Kuatekesa o Ifofo Kuijiia Jihova
1. Kiebhi Jezú kia londekesa henda ku ifofo?
1 O kufua kua Jezú kua zukamene. Kioso kiexile múia mu mbanza ia Jedikó, ifofo iiadi a dikola ni dízui dia suína: “Tu Kuatele henda, Ngana!” Né muene o kizuua kia Jezú kia ku fuá kia zukamene, Jezú uemana, ua a exana iú ua a sake. (Mate. 20:29-34) Kiebhi ki tu tena ku kaiela o henda ia Jezú?
2. Kiebhi ki tu tena ku bhana umbangi ku ifofo, mu ku boka mu ikoka?
2 Kuatekesa: Se u sanga kifofo, nange mu ku boka mu ikoka, zuela o dijina diê, kala polondo phala ku mu kuatekesa. Nange muéne u kala ni hele mukonda dia athu kene mu a suua. Maji o henda iê ia kidi, i tena ku mu bhangesa ku divua kiambote. Ijiia ué kuila, kala kifofo kala ni ukexilu uê, kiki ki bhangesa kuijiia se kiebhi ki u tena ku kuatekesa. Kioso ki u kuatekesa, nange u tena ku zuela kuila, uene mu longa o Bibidia ku athu. Kala polondo, phala ku tanga o divulu dia Jisálamu 146:8 mba Izaia 35:5, 6. Se muéne u tena ku tanga o dimi dia Braile, mu ibhuidise se ua mesena ku tanga divulu mu dimi dia Braile, dia-nda mu kuatekesa kuijiia dingi ia lungu ni Bibidia. U tena ué ku mu kuatekesa ku sanga milongi mu jw.org, phala kuívua. Se mu komputadolo iê, muala mbandu ia ku tanga, tanga milongi, muéne ua-nda sakidila se u mu bhana madivulu ala mu jw.org ni ku katula milongi mu RTF (Baixar Texto).—Tanga o kaxa “Kioso ki u Kuatekesa Ifofo . . .”
3. Kiebhi ki tu tena ku sota o ifofo mu mbambe ietu?
3 Ku Sota o Ifofo: Kiene mu bhonza ku sanga o ifofo, kioso ki tu boka nzo ni inzo, mukonda ene ka divu kiambote, kioso kia zuela ni muthu ka muijiia. Mu kiki-phe, ku bhinga ku bhanga nguzu, phala ku “sota” o ifofo phala ku a bhana umbangi. (Mat. 10:11) O kuila o koleka iê ia salu mba ia xikola kifofo? Se kiene, sota kithangana phala ku zuela né. Se mu mbambe iê, muala xikola phala o ifofo, kala polondo phala ku bhana madivulu mu dimi dia Braile. O kuila uejiia muthu uala ni ndandu kifofo? O kuila mu mbambe iê, muene ibuka iene mu kuatekesa o ifofo mba a kuatekesa o inzo ia ifofo? Zuela ni ndandu ia kifofo, mukalakadi ua inzo muala ifofo mba ku mutuameni kuila, o Jimbangi ja Jihova, a mesena kiavulu ku kuatekesa o ifofo, ni kubhana madivulu mu dimi dia Braile mba milongi ió ngalavale. Londekesa kuila, o Bibidia i kanena kuma Nzambi, ua-nda saka o ifofo ioso. U tena ué ku mu londekesa o vidiu mu jw.org, iambe “Sem Ela, eu me Sentiria Perdido,” u tanga musoso ua kifofo ua katula mbote mu ku tanga o Bibidia mu dimi dia Braile. Jimbulula mukonda diahi uai mu a kunda, o ku bhanga kiki ku kuatekesa ku zuela dingi ni ifofo ia mukuá.
4. Ihi i tu longa o musoso ua Janete?
4 Saí phange ia muhatu kifofo, a mu ixana Janete, ua kundu inzo i kuatekesa o ifofo. Ua zuela ni muzangala uexile ué kifofo. Janete ua mu tangela kuila, “Jezú ua sakele ifofo phala kulondekesa kuila, muéne ua-nda saka ué o ifofo ioso.” Ua tange né o divulu dia Dijingunuinu 21:3, 4. Janete ua jimbulula kiebhi o kikanenu kiki, kia-nda di kumbidila mu Utuminu ua Nzambi. O muhatu ua tambuijila ni ngalasa ioso: “Nuka ngevuile o maka enhá ku kifofo ni mu kuetu. O athu ene mu mona, a banza kuila o muthu u kala kifofo, mukonda dia kima kia iibha kia bhangele mba o jikuku jê.” Janete ua mu tumikisa o divulu, Bibidia i Longa, bhu kaxi ka njimbu mu mutelembe, o muhatu uene mu di longa o Bibidia, luiadi mu semana.
5. Sumbala ki tu tena ku saka o ifofo kala kia bhangele Jezú, mabesá ahi u tua-nda tambula se tu a londekesa o henda?
5 Etu ki tu tena ku saka o ifofo kála kia bhangele Jezú, maji tu tena ku kuatekesa o athu ala kála ifofo, mukonda dia nzambi iaiibha ia mundu iú ni athu a a vuala kiá ni ufofo, ku tendela o kidi kia Mak’a Nzambi. (2 Kol. 4:4) Jezú ua sakele ifofo iiadi ku mbandu a Jedikó, “kuma henda ia mu kuata.” (Mat. 20:34) Se tu londekesa ué henda ku ifofo, tua-nda kala ni ujitu ua ku kuatekesa muthu kuijiia Jihova, o Nzambi ua-nda zubha o ufofo.