Omusambu Ukukwatekesa Kyebhi?

Kyoso Pamela kyeza mukwijiya kwila wala ni uhaxi wabhonzo, wayi musota dotolo. Né kiki, mwene wasambewe kwa Nzambi phala kudibhana kyambote ni kibhidi kiki. Okwila omusambu wamukwatekesa?

Pamela wambe: “Kyoso kyexile mungisaka okijimbu kya dikota mba cancer, ngakexile ni woma wavulu.” “Maji kyoso kingakexile musamba kwa Jihova Nzambi, ngakexile mutululuka. Emengene hanji mukwivwa ndolo yavulu, maji omusambu ungikwatekesa kukala ni ibanzelu yambote. Kyoso athu kya ngibhwidisa kyebhi kingala, eme nga ambela: ‘Kingala kyambote maji ngasanguluka!’”

Mukidi kitubhingi kungila kwila, kubhita ibhidi mba maka abhonzo kumwenyu phala kusamba. Etwenoso twene mu dibhana ni maka, kikale maka abhonzo mba kana. Mu kiki, mu ithangana yavulu twene mubhindamena kikwakwatekesu phala kudibhananawu. Okwila omusambu utena kutukwatekesa?

O Bibidya yamba: “Se wevu kimbamba kya ku xina, iza na-kyu kwa Jihova, mwene u ku sokesa na-kyu; kuma mwene kana kizuwa ki ehela muthu wayuka ku mu bhondeleka sé mbambe.” (Jisálamu 55:22) O izwelu yiyi ituswinisa! Mukiki, kyebhi omusambu ki utena kukukwatekesa? Se usamba kwa Nzambi mu ukexilu umusangulukisa, mwene wandakubhana yoso iwabhindamena phala kudibhana ni ibhidi.—Tala o kaxa “O Musambu Ukukwatekesa Kyebhi?”

O Musambu Ukukwatekesa Kyebhi?

Kutululuka kwa muxima

“Mu ila ni kusamba ni kudyonda, kumoxi ni kusakidila, mu ende ni kubhinga kwa Nzambi yoso i mwa mesena. Bhenyobho o kutululuka kwa Nzambi kwa somboka o kitongolwelu kyoso kya muthu, kwanda ku mi bateka mixima ni ilunji, mu ukamba ni Kidistu Jezú.” (Filipe 4:6, 7) Se utangela kwa Nzambi o ima ikuthandanganyesa ni maka uwamudibhananawu, mwéne wandakukukwatekesa kutululuka ni kukukwatekesa kwijiya se ihi iwatokala kubhanga phala kudibhana ni maka ne mwene se abhonzo.

Unjimu utunda kwa Nzambi

“Se muthu wakambe unjimu akolokote mu ku ubhinga kwa Nzambi, mukonda mwene mukwa kubhana ku athu enyoso ni ngalasa sé kwabazela, anga mwene umubhana.” (Tiyaku 1:5) Kyoso kitwamudibhana ni maka abhonzo, sayi bhabha kibhonza kusola kyambote. Se usamba mukubhinga o unjimu wa Nzambi, mwene wandakukwatekesa kulembalala itendelesu itusanga mu Mak’â mê, o Bibidya.

Ukubhana kutululuka ni nguzu

“Mu ima yoso ngala ni nguzu, mukonda dya yó u ngi bhana o kutena.” (Filipe 4:13) Jihova Nzambi mwene o Muteni Ayoso. Mukiki, mwéne utena kukubhana nguzu iwabhindamena phala kudibhana ni ibhidi mba kukolokota mu ibhhidi yiyi. (Izaya 40:29) O Bibidya ixanawe Jihova kala, “Nzambi mukwa kukonda o malamba a athu.” Mwene utukonda omalamba “mu jiphaxi jetu joso.”—2 Kolindu 1:3, 4.