Tua Tokala ku Bhana o Madivulu Kua Nanhi?
1. Kioso ki tu tanga o Mulangidi ni Despertai! ihi i tua tokala ku banza ni mukonda diahi?
1 O Mulangidi ni Despertai! a a bhange phala o kikalakalu kia ku boka ku mundu oso. Kienhiki, tu sanga milongi iavulu mu madivulu enhá. Kioso ki tu tanga milongi mu madivulu metu, tua tokala ku banza se nanhi ua-nda xikina o milongi, ni ku sola o jimbandu ji tua-nda londekesa ku muthu.
2. Milongi iebhi mu madivulu metu i kuatekesa o athu?
2 O kuila mu Mulangidi ua ubhe, muala milongi i ua zuelele kiá ni koleka iê ia salu? O kuila saí milongi i zuela ia lungu ni muiji i tena ku a kuatekesa? Uejiia muthu ua mesena kuenda njila, mu ixi ene mu i tumbula mu Despertai? O kuila o akua ku bhanga o uenji ni athu a kalakala mu ididi ia tokala ku ji nguvulu eji xikina o madivulu enhá ku mbambe iê? Mu kifika, se mu divulu muala milongi ia lungu ni ibhidi ijila mu ku kuka, a tena ku i xikina ku athu a kalakala mu ididi muene mu kuatekesa o athu a kuka. O ididi ia jinguvulu, a tena ku xikina dingi madivulu muala milongi ia lungu ni usuéia.
3. Tanga musoso u londekesa o valolo ia ku bhana o madivulu muala milongi ia tokala ku athu.
3 Mabesá: Kioso kia tambula o Despertai! dia Kamusasadi ka muvu ua 2011, i zuela “Criar filhos responsáveis”, saí dikaza a xindi ku 25 a ji xikola mu mbambe ia kilunga kiâ. Makuinhi a iiadi ni kiiadi kia athu, a tambula o madivulu ni ku xikina ku di longa o Bibidia. Dikaza dia mukuá mu ixi íii, a bhana o madivulu ku ji xikola ja mbambe iâ. O Alongexi a xikola a solo ku tanga o milongi ia madivulu metu semana joso. O dikaza a zuela ioso ia bhitile ku kafunga ka ilunga. Muéne ua suínisa o ilunga ia mukuá phala ku boka mu ji xikola. O athu a soneka ku filiiale phala ku bhinga dingi madivulu!
4. Mukonda diahi tua tokala ku bhana o madivulu metu ku athu oso?
4 O madivulu metu a lombolola o izulukutu ia mu bhita lelu, milongi ioso i tunda mu Bibidia, i longa ué ia lungu ni Utuminu ua Nzambi. Mu madivulu metu muala ‘njimbu ia ku bhuluka.’ (Iza. 52:7) Mu kiki, tua tokala ku bhana madivulu ku athu oso. Maji kima kiambote ku di ebhuidisa ‘Tua tokala ku bhana o madivulu kua nanhi!’