O Henda ni Kisakidilu Kwa Jihova Yanda Kubhangesa Kudibatizala

1-2. Kala kilondekesa o divulu dya Ikalakalu 8:27-31, 35-38, ihi ya bhangesa o ngolambole ya Etiyopya kudibatizala?

EYE WA mesena kudibatizala kala dixibulu dya Kidistu? O henda ni kisakidilu kya bhangesa athu avulu kusola kudibatizala. Tala o phangu ya ngolambole ya Etiyopya.

² O mukwa Etiyopya wa solo kudibatizala ni lusolo kyoso kya dilongo o Bibidya. (Tanga Ikalakalu 8:27-31, 35-38) Ihi ya mu bhangesa kudibatizala? Se phata o valolo ya Mak’â Nzambi. Mwene wa tange o mbandu ya divulu dya Izaya mu dikalu dyê. Kyoso Filipe kya zwela né mwene wexile polondo phala kulondekesa o kisakidilu kyê mukonda dya ima ya bhange Jezú mukonda dyê. Maji mukonda dyahi o ngolambole wa ile mu Jeluzaleme? Mukonda mwene wa zolele kyá Jihova. Kyebhi ki twejiya o ima yiyi? Mukonda mwene wexile kyá mubheza Jihova mu Jeluzaleme. O diyala didi nange wa xisa o ubhezelu wê, yu wa dibundu ni mundu wa dibakwile kwa Nzambi ya kidi. O henda yê kwa Jihova yene ya mu bhangesa kusola kima kyengi kya beta-kota ku mwenyu wê. Mwene wa dibatizala yu wa kituka dixibulu dya Kidistu.—Mat. 28:19.

3. Ihi i tena kufidisa o muthu kudibatizala? (Tala o kaxa “Kyebhi Kyala o Muxima Wé?”)

³ O henda yê kwa Jihova i tena ku kubhangesa kudibatizala. Maji o henda i tena we ku kufidisa. Kyebhi? Xinganeka mu ifika yiyi. Nange eye wa zolo kyavulu o mwiji wê ni makamba mê, anga u tandanganya kwila se u dibatizala ene anda kuzemba. (Mat. 10:37) Mba nange eye wa zolo ifwa ya zembe Nzambi, anga ki kubhonza kuxisa o ima yiyi. (Jisá. 97:10) Mba nange eye wa kudila mu kubhanga o jifesa ja ijila ya ngeleja ya makutu. Nange eye wa zolo hanji o kulembalala o ima i wa kexile mu bhanga m’ukulu mu jifesa jojo. Mukonda dya kiki nange ki kubhonza hanji kuxisa o ijila yoso ya zembe Jihova. (1 Kol. 10:20, 21) Kyenyiki eye wa tokala kusola se “Ihi mba nanyi u nga zolo dingi?”

NANYI U TWA TOKALA KU MU ZOLA DINGI

4. Kyebhi o kima kya beta-kota kyanda kubhangesa kudibatizala?

⁴ Eye u tena kukala ni ima yavulu yambote phala kuzola ni kusakidila. Mu kifika, nange né mwene ande dya kudilonga ni Jimbangi ja Jihova, eye wexile kya mu bhana valolo ku Bibidya. Nange eye wa zolele kya Jezú. Kindala ki wejiya kyá o Jimbangi ja Jihova, eye utena kuwabhela kubhita nawu kithangana. Maji o kuzola o ima yiyi yambote ki kyanda kubhangesa kudibhakula kwa Jihova ni kudibatizala. O kima kya beta-kota kyanda kubhangesa kudibatizala o henda yé kwa Jihova Nzambi. Se o henda yê kwa Jihova i kala kuthandu dya ima yoso, eye nuka wanda kwehela kima mba muthu ku kufidisa kusidivila Jihova. O henda yê kwa Jihova yene yanda kubhangesa kudibatizala, yanda kukwatekesa we kukolokota ni ufiyele, kyoso ki wanda dibatizala.

5. Ibhwidisu yebhi i twanda dilonga?

⁵ Jezú wambe kwila twa tokala kuzola Jihova ni muxima wetu woso, ni mwenyu wetu woso, ni kilunji kyetu kyoso, ni nguzu yetu yoso. (Mál. 12:30) Kyebhi ki tu tena kudilonga kuzola Jihova ni ku mu xila? Se tu xinganeka kyebhi Jihova kya tu zolo kyavulu, kyanda ku tu kwatekesa ku mu zola we. (1 Nzwá 4:19) Idifwa yebhi i wanda kala nayu dingi kyoso ki wiza ku kala ni kifwa kya beta kota?b

6. Kala kilondesa Loma 1:20, ukexilu webhi u utena kudilonga dingi yalungu ni Jihova?

⁶ Dilonge yalungu ni ibhangelu ya Jihova. (Tanga Loma 1:20; Dij. 4:11) Xinganeka yalungu ni mixi ni yama ya bhange Jihova ni kyebhi o ibangelu yoso yiyi ilondekesa o unjimu wê wavulu. Dilonge bhofele yalungu ni ukexilu wa katunda wa yudika o mukutu wé. (Jisá. 139:14) Xinganeka o ukexilu wa bhange o mwanya? Xinganeka o kutena kwa tula Jihova ku lwanya? Kwala we mazunda ni mazunda a jithethembwa ja mukwá.c (Iza. 40:26) Kyoso ki uxinganeka mu ibhangelu ya Jihova eye wanda mu xila dingi kyavulu. Maji kwijiya kwila Jihova mukwa unjimu, mukwa kutena, kibhanga ngó mbandu ya kukolesa o ukamba wé ni mwene. Phala kukolesa o henda yé kwa Jihova eye wa bhingi kwijiya dingi ima yalungu ni mwene.

7. Phala kukolesa o henda yé kwa Jihova ihi i wa bhingi kuxikina?

⁷ Eye wa bhingi kwijiya ni kuxikina kwila Jihova u langa muthu ni muthu. O kwila kiki ki kubhonza kuxikina kwila o Mubhangi wa dyulu ni ixi u kulanga? Se kyene, lembalala kwila Jihova “kana muthu wa mu kala dikanga.” (Ika. 17:26-28) Mwene “mixima yoso wene ku i solokota,” mwene u kukanena, kala Davidi kya zwela kwa Soloma, kwila, “se u mu sota, wanda ku mu sanga.” (1 Mal. 28:9) Mu kiki, o kima ki kubhangesa kudilonga o Bibidya kindala kiki kyedi kala Jihova wa muzwela, “nga ku sungu we.” (Jel. 31:3) Ku ima yoso i wejiya yene mu bhanga Jihova kokwé, o kya beta kota, o kukolesa o ukamba wé ni mwene.

8. Kyebhi ki u tena kulondekesa o kisakidilu kyé ku henda ya Jihova?

⁸ O ukexilu u moxi wa kulondekesa o kisakidilu ku henda ya Jihova kokwetu o kuzwela nê bhu kaxi ka musambu. O henda yé kwa Jihova yanda kola dingi se wenda ni kuzwela nê yalungu ni ima i ku tandanganyesa ni ku mu sakidila mu yoso yene mu bhanga kokwé. O ukamba wé ni Jihova wanda kola dingi se u mona o itambwijilu ya misambu yé. (Jisá. 116:1) Eye wanda kwijiya kwila mwene u kutendela. Phala kuzukama kwa Jihova eye wabhingi kwijiya o ukexilu wê wa kuxinganeka. Eye wabhingi kwijiya ihi ya mesena kokwé. O ukexilu wa kubandekesa o kwijiya kwé o kudilonga o Maka mê, o Bibidya.

9. Kyebhi ki u tena kulondekesa kwila u bhana valolo mu Bibidya?

⁹ Bhana valolo ku Mak’â Nzambi, o Bibidya. Mu Bibidya mwene ngó mu tu sanga o kidi kyalungu ni Jihova, ni vondadi yê phalaeye. Eye u londekesa o kisakidilu kyé, kyoso ki u tanga o Bibidya izuwa yoso, ki u sokejeka o milongi yé ya Bibidya, ni kukumbidila o ima i u dilonga. (Jisá. 119:97, 99; Nzwá 17:17) O kwila eye wala ni pologama ya kutanga o Bibidya? Se eye wala ni pologama, o kwila eye wa mu tanga o Bibidya izuwa yoso?”

10. Kima kyahi ki bhangesa o Bibidya kukala divulu dya katunda?

¹⁰ O kwijiya kwila mu Bibidya tu sanga-mu misoso ya athu a mono Jezú, ki bhangesa o Bibidya kukala divulu dya katunda. O Bibidya yene ngó izwela ni kidi kyoso ya bhange Jezú kokwé. Kyoso ki u dilonga o ima ya zwela Jezú ni ya bhange, wanda mesena kubhanga o ukamba ni mwene.

11. Ihi ya kukwatekesa kuzola Jihova?

¹¹ Sota kuzola Jezú, o henda yé kwa Jihova yanda kola dingi. Mukonda dyahi? Mukonda Jezú wa kayela o idifwa ya Tat’ê ni kuyuka kwoso. (Nzwá 14:9) Kyenyiki o kwijiya kyambote Jezú, kyanda kukwatekesa kutendela dingi Jihova ni ku mu bhana valolo. Xinganeka ku henda ya londekesa Jezú ku athu kexile kwa xila ku athu engi, mukonda dya kukala jingadyama, jihaxi, ni yó akambe athu a zokela. Xinganeka we o itendelesu ya kubhana phala izuwa yoso ya mwenyu wé ni kyebhi ki wa ditundu kyambote mu kayela o itendelesu yiyi.—Mat. 5:1-11; 7:24-27.

12. Kyoso ki udilonga dingi yalungu ni zola Jezú, wanda tena kubhanga ihi?

¹² Kuxinganeka musata ya kukula ya Jezú phala kuloloka o ituxi yetu, kyanda kukwatekesa kubandekesa o henda yé kwa mwene. (Mat. 20:28) Kyoso ki u tendela kwila Jezú wa kexile polondo phala kufwa mukonda dyé, nange ki tena ku kubhangesa kudyela ni kusota o muloloki wa Jihova. (Ika. 3:19, 20; 1 Nzwá 1:9) Kyoso ki u zola Jezú ni Jihova, eye wanda mesena kudilunga ni athu yó a muzolo we.

13. Ihi ya kubhana Jihova?

¹³ Sota kuzola o mwiji wa Jihova. O mwiji ni makamba mê ka sidivila Jihova nange kanda tendela se mukonda dyahi eye wa mesena kudibhakula kwa Jihova. Ene nange atena mwene ku kufidisa. Jihova wanda kukwatekesa mu ku kubhana o jiphange mu kilunga kala mwiji wé. Se u zukama ku mwiji yu mu nzumbi wanda sanga henda ni kikwatekesu ki wa bhindamena. (Mál. 10:29, 30; Jihe. 10:24, 25) Nange sayi athu a tokala ku mwiji wé a tena kusidivila ni kubelesela o itumu ya Jihova.—1 Phe. 2:12.

14. Kala kilondekesa 1 Nzwá 5:3, ihi i wa mono yalungu ni itumu ya Jihova?

¹⁴ Sota kuxila ni kukumbidila o itumu ya Jihova. Ande dya kwijiya Jihova, eye wexile mu sola mudye o ima yawabha ni yayibha. Maji kindala eye umona kwila o itumu ya Jihova ya beta kota. (Jisá. 1:1-3; tanga 1 Nzwá 5:3.) Xinganeka mu itendelesu ya Bibidya yalungu ni munumi, ahatu, jitata, ni twana. (Efe. 5:22–6:4) Kyoso ki u kumbidila o itendelesu yiyi, wanda mona kwila o mwenyu wa mwiji wé wala kyambote. Kyoso ki u belesela o itendelesu ya Jihova yalungu ni kusola makamba a unjimu, wanda kala ni idifwa yambote. O kwila eye u muthu wa zediwa? (Jisa. 13:20; 1 Kol. 15:33) Nange wanda tambwijila kyene.

15. Se wa bhindamena kikwatekesu phala kukumbidila o itendelesu ya Bibidya ihi i wa tokala kubhanga?

¹⁵ Nange, kyanda kubhonza kwijiya kyebhi ki wanda kumbidila o itendelesu i wa mu dilonga mu Bibidya. Kiki kyene kya mu bhangesa Jihova ku tu bhana o madivulu a jimbulula o Bibidya ni ku tu kwatekesa o kwijiya o ima yawabha ni yayibha. (Jihe. 5:13, 14) Kyoso ki u tanga ni kudilonga, wanda tena kumona kyebhi ki u tena kukumbidila ni kutendela. Nange wanda mesena kubhanga mbandu ya kilunga kya Jihova.

16. Kyebhi Jihova kya sokejeka o mundu wê?

¹⁶ Dilonge kuzola ni kukwatekesa o kilunga kya Jihova. Jihova wala ni kilunga kyê. O Mon’ê Jezú, mwene o mutwameni wa kilunga kyê. (Efe. 1:22; 5:23) Jezú wa solo kibuka kyofele kya mayala a a undu ni nzumbi ikola phala kukula kupholo kya kikalakalu kya kilunga kya mesena Jezú kwila a kibhanga lelu. Jezú wa tumbula o kibuka kya mayala yâ kala ‘kimbadi kya fiyele kya dimuka,’ wa a bhana kikalakalu kya ku kukwatekesa kuzukama kwa Nzambi ni kulanga o ukamba wé ni mwene. (Mat. 24:45-47) O ukexilu umoxi wa kikalakalu kyawu, o kusola mayala a kulu mu nzumbi kala tufunga. Ene atena ku ku kwendesa ni ku kulanga. (Iza. 32:1, 2; Jihe. 13:17; 1 Phe. 5:2, 3) O tufunga ala polondo phala kubhanga yoso ya tena phala kukuximbakatesa, ku kukwatekesa kuzukama kwa Nzambi. O kima kya beta-kota ki tena kubhanga o tufunga phala eye, o ku kukwatekesa kulonga akwenu yalungu ni Jihova.—Efe. 4:11-13.

17. Kala kilondekesa Loma 10:10, 13, 14, mukonda dyahi tu zwela ni akwetu yalungu ni Jihova?

¹⁷ Kwatekesa akwenu kuzola Jihova. Jezú wa tangela ku akayedi’ê kwila ene atokala kulonga akwa yalungu ni Jihova. (Mat. 28:19, 20) Etu tu belesela o kitumu kiki, mukonda twejiya kwila tu tena ku ki belesela. Maji kyoso o henda yé kwa Jihova ki i kula dingi, eye wanda divwa kala kya divu poxolo Phetele ni Nzwá kyoso kyambe: “Etu ki tu tena kufula kutanga o ima yoso i twa mono, i tu evu.” (Ika. 4:20) Twanda sanguluka kyavulu se tu kwatekesa muthu kuzola Jihova. Xinganeka o kisangunsangu kya Filipe kyoso kya kwatekesa o mukwa Etiyopya kwijiya o kidi kya Bibidya ni kudibatizala! Kyoso ki u kayela Filipe ni kubelesela o kitumu kya Jezú kya kuboka, wanda londekesa kuma wamesena kukala Mbangi ya Jihova. (Tanga Loma 10:10, 13, 14.) Mu kithangana kiki, nange wanda bhanga o kibhwidisu kya bhangele o mukwa Etiyopya: “Kima kyahi ki ngi fidisa ku ngi batizala?”—Ika. 8:36.

18. Ihi i twanda dilonga mu milongi ya kayela?

¹⁸ O kudibatizala kyene o kima kya beta-kota ki tu sola kubhanga ku mwenyu. Mukonda dya kiki, eye wabhingi kuxinganeka kyambote se ihi ilombolola o batizu. Ihi i wabhingi kwijiya yalungu ni batizu? Ihi i wa tokala kubhanga ande ni kyoso ki u dibatizala? O ibhwidisu yiyi anda ku i tambwijila mu milongi ya kayela.