Kaiela o Phangu ia Jipolofeta—Mikeia
1. Kibhuidisu kiahi kia bhange Mikeia, ni mukonda diahi muéne ka boko mu ki ngó?
1 ‘O ukexilu ua iibha ua mundu iú, ua-nda bhua thembu kuxi?’ Nange o polofeta Mikeia, ua di bhangele ué o kibhuidisu kiki, kioso kia kexile mu tula o njimbu ia kufundisa ia Jihova, ku jisobha ja Izalaiele ni ja Judá. Mikeia ua dielele mu kikanenu kia Nzambi. Muéne ka boko mu ki ngó kana, mukonda ku muvu ua 740 A.K.K, kioso Mikeia kia kexile hanji ku muenhu, o izuelu ia Jihova ia lungu ni mbanza ia Samádia ia di kumbidila. (Mik. 1:6, 7) Mu ku bhita kithangana, Jeluzaleme a i buika ku muvu ua 607 A.K.K. (Mik. 3:12) Kiebhi ki tu tena ku kaiela o phangu ia Mikeia, mu ku kingila o kizuua kia Jihova?
2. Mu ku kingila o kizuua kia Jihova, kiebhi ki tu tena ku kala ni muanhu, ni mukonda diahi?
2 Kala ni Muanhu: Mikeia uambe: ‘Eme-phe Jihova muene ngó nga ka mu kinga, nga ka kinga kua Nzambi ia ubhulukilu uami.’ (Mik. 7:7) Mu kiki-phe, Mikeia ka kexile ngó mu kingila sé ku bhanga kima. Muéne ua kolokotele mu ku bhanga o kikalakalu kia Jihova. Lelu ué, mu ku kingila o kizuua kia Jihova, tua tokala ku di bhakula ‘mu ku bhanga o sidivisu ia Nzambi.’ (2 Phe. 3:11, 12) O muanhu ua Jihova, u bhangesa o athu ku diela o ituxi iâ. (2 Phe. 3:9) Kima kiambote ku kaiela o milongi ia Bibidia, ia lungu ni ku kaiela o ji polofeta alondekesa o muanhu.—Tiia. 5:10.
3. Mukonda diahi tua tokala ku bhinga o nzumbi ikôla ia Jihova?
3 Dielela mu Kutena Kua Jihova: Né muene Mikeia ua bhitile ni ibhidi mu kikalakalu kia kexile mu bhanga, né kiki, muéne ua dielela mu kutena kua Jihova phala ku kumbidila o kikalakalu. (Mik. 3:8) Mu kiki-phe, o Bibidia i tu tendelesa ku dielela mu kutena kua Jihova Nzambi. Mu henda iê, Nzambi u bhana o kutena kuê ku muthu ua bhuila, n’a tene ku kumbidila o kikalakalu kiê mu kilunga. (Jisá. 84:5, 7; Iza. 40:28-31) O kuila mu ku bhanga o kikalakalu kia Nzambi, ua mono kiá ku muenhu uê kuila, Nzambi ua ku bhana o kutena? O kuila uene mu samba izuua ioso, kua Jihova n’a ku bhane o nzumbi ikôla?—Luk. 11:13.
4. O phangu ia Mikeia i tu longa ihi?
4 Mikeia, ua di bhakule ngó mu ku bhanga o vondadi ia Nzambi ku muenhu uê. Muéne ua mesenene ku kala fiiele, né muene ua kexile mu mbanza iezalele ni usuéia uavulu. Lelu, o ufiiele uetu, a u tendala izuua ioso. Mu kiki, kima kiambote ku kaiela o phangu ia Mikeia ia ‘kuenda mu dijina dia Jihova Nzambi ietu, izuua ioso.’—Mik. 4:5.