala ni henda ia athu?
2 Zola o Athu: O Mulongexi ua Dikota Jezú, ua londekesa henda ku athu, kiki kia a bhangesa kuívua. (Luka 5:12, 13; Nzuá 13:1; 15:13) Se tu thandanganha ni athu, tua-nda bhana umbangi mu ithangana ioso. O ibhidi kála o kizukutisu, ni ku kamba ku tu ívua, ki kia-nda tu tesa uôma. Tua-nda londekesa ku thandanganha kua kidi ku athu u tu tula o njimbu, ni kua zukama dingi phala kuijiia ihi ia bhindamena. Tua-nda kala polondo mu ithangana ioso, ki kioso ngó ki tu kala ni dixibulu dia Bibidia, maji ué kioso ki tu di iudika phala ku longa kala dixibulu.
3. Kiebhi o henda ku kidi, i tu kuatekesa mu ukunji?
3 Zola o Kidi Kia Bibidia: Jezú ua zolele ué o kidi kia Bibidia, ni ku ki mona kala jimbongo. (Mat. 13:52) Se tu zola o kidi, tua-nda zuela ni kidi kioso, kiki ki tena ku suínisa o jingivuidi jetu. O henda íii, ia-nda tu kuatekesa ku mona kiambote o valolo ia njimbu i tua mu tula, sumbala ni ibhindamu, ni ku boka sé hele.
4. Kiebhi ki tu tena ku kala ni henda?
4 Kala ni Henda: Kiebhi ki tu tena kulondekesa o henda ku athu? Mu ku xinganeka mu henda ia Jihova ni ia Mon’ê ia londekesa, ni ku mona o athu mu mbambe ietu kuila a bhingi kikuatekesu mu nzumbi. (Marku 6:34; 1 Nzuá 4:10, 11) O henda ietu ku kidi kia Bibidia, ia-nda dibandekesa dingi, mu kaxi ka ku di longa o Bibidia, ni ku xinganeka. O henda, mbandu ia kibundu kia nzumbi. (Nga. 5:22) Mu kienhiki, tu tena ku bhinga kua Jihova o nzumbi iê ikola, ni ku mu bhinga o ku tu kuatekesa ku kula mu henda. (Luka 11:13; 1 Nzuá 5:14) Né muene tua di longo bhu xikola, ni ikalakalu mu kilunga ia iuka, uhete ua tu vuala nau, maji tu tena ku kala tu alongexi a uhete a Bibidia, mu kulondekesa o henda.