Eye Utena Kusanguluka mu Kidi

1. Mukonda dyahi twatokala kwijiya Nzambi phala kusanguluka mu kidi?

O KUSANGULUKA kwa kidi ki kulombolola kuzediwa ngó mu kakithangana, kana. O kusanguluka kubhanga mbandu mu kifwa kya muthu. Jezú Kidistu wajimbulula o maka enyá mu Diskulusu dyabhange ku Mulundu. Mwene wambe: “Azediwa yó ejiya kwila abhindamena Nzambi.” (Mat. 5:3) Jezú wejidile kuma o athu a abhange ni hanji yavulu phala kwijiya ni kubheza Jihova Nzambi, o Mubhangi wâ. Kuma Jihova, o “Nzambi ya sanguluka,” o abhezi’ê atena we kusanguluka.—1 Ti. 1:11.

2-3. (a) Kala kyambe Jezú, ananyi dingi atena kusanguluka? (b) Ihi itwandadilonga mu milongi yiyi? O kiki kyandatukwatekesa kyebhi?

² O kwila twandasanguluka ngó kyoso kitukamba kukala ni maka? Kana. Mu diskulusu dyabhange ku Mulundu, Jezú wazwela kima kitubhangesa kudiwana. Mwene wambe kwila katé mwene “yó a dila”—nange mukonda dya kudivwa wila ala ni kikuma mukonda dya ituxi yatele mu ukulu mba mukonda dya kudibhana ni maka ku mwenyu, atena kusanguluka. Jezú Kidistu wambe we kwila o “yó a mwa zukutisa mukonda dya kubhanga o ima yayuka,” mba yó a mwa “lokalala” mukonda dya kukala akayedi’ê, atena we kusanguluka. (Mat. 5:4, 10, 11) Maji kyebhi o muthu udibhana ni ibhidi yoso yiyi kyatena kusanguluka?

³ Jezú wexile mutulonga kwila, o kusanguluka kwa kidi ki kulombolola kukamba ibhidi ku mwenyu, maji kwijila mu kwijiya kwila twabhindamena Nzambi ni kuzukama kwa mwene. (Tiy. 4:8) Kiki kibhita kyebhi? Mu milongi yiyi twandadilonga ima itatu yandatukwatekesa kusanga o kusanguluka kwa kidi.

TANGA NI KUDILONGA O BIBIDYA

4. Kyebhi o kima kitwatokala kubhanga phala kusanguluka? (Jisálamu 1:1-3)

⁴ KIMA 1: Phala kusanga o kusanguluka kwa kidi, twatokala kutanga ni kudilonga o Bibidya. O athu ni yama abhindamena kudya mu xitu phala kukala ku mwenyu. Maji o athu ene ngó abhindamena o kudya mu nzumbi. Mukonda dya kiki, Jezú wambe: “O mwenyu wa muthu ki wijila ngó ku mbolo, maji mu maka moso matunda mu dikanu dya Jihova.” (Mat. 4:4) Kyenyiki, kitwatokala kubhita kizuwa kimoxi sé kutanga o Mak’â Nzambi, o Bibidya. O mukwa jisálamu wambe: ‘Mwene-phe o ngalasa yê u i sanga mu ngonge ya Jihova, o ngonge yê mwene u itanga mu mwanya ni mu usuku.’—Tanga Jisálamu 1:1-3.

5-6. (a) Ihi itutena kudilonga mu Bibidya? (b) Kyebhi o kutanga o Bibidya kutukwatekesa?

⁵ Kuma Jihova watuzolo, mwene watulondekesa bhukaxi ka Bibidya se ihi itwatokala kubhanga phala kusanguluka ku mwenyu. Bhukaxi ka Bibidya twadilongo se mukonda dyahi twala ku mwenyu, twadilongo we se ihi itwatokala kubhanga phala kuzukama kwa Nzambi ni ihi itwatokala kubhanga phala mwene kuloloka o ituxi yetu. Twadilongo o kidyelelu kyalungu ni hádya. (Jel. 29:11) O maka yá utwadilongo mu Bibidya atusangulukisa kyavulu!

⁶ Kala kitwejiya, mu Bibidya mwala itendelesu yavulu itukwatekesa mu kizuwa ni kizuwa. Kyoso kitubelesela o itumu ya Bibidya, tusanguluka dingi. Se uluwala mukonda dya ibhidi imoneka ku mwenyu, tanga o Mak’â Nzambi, wenda ni kwaxinganeka. Jezú wambe: “Azediwa yó évwa o maka ma Nzambi, anga abelesela!”—Luk. 11:28.

7. Ihi itena kutukwatekesa kukatula dingi mbote mu kitangelu kya Bibidya?

⁷ Kyoso ki utanga o Mak’â Nzambi, katula kithangana phala utene kukatula mbote mu milongi iwatange. Mu kifika, xinganeka kwila sayi muthu ukulambela o kudya kuwawabhela dingi. Kuma eye wamesena kyá kutunda mba wamuxinganeka mu ima yengi, eye udya ni lusolo lwoso, ki utena dingi kwivwa o kutowala kwa kudya. Kyoso ki uzubha kudya, utonginina kwila eye wadi ni lusolo lwoso, nange eye watokalele kudya bhofelebhofele. O kwila kiki kyabhiti kya n’eye? Kiki kitena we kubhita kyoso kitwamutanga o Bibidya ni lusolo lwoso, kitutena kutendela se ihi yamutulonga Jihova. Katula kithangana phala kutanga o Mak’â Nzambi, xinganeka mu athu otumbule mu misoso ya Bibidya ni mu izwelu yâ. Se ubhanga o ima yoso yiyi, wandasanguluka dingi mu kutanga o Bibidya.

8. Kyebhi “o kimbadi kya fiyele kya dimuka” kya mukumbidila o kikalakalu kyê? (Tala we kulwiji.)

⁸ Jezú wasolo “o kimbadi kya fiyele kya dimuka,” phala kutubhana o kudya mu nzumbi mu kithangana kyatokala. (Mat. 24:45) Etu twene mutambula kudya kwavulu mu nzumbi.b O kudya kwoso kutubhana o kimbadi kya fiyele kutunda mu Bibidya. (1 Te. 2:13) O kudya mu nzumbi kutukwatekesa kwijiya o ibanzelu ya Jihova yosoneke mu Bibidya. Mukonda dya kiki tutanga o Mulangidi, o Despertai! ni madivulu ala mu sayte jw.org. Etu tusokejeka we o yonge ya kaxi ka semana ni ya disukilu dya semana. Tutala we o JW Broadcasting^® mu jimbeji joso. Se tusuluka mu kutanga ni kudilonga o Bibidya, twandatena kubhanga o kima kya kayadi kyandatukwatekesa kusanguluka mu kidi.

BELESELA O IJILA YA JIHOVA

9. Kyebhi o kima kya kayadi kitukwatekesa kusanguluka ku mwenyu?

⁹ KIMA 2: Phala kusanguluka ku mwenyu, twatokala kubelesela o ijila ya Jihova. O mukwa jisálamu wasoneka: “Wa zediwa o muthu yó woso wa kwata woma wa Jihova, mukwa kwenda jinga mu ʼnjila jê.” (Jisá. 128:1) O kukala ni woma wa Jihova kulombolola kumuxila kyavulu ni kukamba kubhanga o ima imuluwalesa. (Jisa. 16:6) Mu kyenyiki, tusulukyenu mu kubhanga yoso ni yoso phala kubhanga o ima yayuka bhu pholo ya Jihova ni kuxisa o ima yamu ibhila. (2 Ko. 7:1) Se tusuluka mu kubhanga o ima yazolo Jihova ni kudituna o ima yazembe mwene, twandasanguluka ku mwenyu.—Jisá. 37:28; 97:11; Lom. 12:10.

10. Kala kyamba Loma 12:2, ihi itwatokala kubhanga?

¹⁰ Tanga Loma 12:2. Nange o muthu wejiya kwila Jihova mwene ngó wala ni ungana wa kuzwela se kima kyebhi kyayibha ni kyebhi kyawabha, maji mwene watokala we kusola ku muxima kubelesela o itumu ya Nzambi. Mu kifika, nange o muthu wejiya kwila o jinguvulu ene ala ni ungana wa kuzwela se kyebhi o endexi a makalu, kyatokala kwenda mu ikoka yamakota. O muthu yú kamesena kubelesela o kijila kiki kya jinguvulu. Mukonda dya kiki mwene wendesa ni lusolo lwoso o dikalu dyê. Kyene we kimoxi n’etu, bhu kaxi ka wendelu wetu, tulondekesa kwila twadyelela ni kidi kyoso kuma o kubelesela o ijila ya Jihova kyene o kima kyabetakota ku mwenyu wetu. (Jisa. 12:28) Kiki kyene kyexile mu divwa sobha Davidi. Mu kiki mwene wambe yalungu ni Jihova: “Eye u [ng’idikisa] njila i bheka kwala mwenyu, kwala kusanguluka kwa mbote bhu pholo yé; o ku lukwaku lwé lwa kudya sayi-ku ima ya vondadi ki i kumu dingi.”—Jisá. 16:11.

11-12. (a) Kyoso kitukala ni maka mba kituluwala, twatokala kudilanga phala kitubhange ihi? (b) Kyebhi o izwelu yala mu Filipe 4:8 itena kutukwatekesa kusola kyambote o itonokenu yetu?

¹¹ Kyoso kitudibhana ni ibhidi mba kyoso kituluwala, twabhingi kubhanga kima kitena kutukwatekesa kukamba kuxinganeka mu ibhidi itwamudibhana nayu ku mwenyu. Kima kyambote kubhanga kiki, maji twabhingi kudilanga phala kitubhange kima kyazembe Jihova.—Efe. 5:10-12, 15-17.

¹² Mu mukanda wê wasonekena akwa Filipe, poxolo Phawulu wadimuna o Jikidistá kuxinganeka mu ima “yoso yayuka, . . . yazele, . . . yawabha, yatokala.” (Tanga Filipe 4:8.) Sumbala poxolo Phawulu kakexile muzwela yalungu ni itonokenu, maji o ima yasoneka mwene itukwatekesa kusola kyambote o itonokenu yetu. Fikisa kubhanga kiki: Mu velusu yiyi, mu mbandu mwala o izwelu “ima” mba “yoso,” tulamu o izwelu “mimbu,” “jifilime,” “jinovela,” mba “jividyu game.” Kubhanga kiki kutena ku kukwatekesa kutongolola o ima yawabhela Nzambi ni ima yamu ibhila. Etu twamesena kubelesela o ijila yayuka ya Jihova. (Jisá. 119:1-3) Ni kitongolwelu kyazele twandatena kubhanga o kima kya katatu, kyanda tukwatekesa kusanguluka mu kidi.—Ika. 23:1.

KU MWENYU WÉ TA O UBHEZELU WA JIHOVA KU PHOLO

13. Kyebhi o kima kya katatu kyandatukwatekesa kusanguluka mu kidi? (Nzwá 4:23, 24)

¹³ KIMA 3: Ku mwenyu wé ta o ubhezelu wa Jihova ku pholo. Jihova mwéne watubhange, kyenyikiphe twatokala kumubheza. (Dij. 4:11; 14:6, 7) Mu kiki, o kima kyabetakota ku mwenyu wetu kyatokala kukala kubheza Jihova mu ukexilu uxikina mwene, “mu nzumbi ni mu kidi.” (Tanga Nzwá 4:23, 24.) Twamesena kwila o nzumbi ikôla ya Nzambi itwendese phala o ibhangelu yetu yoso ilunge ni ima itwene mudilonga mu Bibidya. Twatokala kuta ku pholo dya mwenyu wetu o ubhezelu wa Jihova, né mwene se twatungu mu ixi mwafidisa o kikalakalu kya Jimbangi ja Jihova. Mu kithangana kiki, 100 ya jiphange ja mala ni ja ahatu ndenge, ala mu kaleya mukonda dya kukala ngó Jimbangi ja Jihova.c Né kiki ni kusanguluka kwoso, ene abhanga yoso yatena phala kusamba, kudilonga ni kutangela akwâ yalungu ni Nzambi ni Utuminu wê! Kyoso kyatulokalala mba kyatuzukutisa, tutena kusanguluka mu kwijiya kuma Jihova wala n’etu, yu wandatubesowala we.—Tiy. 1:12; 1 Ph. 4:14.

MUTHU WASIDIVILA JIHOVA NI KUSANGULUKA KWOSO SUMBALA NI IBHIDI

14. Ihi yabhiti ni phange, munzangala mu ixi ya Tadjiquistão? Mukonda dyahi mwene wabhiti ni ibhidi yiyi?

¹⁴ Jiphange jetu javulu adibhana ni ibhidi ku mwenyu, maji ene asanguluka mu kidi mukonda abhange o ima itatu itwadilongo kindala. Sayi munzangala mukwa ixi ya Tadjiquistão amwixana manu Jovidon Bobojonov wala ni 19 dya mivu, waditunu kuya mu usoladi. Tala yabhiti ni mwene mukonda dya maka yá. Mu kizuwa kya 4 kya mbeji ya Kamusasadi ka 2019, amukatula mu inzo yê ni nguzu yoso amute mu kaleya mu jimbeji. Kwenyoko amutalatala kala kifumbe. O dimanda didi adizwela mu jixi javulu. Athu azwela kwila amubeta, amujijidika kubhanga kikutu kya kuzokela o ixi yê kabasa kima kibhita ni kuta izwatu ya masoladi. Kyabhiti o ima yiyi o afundixi ambe kwila mwene watele kituxi, amutumikisa ku kididi kya kubhanga ikalakalu yabhonzo kyavulu. Maji ku pholo dya kwenda o mwenexi wa ixi wamuloloka, yu watumine kumukatula mu kaleya. Mu ibhidi yoso yiyi, manu Jovidon wakolokotele fiyele kwa Jihova ni kusanguluka kwoso. Kyebhi? Mu kusuluka mu kutanga ni kudilonga o Mak’â Nzambi.

15. Kyebhi manu Jovidon kyasuluka mu kudilonga yalungu ni Jihova?

¹⁵ Kyoso kyexile mu kaleya, manu Jovidon wasuluka mu kudilonga yalungu ni Jihova, né mwene kyoso kyamukambele o Bibidya ni madivulu amukwá. Kyebhi mwene kyabhange kiki? O jiphange akexile kumwambatela o kudya, akexile musoneka o velusu ya kizuwa mu jisaku ja kudya. Mu kubhanga kiki, mwene watenene kutanga o Bibidya ni ku ixinganeka izuwa yoso. Kyoso kyamukatula mu kaleya, mwene wambe kiki ku athu kadibhele hanji ni izukutisu ya makota: “Kindala kiki, kyene o kithangana kitwatokala kubhanga yoso ni yoso phala kukala ni kwijiya kwavulu kwalungu ni Jihova mu kutanga o Maka mê ni madivulu metu.”

16. Manu Jovidon wexile muxinganeka mu ima yahi?

¹⁶ Phangyetu manu Jovidon wabelesela o ijila ya Jihova. Mwene kexile mubanza mu ima yayibha, kabhange we o ima yayibha. Maji wadikwatenena kwa Jihova ni mu ima yazolo Mwene. Manu Jovidon wawabhelele kutala o ibhangelu ya Nzambi. Mu imene yoso wexile mubalumuka ni mimbu ya jinjila. Mu usuku wexile mutala o mbeji ni jithethembwa. Mwene wambe: “O maujitu yá a Jihova exile mungisangulukisa ni kungiswinisa we.” Kyoso kitusakidila o maujitu oso atubhana Jihova ni milongi yoso ya Bibidya, tusanguluka dingi. O kusanguluka kuku kutukwatekesa kukolokota.

17. Kyebhi o izwelu ya 1 Phetele 1:6, 7 yalungu ni muthu wamubhita mu izukutisu kala manu Jovidon?

¹⁷ Manu Jovidon wate we kupholo dya mwenyu wê o ubhezelu wa Jihova. Mwene wejidile kwila, watokalele kukolokota fiyele kwa Jihova. Jezú wambe: “Mu kubheza kikale ubheza ngó Jihova Nzambi yé, mwéne ngó u mu sidivila.” (Luk. 4:8) O jikabhitangu ni masoladi amukwa amesenene kwila manu Jovidon weha kubheza Jihova. Mwene wakexile musamba usuku ni mwanya ni nguzu yoso phala kukolokota fiyele kwa Jihova. Né mwene ni ibhidi yoso yadibhana nayu mwene wasuluka mu kubheza Jihova. Kindala kiki, mwene wasanguluka kyavulu mukonda wala ni kima kakexile nakyu ande dya kumwambata mu kaleya ni kumubeta. Kindala mwene wala ni kixikanu kyakolo, mukonda o kixikanu kyê akilola kyá.—Tanga 1 Phetele 1:6, 7.

18. Ihi itwatokala o kubhanga phala kusuluka ni kusanguluka ku mwenyu?

¹⁸ Jihova wejiya kyambote yoso itwabhindamena phala kusanguluka mu kidi. Se ubhanga o ima itatu ibhekela o kusanguluka kwa kidi, wandatena kusanguluka né mwene kyoso ki wandadibhana ni izukutisu. Mu kiki, eye we wandazwela kiki: “Azediwa mwene o athu ala ni Jihova kuma Nzambi yâ.”—Jisá. 144:15.