Kaiela o Phangu ia Polofeta—Jona
1. Ídifua iahi ia kexile na-iu Jona?
1 Ihi i u banza kioso ki u xinganeka o polofeta Jona? Saí athu a banza kuila muéne ua tobhele, mba muthu ua iibha. Jona uexile muthu ua lenduka, ua suína mukua henda. Kiebhi ki tu tena ku ‘kaiela o’ ídifua ia Jona?—Tiia. 5:10.
2. Kiebhi ki tu tena ku kaiela o ku lenduka kua Jona?
2 Ku lenduka: Kioso kia mu tumikisa phala kuia mu boka, Jona ua lengele kaie mu mbanza mua tokalele o kuia. Muéne ua lengele mukonda, o akua Asídia exile ijibhangânga, o mbanza ia Ninive a ixanene “mbonge ia manhinga.” (Nah. 3:1-3) Jihova ua bazela Jona, maji mu ku bhita kithangana muéne ua londekesa ku lenduka mu ku xikina kuia mu boka kioso Jihova kia mu tumikisa dingi lua mukuá. (Jisa. 24:32; Jon. 3:1-3) Sumbala ku dimatekenu ua lengele, maji né kiki muéne ua bhangele o vondadi ia Jihova. (Mat. 21:28-31) O kuila tu athu a lenduka mu ku boka o njimbu iambote, né muene se a tu bazela mba o mbambe ietu ia ku boka i bhonza kiavulu?
3. Ihi i ku bhangesa kulondekesa o ku suína ni henda mu ukunji uê?
3 Ku Suína ni ku Kala Mukua Henda: Kioso Jona kia mono kuila, ua tele o mienhu ia athambi mu iluezu, ua bhange ioso phala ku bhulula o mienhu iâ. (Jon. 1:3, 4, 12) Mu ku suka-ku, ua kumbidila o kikalakalu kiê kia kuia mu mbanza ia Ninive, muéne uende kiavulu, mu ku sota kididi kia tokala phala ku boka o njimbu ia ku fundisa ia Jihova. O ku suína ki ku tobha kana, maji o ukexilu uambote ua londekesa o polofeta ia Nzambi! (Jon. 3:3, 4) Abha etu? Mu kithangana kia kizukutisu ku bhinga kuila, Nzambi u tu suínisa dingi phala ku boka o njimbu iambote. (Ika. 4:29, 31) Phala ku bhana o kithangana ni jimbongo mu ukunji ua Nzambi ku bhinga ku kala ni henda.—Ika. 20:24.
4. Mukonda diahi tua tokala ku di longa o phangu ia jipolofeta ja Jihova?
4 Izuua ioso kioso ki u tanga musoso ua jipolofeta ja Jihova, ua-nda katula mbote se u di xinganeka bhu kididi kia polofeta. Dibhudise: Se nga kexile bhu kididi kiê, kiebhi ki ngeji dibhana ni maka enhá? Kiebhi ki ngi tena ku kaiela o phangu iê ku muenhu uami? (Jihe. 6:11, 12) Ku pholo dia kuenda, tua-nda di longa dingi misoso ia jipolofeta ja mukuá ja Jihova mu Kikalakalu Kietu kia Utuminu.