Kaiela o Phangu ia Jipolofeta—Sofoniia
1. Mu ukexilu uebhi, Sofoniia ua sidivila kála polofeta ni phangu iebhi iambote ia tu xila?
1 Mu kaxi ka sambuadi dia hama A.K.K., o athu exile mu bheza Baale se uôma ua kima ku mbanza ia Judá. O Sobha ia iibha Amone ua jibhile muthu, o munzangala Joziia muene ua kexile mu Usobha. (2 Mal. 33:21–34:1) Mu kithangana kieniókio, Jihova ua tumikisa Sofoniia phala ku tula o njimbu Iê ia ku fundisa. Sumbala Sofoniia uexile muthu ua ujitu ua dibhata dia Judá, muéne ka kexile ni hele ia ku tula o njimbu ia Jihova ia ku fundisa ku jimesene ja Judá. (Sof. 1:1; 3:1-4) Etu ué, tu bhanga nguzu phala ku kaiela o ku suína kua Sofoniia, ki tu ehele o ukamba ni jindandu jetu ku tu fidisa ku bheza Jihova. (Mat. 10:34-37) Njimbu iebhi ia boko Sofoniia ni mabesá ahi a tambula?
2. Ihi i tua tokala o ku bhanga, phala ku bhuluka mu kizuua kia ku fundisa kia Jihova?
2 Sota Jihova: Jihova muéne ngó u tena ku bhulula o athu mu kizuua kiê kia ku fundisa. Kiki, kiene kia bhangesa Sofoniia ku suínisa akua Judá ku sota Jihova ni ku bhanga o mbote ni ku tululuka mu kithangana kia kexile nakiu. (Sof. 2:2, 3) Kiene ué ki tua tokala ku bhanga lelu. Kála kia bhangele Sofoniia, tu suínisa akuetu ku sota Jihova, maji etu tua tokala ué ku suína, ki tu tokala ku ‘xisa o njila ia Jihova.’ (Sof. 1:6) Tu tena ku sota Jihova, mu ku tanga o Maka mê ni ku bhinga o kikuatekesu kiê bhu kaxi ka musambu. Tu sota o ku bhanga o mbote, mu ku kala ni ukexilu ua zele. Tu sota o kutululuka, mu ku tumaka ni ku kala polondo phala ku belesela o milongi ia kilunga kia Jihova.
3. Mukonda diahi, tua tokala ku kala ni kidielelu mu ukunji?
3 Mabesá: O njimbu ia ku fundisa ia Sofoniia, ia suínisa athu avulu akua Judá, benge-benge o munzangala Joziia ua mateka ku sota Jihova, kioso kiexile hanji mona ndenge. Mu bhita thembu, Joziia ni ku suína kuoso ua zubha o ubhezelu ua iteka mu ixi ienióio. (2 Mal. 34:2-5) Lelu, saí njimbu ia Utuminu i lauka bhu mbandu a ikoka mba bhu ndanji ni mu minha, saí íii i lauka mu mavu ambote anga i sabhuka. (Mat. 13:18-23) Tua dielela kuila, Jihova ua-nda suluka ni ku besoala o nguzu i tu bhanga, kioso ki tu kuna jinga o jimbutu ja Utuminu.—Jisá. 126:6.
4. Mukonda diahi tua tokala ku kingila ni kidielelu ‘o kizuua kia Jihova’?
4 Saí akua Judá, a banzele kuila Jihova keji fundisa. Maji Jihova ua kanene ku athu oso kuila, o kizuua kiê kia zukamene. (Sof. 1:12, 14) Uoso ueji lengela kua muéne muene ngó ueji bhuluka. (Sof. 3:12, 17) Mu ku kingila ‘o kizuua kia Jihova’ tu suluke ni ku sidivila Nzambi ietu ionene kumoxi ni jiphange jetu!—Sof. 3:8, 9.