Hama ia Mivu mu ku Boka o Utuminu!
1. O mundu ua Jihova a a suínisa ku bhanga ihi, ku hama ia mivu ku dima?
1“Ijienu-kiu, o Sobha ua mu tumina! Enu mu akunj’iê, mu kiki bokenu, bokenu, bokenu, o Sobha ni utuminu uê.” Mu hama ia mivu ku dima, phang’ietu Rutherford ni ku sanguluka kuoso, ua suínisine o mundu ua Jihova, ku boka o njimbu ia Utuminu ku maxokololo a ixi. Kiene ki tuene mu bhanga! Kála o Jikidistá mu hama ia dianga, tuene mu boka o njimbu iambote ia Utuminu “mu ngongo ioso.” (Kol. 1:23) Tundé ukulu katé lelu, ihi i tuene mu bhanga phala ku boka o Utuminu ua Nzambi? Kiebhi ki tu tena ku suluka ni ku boka, mu kuijiia kuila o Utuminu ua-nda tenesa 100 ia mivu?
2. Kiebhi o madivulu metu, ene mu zangeleka o Utuminu ua Nzambi?
2 M’ukulu: Tundé ukulu, o madivulu metu ene mu zangeleka o Utuminu ua Nzambi. Tundé ku muvu ua 1939, o kadivulu k’etu ka beta kota: O Mulangidi u Bhana Ngolokela ia Utuminu ua Jihova. O kadivulu kaka, kene mu zuela dingi maka a lungu ni Utuminu ni ihi ia-nda bhanga. O Despertai! di longa kuila, o Utuminu ua Nzambi uene ngó ua-nda bhulula o mundu uoso mu ixi. O Mulangidi ni Despertai, ene mu a lungulula ni ku a bhana ku mundu uoso!—Dij. 14:6.
3. Ndunge jebhi ji tua bhange phala ku boka o njimbu ia Utuminu?
3 O mundu ua Jihova, uene mu sota jindunge phala ku boka o Utuminu. M’ukulu, tuexile mu boka ni makalu exile ni mazuí o ngalavale, ni mitelembe ia minangu. O kuboka mu maukexilu avulu, kua tu kuatekesa ku boka o njimbu ia utuminu ku athu avulu, sumbala o aboki a tolele. (Jisá. 19:4) Lelu, tuene mu boka o njimbu ia Utuminu ku mazunda a athu, bhu kaxi ka kijimbuete kietu kia jw.org, katé muene ku jixi muene mu tu fidisa.
4. Ndunge jebhi ja katunda ji tuene mu bhanga phala ku boka?
4 O mundu ua Jihova, uene mu bhanga ndunge jengi ja katunda phala ku boka o njimbu ia Utuminu. Mu kifika, tundé ku muvu ua 1990, tua bhange ioso phala ku sanzumuna o kikalakalu kietu kia ku boka nzo ni inzo, mu ku boka mu ididi ia itonokenu, mu ididi ia ku bhaka makalu, mu itanda ni mu maloja. Lelu, tuene mu boka o njimbu mu ididi mu bhita athu avulu mu ji mbanza ja makota ja jixi joso. Kienhiki, ilunga iavulu ia mu boka mu ididi mu bhita athu avulu mu ji mbambe jâ, bhu kaxi ka meza a madivulu ni ka dikalu ka madivulu. O ku boka nzo ni inzo uene hanji o ukexilu ua beta o kota ua ku boka o Utuminu.—Ika. 20:20.
5. Kithangana kiebhi ki tua-nda kala na-kiu ku muvu ua ubhe?
5 Ku Pholo: Mu dimatekenu dia muvu ua ubhe mu mbeji ia Katutu, avulu a-nda kála aboki a thembu ioso. O kuila kiene ué ki ua-nda bhanga? Sé ki ua-nda tena, o kuila u tena ku kala muboki ua ithangana ni ithangana? Né muene se u kala muboki ua thembu ioso mba kana, Jihova ua-nda besoala o nguzu ioso i ua-nda bhanga phala ku boka o njimbu ia Utuminu.—Mal. 3:10.
6. Mukonda diahi o mbeji ia Kamusasadi ua 2014, ia-nda kala ia katunda?
6 Mu mbeji ia Kamusasadi ua 2014, o Utuminu ua-nda tenesa 100 ia mivu. Mu mbeji íii, O Mulangidi ua ku bhana ku athu, ua-nda zuela ngó maka alungu ni Utuminu ua Nzambi. O kuila ua-nda bhanga ioso phala ku u tambula? Kioso ki tuia ni ku kingila o hádia, kala muthu mu dietu a suluke ni ‘ku boka o Njimbu Iambote ia Utuminu ua Nzambi’ ku athu oso a mesena kuívua.—Ika. 8:12.