Eye Wakijidile?

Dikalu dya kidifwa kyahi mwexile mukwendela o mutwameni mukwa Etiyopiya kyoso Filipe kyamuzukama?

O KIZWELU mu Ngeleku kyolungulule “dikalu” mu Bibidya, kyalungu ni makalu a maukexilu avulu. (Ika. 8:​28, 29, 38) Maji kyedi kala, o dikalu mwexile mu kwendela o diyala mukwa Etiyopiya dyexile dya dikota, ki dyexile dyofele kala o makalu a ita mba a kulenga. Tala se mukonda dyahi tutena kuzwela kiki.

O diyala mukwa Etiyopiya wexile ni ungana wadikota, yu wendele njila ya dikanga. Mwene “wexile mukwatekexi wa Kandase, mvwale ya Etiyopiya. Mwene wexile we mutambula konda ya jimbongo joso ja mvwale.” (Ika. 8:27) O mbandu kwala lelu o ixi ya Sudão ni mbandu ya lwiji ya ixi ya Ijitu, kwene kwexile o ixi ya Etiyopiya yokulu. Sumbala o diyala nange kendela mu dikalu dimoxi ngo kate kya bhixila, maji mwene nange wambatele imbamba yavulu yeji bhindamena. Sayi makalu mwexile mukwendela o athu mu hama ya dyanga ya K.K. exile ni malola awana. Mu kuzwela yalungu ni divulu dya Ikalakalu, sayi divulu dyambe kiki: “O makalu kala ya, ejitena kukala ni ididi phala kwambata jimbwenga ni imbamba yamukwa. Ku mbandu yamukwa, nange o athu exile mutena kwenda njila ya lebha ni makalu enya.

O diyala mukwa Etiyopiya wexile mutanga kyoso Filipe kyamuzukama. O musoso wamba kwila, “Filipe wayi ni kulenga bhu mbandu ya dikalu, wa mwívu kutanga ni dízwi dya swina o divulu dya polofeta Izaya.” (Ika. 8:30) O makalu akubhanga njila, kexile mu ayudika phala kwenda ni lusolo. Kuma o makalu kexile mu kwenda ni lusolo, kyenyiki ki kyabhonzele phala o diyala mukwa Etiyopiya kutanga. Kiki kyene kyabhangesa we kwila Filipe utena kumusanga mu njila, sumbala mwene wexile mu kwendela bhoxi.

O diyala mukwa Etiyopiya “wadyondela Filipe phala kusambela mu dikalu ni kuxikama bhwa kexile mwene.” (Ika. 8:31) Mu makalu a akwa kulenga, o endexi exile mu kwimana. Maji mu makalu a kubhanga njila, mwexile ididi yamukwa. Kyenyiki, o diyala mukwa Etiyopiya ni Filipe a tenene kuxikama.

Mukonda dya musoso utusanga mu divulu dya Ikalakalu kibatulu 8 ni mu milongi yamukwa ya akwa misoso ku mundu, kindala mu madivulu m’etu mwene mu moneka jifikula jilondekesa o diyala mukwa Etiyopiya kwendela mu dikalu dya dikota, kana mu dikalu dyofele kala dyexile muya nadyu mu ita, mba dya kulenga nadyu.