O Xikola ia Ukunji ua Nzambi ua 2015, Ia-nda tu Kuatekesa ku Bandekesa o Uhete Uetu ua ku Longa
1 Davidi ua soneka: ‘O ku zuela kuami ni ku banza, ku kale kuoso kua ku uabhela eie u Jihova, u Nguzu iami, u Mubhuludi uami.’ (Jisá. 19:14) Tua mesena ué kuila o izuelu ietu, i sangulukisa Jihova mukonda tu bhana valolo ku ujitu uetu ua ku zuela o kidi mu kilunga ni mu ukunji uetu. Jihova u tu bhana uhete, bhu kaxi ka Xikola ia Ukunji ua Nzambi. O milongi íii, a i bhanga semana joso, mu 111.000 a ilunga ndenge, ku mundu uoso. O xikola íii, iene mu kuatekesa o jiphange, a ídifua ioso ku mundu, ku kala ni uhete ua ku boka o njimbu iambote ni ku tena ku longa ni kidi kioso, masunga ni ku suína kuoso.—Ika. 19:8; Kol. 4:6.
2 O milongi ia xikola ia muvu ua 2015, ia-nda tunda mu kadivulu Kilomboluelu kia Mak’a Nzambi ni Estudo Perspicaz das Escrituras Volume 1, 2. A lungulula o kithangana kia kitangelu kia Bibidia ni Diskursu dia 1. O ku lungulula o kithangana ni kiebhi kia tokala ku bhanga o jimbandu, a-nda i jimbulula mu makaxi a kaiela.
3 Kitangelu kia Bibidia: O jiphange a-nda bhanga o mbandu íii, mu ithangana iiadi, a tokala ku jimbulula pondo imoxi ia uabhela ia kitangelu kia Bibidia kia semana. O ku di sokejeka kiambote, kua-nda kuatekesa ku jimbulula o valolo ia jipondo, phala o kilunga mu kithangana kia tokala. O jiphange mu kilunga, a-nda bhana o itambuijilu iâ mu ithangana isamanu mu 30 a tu ithangana mba 25, ia lungu ni mbote ia katula mu kitangelu kia Bibidia kia semana. Ku bhinga ku di sokeka kiambote, phala ku tambuijila mu 30 a tu ithangana maji o ku bhanga kiki, ku tu bhana ué uhete. Ku kuatekesa ué phange javulu, ku bhana o itambuijilu iâ.
4 Diskursu dia 1: A-nda di bhanga mu ithangana itatu mba iiadi, o jivelusu ja-nda tanga mu mbandu íii, a ji sosola. O jiphange a-nda tanga, a tokala ku di sokejeka kiambote ni ku tanga ni dízui dia suína, sé ku babajala phala o izuelu i tunde kiambote. O mundu ua Jihova, ua tokala ku bhanga ioso phala ku tanga kiambote, mukonda o ku tanga ku bhanga mbandu, ku ubhezelu uetu. Tua sanguluka kiavulu, mu kuijiia kuila an’etu, ene mu tanga kiambote! Tua ximana o jitata, mu ku kuatekesa o tuana tuâ phala ku tanga kiambote.
5 Diskursu dia 2: A-nda di bhanga mu ithangana itanu, a tokala ku di bhanga ku phange ia muhatu. A tokala ku bhanga o diambu dia a bhana. Se o milongi i tunda mu kadivulu Kilomboluelu kia Mak’a Nzambi, a tokala ku di bhanga phala ku i kumbidila mu ukunji mu ukexilu u fuama mu mbambe ia kilunga. Se o milongi i tunda mu divulu Estudo Perspicaz das Escrituras Volume 1, 2, o phange ua tokala ku tokuesa mu mbandu muala o dijina dia muthu, ku sola o kibatulu kia Bibidia kia tokala phala ku ki tanga ni kulondekesa ihi i tu di longa, ku musoso ua muthu iú. A tena ué ku sola ku tanga ibatulu ia Bibidia, i fuama ni diambu. O muendexi ua xikola, ua-nda sola phange phala ku mu kuatekesa ku bhana itendelesu.
6 Diskursu dia 3: A-nda di bhanga mu ithangana itanu, a tokala ku di bhanga ku phange ia diiala mba ia muhatu. Se phange ia muhatu ua-nda di bhanga, a tokala ku di bhanga kála kia bhanga o Diskursu dia 2. Se phange ia diiala ua-nda di bhanga, a tokala ku di bhanga kala diskursu mu ni ku banza ku jingivuidi. O jiphange, a tokala ku tokuesa o diambu, ku sola o ibatulu ia Bibidia phala ku i tanga, ku jimbulula kiambote o phangu i tu katula mu musoso ua muthu iú.
7 Ndunge ia Ubhe Phala o Jiphange ja Mala a Bhanga o Diskursu dia 3: Se o milongi i tunda mu Kilomboluelu kia Mak’a Nzambi, a tokala ku di bhanga kala o ubhezelu ku muiji mba ku bhana umbangi mu ukunji. O muendexi ua xikola, ua-nda sola phange phala ku mu kuatekesa ku bhana itendelesu ni kifika. O múkuatekexi, u tokala ku muiji mba phange mu kilunga. A tena ku sola ku tanga ibatulu ia Bibidia, i fuama ni milongi phala ku bhanga o kifika. Saí ithangana, o tufunga a-nda bhanga ué o mbandu íii. O kafunga u tena ku sola o múkuatekexi uê ni kifika. Kioso o tufunga kia-nda bhanga o mbandu íii ni muiji uâ mba phange ia mukuá, kia-nda suínisa kiavulu o jiphange, mu ku mona o ukexilu uâ ua ku longa.
Kula mu nzumbi mu ku xikina ni ku kaiela o itendelesu
8 Itendelesu: O muendexi ua xikola, ua-nda ximana ni ku bhana itendelesu mu ithangana iiadi, ku xibulu ni divulu Beneficie-se da Escola do Ministério Teocrático. O muendexi ua xikola ka tokala luua ku zuela o ukexilu ua-nda suua o dixibulu, ande dia ku bhanga o mbandu. Kioso ki bhua o mbandu, o muendexi ua xikola ua tokala ku ximana o milongi, ku zuela o pondo ia kexile mu kumbidila o dixibulu ni kulombolola pondo ia tokala, ilondekesa mukonda diahi o mbandu a i bhange kiambote ni ku kaiela o milongi iexile mu kumbidila.
9 O itendelesu a tokala ku i katula mu mbandu 79 ni 81, mu Escola do Ministério ia dixibulu. Kioso o dixibulu kia-nda bhanga o mbandu iê, o muendexi ua xikola, ua-nda soneka mu divulu dia dixibulu, ua-nda mu ibhuidisa mu kasuekelu, se ua bhange o exame ia pondo ia kexile mu kalakala. O dixibulu a tena ku mu ximana mba ku mu bhana itendelesu, kioso ki zubha o kiônge mba mu kithangana kiéngi. O milongi ia tambula o maxibulu a xikola, a tokala ku i mona kala ukexilu ua-nda mu kuatekesa ku kula mu nzumbi.—1 Tim. 4:15.
10 Se o kithangana kia dixibulu kia bhu kiá, o muendexi ua xikola mba múkuatekexi uê, a tokala ku bhanga kima phala kulondekesa ku dixibulu kuila, o kithangana kia bhu kiá maji ni masunga. O dixibulu ua tokala kuijiia o kijimbuete ni ku bhanga ioso phala ku tunda ku ditala.—Tanga Escola do Ministério, mban. 282 kax. 4.
11 Athu oso a kumbidila o milongi ia Bibidia, a a tendelesa ku di soneka mu Xikola ia Ukunji ua Nzambi. (Tanga Escola do Ministério, mban. 282, kax. 6.) O milongi ia xikola, i kuatekesa o mundu ua Jihova ku boka ni ku longa o njimbu iambote ia Utuminu ni kidielelu kioso, uhete ni henda ioso. Jihova u sanguluka kiavulu ni athu oso a kumbidila o milongi iene mu tambula mu xikola!—Jisá. 148:12, 13; Iza. 50:4.