MBANDU YAKUDILONGA 28
O Utuminu wa Nzambi Wamutumina Kyá!
“O utuminu wa ngongo, wakituka o Utuminu wa Ngana yetu ni wa Kidistu.”—DIJ. 11:15.
MWIMBU 22 Utuminu wa Nzambi Wíze!
ITWANDADILONGAa
1. Twadyelela mu ihi, ni mukonda dyahi?
KYOSO ki umona o maka oso ala mu ngongo lelu, kikubhonza kyavulu kuxikina kwila o ima ku hádya yandawabha. O athu ku mwiji, kadizolo dingi kala m’ukulu. O usweya ni njinda ya athu, ya mudibandekesa dingi. O athu amudizola dingi ene ngó. Avulu kadyelela o athu ala ni maungana. Maji kiki kitena ku kubhana o kidyelelu kwila o ima ku hádya yandawabha. Mukonda dyahi? Mukonda o athu ala kala kyakanena o Bibidya yalungu ni “izuwa isukidilaku.” (2 Ti. 3:1-5) O kikumbidilu kya kikanenu kiki, athu avulu akixikina. Kyene kilondekesa kwila Kidistu Jezú wamutumina kyá kala Sobha ya Utuminu wa Nzambi. Maji kiki kikanenu kimoxi ngó kyala mwaxaxi ka ikanenu yamukwá yalungu ni Utuminu wa Nzambi. O kudilonga o ikanenu yengi yadikumbidila mu izuwa yetu, kwanda kolesa dingi o kixikanu kyetu.
Kala o jimbandu jafoto jitena kutukwatekesa kumona o foto yatenena, o ikanenu yala mu divulu dya Daniyele ni dya Dijingunwinu itukwatekesa kutendela kyambote kwebhi kutwala mu kithangana kya Jihova (Tala okaxi 2)
2. Ihi itwandadilonga mu milongi yiyi ni mukonda dyahi? (Zwela yalungu ni foto yakapa.)
2 Mu milongi yiyi, twandadilonga (1) o kikanenu kitukwatekesa kutendela se o Utuminu wa Nzambi wamateka kutumina thembu kuxi, (2) o ikanenu itukwatekesa kwijiya kwila Jezú wakituka Sobha ya Utuminu wa Nzambi ku dyulu, ni (3) o ikanenu ilondekesa kwila o jinguma ja Utuminu wa Nzambi anda kwabwika. Kala o jimbandu jafoto jitena kutukwatekesa kumona o foto yatenena, o ikanenu yiyi itukwatekesa kutendela kyambote kwebhi kutwala mu kithangana kya Jihova.
KYEBHI KITUTENA KWIJIYA SE O UTUMINU WA NZAMBI WAMATEKA KUTUMINA THEMBU KUXI?
3. Kidyelelu kyahi kitubhana o divulu dya Daniyele 7:13, 14 kyalungu ni Sobha ya Utuminu wa Nzambi?
3 O kikanenu kyala mu divulu dya Daniyele 7:13, 14, kitubhana kidyelelu kuma Kidistu Jezú mwéne o muthu wabetakota phala kukala o Sobha ya Utuminu wa Nzambi. Athu a ifuxi yoso anda “mu bhikila” ni kisangusangu kyoso, séku muthu wanda mubhingana mu utuminu wê. O kikanenu kya mukwá mu divulu dya Daniyele kilondekesa kuma Jezú, wejimateka kutumina kudisukilu dya sambwadi dya jithembu. O kwila tutena kwijiya o kithangana kyoso Jezú kyakituka Sobha?
4. Jimbulula kyebhi Daniyele 4:10-17 kitukwatekesa kwijiya se Jezú wakituka Sobha ya Utuminu wa Nzambi ku muvu webhi. (Tala kulwiji.)
4 Tanga Daniyele 4:10-17. O ‘sambwadi dya jithembu’ kilombolola 2.520 ya mivu. O kithangana kiki kyamateka ku muvu wa 607 A.K.K. kyoso akwa Babilonya kyakatula o sobha yasukina ku kyandu kya Jihova, mu mbanza ya Jeluzaleme. Kyene kyazumbuka ku muvu wa 1914 K.K. kyoso Jihova kyatumbika Jezú—‘o muthu watokala o kididi kiki’—o Sobha ya Utuminu wa Nzambi.b—Ize. 21:25-27.
5. Kyebhi o kikanenu kya “sambwadi dya jithembu” kitubhekela mbote?
5 Kyebhi o kikanenu kiki kitubhekela mbote? O kutendela o kikanenu kya lungu ni “sambwadi dya jithembu,” kikolesa dingi o kixikanu kyetu kwa Jihova, kuma mwene wanda kumbidila o ikanenu yê mu kithangana kyatokala. Jihova wasolo o kithangana kyatokala phala kusola Jezú kukala o Sobha ya Utuminu wê, kumbandu ya mukwa tutena kukala ni kidyelelu kuma o kizuwa kya Jihova, “ki kya-nda ku kokoloka, kana.”—Haba. 2:3.
KYEBHI KI TWEJIYA KUMA JEZÚ WAKITUKA SOBHA YA UTUMINU WA NZAMBI
6. (a) Ima yebhi yamubhita mu ngongo ilondekesa kwila Kidistu wamutumina kyá ku dyulu? (b) Kyebhi o kikanenu kyala mu divulu dya Dijingunwinu 6:2-8 kilondekesa o kidi kiki?
6 Kudisukilu dya ukunji wê mu ixi, Jezú wambe kuma sayi ima yejibhita mu ngongo yejikwatekesa o maxibulu mê kwijiya kwila, mwene wamateka kyá kutumina ku dyulu. Mwene wazwela yalungu ni ita, nzala, itungutu mu ngongo, ni mauhaxi “mu ididi yavulu,” mu kifika, kala o uhaxi wa COVID-19. O ima yiyi ibhanga mbandu ya “kijimbwete” kya kutukuluka kwa Kidistu, kala kilonga o Bibidya. (Mat. 24:3, 7; Luka 21:7, 10, 11) Kyoso Jezú kyafu, anga amufukununa, yu wavutuka ku dyulu, mu kubhita 60 a mivu ndenge, mwene wajimbulula dingi kwa poxolo Nzwá kuma o ima yiyi yejibhita mwene. (Tanga Dijingunwinu 6:2-8.) O ima yoso yiyi yabhiti kyoso Jezú kyakituka Sobha ya Utuminu wa Nzambi ku muvu wa 1914.
7. Mukonda dyahi o kuyibha mu ngongo kwa dibandekesa dingi kyoso Jezú kyakituka Sobha?
7 Mukonda dyahi o kuyibha mu ngongo kwa dibandekesa dingi kyoso Jezú kyakituka Sobha? Dijingunwinu 6:2 ditutangela o kima kya dyanga kyabhange Jezú kyoso kyakituka Sobha ya Utuminu. Mwene waluwu o ita. Wabhânge ni nanyi? Wabhânge ni Dyabhu ni madimonyo mê. O divulu dya Dijingunwinu kibatulu 12 dyamba kuma Satanaji amutolola, mwene ni madimonyo mê a atakula mu ixi. Mukonda dya kiki o Bibidya yamba kwila, “lamba dyenu mu ngongo,” kuma Satanaji wala ni njinda yavulu, yu wamusuluka mu kuzukutisa o athu.—Dij. 12:7-12.
Etu kitwene musanguluka ni jinjimbu jayibha, maji o kumona o ikanenu ya Bibidya kudikumbidila izuwa yoso, itubhana kidyelelu kwila o Utuminu wa Nzambi wamutumina kyá (Tala okaxi 8)
8. Kyebhi o kumona o ikanenu yalungu ni Utuminu wa Nzambi, ya mudikumbidila itubhekela mbote?
8 Kyebhi o ikanenu yiyi itubhekela mbote? O izulukutu mu ngongo ni ibhangelu ya athu ilondekesa kuma Jezú wakituka Sobha ya Utuminu. Muveji dya kuluwala mukonda dya kumona kwila o athu adizolo dingi ene, akituka dingi isweya, twatokala ku dilembalala kwila o ima yabhanga ya mukumbidila o ikanenu ya Bibidya. O Utuminu wa Nzambi wa mutumina kyá! (Jisá. 37:1) Mu kiki kyoso kituya ni kukinga o Alumajedone, o ima yayibha mu ngongo yanda dibandekesa dingi. (Mál. 13:8; 2 Ti. 3:13) Etu tusanguluka kyavulu mu kwijiya kuma o Tata yetu ya dyulu utukwatekesa kutendela se mukonda dyahi kwene maka avulu mu ngongo.
KYEBHI O JINGUMA JA UTUMINU WA NZAMBI ANDA KWABWIKISA
9. Kyebhi o kikanenu kya Daniyele 2:28, 31-35, kyajimbulula o utumuminu wasukinaku? Wene wamateka kutumina thembu kuxi?
9 Tanga Daniyele 2:28, 31-35. Twamumona o kikanenu kiki kudikumbidila mu izuwa yetu. O nzoji ya Nabukodonozolo yalondekesa o ima yejibhita mu “izuwa ya sukidila-ku,” kyoso Kidistu kyejimateka kutumina. O jinguma ja Jezú mu ixi, yó abhanga mbandu ku utuminu wa mundu kala kyakanena Bibidya, o kijimbwete kyê kyejikala kala o “felu ni utuma.” O unguvulu yu wamutumina kyâ. O unguvulu yú wamoneka mu kithangana kya ita yadyanga yabhiti ku mundu woso, kyoso Grã-bretanya ni Estados Unidos kyabhangele ukamba wakatunda, o utuminu wa Anglo-Americana. Mu nzoji ya kiteka kyê, Nabukodonozolo wamono ima iyadi yalanayu o unguvulu yu, o mautuminu amukwa kexilenayu.
10. (a) Ihi itumona mu utuminu wa Anglo-Americana ikumbidila yazwela o kikanenu kya Daniyele? (b) Twatokala kudilanga ku kilwezu kyahi? (Tala o kaxa “Dilange ni Utuma!”)
10 Kya dyanga, o mautuminu amukwá atumina o ngongo yoso, a alombolola ni ima yakolo, kala ulu ni phalata. Maji o utuminu wa Anglo-Americana a ulombolola kala felu yofunge ni utuma. O utuma ulombolola o “mbutu ya athu.” (Dan. 2:43) Tutena kumona o ifunyisu ya athu mu kithangana kya kusola nguvulu mba mwenexi, mu kudikalanganza kwâ kwalungu ni ufôlo wa athu, ni mu ibuka ya akalakadi adikalanganza mukonda dya ima ibhita mu ididi yâ, ya kukalakala. Yoso yiyi ifidisa o jinguvulu ja utuminu yú kubhanga o ima yamesena.
11. Kyebhi o kumona Utuminu wa Anglo-Americana ukolesa o kidyelelu kyetu kya kwila twala mwene mu izuwa isukidilaku?
11 Kya kayadi, kala kilondekesa o inama ya kiteka kya dikota, o Anglo-Americana wene o utuminu wasukina kala kyakanena o Bibidya. Séku dingi utuminu wengi mu ixi wanda ubhingana. Maji wene anda ku ubwika ku Utuminu wa Nzambi mu ita ya Alumajedone, mwene ni jinguvulu joso ja ngongo.c—Dij. 16:13, 14, 16; 19:19, 20.
12. Kidyelelu kyahi kitubhana o kikanenu kyala mu divulu dya Daniyele?
12 Kyebhi o kikanenu kiki kitubhekela mbote? O kikanenu kya divulu dya Daniyele kitutangela kima kyengi kilondekesa kwila twala mwene kudisukilu dya izuwa isukidilaku. Mu 2.500 ja mivu kudima, Daniyele wazwela kuma kyoso kyejibhita o utuminu wa Babilonya, kwejimoneka mautuminu awana ejitumina ku mundu wa Nzambi. Mwene wambe we kwila, o Utuminu wa Anglo-Americana wejikala o utuminu wasukina. Kiki kitubhana kidyelelu kuma kwakambe ngó bhofele, o Utuminu wa Nzambi wandabwikisa o jinguvulu joso ja ngongo, wene wandatumina o ngongo yoso.—Dan. 2:44.
13. Nanyi o “sobha ya kanake” ni “dikwinyi dya jisobha,” yotumbule mu Dijingunwinu 17:9-12, ni kyebhi o kikanenu kiki kyadikumbidila?
13 Tanga Dijingunwinu 17:9-12. Kuma o Ita ya Dyanga Yabhiti ku Mundu Woso yabwikisa ima yavulu, kiki kyabhangesa kukumbidila o kikanenu kya mukwa kya Bibidya kyalungu ni izuwa isukidilaku. O jinguvulu ku mundu amesenene kubheka paze mu ngongo yoso. Mu mbeji ya Katatu ka 1920, o jinguvulu abhange o kisangela kya Liga das Nações, anga akibhingana ku kibuka kya Nações Unidas mu mbeji ya Kamusasadi ka 1945. O kisangela kiki akixana kala “sobha ya kanake.” Maji ki utuminu, utumina o ngongo yoso. Mukonda o kutena kwê kwijila bhukaxi ka jinguvulu. O Bibidya ixana o jinguvulu jiji kala “o dikwinyi dya jisobha.”
14-15. (a) Ihi izwela o divulu dya Dijingunwinu 17:3-5 ya lungu ni “Babilonya ya dikota”? (b) Ihi yamubhita lelu ni jingeleja ja makutu?
14 Tanga Dijingunwinu 17:3-5. Mu kisuma kyalondekesa Nzambi kwa Nzwá, mwene wamono kidyanzunga amwixana, “Babilonya ya dikota,” kifwa, o kisangela kya jingeleja joso ja makutu. O kisuma kiki kyadikumbidila kyebhi? O jingeleja ja makutu jene mukalakala kyavulu ni jinguvulu ni kwa kwatekesa we. Maji kwakambe ngó bhofele, Jihova wandata ku mixima ya jinguvulu “o vondadi ya kubhanga o kima kya mukala ku muxima.” Ihi yandabhita? O jinguvulu, kifwa “o dikwinyi dya jisobha,” jandazukutisa o jingeleja joso ja makutu ni ku jibwikisa.—Dijingunwinu 17:1, 2, 16, 17.
15 Kyebhi kitwejiya kwila o disukilu dya Babilonya ya dikota dyazukama? Phala kutambwijila o kibhwidisu kiki twabhingi kulembalala kwila o mbanza yokulu ya Babilonya a ikondolokele ku menya a Ngiji yadikota ya Ewufalate. O menya akexile mulanga o mbanza. O divulu dya Dijingunwinu disokesa o mazunda a athu ene mukwatekesa o Babilonya ya dikota kala “menya” a ilanga. (Dij. 17:15) Maji dyene dilondekesa we kuma, o menya eji ‘kukuta,’ kiki kilombolola kwila o athu akwatekesa o kisangela kya jingeleja ja makutu, kandasuluka mu kubhanga kiki. (Dij. 16:12) O kikanenu kiki kya mudikumbidila lelu, mukonda athu avulu amudisandula mu jingeleja jamakutu phala kusota kubatula o maka alanawu mu ididi yengi.
16. Mbote yahi itutena kukatula mukutendela o ikanenu yalungu ni kumoneka kwa kisangela kya Nações Unidas ni disukilu dya Babilonya ya Dikota?
16 Kyebhi o kikanenu kiki kitubhekela mbote? O kubhanga o kisangela kya Nações Unidas, ni kumona kwila athu avulu amudisandula ku jingeleja ja makutu, kitulondekesa we kwila twala mwene mu izuwa isukidilaku. O menya a Babilonya ya dikota amukukuta, kifwaphe o athu akwatekesa o jingeleja joso ja makutu amudisandula. Maji ki ene anda bwikisa o jingeleja jiji, kala ki twazwela kya kudima, Jihova wandata ku mixima ya “dikwinyi dya jisobha”—o jinguvulu jene mukwatekesa o kisangela kya Nações Unidas—“o vondadi ya kubhanga o kima kya mukala ku muxima” wê. O ifuxi yiyi yanda bwikisa o jingeleja joso jamakutu, kiki kyanda sasumukisa o athu oso mu ngongo.d (Dij. 18:8-10) O kibwikilu kya Babilonya ya dikota, kyanda tungutisa o ixi yoso ni kwila yandabheka we ibhidi yavulu, maji o mundu wa Nzambi andatena kusanguluka mukonda dya ima iyadi yiyi. Kyadyanga, o jingeleja jamakutu anda jibwika katé kuhádya ni hádya. Kyakayadi, kiki kyandalondekesa kwila o kutubhulula ku mundu yú wayibha, kwazukama!—Luk. 21:28.
DYELELA KWILA JIHOVA WANDALANGA O MUNDU WÊ KUHÁDYA
17-18. (a) Mukonda dyahi twatokala kusuluka mu kukolesa o kixikanu kyetu? (b) Ihi itwandadilonga mu milongi yakayela?
17 Daniyele wakanena kwila o ‘kwijiya kwa kidi’ kweji ‘kuya ni ku dibandekesa.’ Mu kidi, kiki kyamubhita kyá! Kindala etu twene mutendela dingi kyambote o ikanenu yalungu ni izuwa ya lelu. (Dan. 12:4, 9, 10) Kiki kya mudikumbidila mbandu ni mbandu, kiki kibandekesa o kuxila kwetu kwa Jihova ni ikialakalu yê. (Iza. 46:10; 55:11) Mu kiki, suluka mukukolesa dingi o kixikanu kyê mu kudilonda o Maka a Nzambi ni kukwatekesa akwenu phala akala we ni ukamba wambote ni Jihova. O Nzambi yetu wanda langa yo amudyelela, o yo udyelela kwa Jihova wandakala ni “kutululuka kwa kidi.”—Iza. 26:3.
18 Mumilongi yamukwa, twandamona ikanenu yengi izwela yalunga ni mundu wa Nzambi mu ithangana isukidilaku. Twandadilonga we kwila o ikanenu yiyi yamudikumbila mwene mu izuwa ya lelu. Twandamona ima itudyelelesa kwila Jezú —o Sobha yetu —wa mukwendesa o akayedi’ê.
MWIMBU 61 Enu mu Jimbangi, Ndenu ku Pholo!
a Etu twatungu mu jithembu jakatunda! Mu Bibidya mwala ikanenu yavulu ilondekesa kuma o Utuminu wa Nzambi a utumbika kyá. Mu milongi yiyi twandamona ikanenu yanda tukwatekesa ni kukolesa o kixikanu kyetu kwa Jihova, ni ku tu tululukisa ni kumudyelela, ki lelu ngó, maji katé ku hádya ni hádya.
b Tala o disá 32 mu pondo ya 4 ya divulu Sanguluka Katé Kuhádya ni Hádya!, ni kumona we o vidyu O Reino de Deus começou a governar em 1914 mu kijimbwete kyetu jw.org.
c Phala kwijiya dingi yalungu ni kikanenu kya Daniyele, tala O Mulangidi 1 wa Kanake wa 2012, maf. 16-20.
d Phala kwijiya dingi ima yamukwá yandabhita kuhádya, tanga o kibatulu 21 kya divulu O Utuminu ua Nzambi ua mu Tumina Kiá!