Minzangala, o Kuila Mua mu Suua Mbambe?
1. Mu kitala kiebhi o munzangala ua tokala ku kumbidila o milongi iala mu divulu dia 1 Timote 3:1?
1 ‘Se muthu uinda ku kala kafunga . . . uendi kikalakalu kiambote.’ (1 Tim. 3:1) O izuelu íii, i suínisa o jiphange ku bhanga ioso, phala ku suua mbambe mu kilunga. O kuila ua tokala ku kala muadiakimi phala ku suua mbambe? Kima kiambote ku suua mbambe, mu unzangala hanji. Se u di suínisa, a-nda ku bhana itendelesu, ia-nda ku kuatekesa kulondekesa o vondadi iê ia ku kalakala, ni u tambule o ujitu ua ku kala múkuatekexi ua tufunga kioso ki ua-nda kula. (1 Tim. 3:10) Se a ku batizala kiá, kiebhi ki u tena ku suua mbambe?
2. Kiebhi ki tu tena kulondekesa o ukexilu ua ku di bhakula?
2 Ku di Bhakula: Ejiia kuila, o mbambe i ua mesena o ku suua kikalakalu kiambote, ki ujitu ua fuma. Kala ni vondadi ia ku kuatekesa o jiphange jê joso. Kima kiambote ku kaiela o phangu ia Jezú. (Mat. 20:28; Nzu. 4:6, 7; 13:4, 5) Bhinga kua Jihova n’a ku kuatekese ku suua o athu oso mu kilunga. (1 Kol. 10:24) O kuila uala polondo phala ku kuatekesa o adiakimi a kuka kiá, mba o jihaxi mu kilunga? O kuila u kala polondo phala ku komba, ni ku bhanga ima ia mukuá dingi mu Kididi kia Ubhezelu? O kuila u tena ku kala polondo, phala ku bhanga mbandu mu Xikola ia Ukunji ua Nzambi, se o phange ueji ku i bhanga ka moneka? O ku bhanga ima i kuatekesa o jiphange, ia-nda ku sangulukisa kiavulu.—Ika. 20:35.
3. Mukonda diahi kima kiambote o ku kula mu nzumbi, ni kiebhi o muthu kia tena ku bhanga kiki?
3 Ku Kula mu Nzumbi: Phala ku tambula ujitu mu kilunga ki ku bhingi ngó ku kala ni uhete, o kima kia beta-kota o ku kula mu nzumbi. O muthu ua kulu mu nzumbi, u mona o ima kála kia mona Jihova ni Jezú. (1 Kol. 2:15, 16) Muéne ulondekesa ‘o ídifua ia nzumbi.’ (Nga. 5:22, 23) Muéne u boka ni ku suína kuoso, u ta o Utuminu ua Nzambi ku pholo. (Mat. 6:33) U tena ué ku kula mu nzumbi, se u di longa ubheka uê izuua ioso. Kála o ku tanga o Bibidia izuua ioso, o Mulangidi, ni Despertai!, ni ku pelepalala o milongi ia iônge. (Jisá. 1:1, 2; Jihe. 10:24, 25) Kioso Phaulu kia suínisa Timote ku kula mu nzumbi, muéne ua soneka: ‘Langa . . .o ulongelu ué.’ (1 Tim. 4:15, 16) Di pelepalale kiambote, phala ku bhanga o mbandu mu Xikola ia Ukunji ua Nzambi. Di pelepalale ué kioso ki uia mu boka, kana ku fula o ku boka. Suua mbambe ni ku bhanga ioso phala ku kala muboki ua thembu ioso, ku kalakala mu Betele, mba ku bhanga o Escola Biblica Para Irmãos Solteiros. O ku kula mu nzumbi, kua-nda ku kuatekesa ‘ku lenga o jihanji ja unzangala.’—2 Tim. 2:22.
4. Iebhi o valolo ia ku kala muthu ua fiiele?
4 Ku Kala Muthu ua Fiiele: Mu hama ia dianga o jiphange akexile mu uana o kudia ku Jikidistá a bhindamene, a tokalele ku kala maiala a ‘fiiele,’ o jipoxolo ka tokalele dingi ku thandanganha se kiebhi kieji bhanga o kikalakalu. Kiki, kia a kuatekesele ku bhanga o kikalakalu kiéngi. (Ika. 6:1-4) Se u tambula kikalakalu mu kilunga, bhanga ioso phala ku ki kumbidila kiambote. Kaiela o phangu ia Noué, ua kaiele o itendelesu phala ku bhanga o álaka. (Dim. 6:22) Jihova u bhana valolo ku athu a fiiele, o athu alondekesa o ukexilu iú a kulu mu nzumbi.—1 Kol. 4:2; tanga o kaxa iambe: “Mabesá a ku Tambula Milongi.”
5. Mukonda diahi o minzangala a tokala ku suua mbambe?
5 Kala kia ki kanena kiá, Jihova ua mu bhanga ioso phala kuongeka o mundu uê. (Iza. 60:22) Ku mivu joso, ene mu batizala mazunda ni mazunda a athu. Mukonda dia athu avulu a mu bokona mu kilunga, kua bhingi dingi maiala phala ku kala ku pholo mu kilunga. Kiki kiene o kithangana kia ku kalakala dingi mu sidivisu ia Jihova. (1 Kol. 15:58) Minzangala, o kuila mua mu suua mbambe? Se kiene, mua mu bhanga kiambote!
[O pondo ia tokala ku mbandu 2]
Mukonda dia athu avulu a mu bokona mu kilunga, kua bhingi dingi maiala phala ku kala ku pholo mu kilunga
[Kaxa ku mbandu 3]
Mabesá a ku Tambula Milongi
O minzangala ala ni uhete, a tambula mabesá kioso kia a bhana o ikalakalu mu kilunga ni ku a bhana milongi ku tufunga. Kioso kia bhu o kiônge, o kafunga ka ilunga ua kexile bhu pholo ia ditala mu bhana milongi ku muboki. O kafunga ka ilunga ua mono muzangala ua mu zukama, iú ua mu ibhuidisa se ua mesenene ku zuela ni muéne. O muzangala ua mu tambuijila kuila, a mu bhana o kikalakalu kia ku komba o ditala, izuua ioso mu disukilu dia kiônge. O jitata jê akexile ku mu kingila phala kuia kiá ku bhata, maji muéne ka-ndalele kuia se ku kumbidila o kikalakalu kiê. O kafunga ka ilunga ua sangulukile kiavulu. Muéne uambe: “O tufunga tua ilunga a a tendelesa ku bhana ikalakalu ku minzangala mu kilunga. Mu ku bhanga kiki, o tufunga a bhana o ujitu ku muzangala ua ku kala múkuatekexi ua tufunga kioso ki nga kexile hanji mu kunda o ilunga ia diembu didi.”