Kwatekesa Jezú o Mutwameni Wetu

1. Yebhi o vondadi ya Jihova lelu?

NZAMBI wamesena kwila, lelu o njimbu yambote a iboka mu jixi joso. (Mál. 13:10; 1 Ti. 2:3, 4) Kiki kikalakalu kya katunda phala Jihova. Mukonda dya kiki mwene wasolo Monê phala kukala kupholo dya kikalakalu kiki. Tutena kuxikina ni kidi kyoso kuma Jezú mukukala o mutwameni wetu, o kikalakalu kya kuboka kyanda kwenda kala kyamesena Jihova, ande dyakubhixila o dizubhilu.—Mat. 24:14.

2. Ihi itwanda dilonga mumilongi yiyi?

² Mu milongi yiyi twanda mona kyebhi Jezú kyamukwatekesa o “kimbadi kya fiyele” phala kubhana kudya mu nzumbi ni kusokejeka o akayedyê phala kubhanga o kikalakalu kyadikota kya kuboka. (Mat. 24:45) Twanda mona we se ihi itutena kubhanga kala muthu mudyetu phala kukwatekesa Jezú ni kimbadi kya fiyele.

JEZÚ WAMUKWENDESA O KIKALAKALU KYA KUBOKA

3. Kutena kwahi kwala naku Jezú?

³ Jezú mwene wamukwendesa o kikalakalu kya kuboka. Kyebhi kitutena kwijiya o kidi kiki? Kithangana ande dya kuya kudyulu, Jezú wadyongeka ni amoxi ku akayedyê a fiyele ku mulundu wa Ngalileya. Mwene wa atangela: “O kutena kwoso a ngi bhana-ku eme, ni mu dyulu ni mu ngongo.” Mukusuluka mwene wambe dingi: “Mu kiki-phe, ndenu mwa kà longe maxibulu ku akwá jixi joso.” (Mat. 28:18, 19) O kutena kwala naku Jezú, kwalungu we ni kulanga o kikalakalu kya kuboka.

4. Mukonda dyahi tutena kuxikina kwila Jezú wamusuluka mu kukwendesa o kikalakalu kyakuboka kate lelu?

⁴ Jezú wambe kwila o kikalakalu kya kuboka ni kyakubhanga maxibulu, eji kukibhanga kate “ku jixi joso,” ni kwila mwene weji kala kumoxi ni akayedyê “izuwa yoso, katé ku dizubhilu dya mundu.” (Mat. 28:20) O izwelu yiyi ilondekesa ni kidi kyoso kwila Jezú weji suluka mu kukwendesa mba kukala kupholo dya kikalakalu kya kuboka kate mu izuwa yetu.

5. Kyebhi kitutena kukwatekesa kukumbidila o divulu dya Jisálamu 110:3?

⁵ Jezú kathandanganyele se ku dizubhilu dya mundu o akalakadi ejitola. Mwene wejidile kwila o izwelu ya mukwa jisálamu yeji dikumbidila: “Makwenze mé ma kà di bheka mwene mu vondadi yâ, bhu kizuwa ki u katula o kilômbo.” (Jisá. 110:3) Se wa muboka o njimbu yambote, eye wamukwatekesa Jezú ni kimbadi kya fiyele ni kwila wamwakwatekesa we kukumbidila o kikanenu kiki. O kikalakalu kyamuya kupholo, maji kwala ibhidi yavulu.

6. Kibhidi kyebhi kyene mudibhana nakyu o aboki a Utuminu lelu?

⁶ Kibhidi kimoxi kidibhana nakyu o aboki a Utuminu, o izukutisu. O akwa kubalukila Nzambi, atwameni a jingeleja, ni jinguvulu ene muzwela ku athu ima yavulu ya makutu yalungu ni kikalakalu kyetu. Se o jindandu jetu, o athu utwejiya, ni jikoleka jetu jasalu ene mwanganala ni maka enyá mba kwafunyisa, ene atena kutujijidika kweha kusidivila Jihova ni kweha kuboka. Sayi jixi o jinguma ene mukusa, ene musebhulula ni kutalatala kya ibha o jiphange jetu jamala ni ja ahatu, kate mwene ni kwata mukaleya. Etu kitwene mudiwana mukumona kuma o athu ene mututalatala mu ukexilu yú. Jezú wakanena: “Anda mi zemba kwala akwa jixi joso, mukonda dya dijina dyami.” (Mat. 24:9) O ima itwene mudibhana nayu kala o kutuzemba, ilondekesa kwila Jihova watu tuxikina. (Mat. 5:11, 12) Dyabhu mwéne wene mufunyisa o izukutisu yiyi. Maji Jezú wabetakota mu kutena, Satanaji ndenge! Ni kikwatekesu kya Jezú, o njimbu yambote yamubhixila ku athu akwa jixi joso. Tala o ima yamubhita.

7. Ima yebhi iwene mumona ilondekesa kwila o divulu dya Dijingunwinu 14:6, 7 dyene mudikumbidila?

⁷ Kuma tu aboki a Utuminu, etu we tudibhana ni kibhidi kyengi, kya kwila o athu azwela madimi avulu. Mu dijingunwinu dyabhana kwa poxolo Nzwá, Jezú wakanena kwila mu izuwa yetu o njimbu yambote yejitolola o kibhidi kiki. (Tanga Dijingunwinu 14:6, 7.) Kyebhiphe? Twamukwatekesa athu avulu kwijiya ni kuxikina o njimbu ya Utuminu. Lelu, athu avulu ku mundu woso atena kutanga madivulu ala ni milongi ya Bibidya, mu kijimbwete kyetu kya jw.org, mukonda mwala milongi mu 1.000 a madimi ndenge! O Kibuka kya Utuminu kyaxikina kwila o divulu Sanguluka Katé Kuhádya ni Hádya! o falamenda yetu yabetakota phala kubhanga maxibulu, adilungulula mu 700 a madimi ndenge! Ene mubhanga we kudya mu nzumbi bhukaxi ka jividyu phala o maxilu (mba afu o mátwi), ni madivulu mu braille, phala o ifofo. Twamumona o ikanenu ya Bibidya kudikumbidila. Athu “a tokala ku madimi m’engi ma miji yoso mu ngongo” amudilonga kuzwela o “dimi dya zele” dya kidi kya Bibidya. (Zak. 8:23; Sof. 3:9) Ima yoso yiyi yene mudikumbidila, mukonda Jezú Kidistu mwéne wamukwendesa o kilunga.

8. Mbote yahi yene mukwijila, katé lelu, mukonda dyakikalakalu kyetu kya kuboka?

⁸ Lelu, dinake dya mazunda (8.000.000) ndenge a athu mu 240 a jixi, abhanga mbandu ya kilunga kya Jihova. Ku mivu yoso ene mubatizala dikwinyi dya midi a athu! O yabeta dingi kota o idifwa mu nzumbi, kala o “ukexilu wa ubhe watubhana Nzambi,” wene mulondekesa o maxibulu yá a ubhe. (Kol. 3:8-10) Athu avulu eha kukala ni ukexilu wayibha wa mwenyu, isweya, akwa katombo ni azokedi a ixi. O kikanenu kyala mu divulu dya Izaya 2:4 kya mudikumbidila; ene ‘ka mudilonga dingi kúlwa ita.’ Kyoso kituya ni kubhanga nguzu phala kulondekesa o ukexilu wambote, twene mukwatekesa athu kuzukama mu kilunga kya Nzambi, ni kwila tulondekesa kuma twamukayela o mutwameni wetu Jezú Kristu. (Nzwá 13:35; 1 Ph. 2:12) Kiki ki kyamubhita mu kingoho. Mukonda Jezú wene mutubhana o kikwatekesu kitwabhindamena.

JEZÚ USOLA KIMBADI

9. Kala kilondekesa o divulu dya Matesu 24:45-47, ihi yokanene yalungu ni izuwa isukidila-ku?

⁹ Tanga Matesu 24:45-47. Jezú wakanene kwila mu izuwa isukidila-ku, mwene weji sola “kimbadi kya fiyele kya dimuka” phala kubhana o kudya mu nzumbi. Mu kiki tutena kukingila kwila o kimbadi kiki kikalakala ni nguzu yoso mu izuwa yetu. O ima yene mubhanga ilondekesa o kidi kiki. O Mutwameni wetu Jezú, wene mukalakala ni kibuka kyofele kya athu a a undu, phala kudikila o mundu wa Nzambi ni athu amukwa, mu kwabhana o kudya mu nzumbi “mu kithangana kyatokala.” O mayala yá kene mudimona kala jingana ja kixikanu kya akwâ. (2 Ko. 1:24) Muveji dya kiki, ene ejiya kwila Jezú Kidistu mwéne o “mutwameni ni nguvulu” ya mundu wê.—Iza. 55:4.

10. Madivulu ebhi amoneka mu fikula, akukwatekesa kwenda mu njila ya mwenyu wakalelaku mba kusidivila Jihova?

¹⁰ Tunde ku muvu wa 1919, o kimbadi kya fiyele kyene mubhanga ni kuwana kudya kwavulu mu nzumbi. O kudya kuku kwene mubhana kithangana ku athu kya kudilonga o kidi kya Mak’â Nzambi. Ku muvu wa 1921, o kimbadi kyabhange o divulu A Harpa de Deus, phala kukwatekesa o athu kwijiya o milongi ya Bibidya. Kyoso o kithangana kyexile muya ni kubhita, abhange madivulu amukwá. Divulu dyebhi dyakukwatekesa kwijiya ni kuzola o Tata yetu ya dyulu? O kwila o divulu “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Kuijiia Kuambata ku Muenhu ua Kalelaku, Mu Kidi Ihi i Longa o Bibidia?, Ihi i Tu Longa o Bibidia?, inga o divulu dyetu dya ubhe, Sanguluka Katé Kuhádya ni Hádya! O madivulu oso yá a abhange phala kutukwatekesa kubhanga maxibulu. Yene mwene itwabhindamene mu kithangana kyoso kya a bhange.

11. Mukonda dyahi kima kyambote etu enyoso kutambula o kudya mu nzumbi?

¹¹ O yó amesena kwijiya o kidi, k’ene ngó abhindamene o kudya kwa nguzu mu nzumbi. Etwenyoso twabhindamena. Poxolo Phawulu wasoneka: “O kudya kwa nguzu kwatokala ku athu akulu kyá.” Phawulu wabandekesa mukwamba kwila o kudya kuku kwanda tukwatekesa “kutungula kyoso kyawabha mu kiki kyayibha.” (Jih. 5:14) Mu izuwa yiyi, kitena kubhonza kubelesela o itumu ya Jihova mukonda atukondoloka ku athu avulu ala ni ukexilu wayibha wa mwenyu. Maji Jezú watulongo o ima itwabhindamena phala kukolesa o kixikanu kyetu. O kudya kuku kutunda mu Mak’â Nzambi, o Bibidya. Ni kitendelesu kya Jezú, o kimbadi kya fiyele kyene musokejeka ni kuwanena o kudya kuku mu nzumbi.

12. Kala Jezú, kyebhi kitwene mubhana kijingu ku dijina dya Nzambi?

¹² Kala Jezú, etu twene mubhana o kijingu kyatokala, ku dijina dya Nzambi. (Nzwá 17:6, 26) Mu kifika, ku muvu wa 1931 amateka kutwixana kala tu Jimbangi ja Jihova, mukubhanga kiki twalondekesa kwila o dijina dya Nzambi dyala ni valolo yadikota phala etu, ni kwila twamesenene kuma o athu atwijiya bhukaxi ka dijina dya Tat’etu ya dyulu. (Iza. 43:10-12) Tunde mu mbeji ya Kamusasadi ka muvu wenyó, o dijina dya Nzambi dyene mu moneka mu kapa ya mulangidi. Ku mbandu yamukwá, o Bibidya ya Mundu Wobhe yene muta o dijina dya Nzambi mu ididi yatokala. Ki yadifu ni Jibibidya ja jingeleja jamakutu, jene mukatula o dijina dya Jihova!

JEZÚ WAMUKWENDESA O AKAYEDYÊ

13. Ihi ikuxikinisa kwila lelu Jezú wamukalakala ni “kimbadi kya fiyele kya dimuka”? (Nzwá 6:68)

¹³ Bhukaxi ka “kimbadi kya fiyele kya dimuka,” Jezú wene mubhanga yoso phala o mbandu ya kilunga mu ixi, itena kusanzumuna o ubhezelu wa kidi. Kyebhi ki udivwa mukubhanga mbandu ya kilunga? Phala kutambwijila, nange utena kuxinganeka mu izwelu ya poxolo Phetele, kyoso kyambela Jezú: “Twanda vutuka kwa nanyi? Éye wala ni maka a mwenyu wakalelaku.” (Nzwá 6:68) Kwebhi kutweji kala lelu, se kitweji kala mu kilunga kya Jihova? Kidistu wabhange yoso phala tutene kukala ni ima yoso itwabhindamena phala kusuluka kukala ni kixikanu kwa Nzambi. Mwene we utulonga kuboka o njimbu yambote ni uhete woso. Ku mbandu yamukwá, mwene utukwatekesa we kukala ni “ukexilu wa ubhe,” phala tutene kusangulukisa Jihova.—Efe. 4:24.

14. Mbote yahi iwene mukatula mukubhanga mbandu ya kilunga kya Jihova mu kithangana kiki kya uhaxi wa COVID-19?

¹⁴ Jezú ubhana itendelesu ya unjimu mu ithangana ya ibhidi. O mbote ya itendelesu yiyi, yadimonekena kyoso kyamateka o uhaxi wa COVID-19. Kyoso athu avulu ku mundu kejidile se ihi yejibhanga, Jezú wabhange yoso phala tutambule o itendelesu yatokala phala kudilanga. Atutendelesa kuzwata jimaskara kyoso kitukala mu ididi mwala athu avulu ni kudisandula ku athu. O tufunga a atendelesa kudizwelesa ni athu oso mu kilunga mba kwaxinda, ni kwijiya se ihi yabhingi phala kudilanga, kwijiya o sawidi yâ ni kwakwatekesa kuzukama dingi kwa Jihova. (Iza. 32:1, 2) Twatambula we itendelesu yengi ni kiswinisu bhukaxi ka jihundu ja ubhe ja Kibuka Kya Utuminu.

15. Itendelesu yebhi yabhana o kimbadi kya fiyele yalungu ni o yônge ni kuboka, mu kithangana kya COVID-19, ni mbote yahi yejila mukubhanga kiki?

¹⁵ Mu kithangana kya uhaxi yú, twatambula we itendelesu yalungu ni kyebhi kitwejibhanga o yônge ni kikalakalu kya kuboka. Ni lusoso-lwoso twamateka kumona o yônge yetu ya kilunga, yônge ya ilunga ni yamakota bhukaxi ka jividyukonferensya mba internete. Twamateka we kubhana umbangi wavulu bhukaxi ka mikanda ni mitelembe yakafwetele. Jihova wabesowala o nguzu yetu. Jifiliyale javulu asoneka kwila, o aboki mu jixi jâ adibandekesa. Mu kidi avulu ala ni misoso iswinisa, yalungu ni kithangana kiki.—Tala o kaxa “Jihova Ubesowala o Ukunji Wetu.”

16. Etu tutena kudyelela mu ihi?

¹⁶ Avulu nange abanzele kwila o kilunga kyexile mutubhana itendelesu yavulu yalungu ni Uhaxi wa COVID-19, edile kala exile muvudisa o ima. Maji kyoso o kithangana kyexile muya ni kubhita, a mono kwila o itendelesu itwexile mutambula, yexile mwene itendelesu ya unjimu. (Mat. 11:19) Kyoso kituxinganeka mu ukexilu wa henda wa Jezú wa kukwendesa o mundu wê, tu dyelela ni kidi kyoso kwila kiza ki kizé ku hádya, Jihova ni Mon’ê wa kazola anda kala netu.—Tanga Jihebelewu 13:5, 6.

17. Kyebhi ki udivwa mukukala ni Jezú kala o mutwameni wé?

¹⁷ Etu twasanguluka kyavulu mu kwijiya kuma Jezú mwéne o mutwameni wetu! Tubhanga mbandu ya kilunga kimoxi mwala athu ala ni maukexilu kadifu, atokala mu jixi javulu, azwela we madimi avulu. Etu twene mutambula itendelesu yavulu itunda mu Mak’â Nzambi ni kwila twene mutambula we milongi itwabhindamena phala kubhanga kyambote o ukunji wetu. Kala muthu mudyetu a mutulonga kukala ni ukexilu wa ubhe, a mutulonga we kudizola mudyetu. Sé phata tusanguluka kyavulu mukukala ni Jezú kala o mutwameni wetu!