UENDELU UA UKIDISTÁ
Zokela o Itumu ia Jihova
Jihova Nzambi ua bhange itumu phala o athu. Mu kifika, muéne ua dianga kuiudika o ukaza ua diiala ni muhatu. (Mat 19:4-6, 9) Muene ua zembe o maukexilu oso a undumbu. (1Ko 6:9, 10) Muene ua bhange ue itumu ia lungu ni izuatu, i bhangesa o mundu uê ku di tungula bhu kaxi ka athu a mukuá.—Mate 22:5; 1Ti 2:9, 10.
Lelu, athu avulu a dituna o itumu ia Jihova. (Lo 1:18-32) Ene a kaiela o ukexilu ua kuzuata, ni uendelu ua athu ku mundu iú. Sai iâ, a dizangeleka mu ima iaiibha ia bhanga, anga a tatela o athu a kaiela ukexilu uéngi ku muenhu.—1Ph 4:3, 4.
Kuma tu Jimbangi ja Jihova, tua tokala kuzokela o itumu ia Nzambi ni kusuina. (Lo 12:9) Kiebhi ki tu tena kubhanga kiki? Ni kuxila kuoso, tua tokala kuijidisa ku athu o ima ia zembe ni ia uabhela Nzambi. Maji etu ue tua tokala kukumbidila o itumu ia Nzambi ku muenhu uetu. Mu kifika, kioso ki tu sola izuatu, tua tokala ku di bhuidisa: ‘O kuila o ima i ngi sola ilondekesa kuila, nga mu kaiela o itumu ia Jihova, inga ia mundu? O kuila o izuatu iami ilondekesa kuila, ngi mubhezi ua Nzambi?’ Mba kioso ki tu sola minangu mu mutelembe ua izunzumbia mba filme, tua tokala ku dibhuidisa: ‘O kuila Jihova u xikina o filme íii? O filme íii i suinisa kubhanga ima iambote, inga iaiibha? O kuila o itonokenu i ngi sola, ia-nda ngi bhangesa kubhanga ima iaiibha? (Jis 101:3) O kuila i tena kukala kiluezu phala o muiji uami, ni athu amukuá?’—1Ko 10:31-33.
Mukonda diahi tua tokala kuzokela o itumu ia Jihova? Kua kambe ngó bhofele, Jezú Kristu ua-nda buika o athu aiibha, ni kuzubha o kuiibha kuoso mu ngongo. (Ize 9:4-7) O athu a bhanga o vondadi ia Nzambi, ene ngó a-nda nangenena. (1Nz 2:15-17) Mu kiki, tu zokele o itumu ia Jihova, phala o athu kubhana kijingu kua Nzambi, mukonda dia ima iambote i tu bhanga.—1Ph 2:11, 12.
O kuila o ukexilu uami ua kuzuata, ulondekesa kuila nga mu xila o itumu ia Nzambi?
TALA O VIDIU, KALA U KAMBA DIA JIHOVA—DIIALA DIMOXI, MUHATU UMOXI, MU KUSULUKA, TAMBHUIJILA O IBHUIDISU IA KAIELA:
Mukonda diahi kima kiambote kubelesela o itumu ia Jihova?
Mukonda diahi o jitata a tokala kulonga o itumu ia Jihova ku tuana tuâ, tundé mu undenge?
Kiebhi o minzangala ni adiakimi, kia tena kukuatekesa o athu kukatula mbote mu henda ia Nzambi?