O Kwila o Kukala Muthu Wambote Kutubhekela Kukondama Kuhádya?

Mu jihama jamivu, athu avulu amono kwila o kukala u muthu wambote wene o ukexilu wakukala ni kukondama kuhádya. Mukifika, o athu ku Ásia, axikina o milongi yamulongexi filósofo, amwixana Confúcio (551-479 A.K.K.) wambe: “Kana kubhanga kima kwa akwenu, kimwamesena kuma kakubhangekyu.”a

O KIMA KYENE MUKAYELA O ATHU AVULU

Avulu axikina hanji kwila o kukala ni idifwa yambote kyene o kima kyabetakota phala kukala ni kukondama kuhádya mba phala kusanguluka. Ene asota kuxila akwa, kukala ni idifwa yambote, kutendela ihi yatokala kubhanga, ni kukala ni kitongolwelu kyambote. Linh, muhatu ku Vietname wambe: “Eme ngexile muxinganeka jinga kuma se ngikala ngi muthu wambote ni kuzwela o kidi, ngeji tena kutambula mabesá.”

O muhatu mwenyu hanji wamusidivila kudya kujingadyama.

Amoxi asota kubhanga mbote mukonda dya ngeleja yâ. Sayi diyala amwixana Hsu-Yun watungu ku Taiwan, wambe, “Eme angilongo kuma se ubhanga ima yambote, wandazediwa kyoso kiwandafwa, maji se ubhanga ima yayibha, wandatala hadi.”

IHI IBHITA?

Kudisukilu dya kizuwa, waluwala, watohoka, wakwata mone ya diyala bhu maku.

Mukidi kubhanga mbote ku akwetu, kutubhekela we mbote yavulu. Maji, avulu asoto kubhanga mbote ku akwa atonginina kwila sayi ithangana kiyabhekela o kima kyexile mukingila. Sayi diyala amwixana Shiu Ping, watungu ku Hong Kong, wambe: “Eme ngadilongo ni musoso wami, kwila o yó abhanga ima yambote, sayi ithangana katambula mabesá. Ngabhange yoso ingatokalele o kubhanga phala kulanga o mwiji wami ni kubhanga ima yambote. Maji o ukaza wetu wabatuka, mwadiwami wangixisa ni mona.”

Avulu atonginina kwila sayi jingeleja kijene mukitukisa athu ambote. Etsuko, diyala dya tungu ku Japão, wambe “Ngaditele mu ngeleja, eme ngexile mukwendesa o ikalakalu ya minzangala. Ngadiwana mukumona athu kexile ni wendelu wambote, o athu exile muzoka phala kumona se nayi wandatumina, ni kungaxtala kyayibha o kitadi kyexile musangela o athu mungeleja.”

“Ngabhange yoso ingatokalele o kubhanga phala kulanga o mwiji wami ni kubhanga ima yambote. Maji o ukaza wetu wabatuka, mwadiwami wangixisa ni mona.”—SHIU PING, HONG KONG

Sayi yâ adibhakula ni muxima woso mu ngeleja, aluwala mukumona ima yayibha kubhita ku mwenyu wa sumbala abhanga ima yambote. Kiki kyene kyadivu o muhatu watungu ku Vietname, amwixana Van, wambe: “Izuwa yoso engexile mukwambata ibundu, itulu, ni kudya ni kusatela o jikuku jami jafu kya ukulu, mukukingila kusanguluka mba kutambula mabesa kuhádya.” “Sumbala ni ibhangelu yoso yambote ni ima yoso ingabhange mu ngeleja mu mivu yavulu, mwadiwami wakwata uhaji wabhonzo. Mukusuluka, o mona wa 20 amivu wafu, kyoso mwene kyexile mudilonga mu ixi yengi.”

MUKONDA DYAHI KUKALA MUTHU WAMBOTE KIKUSOKO?

Kima kyambote kukala muthu wambote, maji kikusoko phala kukala ni kukondama kuhádya. Kikisoko mukonda dyahi? Tala ihi itutangela o Mikanda Ikôla.

KATHU OSO ASOLA KUBHANGA IMA YAMBOTE

“O mukwa ituxi umoxi ngó u zanga ndumba dya jimbote.”—NDONGIXI 9:18.

Né mwene se usota kubhanga nguzu phala kukala muthu wambote, o mwenyu kuhádya utena kukusasumukisa mukonda dya ibhangelu ya akwenu. Mukifika, mukithangana kiki kya dibhebhu dya Covid-19 eye utena kukayela o itendelesu ya jinguvulu yalungu ni kudisandula. Maji ihi ibhita sekukala muthu uxibhaka o kitendelesu kiki? O wendelu wawu utena kuta mukilwezu o sawidi ya yó amusota kubelesela o itendelesu ya jinguvulu.

O ATHU ATENA KUTONDALA MU UKEXILU WAKUTALA O IMA YAMBOTE NI YAYIBHA

“Sayi njila, muthu u i mona kuyuka; maji o ku dizubhilu dyê-phe ikoka ya kalunga.”—JISABHU 14:12.

Tunde ukulu, athu avulu abhange ima yaxinganekene kuma yexile ima yambote, maji kupholo atonginina kwila mbe yexile ima yayibhba. O kumesena kubhanga mbote kikulange muthu mu ibhidi ijila mukusola kyayibha.

KITWEJIYA YOSO YANDABHITA KU MWENYU

‘Enwenu kyoso k’iza-ku mungu ku myenyu yenu, ki mwa k’ijiya!’—TIYAKU 4:14.

Né mwene se muthu wambote mwene utena kufwa mu kithangana ni mbandu. Mukifika, mukithangana kiki dya dibhebhu dya Covid-19, avulu afu mukusota kukwatekesa akwâ. Tala o musoso wa Liting, muhatu mukwa China, wafundu tat’ê mukilwezu kya dikalu. Mwene wambe: “Eme kingatendela se mukonda dyahi o muthu kala mwene wafu. Tata yami wexile mukalakadi wanguzu, walendukile, wawabhele muxima. Mwene ngo wafuku mukilwezu kyadikalu mwexile athu avulu.”

Se kukala muthu wambote kikubhekela kukondama kuhádya, ihiphe ibhekela? Phala kutambwijila o kibhwidisu kiki twabhingi kusanga o fixi ya itendelesu yatokala, itena kutambwijila o ibhwidisu yetu ni kutubhekela o kukondama kuhádya. Kwebhi kututena kusanga o itendelesu yiyi?

a Phala kwijiya yalungu ni ilongesu yamulongexi Confúcio, tala o kibatulu kya 7, difwe 31-35, mu divulu O Homem em Busca de Deus akabhange ku Jimbangi ja Jihova udisanga mu www.jw.org.