Mukonda Dyahi Twabhingi Kukala ni Woma wa Jihova?

1-2. Kala kizwela Jisálamu 25:14, ihi itwatokala kubhanga se twamesena kukala ni ukamba wambote ni Jihova?

IDIFWA yebhi iwafika kwila yabeta kota mu ukamba? Nange weji zwela kwila, o makamba atokala kudizola ni kudikwatekesa mudya. Eye nange ki wejixinganeka kwila o woma kidifwa kyala ni valolo mu ukamba. Maji kala kilondekesa o velusu ya milongi yiyi, o yo amesena kukala ni ukamba wambote ni Jihova atokala kumukwatela “woma.”—Tanga Jisálamu 25:14.

² Kikale se twamusidivila kya Jihova mu mivu yavulu mba kana, etwenyoso twabhingi kumukala ni woma mu ukexilu wambote. Maji ihi ilombolola kukala ni woma wa Nzambi? Kyebhi kitutena kudilonga kukala ni woma wa Jihova? Ni ihi itutena kudilonga mu phangu ya Obadya, o mukunji wadikota Joyada, ni sobha Jowaji yalungu ni kukala ni woma wa Nzambi?

IHI ILOMBOLOLA KUKALA NI WOMA WA NZAMBI?

3. Jimbulula kyebhi o woma utena kutulanga.

³ Etu tukala ni woma wa kima se tumona kwila kyene kitena kutubhanga kyayibha. O woma yu utena kukala kima kyambote, utena kutubhangesa ku sola ni unjimu. Mu kifika, o kukala ni woma wakudibhala kitubhangesa kudilanga bengebenge se twamukwenda bhu kididi bhwaxanana. O woma wakudikwama utubhangesa kulenga o ilwezu. O woma wakuzanga o ukamba, utukwatekesa kudilanga phala ki tuzwele mba ki tubhange kima kiluwalesa kamba dyetu dya kazola.

4. Satanaji wamesena kutubhangesa ku xinganeka ihi yalungu ni Jihova?

⁴ Satanaji wamesena kwila tukala ni woma wayibha wa lungu ni Jihova. Mwene wamesena kutubhangesa kuxinganeka kala kyexile mu xinganeka Elifaji—kwila Jihova ithangana yoso ukala ni njinda, kindanda, wamesena kutukaxitikala, ni kwila seku muthu utena kumusangulukisa. (Jobe 4:18, 19) Satanaji wamesena kutukwatesa woma wa Jihova phala twehe kumu bheza. Phala kulenga o mubhetu yu twatokala kukala ni woma wambote wa Jihova.

5. Ihi ilombolola kukala ni woma wa Nzambi?

⁵ O kukala ni woma wa Nzambi kilolombola kumuzola kyavulu, ni kukamba kubhanga kima kyosokyoso kyeji zanga o ukamba wetu ni Mwene. O yu wene o woma wexile nawu Jezú. (Jih. 5:7) Ki kyalungile ni woma wa ku mubhana kaxitiku mba kumubhanga kyayibha kwa Jihova, kana. (Iza. 11:2, 3) Mu kidi mwene wazolele kyavulu Jihova ni kwila wamesenene kumubelesela. (Nzw. 14:21, 31) Kala Jezú etu tuxila kyavulu Jihova ni kumuximana, mukonda twejiya kwila mwene Nzambi ya henda, njimu, wayuka, wala ni kutena kwavulu. Twejiya we kwila Jihova watuzolo kyavulu, ni kwila o ima itubhanga itena kumusangulukisa mba imuluwalesa.—Jisá. 78:41; Jisa. 27:11.

DILONGE KUKALA NI WOMA WA NZAMBI

6. Mu ukexilu webhi ututena kudilonga kukala ni woma wa Jihova? (Jisálamu 34:11)

⁶ Etu ka tuvwala kya ni woma wa Jihova, twabhingi kudilonga kukalanawu. (Tanga Jisálamu 34:11.) Ukexilu umoxi wakubhanga kiki o kutonginina o ibhangelu. Kyoso kitutonginina o ibhangelu ya Jihova, tumona o unjimu we, o kutena kwe ni henda ye kokwetu. O kiki kitubhangesa we kumuzola dingi ni kumuxila. (Lom. 1:20) Sayi phange ya muhatu a mwixana Adrienne, wambe: “Kyoso kingimona o unjimu wa Jihova bhukaxi ka ibhangelu, ngitendela kwila mwene wejiya kyambote o ima yabetakota phala eme.” Mukonda dya kuxinganeka kyavulu ku maka ya, mwene wambe: “Kuma Jihova mubhangi wami, mukonda dyahi ngeji bhanga kima kyeji zanga o ukamba wami ni mwene? Eme ki ngamesena kubhanga kima kyosokyoso kizanga o ukamba wami ni Jihova”. Ihi i ubanza kukatula kithangana mu semana yiyi phala kuxinganeka mu ibhangelu ya Jihova? O kubhanga kiki kyanda kukwatekesa dingi kuzola Jihova ni kumuxila.—Jisá. 111:2, 3.

7. Kyebhi o misambu itena kutukwatekesa kukala ni woma wa Jihova?

⁷ Ukexilu wamukwa wa kubandekesa o woma wetu wa Jihova, o kusamba ithangana yoso. Ithangana yoso itusamba kwa Jihova tubeta kumwijiya dingi kyambote. Kyoso kitusamba kwa Jihova mu kumubhinga nguzu phala tutene kukolokota, tulembalala kwila mwene wala ni kutena kwavulu. Kyoso kitumusakidila mukonda dya sata yakukula ya Mon’e, tulembalala kwila Jihova watuzolo kyavulu. Kyoso kitudibhana ni kibhidi anga tudyonda kwa Nzambi phala kutukwatekesa kukitolola, tulembalala kwila mwene wala ni unjimu wavulu. O misambu kala yiyi, itukwatekesa kuxila kyavulu Jihova. Ibandekesa we o vondadi yetu ya kudituna kubhanga kima kyosokyoso kyeji zanga o ukamba wetu ni mwene.

8. Ihi yanda tukwatekesa kusuluka kukala ni woma wa Jihova?

⁸ Phala kusuluka mu kukala ni woma wa Nzambi twatokala kutanga o Bibidya, ni kudilonga o phangu ya athu abhange ima yambote ni yo abhange ima yayibha. Kindala tudilonge o phangu ya jiselevende jiyadi ja fiyele ja Jihova, Obadiya wexile mulanga o ikalakalu mu inzo ya Sobha Akaji, ni mukunji wa dikota Joyada. Mukusuluka twanda dilonga o musoso wa Sobha ya Judá, Jowaji, wexile mu sidivila Jihova kudimatekenu maji kupholo dya kwenda wa lembwa.

SWINA KALA OBADIYA

9. Kyebhi o woma wa Jihova wakwatekesa Obadiya? (1 Jisobha 18:3, 12)

⁹ Mu veji yadyanga ya tumbula Obadiyab mu Bibidya, yene yambe: “Obadiya phe mwenyú wa kexile mukwa woma wavulu wa Jihova.” (Tanga 1 Jisobha 18:3, 12.) Kyebhi o kukala ni woma wavulu wa Jihova kya kwatekesa Obadiya? Twejiya kwila mwene wexile muthu uzwela o kidi, amudyelele we kyavulu, kiki kyene kya bhangesa o sobha kumuta ku pholo phala kwendesa o ikalakalu ya inzo ye. (Neh. 7:2) O woma wa Nzambi wene we wabhana o kuswina kwa Obadiya—mu kidi mwene wabhindane kyavulu o kidifwa kiki. Mukonda dyahi? Mukonda mu kithangana kyenyokyo o wexile mutumina sobha Akabe, ku pholo ya Jihova mwene ‘wa betele kota mu kubhanga kyayibha Jisobha joso a mu dyangelele, ndenge.’ (1 Jis. 16:30). Kumbandu ya mukwa o muhatu we Jezabele wexile mubheza Bahale. Kuma wazembele kyavulu Jihova mwene wabhange yoso phala kubwika o ubhezelu wa kidi wa Nzambi, exile mu ubhanga kwala o kwinyi dya miji ya Izalayele. Jezabele kate mwene wajibha jipolofeta javulu ja Jihova. (1 Jis. 18:4) Se phata Obadiya wexile musidivila Jihova mu kithangana kyabhonzo.

10. O kuswina kwakwatekesa Obadiya kubhanga ihi?

¹⁰ O kuswina kwakwatekesa Obadiya kubhanga ihi? Kyoso Jezabele kyamateka kusota o jipolofeta ja Nzambi phala kujijibha, Obadiya wa swekaku 100 ya jipolofeta, yu wa awane mu ibuka iyadi, ‘kala kibuka makwinyi atanu, anga wa a dikila ni mbolo ni menya.’ (1 Jis. 18:13, 14) Se Jezabele wejidile kwila Obadiya wa swekele jipolofeta ja Nzambi, se phata weji mu jibha. Nange Obadiya wexile ni woma mukonda ka mesenene kufwa. Maji mukonda dya kuzola kyavulu Jihova ni yo exile mu mubheza, Obadiya wexile polondo kate mwene phala kufwa, se kwa bhingile.

11. Mu izuwa yetu, kyebhi o jiselevende ja Jihova akayela o phangu ya Obadiya? (Tala we ofoto.)

¹¹ Lelu jiselevende javulu ja Jihova atungu mu jixi mwafidisa o kikalakalu kyetu. Kala Obadiya, o jiphange jetu mu jixi jiji asuluka mu kuxila o jinguvulu, maji adituna kweha kubheza Jihova! (Mat. 22:21) Ene alondekesa kwila ala ni woma wa Nzambi mu kumubelesela muveji dya kubelesela o athu. (Ika. 5:29) Ene amusuluka mu kubhanga o sidivisu ya kuboka ni kuya mu yonge mu kaswekele. (Mat. 10:16, 28) Ene asota kubhanga yoso phala o jiphange akale ni kudya mu nzumbi kwa bhindamena. Tala o phangu ya phange Henri, watungu mu ixi ya África, kwenyoko sayi kithangana o kikalakalu kyetu akifidisile. Mu kithangana kiki, Henri wadibhakula phala kubhana o madivulu ku jiphange. Mwene wambe: “Eme ngi mukwa jisonyi. Mu kiki ngixikina ni kidi kyoso kwila o woma wami kwa Jihova wene wa ngibhana o kuswina ku nga bhindamene.” O kwila eye utena we kuswina kala phange Henri? Kyene utena se ukala ni woma wa Jihova mu ukexilu watokala.

KALA UMUTHU WA FIYELE KALA O MUKUNJI WADIKOTA JOYADA

12. Kyebhi Joyada ni muhatu we alondekesa kwila exile fiyele kwa Jihova?

¹² O Mukunji Wadikota Joyada wexile ni woma wa Jihova, o woma yu wene wamukwatekesa ku kala fiyele ni kuzokela o ubhezelu wa kidi. Kiki kyadimonekena kyoso o mona a Jezabele, Ataliya, wamateka kutumina kala Mvwale mu ixi ya Judá sumbala mwene kexile ni ujitu yu. O athu exile ni woma wavulu wa Ataliya. Ene alungil’ya, mukonda Ataliya wexile mukwa lwimbi, muthu wayibha wamesenene kyavulu kukala Mvwale kate mwene wasoto kujibha o alawulal’e phala kutambula o ungana. (2 Mal. 22:10, 11) Maji mulawula umoxi—Jowaji—katena kumujibha, mukonda o muhatu wa Joyada Jozabate, wamuswekele. Mwene ni mwadi we aswekele o mona, ya amusasele. Mu ukexilu yu, Joyada ni Jozabate abhangesa kwila ku mwiji wa Davidi kusubhuka muthu phala kukala sobha. Joyada wexile fiyele kwa Jihova, kehela kwila o woma umufidisa kubhanga o kima kyatokala.—Jisa. 29:25.

13. Kyoso Jowaji kyexile ni sambwadi dya mivu, kyebhi Joyada kyalondekesa dingi o ufiyele we kwa Jihova?

¹³ Kyoso Jowaji kexile ni sambwadi dya mivu, lwamukwa dingi Joyada walondekesa kwila wexile fiyele kwa Jihova. Mwene wexile ni ndunge ya kubhangesa kwila, Jowaji, watokalele ku mbutu ya Davidi, ukituka sobha. Se o ndunge yiyi yalwezele, Jowaji eji mujibha. Maji ni kikwatekesu kya Jihova yoso yabhiti kyambote. Joyada ni kikwatekesu kya adyakime amukwa, ni Jilevita, wabhangesa kwila Jowaji ukituka sobha, Ataliya amujibha. (2 Mal. 23:1-5, 11, 12, 15; 24:1) Mu kusuluka Joyada wate “kikutu bhu kaxi ka Jihova ni sobha ni mundu, phala ene kukala ngo mundu wangene wa Jihova.” (2 Jis. 11:17) Mwene we wate “alangidi a mabhitu, bhu myelu ya inzo ya Jihova, phala ki mu bokone muthu wadikasanesa ni kima kyosokyoso kya bolo.”—2 Mal. 23:19.

14. Kyebhi Joyada kya mu besowala mukonda dya kujingisa Jihova?

¹⁴ Jihova wambele kya kwila: ‘Oso a ngi jingisa, eme we nga ajingisa.’ Kiki kyene mwene kyabhiti ni Joyada. (1 Sam. 2:30) Mu kifika mwene wate o musoso wa Joyada mu Bibidya phala tutene kukatulaku mbote. (Lom. 15:4) Kyoso Joyada kyafu, watambula o ujitu wa kumufunda “mu Sanzala ya Davidi, mu jimbila ja jisobha, mukonda mwene wabhangele mbote, ni kwa Izalayele, ni kwa Nzambi, ni ku dibhata dye.”—2 Mal. 24:15, 16.

15. Ihi itutena kudilonga ku musoso wa Joyada? (Tala we ofoto.)

¹⁵ O musoso wa Joyada utena kutukwatesa kubandekesa o woma wetu kwa Jihova. O tufunga atena kukayela o phangu ya Joyada, mukusota maukexilu akulanga o kilunga ithangana yoso. (Ika. 20:28) O adyakime atena kudilonga ku phangu ya Joyada kwila, se akala ni woma wa Jihova ni kumukala fiyele, mwene utena kwa abhana o ujitu wa ku mukalakela phala kukumbidila o vondadi ye. Mwene nuka wanda kwaxisa. O mizangala atena kukatula mbote ku phangu ya Jihova mu kutalatala o adyakime ni kuxila kwoso, kala kyabhange Nzambi kwa Joyada, bengebenge yo ene musidivila kya Jihova mu mivu yavulu. (Jisa. 16:31) Kumbandu yamukwa etwenyoso tutena kudilonga ni phangu ya Jilevita ni adyakime amukwa akwatekesa Joyada. Tukwatekesyenu ni ufiyele woso ‘yó atukala kupholo’ mu kwabelesela.—Jih. 13:17.

KANA KUKAYELA O PHANGU YA SOBHA JOWAJI

16. Ihi ilondekesa kwila Jowaji kexile ni woma wa kidi kwa Jihova?

¹⁶ Joyada wakwatesa sobha Jowaji kukala muthu wambote. (2 Jis. 12:2) Mukonda dya kiki mu unzangala we, Jowaji wamesenene kusangulukisa Jihova. Maji kyoso Joyada kyafu, Jowaji exile mu mufwinyisa kwala o ilamba kexile mubheza Jihova. Mukonda dya kiki, amateka “kuxidibhila mahamba mu mikawu, ni kubhikila iteka.” (2 Mal. 24:4, 17, 18) Kiki kyaluwalesa kyavulu Jihova, maji wasuluka mu kwa ‘atumikisa jipolofeta, phala kwenda ni ku a vutwila kwa mwene . . . , maji ene aditunu kubhana matwi.’ Ene kate mwene ka mesenene kwivwa Zakadiya, mona a sekaji’a Jowaji, Jozabate wexile polofeta ni mukunji wa Jihova. Mu kidi se o mwiji wa Zakadiya wa kambele Jowaji kejikala kumwenyu, maji mwene ka londekesa kisakidilu muveji dya kiki, watumina kujibha Zakadiya.—2 Mal. 22:11; 24:19-22.

17. Ihi yabhiti ni Jowaji mukonda dya kukamba kukala ni woma wa Jihova?

¹⁷ Jowaji kexile mulondekesa o woma wa kidi kwa Jihova, mu kiki wexile mudibhana ni ibhidi yavulu. Jihova wambele kiki: “oso-phe a ngi tènde, a kà jingunuka katé kya sebhuluka mwene.” (1 Sam. 2:30) Sumbala Jowaji wexile ni “kifuxi kyonene kya masoladi” amutolola ku kifuxi kyofele kya akwa Sidya, ya “amukwamene kyavulu”. Kyoso akwa Sidya kya vutuka ku ixi ya, Jowaji amujibha kwala o jiselevende je, mukonda dya kujibha Zakadiya. Mwene wexile sobha yayibha kinene, mukonda dya kiki, “ka mufundu mu jimbila ja jisobha.”—2 Mal. 24:23-25; tala o nota de estudo “filho de Baraquias” mu divulu dya Matesu 23:35, mu Bibidya ya phutu.

18. Kala kilondekesa Jelemiya 17:7, 8, ihi itwatokala kubhanga phala ki tukale kala Jowaji?

¹⁸ Ihi itutena kudilonga mu phangu ya Jowaji? O muxi wala ni jindanji jatolo o nguzu, ubhinga ngunji phala ku ufikidila, se a ukatula o jingunji jiji, atena ku ulundula ku kitembwe. Kyene we kyabhiti ni Jowaji. Mwene wexile ni kikwatekesu kya Joyada, maji kyoso kyafu ya amufwinyisa dingi ku akwa kulungulukila o kidi, Jowaji wadibhale mu nzumbi yu walembwa kukala fiyele kwa Jihova. O kifika kiki kitulondekesa kwila, etu ki tutokala ngo kubheza Jihova mukonda dya kikwatekesu kya jindandu jetu, mba mukonda dya phangu yambote itubhana o jiphange mu kilunga. Se twamesena kukala ni ukamba wambote ni Jihova, twabhingi kubandekesa o henda ni woma wetu kwa mwene, mu kudilonga o Bibidya, kuxinganeka ni kusamba.—Tanga Jelemiya 17:7, 8; Kol. 2:6, 7.

19. Ihi ibhinga Jihova kokwetu?

¹⁹ Mu kidi o itubhinga Jihova ki yabhonzo kana. O yamesena mwene a ijimbulula kyambote mu divulu dya Ndongixi 12:13, yamba: “Xila Nzambi, waluke o ijila yê, mukonda kyene kya fwama athu oso ku ki bhanga.” Se tukala ni woma kwa Jihova, twandatena kutolola kibhidi kyosokyoso ku hadya, kala kyabhiti ni Obadiya ni Joyada. Seku muthu wandatena kuzanga o ukamba wetu ni Jihova.