Langa o Kitongoluelu Kiê
1. Diebhi o diambu dia kiônge kionene phala o muvu ua sidivisu ua 2013 ni a ki pelepalala phala-hi?
1 Izuua ioso tuene mu di bhana ni ibhidi iavulu, i tena ku tu bhangesa ku kamba ku belesela o kitongoluelu kietu. Kienhiki-phe, o kiônge kietu kionene phala o muvu ua sidivisu ua 2013, kia-nda mateka mu kizuua kia 1 ia Kamusasadi ka 2012 uala ni diambu: “Langa o Kitongoluelu Kiê” (1 Tim. 1:19) O kiônge kiki, a ki pelepalala phala ku kuatekesa kala muthu mudietu ku xinganeka se kiebhi ki tua mu kalakala ni ujitu iú ua tu bhana o Mubhangi uetu.
2. Ibhuidisu iebhi a-nda itambuijila mu kiônge kionene?
2 Tala o ji pondo jiji: O Kiônge kia-nda tambuijila ibhuidisu ia lungu ni kitongoluelu:
• Ihi i tena ku ta mu iluezu o kitongoluelu kietu?
• Kiebhi ki tu tena ku longa o kitongoluelu kietu?
• Kiebhi kia tena ku kala sé kikuma kia manhinga a athu oso?
• O ku xinganeka kuetu ni ku belesela o itumu ia Bibidia kulondekesa ihi ia lungu n’etu?
• Ihi i tua tokala ku bhanga phala ki tu bhangese akuetu ku divua kia iibha mu ima ia lungu ni kitongoluelu?
• Minzangala, kiebhi ki mu tena ku kolokota kioso kia mi jijidika ku bhanga ima ia iibha?
• Mabesá ahi a tambula oso a kaiela o kitongoluelu kiâ kio longe bhu kaxi ka Bibidia?
3. Kiebhi o kiônge kiki ki tena ku tu kuatekesa?
3 Sé-ku phata kuila ni ki kuatekesu kia Jihova tua-nda kolokota ku nguzu i bhanga Satanaji phala ku zanga o kitongoluelu kietu. Bhu kaxi ka mak’â Nzambi ni kilunga kiê, o Tat’etu ia kazola uene mu tu ambela: “Íii iene o njila. Endelenu muenhumu” (Iza. 30:21) Jihova uene mu tu londekesa o njila bhu kaxi ka iônge kala íii. Mu kiki-phe, Bhanga ioso phala kuia mu kuívua o kiônge kioso. Ivua kiambote o milongi n’u i kumbidile ku muenhu uê. Bhitulula o kiônge mu ubhezelu uê ni muiji. Ku kaiela o milongi ioso i tua-nda tambula, kua-nda tu suínisa phala “ku langa kiambote o kitongoluelu”, kia-nda tu kuatekesa ué phala o jihanji ja ngongo íii ia Diabhu, ki ji tu funhise ku bhanga kima kieji zanga o ukamba uetu ni Jihova.— 1 Phe. 3: 16