Sanguluka ni Kikalakalu Kiê Kiambote
1. Ihi i tena ku tu katula o kisangusangu mu ukunji uetu?
1 O muthu a mu bhange phala ‘ku sanguluka ni kikalakalu kiê kiambote.’ (Ndo. 2:24) Sé ki tu sanguluka mu ukunji uetu, ki tua-nda kala ni kisangusangu ni muanhu. Ihi i tena ku tu kuatekesa ku kala ni ibanzelu iambote?
2. Mukonda diahi tua tokala ku kala ni ku kinga kua kidi mu ukunji uetu?
2 Kala ni ku Kinga Kua Kidi: Ejiia kuila, né muene athu ofele ngó a xikinine kuívua o njimbu ia Jezú, maji né kiki, Jezú ua di tundu kiambote mu ukunji uê. (Nzu. 17:4) Mu kifika kiê kia lungu ni mukuni, Jezú uambe kuila athu avulu eji dituna kuívua o njimbu ia Utuminu, o njimbu íii a i sokesa ni mbutu. (Mat. 13:3-8, 18-22) Mu kiki, o ngunzu i tu bhanga mu ukunji uetu iala ni valolo iavulu.
3. Kiebhi ki tu tena ku ‘bhana ibundu’ né muene sé athu ofele a xikina o njimbu i tu boka?
3 Kiebhi ki tu Bhana Ibundu Iavulu: Kala kiambe Jezú mu kifika kia mukuni, o athu eevua o njimbu a tokala a ‘bhana ibundu.’ (Mat. 13:23) Kioso ki sabhuka o mbutu ia tiliku ni i kulu, i bhana jimbundu javulu ja tiliku. O ibundu i bhana o Jikidistá, ki i bhingi ku kala maxibulu a ubhe, maji o ku kuna jimbutu javulu ja Utuminu—tu kuna jimbutu javulu mu ku tula o njimbu ia Utuminu. O ku tula o njimbu, ku tu bhangesa ku ‘sanguluka,’ né muene se saí athu ka mesena kuívua. Etu tuene mu kuatekesa mu ku bhana kijingu ku dijina dia Jihova. (Iza. 43:10-12; Mat. 6:9) Tuala ni ujitu ua ku kala tu akalakadi a Nzambi. (1 Kol. 3:9) O ‘izuelu mu ku boka’ i sangulukisa o muxima ua Jihova.— Jihe. 13:15, 16.
4. Ibundu iahi ki tu i mono mu ukunji uetu?
4 O kikalakalu kietu kia ku boka sumbala, ki bhana ibundu se etu ku i mona. Nange mu izuua ia Jezú, athu avulu evu o njimbu iê a kituka maxibulu kioso muéne kia tenesa o ukunji uê mu ixi iú ua habe ku diulu. Kiene kimoxi uê lelu, o njimbu ia Utuminu i tua mu tula nange ki i kuatekesa o muthu ku kula mu nzumbi mu kithangana kieniókio, maji mu ku bhita thembu, nange muéne u kituka mbangi ia Jihova sé etu ku k’ijiia. Mu kiki-phe, tu sanguluka ni kikalakalu kietu kia ku boka. Tu kolokotie-nu mu ku “bhana ibundu iavulu,” ni tu londekese kuila tu maxibulu a Jezú.—Nzu. 15:8.