Kaiela o Phangu ia Jipolofeta—Habakuke
1. Mukonda diahi o mundu ua izuua ia Habakuke, ua sokela ni izuua ietu?
1 Mu kumona o kuiibha ku dimendala ku mundu, nange tu divua kála Habakuke, uebhuidisa kua Jihova: ‘Phala’hi u ngi bhangesa kumona o ufusa? Anga u ngi bhangesa kutala ungulungumba?’ (Haba. 1:3; 2 Tim. 3:1, 13) Kuxinganeka mu ibhuidisu ia Habakuke ni phangu iê, i tu kuatekesa kusuína mu kukingila o kizuua kia Jihova.—2 Phe. 3:7.
2. Kiebhi ki tu tena kulondekesa o ufiiele uetu lelu?
2 Kusidivila ni Ufiiele Uoso: Mu veji dia kukala ni uôma, mukonda dia ima iaiibha, Habakuke ua kolokotele. (Haba. 2:1) Jihova ua kanene kua polofeta kuila, o kizuelu Kiê kieji dikumbidila, mu kithangana kia tokala ni kuila ‘muthu ua iuka-phe ua-nda kolokota mu ufiiele uê.’ (Haba. 2:2-4) O izuelu íii, ilombolola ihi phala o Jikidistá ala mu izuua isukidila-ku? Ki tu tokala kuthandanganha, se o kibuikilu kia-nda kuíza kizuua kuxi maji tua tokala kudielela kuila kia-nda kuíza muene. O kixikanu ki tu kuatekesa kusuína ni ku dianga kusota o Utuminu.—Jihe. 10:38, 39.
3. Mukonda diahi tua tokala kusanguluka mu kusidivila Jihova?
3 Sanguluka mu Kusidivila Jihova: Kioso o Ngôngo dia Mangongo kia-nda zukutisa o mundu ua Jihova, o kixikanu kietu, kia-nda kala mu kiluezu. (Ize. 38:2, 10-12) O ibhidi i bhekela maka avulu, né muene phala o jimvuama. Nange o athu a kala sé kudia, o athu a kala sé mabhata, a bhukumukina o ijila. Ihi i tua-nda bhanga, se tu dibhana ni ibhidi? Habakuke uejidile kuila ueji dibhana ni ibhidi, né kiki ua solele kusidivila Jihova ni kusanguluka kuoso. (Haba. 3:16-19) ‘O kusanguluka kua Jihova,’ kua-nda tu kuatekesa kukolokota kudibhana ni ibhidi, ia-nda kuíza ku hádia.—Neh. 8:10; Jihe. 12:2.
4. Kisangusangu kiahi tuala na-kiu lelu ni ki tua-nda kala na-kiu ku hádia?
4 O athu a-nda ku a bhulula kua Jihova mu kizuua kia kufundisa, a-nda suluka ni kudilonga n’a kale mu njila ia Nzambi. (Haba. 2:14) O athu a-nda kua fukununa, a-nda kua longa ia lungu ni Jihova. Lelu saí maukexilu avulu a kulonga ia lungu ni Jihova ni ibhangelu iê!—Jisá. 34:1; 71:17.