“Jikulenu o Mesu, Mudilange!”

1. Ihi yambe Jezú ku maxibulu mê yalungu ni dizubhilu, yú wa adimuna phala kubhanga ihi?

MU KUKAMBA tuyizuwa ande dya Jezú kufwa, o mxibulu mê a mwibhula: “Kyebhi o kijimbwete . . . kya dizubhilu dya mundu?” (Mat. 24:3) O maxibulu nange a mesenene kwijiya se thembu kuxi kyeji bhwika o mbanza ya Jeluzaleme ni tembulu. Mu kwa tambwijila Jezú wazwela yalungu ni kibwikilu kya mbanza ya Jeluzaleme ni tembulu yé, yú wazwela we yalungu ni “dizubhilu dya mundu” yu. Mu kuzwela yalungu ni dizubhilu, Jezú wambe: “Yalungu ni kizuwa mba kithangana kyenyókyo, sé-ku muthu wa k’ijiya, né o jianju ku dyulu, né o Mona, maji Tata ngó wa k’ijiya.” Mwene anga wadimuna o maxibulu mê phala ‘kwaluka’ ni ku ‘kolokota mu kudilanga’.—Mál. 13:32-37.

2. Mukonda dyahi o Jikidistá ku hama yadyanga atokalele kudilanga mu ithangana yoso?

² Phala kubhuluka, o Jikidistá ku hama yadyanga, atokalele kudilanga mu ithangana yoso. Jezú watangela o maxibulu mê phala kukolokota mu kutonginina o kithangana kyoso kyejibwika o mbanza ya Jeluzaleme ni tembulu yé. Mwene wambe: “Kyoso ki mu mona ifuxi ya masoladi akondoloka o mbanza ya Jeluzaleme, mwijiya kwila, o kibwikilu kyê kyazukama. Mu kithangana kyenyókyo, o maxibulu a tokalalele kukayela o kitendelesu kya Jezú, ni ‘kumateka kulengela ku milundu.’ (Luk. 21:20, 21) Yó a belesela o kitendelesu kya Jezú a bhuluka kyoso o akwa Loma kyabwikisa o mbanza ya Jeluzaleme.

3. Ihi itwandadilonga mu milongi yiyi?

³ Twatungu ku dizubhilu dya mundu yu. Mu kiki, twatokala kudilanga ni kwaluka we. Mu milongi yiyi, twandadilonga kwila mu kumona o izulukutu ku mundu yu, twatokala kudilanga phala kituzwele kwila o dizubhilu dyandakwiza mu kizuwa mba ku muvu wa nganji. Twanda dilonga we, kyebhi ki tutena kuditonginina mudyetu ni kyebhi ki tutena kukalakala kyambote ni kithangana ki twala nakyu.

DILANGE KYOSO KI UYA NI KUTALA O IZULUKUTU YA MUNDU

4. Mukonda dyahi twabhingi kumona se kyebhi o izulukutu ya mundu yu yamukumbidila o ikanenu ya Bibidya?

⁴ Twene mumona kwila o izulukutu ya mubhita mu ngongo yamukumbidila ikanenu ya Bibidya. Mukonda dya kiki, sayi bhabha twene muyitala ku mutelembe. Mu kifika, Jezú wazwela ima yavulu itukwatekesa kwijiya kwila o dizubhilu dya mundu yú wa Satanaji dyazukama. (Mat. 24:3-14) Poxolo Phetele watuswinisa phala tutonginine o ikanenu ya Bibidya phala o kixikanu kyetu kikole dingi. (2 Ph. 1:19-21) O divulu dyasukina dya Bibidya dimateka ni izwelu yiyi: “Dijingunwinu dya Jezú Kidistu dya mubhana Nzambi phala kulondekesa ku abhik’ê o ima yanda bhita ku hádya.” (Dij. 1:1) Mukonda dya kiki, twamesena kwijiya yalungu ni izulukutu yamubhita mu ngongo ni kwijiya se kyebhi yene yamukumbidila o ikanenu ya Bibidya. Etu we tukala ni hanji yakuzwela o ima yiyi ni akwetu.

5. Mukumona o izulukutu ya mundu yu, kitutokala kubhanga ihi? Maji phe ihi itwatokala kubhanga? (Tala we o jifoto)

⁵ Maji mu kuzwela yalungu ni ikanenu ya Bibidya, kitutokala kuzwela kuma o izulukutu ya mundu yu, ilondekesa kwila o Alumajedone yandakwiza mu kizuwa kya nganji. Mukonda dyahi kitutokala kubhanga kiki? Mukonda se tubhanga kiki twandabhangesa o jiphange jetu mu kilunga kudimwangununa. Mu kifika, nange twivwa o jinguvulu kuzwela kwila andabhatula o maka ala nawu ni kubheka o kutululuka ni kubatama. Muveji dya kuzwela kwila o izwelu yiyi yamukumbidila o kikanenu kya 1 Tesalonika 5:3, twatokala kwijiya yebhi o milongi yasukina itwatambula yalungu ni maka enya. Kyoso ki tuzwela o ima yala mu madivulu ene mutubhana o Kilunga kya Jihova, tukwatekesa o kilunga kukala ni “ukexilu umoxi wa kuxinganeka.”—1 Ko. 1:10; 4:6.

6. Ihi itudilonga mu divulu 2 Phetele 3:11-13?

⁶ Tanga 2 Phetele 3:11-13. Poxolo Phetele ututangela se mukonda dyahi twatokala kudilonga o ikanenu ya Bibidya. Mwene ututangela kwila twatokala kusuluka mu “kuxinganeka o kizuwa kya Jihova.” Mukonda dyahi? Etu kitubhanga kiki mukonda twamesena kwijiya ‘o kizuwa ni ola’ kyoso Jihova kyandabheka o Alumajedone, maji tubhanga kiki phala kungastala o kithangana kyetu ni unjimu ni tukale “ni wendelu wazele, ni kubhanga ima iximanesa Nzambi.” (Mat. 24:36; Luk. 12:40) Mu izwelu yengi, twatokala kukala ni wendelu wambote ni kubhanga yoso mu sidivisu ya Jihova, mukonda dya henda yetu kwa mwene. Phala kubhanga kiki twatokala kuditonginina mudyetu.

IHI ILOMBOLOLA O KUDITONGININA MUDYETU?

7. Kyebhi ki tulondekesa kwila twamudilanga? (Luka 21:34)

⁷ Jezú watangela o maxibulu mê kwila, katokalele kutonginina ngó o izulukutu, maji atokalele kuditongininina we mudyâ. Kyene kya zwela Jezú mu divulu dya Luka 21:34. (Tanga.) Xinganeka mu izwelu ya Jezú: “Dilangyenu.” O muthu udilanga wejiya kyambote o ima itena kuta o ukamba wê ni Jihova mu kilwezu. Mu kiki mwene ubhanga yoso phala kulenga o ima yeniyi. Mukubhanga kiki mwene unagenena mu henda ya Nzambi.—Jisa. 22:3; Jud. 20, 21.

8. Ihi yatendelesa poxolo Phawulu ku Jikidistá?

⁸ Poxolo Phawulu watendelesa o Jikidistá phala kudilanga mudyâ. Mu kifika mwene watendelesa o Jikidistá mu mbanza ya Efezu: “Dilangyenu phala ki mwende kala mu yôwa, maji mwenda kala mu jinjimu.” (Efe. 5:15, 16) Mu ithangana yoso Satanaji usota kuzanga o ukamba wetu ni Jihova, maji o Bibidya itudimuna phala tu ‘tongolole yebhi o vondadi ya Jihova’ phala phe tutene kutolola o mibhetu yoso ya Satanaji.—Efe. 5:17.

9. Kyebhi ki tutena kutongolola yebhi o vondadi ya Jihova phala etu?

⁹ O Bibidya kiyijimbulula o mibhetu yoso ita mu kilwezu o ukamba wetu ni Jihova. Sayi bhabha tukala ni maka utwabhingi kubatula, tutokwesa mu Mikanda ikôla maji kitusangemu velusu mba kitendelesu kyamuzwela yalungu ni maka utwala nawu. Mu ithangana kala yiyi, twatokala kusola mudyetu mwene, maji phala kusola ni unjimu twatokala kutongolola, “o vondadi ya Jihova.” Phala kukala ni uhete yu wakutongolola, twabhingi kutanga o Mak’â Nzambi ithangana yoso ni kuxinganeka mu ima yalamu. Kyoso ki tutendela dingi yebhi o vondadi ya Jihova ni kukala ni kilunji kya Kidistu, twandasola o ima ni unjimu, né mwene se kitwala ni ijila itutangela itwatokala kubhanga. (1 Ko. 2:14-16) Sayi mibhetu kiyibhonzo phala kuyimona, maji yakamukwa ibhonza mwene.

10. Ilwezu yebhi itwatokala o kulenga?

¹⁰ Twatokala kulenga o ilwezu kala yiyi: O diyala kutonoka ni hanji ya muhatu mba o muhatu kutonoka ni hanji ya diyala kala adizolo, kunwa kyavulu, kudya kyavulu, kuzwela ima ixingisa o athu mba ya abhangesa kudivwa kyayibha, kutala jifilime ja usweya, kutala ufusa ni ima yamukwa. (Jisá. 101:3) O nguma yetu Dyabhu, ithangana yoso wamusota ndunge phala kuta mu kilwezu o ukamba wetu ni Jihova. (1 Ph. 5:8) Se kitudilange, mwene utena kukuna mu kilunji kyetu o lwimbi, o kukamba kukala muthu wakidi, difuba, kudizemba, kudizangeleka ni kubhaka phonzo. (Nga. 5:19-21) Sayi bhabha, kudimatekenu o jihanji jiji, kijikala ni nguzu ku mixima yetu. Maji se kitubhange yoso ni yoso phala kujikatula, jene jandakula kala o minya itena kukula mu njaludim ni kubheka maka.—Tiy. 1:14, 15.

11. Mubhetu webhi wabhonzo ku utongolola utwatokala kulenga, ni mukonda dyahi?

¹¹ Mubhetu umoxi wabhonzo ku utongolola, o kudilunga ni athu ayibha. Xinganeka mu kifika kiki. Eye ukalakala ni muthu ki Mbangi ya Jihova. Eye wamesena kwila mwene utala kyambote o Jimbangi ja Jihova, mu kiki, eye umulondekesa henda, uya ni kumukwatekesa we. Sayi bhabha eye uxikina kudimosola né kumoxi. Kupholo dya kwenda eye uya ni kudya né ithangana yoso. Sayi bhabha, mwene uzwela ima yalungu ni undumbu. Kudimatekenu eye uyibhila o izwelu yiyi. Kupholo dya kwenda, uya ni kuzola o izwelu yenyóyo, kifwa, umateka kuyiwabhela dingi. Kwiza o kizuwa, o koleka yé ukwixana phala kunwa uhôlwa kudisukilu dya salu, eye anga uxikina. Mu kusukaku, yoso ikutangela o koleka yé, eye umona kwila yawabha, uya ni kuyixikina. Kikubhiti ithangana yavulu phala kumateka kubhanga ima yayibha kala o koleka yé. Mu kidi, twatokala kukala tu akwa henda ni kuxila o athu oso, maji twatokala kulembalala kwila o yó utubhita nawu o kithangana, atufunyisa. (1 Ko. 15:33) Jezú watendelesa kwila twatokala kudilanga mudyetu. Se tubhanga kiki, kitwandabhita ithangana yavulu ni yó kabelesela o itumu ya Jihova. (2 Ko. 6:15) Twanda tena kumona o kilwezu ni kukilenga.

KALAKALA KYAMBOTE NI KITHANGANA KYÉ

12. O maxibulu a Jezú atokalele kubhanga kikalakalu kyebhi kyoso kyexile mukingila o kibwikilu kya mbanza ya Jeluzaleme ni tembulu yê?

¹² Jezú wamesenene kwila o maxibulu mê akalakala ni kuswina kwoso, kyoso kyexile mukingila o kibwikilu kya mbanza ya Jeluzaleme ni tembulu yê. Jezú wa abhana kikalakalu phala kubhanga. Mwene wa atumu kuboka o njimbu yambote, “mu Jeluzaleme, mu Judeya yoso, mu Samadiya, katé ni ku maxokololo a jixi.” (Ika. 1:6-8) Kiki kyexile kikalakalu kya katunda! Mu kudibhakula mu kikalakalu kiki, ene ejitena kukalakala kyambote ni kithangana kyâ.

13. Mukonda dyahi twatokala kukalakala kyambote ni kithangana ki twala nakyu? (Kolose 4:5)

¹³ Tanga Kolose 4:5. Yalungu ni kudilanga mudyetu, twabhingi kuxinganeka kyambote kyebhi ki twa mukalakala ni kithangana ki twala nakyu. Mukonda etwenyoso tutena kubhita ni ima yayibha. (Ndongixi 9:11) Mu kithangana ni mbandu tutena kufwa.

14-15. Kyebhi ki tutena kukalakala kyambote ni kithangana kyetu? (Jihebelewu 6:11, 12) (Tala we o foto.)

¹⁴ Twatokala kukalakala kyambote ni kithangana kyetu mukubhanga o vondadi ya Jihova ni mukukolesa o ukamba wetu ni mwene. (Nzw. 14:21) Twabhingi kukumbidila o kitendelesu kiki kya Bibidya: “Swinenu, mu kolokote, mukale jinga ni ima yavulu phala kubhanga mu kikalakalu kya Ngana.” (1 Ko. 15:58) Kyoso kyandabhixila o dizubhilu —kikale o dizubhilu dya mwenyu wetu mba dya mundu yu —kitwandadyela.—Mat. 24:13; Lom. 14:8.

¹⁵ Jezú wamusuluka mukukwatekesa o maxibulu mê, mu kikalakalu kya kuboka o njimbu ya Utuminu wa Nzambi mu ngongo yoso. Mwene wakumbidila o kikanenu kyê. Bhukaxi ka kilunga kya Jihova, Jezú utulonga kyebhi ki twatokala kuboka, utubhana we o jifalamenda ji twabhindamena phala kusanzumuna o ukunji wetu. (Mat. 28:18-20) Etu tubhanga o mbandu yetu mu kukalakala ni nguzu yoso mu kuboka ni kulonga o athu, ni kudilanga mudyetu kyoso ki tuya ni kukingila o dizubhilu dya mundu yu. Mu ku kumbidila o kitendelesu kyala mu Jihebelewu 6:11, 12, twatokala kudikwatenena mu kidyelelu kyetu “katé ku disukilu.”—Tanga.

16. Twatokala kusuluka mukubhanga ihi?

¹⁶ Jihova wasolo kyá o kizuwa ni kithangana phala kubwika o mundu wa Satanaji. Kyoso kyandabhixila o kizuwa kiki, Jihova wandakumbidila o ikanenu yoso yala mu Maka mê. Maji, sayi bhabha tutena kuxinganeka kwila o kizuwa kya Jihova kyamulaleka. Maji phe kala ki tulonga o Bibidya, o kizuwa kya Jihova ‘kikyanda laleka!’ (Haba. 2:3) Kyenyiki phe, tusuluke ‘mu kukinga kwa Jihova’ mukulondekesa kwila ‘twamukinga kwa Nzambi ya ubhulukilu wetu.’—Mik. 7:7.