Kyoso Muthu Utwazolo Weha Kusidivila Jihova

1. Kyebhi kidivuwa o muthu se kumwiji we kukala muthu amuta kamukonde mu kilunga?

O KWILA sayi muthu ku mwiji wé amute mu kamukonde mu kilunga? Kiki kiluwalesa kyavulu o muxima! Sayi phange yamuhatu amwixana Ilda, wambe: “Kyoso mwadiwami kyafu, twabhangele kya 41 amivu mu ukaza wetu.b Eme ngabanzele kwila, kiki kyene o kima kyabetele kota o kuyibha kyangibhiti kumwenyu wami woso. Maji kyoso monami kyaxisa o kilunga, kyaxisa o muhatu ni twana twê, eme ngadivu dingi kyayibha.”

2-3. Kala kilondekesa Jisálamu 78:40, 41, kyebhi kidivwa Jihova kyoso selevende yê kyamubhana o dikunda?

² Xinganeka ngó o kuluwala kwevu Jihova kumuxima, kyoso ku mwiji wê kudyulu sayi jianju jamubhana o dikunda! (Juda 6) Xinganeka we o kuluwala kwevu Jihova kyoso kyamono o mundu wê wazolele, akwa Izalayele, kumubhukumukina muveji javulu. (Tanga Jisálamu 78:40, 41.) Utena kuxikina ni kidi kyoso kwila, o Tata yetu ya henda wala kudyulu, uluwala we kyoso kyamona muthu wamuzolo, kweha kumubheza. Mwene we wejiya, utendela o ndolo iwamukwivwa. Ni henda yoso, mwene wandakubhana o kiswinisu ni kikwatekesu kiwabhindamena.

³ Mu milongi yiyi, twandamona se ihi i utena kubhanga se muthu utwazolo weha kusidivila Jihova. Twandamona we kyebhi kitutena kukwatekesa akwetu mukilunga amudibhana we ni ibhidi yiyi. Maji kyadyanga tuzwele hanji o ixinganeku yayibha itwatokala o kulenga.

KANA KUDITATELA

4. Kyebhi kyene mudivwa o jitata javulu kyoso o mona wadiyala mba wamuhatu weha kubheza Jihova?

⁴ Kyoso o mona wakazola kyeha kubheza Jihova, jitata javulu adibhwidisa se ihi dingi yatokalele kubhanga phala asuluke kubheza Jihova. Phange amwixana Luka, kyoso mon’ê kyamute mukamukonde, wambe: “Eme ngaditatela mudyami. Kate ngexile mulota jinzoji jayibha mukonda dya maka yá. Sayi ithangana ngexile mudila, o muxima wexile mungikata.” Phange Elizabete wadibhana we ni maka adifu kiki, wateku dingi wixi: “Kala mama, ngadibhwidisa se bhebhi bhu ngalweza. Ngadivu kwila, kingibhangele yoso ingatokalele kubhanga phala kulonga monami kuzola Jihova.”

5. Se muthu weha kubheza Jihova nanyi mwene wala ni kikuma?

⁵ Twabhingi kulembalala kwila, Jihova watubhana etwenyoso, o ujitu wakusola yoso itwamesena o kubhanga. Kiki kilombolola kwila, etu tutena kusola se twandabelesela Jihova mba kana. Sayi minzangala, kexile ni jitata phala ku abhana phangu yambote, maji ne kiki, asolo kusidivila Jihova ni kumukala fiyele. Maji o minzangala yamukwa, o jitata jâ abhange mwene yoso phala ku alonga kuzola Jihova. Maji kyoso kyakulu eha kusidivila Jihova. Kifwa, kudisukilu, etwenyoso twala ni ufolo wakusola se twandasidivila Jihova. (Josu. 24:15) Kyenyikiphe, enu mu jitata mwaluwala mukonda o twana twenu eha kusidivila Jihova, kanenu kuxinganeka kwila, énu mwala ni kikuma!

6. Kyebhi kidivwa o twana kyoso o jitata jâ kyeha kudisivila Nzambi?

⁶ Sayi ithangana o tata mba mama, weha kusidivila Jihova, katé mwene uxisa o mwiji wê. (Jisá. 27:10) Kiki kitena kubhekela ibhidi kutwana, mukonda ene axila o jitata jâ, a amona kala phangu yâ. Phange Ester, tat’ê amutele mu kamukonde mu kilunga wambe: “Ngadidile muveji javulu, mukonda ngejidile kwila, mwene kaxalumuka ngó mu njila ya kidi, kana. Mwéne mwene wasolo muvondadi yê kwila, kamesena dingi kusidivila Jihova. Eme ngazolo kyavulu tatetu. Kyenyiki, kyoso kyamutele mu kamukonde, muveji javulu ngatandanganyele phala kwijia se mwene wala kyambote. Ngexile ni wôma wavulu.”

7. Kyebhi Jihova kya divwa mukutala o minzangala ala ni jitata a ate mu kamukonde?

⁷ Minzangala, se o jitata jenu a ate mu kamukonde mu kilunga, ejiyenukyu kwila, etu we twaluwala kyavulu! Twakudyondo, ejiya kwila, Jihova wejiya o ndolo iwamudibhananayu. Mwene wakuzolo kyavulu, wasanguluka neye mukonda wamumusidivila jinga ni ufiyele woso. Etu tu jiphange jê mukilunga, twasanguluka we neye. Lembalala kwila, keyeku wala ni kikuma mu kima kyasolo tata mba mamenu. Kala kitwatumbula kudimatekenu, Jihova wabhana ku athu oso o ufolo wakusola. Oso adibhakula ni kudibatizala ejiya kwila, muthu watokala “wambata o kimbamba kyê.”—Nga. 6:5.

8. Ihi itena kubhanga o jindandu ala fiyele kyoso kyaya ni kukinga ndandu yâ amute mu kamukonde kuvutuka kwa Jihova? (Tala we o kaxa “Vutuka kwa Jihova.”)

⁸ Kyoso muthu utwazolo kyeha kusidivila Jihova, ki kima kyayibha kudyelela kwila, mungu mwene wandavutuke kwa Jihova. Eye utena kubhanga jinga yoso i utena phala kukolesa o kixikanu kyé. Mukubhanga kiki wandabhana phangu yambote ku athu amukwa kumwiji wé, nange kate mwene kwa yó amute mu kamukonde. Wandakala we ni nguzu iwabhindamena phala kukolokota ni ndolo iwamudibhana nayu. Kyenyikiphe, ihi i utena kubhanga phala kukolesa jinga o kixikanu kyé?

IHI I UTENA KUBHANGA PHALA KUKOLESA O KIXIKANU KYÉ?

9. Ihi i utena kubhanga phala kukolesa jinga o kixikanu kyé? (Tala we o kaxa “O Bibidya Itena Kukuswinisa se Sayi Muthu Wakazola Waxisa Jihova.”)

⁹ Bhanga yoso i utena phala kukolesa o kixikanu kyé. Kima kyambote kudiswinisa mudyé ni kuswinisa we akwenu ku mwiji wé. Kyebhi ki utena kubhanga kiki? Kolesa o ukamba wé ni Jihova mukutanga o Bibidya izuwa yoso, xinganeka mu ima iwatange ni kuya muyônge. Phange Joana tat’ê ni phangye yamuhatu axisa o kidi. Mwene wambe: “Muxima ungitululuka kyoso kingitanga o misoso ya athu a atumbula mu Bibidya, kala Abingayile, Estele, Jobe, Zuze ni Jezú. O phangu yá ingiswinisa, ingikwatekesa kutala o ima mu ukexilu wambote. Kwivwa o mimbu yetu ya JW Broadcasting, kungikwatekesa we kudivwa kyambote.”

10. O Jisálamu 32:6-8 itukwatekesa kyebhi kukolokota kyoso kitudibhana ni kuluwala kwa muxima?

¹⁰ Tangela kwa Jihova o maka oso amukutandanganyesa. Kana kufula kusamba kwa Jihova kyoso ki uluwala. Bhinga kwa Nzambi yetu ya henda phala kukukwatekesa kutala o ima mu ukexilu wambote ni “ku kwidikisa njila yoso i wa fwama ku ila; ni ku kubhana o kayula.” (Tanga Jisálamu 32:6-8.) Mukidi, kitena kubhonza kyavulu kutangela kwa Jihova ni kidi kyoso, kyebhi ki wamudivwa. Maji Jihova wejiya kyambote, utendela o ndolo iwamudivwa kumuxima. Mwene wakuzolo kyavulu, ukuswinisa phala kumutangela yoso yakukala ku muxima.—Mak. 34:6; Jisá. 62:7, 8.

11. Kala kilondekesa Jihebelewu 12:11, mukonda dyahi tutena kudyelela mu kibazelu kya henda kibhana Jihova? (Tala we o kaxa “O Kamukonde Kilondekesu Kya Henda ya Jihova Kokwetu.”)

¹¹ Xikina o kima kyasolo o tufunga. O kuta muthu mukamukonde, kubhanga mbandu wa ukexilu wa Jihova kwendesa o ima mukilunga. O kibazelu kyê kya henda phala o mbote ya athu oso, katé mwene yó wate o kituxi. (Tanga Jihebelewu 12:11.) Kyoso o tufunga kyabazela muthu wate o kituxi mukilunga, sayi yâ atena kuzwela kwila, ene kabatula kyambote o maka. Maji lembalala kwila, muveji javulu, o athu azwela kiki, katumbula o ima yayibha yabhange yó amubazela. Mukidi, etu kitwejiya yoso yabhiti. Kyenyikiphe, dyelela kwila, o tufunga abatula o maka abhange yoso phala kukayela yamba o Bibidya, phala atene kufundisa mu ukexilu wa “Jihova.”—2 Mal. 19:6.

12. Sayi yâ akatula mbote yebhi mu kuxikina o kibazelu kya abhana Jihova?

¹² Mu kuxikina o kibazelu kyabhana o tufunga, kya kuta ndandu yé uwamuzolo mu kamukonde, mukidi utena kumukwatekesa kuvutuka kwa Jihova. Phange Elizabete twamutumbula kudimatekenu, wambe: “Kibhonza kyavulu kukamba kudizwelesa né ngó kakithangana kofele ni mon’ê wakulu kyá. Maji kyoso mon’etu kyavutuka mu kilunga kya Jihova, mwene waxikina kwila, kyamutokalele mwene kumuta mu kamukonde. Mukubhita kithangana mwene wambe kwila, ngadilongo ima yavulu yambote, mu ithangana yoso, Jihova ubazela mu ukexilu wayuka.” Mwadi wê, phange Mark, wabandekesaku dingi wixi: “Mukubhita kithangana, mon’etu wambe kwila, wamesenene kyavulu kuvutuka mukilunga, mukonda etu kitwexile mudizwelesa nê. Tusakidila kyavulu Jihova mukutukwatekesa kumubelesela.”

13. Ihi itena kutukwatekesa kudibhana ni ndolo kumuxima?

¹³ Zwela ni dikamba wandatendela kyebhi kiwamudivwa. Kubhita kithangana ni Jikidistá akulu kyá mu nzumbi, kutena kukukwatekesa kukala ni ixinganeku yambote. (Jisa. 12:25; 17:17) Phange Joana twamutumbula kya kudima wambe: “Kumuxima wami, eme ngexile mudivwa ubheka, maji kuzwela ni makamba ungadyelela kwangikwatekesa kudibhana ni ndolo yami.” Ihi itwamba se mukilunga mukala athu azwela ima ikubhangesa dingi kuluwala?

14. Mukonda dyahi twabhingi kusuluka ni ‘kudilendukila ni kudikwatekesa mudyetu, ni kudiloloka’?

¹⁴ Kala ni mwanyu mu kudibhana ni jiphange jé. Kitutokala kukingila kwila, mu ithangana yoso o athu azwela ngó ima yandatuswinisa. (Tiya. 3:2) Etwenyoso tu akwa ituxi. Kyenyiki, kana kudiwana se kukala muthu ukamba kwijiya yandazwela phala kukuswinisa, mba se kukimesena uzwela kima kikubhekela dingi ndolo. Lembala o itendelesu ya poxolo Phawulu kyoso kyambe: “Mu di lendukile ni kudikwatekesa mudyenu, mu di loloka, se bhwala muthu wa di kwata ni mukwá.” (Kol. 3:13) Phange yamuhatu wexile ni ndandu amutele mukamukonde, wajimbulula: “Jihova wangikwatekesa kuloloka o jiphange amesenene kungiswinisa, maji muveji dya kiki angiluwalesa.” Ihi itena kubhanga o kilunga phala kukwatekesa o mwiji kukolokota?

O KILUNGA KITENA KUKWATEKESA

15. Ihi itutena kubhanga phala kukwatekesa o mwiji wala ni muthu amute mukamukonde?

¹⁵ Tambulula kyambote muyônge o athu atokala kumwiji ala fiyele. Phange yamuhatu amwixana Mirian, wazwela kwila, wexile ni hele ya kuya muyônge kyoso phangye kyamute mukamukonde mukilunga. Mwene wambe: “Ngexile ni hele ya ima yeji zwela o athu. Maji mu kilunga mwexile jiphange javulu aluwalele we mukonda dya yoso yabhitile. Ene kazwela kima kyosokyoso kyayibha kyalungu ni phange yami. Ngisakidila o kikwatekesu kyâ, mukonda kingadivu ubheka mu kuluwala kwami.” Phange yamukwa yamuhatu wambe we: “Kyoso monami kyamutele mukamukonde, makamba akazola ejile kubhata dyami phala kungiximbakatesa. Amoxi mudya ambele kwila, kejidile yeji zwela phala kungikwatekesa. Sayi yá adidi neme, amukwa angitumikisa jinjimbu jangikwatekesa. O ima yabhange, yangikwatekesa kyavulu!”

16. Kyebhi o kilunga kitena kusuluka ni kuximbakatesa ni kukwatekesa yó ala ni jindandu a ate mu kamukonde?

¹⁶ Suluka ni kukwatekesa o athu atokala kumwiji amukolokota. Mu kithangana kiki, ene abhindamena dingi o henda ni kiswinisu kyetu m’ukulu ndenge. (Jihe. 10:24, 25) Sayi ithangana o athu atokala kumwiji mwala muthu amute kamukonde, adivwa kwila, sayi athu mukilunga kazwela nawu dingi, kala ene we a ate mukamukonde. Kitwatokala kubhangesa akwetu kudivwa kiki! Etu twatokala kuximana ni kuswinisa o minzangala mukilunga ala ni jitata kamusidivila dingi Jihova. Phange Madiya, mwadiwe amute mu kamukonde yu waxisa o mwiji, wambe: “Sayi makamba mami ejile kubhata, alambe, angikwatekesa kubhanga o ubhezelu kumwiji ni twana twami. Ene exile we mukwivwa o ndolo yami, adidi kumoxi n’eme. Ene angizokela kyoso kikwamoneka athu exile muzwela ima yayibha yamakutu yalungu n’eme. Ene angiswinisa mwene kyavulu!”—Loma 12:13, 15.

17. Ihi itena kubhanga o tufunga phala kuximbakatesa yó aluwala o muxima?

¹⁷ Tufunga, sotenu kithangana phala kukwatekesa yó atokala ku mwiji ala fiyele. Enu mwala ni kikalakalu kya katunda o kuswinisa yó ala ni jindandu eha kubheza Jihova. (1 Tes. 5:14) Phala ku aswinisa, zwela nawu ande dya kumateka o kyônge, ni kyoso kibhwa o kyônge. Sota kwakunda kumabhata mawu ni kusamba nawu kumoxi. Sota kuboka nawu mba sota kwa exana phala kudibunda nenu mu ubhezelu wenu wa mwiji. O tufunga abhingi kulanga oso aluwala o muxima mu ku alendukila ni ku alondekesa o henda yabhindamena.—1 Tes. 2:7, 8.

KANA KUBHWILA, SULUKA NI KUDYELELA KWA JIHOVA

18. Kala kilondekesa 2 Phetele 3:9, ihi yamesena Nzambi kwa yó eha kumusidivila?

¹⁸ Jihova “ka mesena kwila ku kala muthu u texika, mbata wa mesena ene oso eza mu kudyela.” (Tanga 2 Phetele 3:9.) Ne mwene se muthu wate kituxi kyadikota, o mwenyu we wala hanji ni valolo kumesu ma Nzambi. Xinganeka o swilu mba pelesu yafutu Jihova phala kubhulula o mwenyu wa akwa ituxi—o sata ya mon’ê wakazola. Ni henda yoso, Jihova usota kukwatekesa yó amubhana o dikunda phala kuvutuka kwa mwene. Jihova wadyelela kwila, ene atena kubhanga kiki. Tumona o kidi kiki mukifika kyatele Jezú kyalungu ni mona wajimbidile. (Luka 15:11-32) Avulu ehele kubheza Jihova, kupholo dyakwenda avutuka kwa Tata yâ yakazola wala kudyulu. Kyoso kyavutuka o jiphange mukilunga asangulukile kyavulu, a atambulula ni muxima woso. Phange Elizabete twamutumbula kudimatekenu, wamono o kidi kiki kyoso mon’ê kyavutuka mu kilunga. Mwene wambe: “Eme ngisakidila kyavulu oso atuswinisa phala tukale ni kidyelelu.”

19. Mukonda dyahi twatokala kusuluka ni kudyelela kwa Jihova?

¹⁹ Etu tutena kudyelela kwa Jihova mu ithangana yoso. Mu ithangana yoso mwene wandakutubhana itendelesu yandakutukwatekesa. Mwene Tata ya jihenda, mukwa kubhana, wazolo oso amuzolo, oso amubheza. Eye utena kudyelela ni muxima woso kwila, Jihova nuka wandakukwehelela mu kithangana kya kuluwala. (Jihe. 13:5, 6) Phange Mark twamutumbula kudimatekenu, wambe: “Jihova katwehelela. Mwene wandatukwatekesa jinga mu ithangana yoso itudibhana ni ibhidi.” Jihova wandasuluka ni kukubhana “o nguzu i lenda yoso.” (2 Kol. 4:7) Kyene, eye utena kukala fiyele, kukala ni kidyelelu né mwene se ndandu yé uwazolo kyavulu weha kubheza Jihova.