Utena Kudyelela Kwila Jihova Wanda Kukwatekesa mu Ithangana ya Bhonzo

1-2. (a) Ima yebhi itwene mudibhana nayu yadifwangana ni ima yadibhanene nayu o Jijudé javutukile mu Jeluzaleme? (b) Jimbulula bhofele o ibhidi yadibhanene nayu o Jijudé. (Tala o kaxa “O Izuwa ya Ajewu, Zakadiya, ni Ejidala.”)

O KWILA sayi ithangana wene mu thandanganya yalungu ni hadya? Nange wathandanganya yalungu ni kulanga o ibhindamu ya mwiji we mukonda kwamukalakala. Nange wathandanganya ni kulanga o mwiji we mukonda dya maka a jinguvulu, izukutisu, mba afidisa o kikalakalu kya kuboka. O kwila wamudibhana ni maka enya? Se kyene, wandakatula mbote yavulu mu kudilonga kyebhi Jihova kya kwatekesa akwa Izalayele m’ukulu kyoso kyadibhanene ni ibhidi kala yiyi.

² O Jijudé atungile mu Babilonya mu mivu yavulu. Mukonda dya kiki abhingile kukala ni kixikanu kyakolo phala kuxisa o ukexilu wa mwenyu ni jimbote jexile naju, ni kuya mu ixi ka ijidile kyambote. Kyoso kya bhixila, ki kulaleka kyavulu amateka kudibhana ni ibhidi phala kudikila o ibhindamu ya miji ya. Adibhanene we ni ibhidi ku mbandu ya Unguvulu wa Pelesa, ni izukutisu ya ifuxi ya akondolokele. Ku mbandu ya mukwa, amoxi kya abhonzele kudikwatenena mu kikalakalu kya kutunga o tembulu ya Jihova. Mukonda dya kiki, ku muvu wa 520 A.K.K., Jihova watumikisa polofeta jiyadi, Ajewu ni Zakadiya, phala kukwatekesa o mundu kukala dingi ni kuswina mu kikalakalu kya Jihova. (Aje. 1:1; Zak. 1:1) Kala kitwandamona, o kiswinisu kyabhana o jipolofeta jiji kyabhekela mbote yavulu. Maji phe, mu kubhita 50 a mivu kupholo, o Jijudé avutukile mu Jeluzaleme, abhindamene dingi kiswinisu. Kyenyiki, Ejidala, muthu wexile ni uhete wakusoneka o Kitumu, watundu ku Babilonya yu wayi ku Jeluzaleme phala kuswinisa o mundu wa Nzambi, kuta o ubhezelu wa kidi ku pholo, ku myenyu ya.—Eji. 7:​1, 6.

3. Ibhwidisu yebhi itwanda tambwijila? (Jisabhu 22:19)

³ O ikanenu ya Ajewu ni Zakadiya, ya kwatekesa o mundu wa Nzambi m’ukulu kusuluka mu kudyelela kwa Jihova mu ithangana ya ibhidi. Yene we itena kutukwatekesa lelu kudyelela kwila Jihova wanda tukwatekesa, ne mwene se tudibhana ni ibhidi yabhonzo ku mwenyu wetu. (Tanga Jisabhu 22:19.) Kyoso kituya ni kuzwela yalungu ni njimbu yabhana Nzambi bukaxi ka Ajewu ni Zakadiya, ni kumona o phangu ya Ejidala, twanda tambwijila o ibhwidisu yiyi: O ibhidi yoso yadibhana nayu o Jijudé ya abhangesa kudivwa kyebhi? Mukonda dyahi twatokala kudikwatenena mu kubhanga o vondadi ya Nzambi kyoso kitudibhana ni ibhidi ku mwenyu? Kyebhi kitutena kudyelela dingi kwa Jihova mu ithangana ya ibhidi?

O IBHIDI YABHANGESA O JIJUDÉ KUZOZA

4-5. Mukonda dyahi o Jijudé azozele mu kubhanga o kikalakalu kya kutungulula o tembulu?

⁴ Kyoso o Jijudé kyabhixila mu Jeluzaleme, ene exile ni kikalakalu kyavulu phala kubhanga. Ni lusolo lwoso, atungu dingi o kalatódyu ka Jihova, ya ate o madisesa a tembulu. (Eji. 3:​1-3, 10) Maji o kuswina kwexile naku ku dimatekenu, kwa sosoloka. Mukonda dyahi? Mukonda ene kexile ngo ni kikalakalu kya kutunga o tembulu, maji abhingile we kutunga jinzo ja, kukuna jimbutu ni kudikila o miji ya. (Eji. 2:​68, 70) Ku mbandu yamukwa, ene adibhanene we ni kizukutisu kya jinguma, amesenene kufidisa o kikalakalu kya kutungulula o tembulu.—Eji. 4:​1-5.

⁵ O jijudé kyoso kyavutuka mu Jeluzaleme, adibhanene we ni ibhidi yalungu ni kitadi ni maka alungu ni jinguvulu. Mu kithangana kyenyokyo, o ixi ya, yabhangele mbandu ku Unguvulu wa Pelesa. Kyoso Silu, Sobha ya Pelesa kyafu ku muvu wa 530 A.K.K., o sobha Cambises wamubhinganene, wamesenene kutolola o ixi ya Ijitu. Mu njila ye phala kuya ku Ijitu, o masoladi me nange ajijidika akwa Izalayele phala ku abhana kudya, menya ni ididi phala kukalamu, o kiki kyabhonzesa dingi o myenyu ya athu kwenyoko. Kyoso o Sobha Ndala I, kya bhingana Cambises yu wamateka kutumina, kwexile hanji maka avulu, kala o athu exile mu bhukumukina o jinguvulu ni ibhidi yamukwa dingi mu Unguvulu wa Pelesa. O ibhidi yoso yiyi se phata yathandanganyesa o Jijudé, yalungu ni kyebhi kyejitena kulanga o ibhindamu ya miji yawu. Mukonda dya maka oso adibhanene nawu, sayi Jijudé exile mudivwa kwila kyokyo ki kyexile o kithangana kyatokala phala kutungulula o tembulu ya Jihova.—Aje. 1:2.

6. Kala kilondekesa o divulu dya Zakadiya 4:​6, 7, ibhidi yebhi yamukwa yadibhanene nayu o Jijudé, ni kidyelelu kyebhi kya abhanene Zakadiya?

⁶ Tanga Zakadiya 4:​6, 7. Katuku o ibhidi yalungu ni kitadi ni maka a jinguvulu, o Jijudé adibhanene we ni izukutisu. Ku muvu wa 522 A.K.K., o jinguma ja fwinyisa o nguvulu ya Pelesa phala kufidisa o kikalakalu kya kutungulula o tembulu ya Jihova. Maji Zakadiya wadyelelesa o Jijudé kwila Jihova bhukaxi ka nzumbi Ye, weji katula kabasa kibhidi kyejisota ku afidisa kusuluka ni kikalakalu. Ku muvu wa 520 A.K.K., Sobha Ndala wa ehela kusuluka ni kikalakalu kya kutunga, yu wa abhana we kitadi phala ku akwatekesa. Mwene we watendelesa o jinguvulu kwenyoko phala ku akwatekesa.—Eji. 6:​1, 6-10.

7. Kyoso o Jijudé javutukile mu Jeluzaleme, kyatele kupholo o kikalakalu kya Jihova, mabesá ebhi atambula?

⁷ Bhukaxi ka Ajewu ni Zakadiya, Jihova wakanena o mundu we kwila weji ku akwatekesa, se atele ku pholo o kikalakalu kya kutungulula o tembulu. (Aje. 1:​8, 13, 14; Zak. 1:​3, 16) Ni kiswinisu kyatambula bhukaxi ka jipolofeta, ku muvu wa 520 A.K.K., o Jijudé avutuka dingi mu kubhanga o kikalakalu kya tembulu. Bhenyobho, ki kwabhitile luwa mivu itanu, ene azubha ku itungulula. Mukonda dya kuta o vondadi ya Jihova ku pholo sumbala ni ibhidi yavulu, Jihova wabhana ku Jijudé, yoso yabhindamene ku myenyu ya, yu wa akwatekesa we kumuzukama dingi. Mukonda dya kiki, ene atena kubheza Jihova ni kisangusangu kyoso.—Eji. 6:​14-16, 22.

LUNGA O MUXIMA WE MU KUBHANGA O VONDADI YA JIHOVA

8. Kyebhi o izwelu itusanga mu divulu dya Ajewu 2:​4, itena kutukwatekesa kulunga o muxima wetu mu kubhanga o vondadi ya Jihova? (Tala we o nota.)

⁸ Kuma o hadi yadikota yazukama dingi m’ukulu ngenge, twatokala kulembalala kwila, twabhingi kuboka o njimbu yambote ni lusolo lwoso. (Mál. 13:10) Maji, nange kitena kutubhonza kulunga o muxima mu ukunji wetu se twamudibhana ni maka alungu ni kitadi, mba phe se o kikalakalu kyetu kya kuboka amukifidisa. Maji ihi itena kutukwatekesa kuta o kikalakalu kya Jihova kupholo? O kudyelela kwila “Jihova dya ifuxi”b wala ku mbandu yetu. Mwene wanda tukwatekesa se tusuluka mu kuta o Utuminu we kupholo. Kyenyiki ki tubhingi kukala ni woma.—Tanga Ajewu 2:4.

9-10. Kyebhi o dikaza dyamono o izwelu yala mu divulu dya Matesu 6:33 kudikumbidila ku mwenyu wa?

⁹ Tala o Phangu ya dikaza Xikitu ni Lina,c aboki a thembu yoso. Kyoso kyayi mukwatekesa kilunga mu kididi kyengi, ene axala se kikalakalu mukonda dya maka alungu ni kitadi mu ixi ya. Sumbala katenene kusanga salu mu muvu umoxi, ne kiki ene asuluka mu kumona o kikwatekesu ni henda ya Jihova. Sayi ithangana exile mutambula kikwatekesu bhukaxi ka jiphange. Ihi ya akwatekesa kudibhana ni ibhidi yiyi? Phange Xikitu, waluwalele ku dimatekenu, wambe: “O kudibhakula mu kikalakalu kya kuboka, kyatukwatekesa kulunga o muxima mu kima kyabeta dingi kota ku mwenyu.” Kyoso mwene ni muhatu we kyexile musota salu, adikwatenena mu kuboka ni kuswina kwoso.

¹⁰ Sayi kizuwa, kyoso kyazubha kuboka, ya abhixila kubhata, amono kwila sayi dikamba dyawu dya kazola wendele 160 a jikilometulu, phala kwabhekela jisakola jiyadi ja kudya. Phange Xikitu wambe: “Mu kizuwa kyenyokyo, twamono dingi kyebhi Jihova ni jiphange mu kilunga kyene mutusuwa. Kyenyiki, twadyelela kwila Jihova nuka wandajimba o jiselevende je, ne mwene se o ibhidi yamudibhana nayu yedi kala ki yandabhita.”—Mat. 6:33.

11. Ihi itutena kukingila se tulunga o muxima wetu mu kubhanga o vondadi ya Nzambi?

¹¹ Jihova wamesena kwila tu lunga o muxima mu kikalakalu kibhulula myenyu, mu kubhanga maxibulu. Kala kyotumbule mu kaxi ka 7, Ajewu watendelesa o mundu wa Jihova kumateka o kikalakalu kya kutunga o tembulu. Kyedile kala exile mwatangela phala kuta dingi lwamukwa o madisesa a tembulu. Se kyene kyabhangele, Jihova wakanene kwila weji ‘kwa abesowala.’ (Aje. 2:​18, 19) Etu we tutena kudyelela kwila Jihova wanda tubesowala se tuta ku pholo o kikalakalu kya tutendelesa o kubhanga.

KYEBHI KITUTENA KUDYELELA DINGI KWA JIHOVA

12. Mukonda dyahi Ejidala ni yo exile ne, abhingile kukala ni kixikanu kyakolo?

¹² Ku muvu wa 468 A.K.K., Ejidala ni kibuka kyakayadi kya Jijudé, ende njila tunde ku Babilonya kate mu Jeluzaleme. Ejidala ni yo exile ne, abhingile kukala ni kixikanu kyakolo phala kwenda o njila yenyoyo. Ene exile mu kwambata ulu ni phalata yavulu ya abhanene kwa sobha phala o kikalakalu kya tembulu. O ikoka mwexile mubhitila mwexile ilwezu yavulu. Kyenyiki, nange ejitena kudisanga ni miyi. (Eji. 7:​12-16; 8:31) Ku mbandu yamukwa, ki kulaleka kyavulu ene amono kwila kate mwene o mbanza ya Jeluzaleme ki yexile kikidi kya kondama. Mu mbanza ki mwatungile athu avulu, ni kwila o ilumbu yabhindamene ku iyudika. Ihi itutena kudilonga ku phangu ya Ejidala yalungu ni kudyelela dingi kwa Jihova?

13. Kyebhi Ejidala kya kolesa o kidyelelu kye kwa Jihova? (Tala we o nota.)

¹³ Ejidala wamono kyebhi Jihova kyakwatekesa o mundu We mu ithangana yabhonzo. Mivu kudima, ku muvu wa 484 A.K.K., Ejidala nange watungile mu Babilonya mu kithangana kyoso o Sobha Asuwelu kyabhana o kitumu kya kujibha o Jijudé joso jatungile mu Utuminu wa Pelesa. (Este. 3:​7, 13-15) O mwenyu wa Ejidala ni wa Jijudé jamukwa wexile mu kilwezu! Kyoso kyevu o kitumu kya sobha, ene aluwalele kyavulu kate eha o kudya, ya exile mudila ni kusamba kwa Jihova mukubhinga kikwatekesu. (Este. 4:3) Xinganeka ngo kyebhi kyadivu Ejidala ni Jijudé jamukwa kyoso o ima yalunguluka, anga muveji dya ku ajibha ene, ajibhaku o athu atele o ndunge yakujibha o Jijudé! (Este. 9:​1, 2) O ima yadibhana nayu Ejidala, se phata yamukwatekesa kukala polondo phala o ibhidi yejikwiza ku pholo. Yamukwatekesa we kudyelela dingi kwila Jihova utena kulanga o mundu We.d

14. Ihi yadilongo phang’yetu ya muhatu kyoso kyamono o kikwatekesu kya Jihova mu ithangana ya ibhidi?

¹⁴ Kyoso kitumona kyebhi Jihova kyatukwatekesa mu ithangana yabhonzo, o kidyelelu kyetu kwa mwene kikola dingi. Tala o phangu ya phange Palasa, watungu ku Europa. Mwene waxisa o salu ye phala kulenga kudita mu maka a jinguvulu. Mwene wambe: “Yiyi yexile o veji yadyanga ku mwenyu wami ingakambele kukala ni kitadi.” Mu kusuluka, wambe dingi: “Eme ngehela o maka bhu maku a Jihova, anga ngamono kyebhi mwene kyangilange ni henda yoso. Kyenyiki, ne mwene se ngixala dingi sé salu, ki ngandakala ni woma. Se Tata yami yadyulu wamungilanga lelu, mwene wandangilanga we ku hadya.”

15. Ihi yakwatekesa Ejidala kusuluka mu kudyelela kwa Jihova? (Ejidala 7:​27, 28)

¹⁵ Ejidala wamono o kikwatekesu kya Jihova ku mwenyu we. Ejidala waxingeneka mu jiveji javulu jamulange kya kwa Jihova m’ukulu. O kubhanga kiki se phata kyamukwatekesa kusuluka mu kudyelela kwa Mwene. Tala o izwelu ‘o lukwaku lwa Jihova, Nzambi yami, lwa ngi tula ku thandu.’ (Tanga Ejidala 7:​27, 28.) Mu divulu dya soneka mu Bibidya, Ejidala watumbula izwelu yadifu kiki mu veji jisamanu.—Eji. 7:​6, 9; 8:​18, 22, 31.

16. Mu ithangana yebhi mututena kumona o kikwatekesu kya Jihova ku mwenyu wetu? (Tala we ofoto.)

¹⁶ Jihova utena kutukwateksa kyoso kitudibhana ni kibhidi kyabhonzo. Mu kifika, tutena kumona kyebhi Jihova kyamutukwatekesa, kyoso kitubhinga kwa phatalá yetu phala kutwehela kuya mu kyonge kyadikota, mba kyoso kitumubhinga phala kusosolola o kithangana kyetu kya kukalakala ni tutena kuya mu yonge mu kilunga. Mu ithangana yiyi, tutena kudiwana mu kumona kyebhi Jihova kyalungulula o ima. Mu kusuluka, o kidyelelu kyetu kwa Mwene kidibandekesa dingi.

17. Kyebhi Ejidala kyalondekesa o kulenduka mu ithangana yabhonzo? (Tala ofoto yakapa.)

¹⁷ Ni kulenduka kwoso, Ejidala wabhingi o kikwatekesu kya Jihova mu musambu. Mu ithangana yoso yexile ni hele mukonda dya ima yatokalele o kubhanga, Ejidala ni kulenduka kwoso wasambe kwa Jihova. (Eji. 8:​21-23; 9:​3-5) O ukexilu wa Ejidala, wabhangesa akwa kumukwatekesa ni kukayela o kixikanu kye. (Eji. 10:​1-4) Kyoso kitukala ni hele yavulu yalungu ni kudikila o ibhindamu yetu mba kulanga kyambote o mwiji wetu, twatokala kusamba kwa Jihova ni muxima woso.

18. Ihi itena kutukwatekesa kubandekesa o kidyelelu kyetu kwa Jihova?

¹⁸ Se tusota o kikwatekesu kya Jihova ni kulenduka kwoso anga tuxikina o kikwatekesu kitubhana o jiphange jetu, o kidyelelu kyetu kwa Nzambi kyanda dibandekesa. Phange Erika, mama wala ni twana tutatu, wasuluka mu kudyelela mu kikwatekesu kya Jihova ne mwene kyoso kyadibhana ni ibhidi yabhonzo kinene. Mu kithangana kyofele mwene wafundu mon’e wa muhatu wafwila mu mala, ni wafundu we mwadi we. Mu kuzwela yalungu ni ima yadibhana nayu, mwene wambe: “Eye ki utena kwijiya kyebhi Jihova kyanda kukwatekesa. O kikwatekesu kitena kwiza mu ukexilu ki twa ufikile. Ngamono kwila, Jihova watambwijila misambu yami yavulu bhukaxi ka izwelu ni ibhangelu ya makamba mami. Se ngitangela o makamba mami ihi yamubhita ku mwenyu wami, ki kyanda kwabhonza kyavulu ku ngikwatekesa.”

KOLOKOTA MU KUDYELELA KWA JIHOVA KATE KU KUDIZUBHILU

19-20. Ihi itwadilongo ku phangu ya Jijudé ka tenene kuvutuka mu Jeluzaleme?

¹⁹ Tutena kukatula mbote yavulu ku phangu ya Jijudé ka tenene kuvutuka mu Jeluzaleme. Amoxi ka tenene kuvutuka, mukonda akukile kya, exile jihaxi, mba phe mukonda dya ibhidi ku mwiji. Maji ne kiki, ene asangulukile mu kukwatekesa yo exile muvutuka mu Jeluzaleme mu kusangela ima yavulu yejibhindamena phala kutunga o tembulu. (Eji. 1:​5, 6) Kyoso o kibuka kyadyanga kya Jijudé kyabhixila mu Jeluzaleme, mu kubhita 19 dya mivu, o yo axalele mu Babilonya exile hanji musangela imbamba phala ku itumikisa mu Jeluzaleme.—Zak. 6:10.

²⁰ Ne mwene se kitwamutena kubhanga yoso itwamesenene mu sidivisu ya Jihova, tutena kudyelela kwila Mwene ubhana valolo ku ima yoso itubhanga ni muxima wetu woso. Kyebhi kitwejiya o kidi kiki? Mu izuwa ya Zakadiya, Jihova wabhingi kwa polofeta ye phala kukwata ulu ni phalata yatumikisine o Jijudé jaxalele ku Babilonya, phala kubhanga kitundu. (Zak. 6:11) O ‘kitundu kyadikota’ kyenyokyo, kyeji sidivila phala kulembalala o ima yoso yatumikisine. (Zak. 6:14) Tutena kudyelela kwila Jihova nuka wandajimba o nguzu itubhanga phala kumusidivila ni muxima woso mu ithangana yabhonzo.—Jih. 6:10.

21. Ihi yandatukwatekesa kudibhana ni ibhidi ku hadya ni kidyelelu?

²¹ Se phata kwila twandasuluka mu kudibhana ni ibhidi mu izuwa yiyi isukidilaku, ni kwila ku hadya o ima kate mwene itena kubhonza dingi. (2 Ti. 3:​1, 13) Maji, ki tubhingi kuthandanganya kyavulu. Lembalala o izwelu ya Jihova ku mundu we mu izuwa ya Ajewu, mwene wixi: “Eme ngi kala jinga ni enu. . . . Ki mukale ni woma.” (Aje. 2:​4, 5) Etu we tutena kudyelela kwila Jihova wandakala jinga n’etu, kyoso kituya ni kubhanga yoso itutena phala kubhanga o vondadi ye. Mu kukumbidila o madisá utwadilongo mu ikanenu ya Agewu, Zakadiya, ni mu phangu ya Ejidala, kabasa kibhidi kitena kwiza kupholo, twandatena we kusuluka mu kudyelela kwa Jihova.