Jihova Wamesena Kwila o Jiphange Atalatala Kyebhi o Athu Ate Kituxi Kyadikota?

1. Ihi yamesena Jihova ku athu oso?

JIHOVA wabhange o athu ni kutena kwa kusola yandala kubhanga. Izuwa yoso twene musola o ima itwamesena o kubhanga. O kima kyabeta-kota kyatena kusola o muthu, o kudibhakula kwa Jihova ni kumubheza kumoxi ni abhezi’ê amukwa. Jihova wamesena kwila athu oso abhanga kiki. Mukonda dyahi? Mukonda mwene wazolo o athu, wamesena kwila ene akala makamba mê ni kwila akala ni mwenyu wakalelaku.—Mate. 30:​19, 20; Nga. 6:​7, 8.

2. Jihova wamesena kwila o athu ate kituxi kyadikota, abhanga ihi? (1 Nzwá 2:1)

² Maji Jihova kene mujijidika o athu phala kumubheza. Mwene wamesena kwila kala muthu asole yatokala o kubhanga. Ihi yatokala o kubhanga o tufunga se sayi phange amubatizala, uta kituxi kyadikota? Se mwene kadyela, atokala ku mukatula mu kilunga. (1 Ko. 5:13) Se kiki kibhita, Jihova wamesena hanji kwila o muthu yú adyele o kituxi kyê, nakale kamba dyê. Jihova watubhana o sata ya kukula, phala kuloloka o athu eji dyela o ituxi yâ. (Tanga 1 Nzwá 2:1.) Jihova, Tata yahenda, wamesena kwila o athu ate ituxi adyela.—Zak. 1:3; Lom. 2:4; Tiy. 4:8.

3. Ihi i twanda dilonga mu milongi yiyi?

³ O Bibidya itutangela o kibanzelu kya Jihova kyalungu ni kituxi ni kyebhi mwene kyatalatala yó ata kituxi. Etu twatokala kukayela o phangu ya Jihova. Mu milongi yiyi twanda dilonga (1) kyebhi o kilunga mu mbanza ya Kolindu kyabatula o maka a phange watele kituxi kyadikota, (2) ihi yambe poxolo Phawulu yatokalele kubhanga o kilunga kyoso o phange kyadyela o kituxi kyê, ni (3) kyebhi kyadivwa Jihova yalungu ni yó ate kituxi kyadikota.

IHI YABHANGE O KILUNGA KYOSO PHANGE KYATELE KITUXI KYA DIKOTA?

4. Maka-hi abhiti mu kilunga kya mbanza ya Kolindu? (1 Kolindu 5:​1, 2)

⁴ Tanga 1 Kolindu 5:​1, 2. Mu njila yê ya katatu kala mukunji wa jixi jengi, Phawulu wevu kwila mu kilunga kya Kolindu, kwamoneka maka ayibhile kyavulu. Sayi phange wexile muta undumbu ni muhatu wa tat’ê. Mukonda dya kiki o Bibidya yamba kwila “o undumbu yú, wa betakota, o wene mubhanga o athu ka mubheza Nzambi, ndenge”! Maji o jiphange afikile kwila o phange wabhange kiki weji tena kusuluka mu kilunga. Nange sayi athu mu kilunga exile mubanza kwila exile mukayela o phangu ya Jihova ya kumukwatela henda. Maji Jihova kaxikina o kuyibha mu kilunga kyê. Mukonda dya kima kiki sayi athu kexile mubheza Nzambi, adibhukana. Se amwehelele kukala mu kilunga, o jiphange ja mukwa eji kayela o phangu yê. Mukonda dya kiki, poxolo Phawulu watendelesa o jiphange kubhanga ihi?

5. Phawulu wambe kwila o jiphange atokalele kubhanga ihi? Ihi yamesenene kuzwela mwene? (1 Kolindu 5:13) (Tala we ofoto.)

⁵ Tanga 1 Kolindu 5:13. Jihova wabhangesa Phawulu kusoneka mukanda phala o kilunga kya Kolindu, yu wambe kwila o phange watele kituxi atokalele kumukatula mu kilunga. Kyebhi o jiphange atokalele kumutalatala? Phawulu wa atangela phala ‘kadilunge-nê.’ Ihi yamesenene kuzwela mwene? Mwene wambe kwila ene katokalele “né ngó kúdya n’ê kumoxi.” (1 Ko. 5:11) Kúdya ni muthu kutubhangesa kukala tu makamba mê. Phawulu wamesenene kuzwela kwila o jiphange katokalele kubhanga ukamba ni mwene. Kiki kyeji kwatekesa o kilunga phala kakayele o kifwa kyê kyayibha. (1 Ko. 5:​5-7) Kiki kyeji bhangesa o diyala kumona kwila waluwalesa kyavulu Jihova ni kwila watokalele kudyela.

6. Kyebhi kyadivu o jiphange kyoso Phawulu kya atumikisa o mukanda wê wadyanga, ni ihi yabhange ene?

⁶ Kyoso kyatumikisa o mukanda wê wadyanga ku jiphange mu kilunga, Phawulu wexile muxinganeka se kyebhi o jiphange kyeji divwa. Maji Titu wambela Phawulu kwila o jiphange axikinine o kitendelesu kyê. O njimbu yiyi yasangulukisa Phawulu. Mu kusuluka, o diyala watele kituxi amukatwile mu kilunga. (2 Ko. 7:​6, 7) Jimbeji ku pholo kyoso Phawulu kyatumikisine o mukanda wê wadyanga, o diyala wadyela o kituxi kyatele! Mwene walungulula o ukexilu wê, yu wamateka kubelesela o itumu ya Jihova. (2 Ko. 7:​8-11) Mu kithangana kyenyokyo Phawulu watendelesele ihi ku jiphange?

KYEBHI O KILUNGA KYATOKALELE KUTALATALA O PHANGE WADYELA O KITUXI KYÊ?

7. O kukatula o diyala mu kilunga kwamukwatekesa kubhanga ihi? (2 Kolindu 2:​5-8)

⁷ Tanga 2 Kolindu 2:​5-8. Phawulu wambe kwila “o kibazelu kyabhana o jiphange ku diyala didi kya [musokele] kyá.” O izwelu ya Phawulu ilombolola kwila o jiphange abatwile kyambote o maka a diyala dyodyo, mu kiki mwene wadyele o kituxi kyê.—Jih. 12:11.

8. Phawulu watendelesa o kilunga kubhanga ihi?

⁸ Phawulu watendelesa o kilunga: “Mwatokala ku mu loloka ni muxima woso ni ku mu swinisa”, o phange wate o kituxi “mu londekesenu kwila mwamuzolo.” Kuma o muthu yu wadyela kya o kituxi kye Phawulu wambe kwila o tufunga atokalele kwehela o phange wate o kituxi kuvutuka mu kilunga. Mwene we wambe kwila atokalele kumutalatala kyambote, kumuloloka ni kumulondekesa henda. Phawulu wamesenene kwila o jiphange aswinisa o phange yu bhukaxi ka izwelu ni ibhangelu ya. Mu kubhanga kiki o phange weji divwa kyambote mu kuvutuka mu kilunga.

9. Mukonda dyahi sayi jiphange kwene mwabhonza kulondekesa henda kumuthu yo wavutuka mu kilunga?

⁹ Maji sayi bhabha kubhonza kyavulu kulondekesa henda kwa phange wavutuka mu kilunga, mukonda dyahi tuzwela kiki? Mukonda o kituxi kye kyabhekela maka avulu mu kilunga, mba athu avulu exile ni jisonyi mukonda dya kituxi kyatele mwene. Sayi jiphange ene mubhanga nguzu yavulu phala kubelesela o itendelesu ya Jihova. Mu kiki sayi ya adivwa kwila o tufunga alweza mukuxikina kwila o muthu wate o kituxi kyadikota kuvutuka dingi mu kilunga. (Sokesa Luka 15:​28-30.) Mukonda dyahi kima kyambote o jiphange kulondekesa henda ya kidi ku phange wavutuka mu kilunga?

10-11. Ihi itena kubhita se o tufunga adituna kuloloka o phange wadyela o kituxi?

¹⁰ kyebhi o muthu wa dyela o kituxi kye kyeji divwa se o tufunga kamwehela kuvutuka mu kilunga, mba mu kuvutuka mu kilunga kyebhi mwene kyeji divwa se o jiphange akamba kumulondekesa henda. Mwene weji luwala kyavulu ni “kubhwila.” Mwene weji divwa we kwila kabhanga dingi mbandu ya kilunga kya Jihova. Mwene utena kubanza kwila Jihova kamuloloka ni kwila mwene kabhingi kulungulula o ukexilu wa mwenyu we.

¹¹ Ihi itena kubhita ni jiphange udituna kuloloka o phange wavutuka mu kilunga? Ene eji zanga o ukamba wa ni Jihova. Mukonda dyahi? Mukonda mukubhanga kiki ene kakayela o idifwa ya Jihova, maji akayela o ukexilu wa Dyabhu. Ene eji kwehela dyabhu kwa fwinyisa phala kalondekesa henda ku muthu wavutuka mu kilunga.—2 Ko. 2:​10, 11; Efe. 4:27.

12. Kyebhi o kilunga kyatena ku kayela o phangu ya Jihova?

¹² Kyebhi o jiphange ku hama yadyanga kya kayela o phangu ya Jihova, kana ya Satanaji? Mu kuloloka ni kujimba o kituxi kyate o muthu. Tala ya zwela sobha Davidi yalungu ni Jihova. mwene “muthu wambote, u lenguluka kuloloka.” (Jisá. 86:5) Mikeya wasoneka: “Nzambi, nanyi mwene u soka n’eye, eye u loloka o ituxi anga o kubhukumuka kwa mbandu ya yá a subhuka ku undundu wé u ku jimba kyá?” (Mik. 7:18) O polofeta Izaya wasoneka: “Mukwa-ituxi ehe o njila yê, o wa yibha muxima a tule mabanzelu mê; a vutuke kwa Ngana, u mu kwatela henda; n’alukile kwa Nzambi yetu, kuma muene mukwa kuloloka kyavulu.”—Iza. 55:7.

13. Mukonda dyahi kima kyambote kutambulula o muthu wa dyela o kituxi kye mu kilunga? (Tala o kaxa “O Diyala Watele o Kituxi Mu Kilunga Kya Kolindu Wavutuka Thembu Kuxi?”)

¹³ Mu kukayela o phangu ya Jihova o kilunga ku hama ya dyanga asangulukile kyavulu mu kutambula o muthu wavutuka mu kilunga ni kumulondekesa henda. Phawulu wambe kwila se ene eji loloka o muthu wa dyela o kituxi kye ene eji londekesa kwila a “mu tumaka o ima yoso.” (2 Ko. 2:9) Kidi kwila kwabhiti ngo tumbeji twofele tunde kya mukatwile mu kilunga, maji o kikwatekesu kyatambula kyamubhangesa kudyela o kituxi. Kyoso mwene kyavutuka mu kilunga o tufunga kakala dingi ni kima kya kubhanga.

KYEBHI KITUTENA KUKAYELA O PHANGU YA JIHOVA MU KULOLOKA AKWETU NI KWATALATALA NI KUYUKA?

14-15. Ihi itwadilongo mu ukexilu ya batula o maka ku kilunga kwakwakolindu? (2 Phetele 3:9) (Tala we ofoto.)

¹⁴ O ukexilu wa batula o maka mu kilunga kya Kolindu a isoneka “phala ku tulonga.” (Lom. 15:4) Twadilongo kwila Jihova ka ehela o muthu wate kituxi kya dikota kusuluka mu kilunga kye se kadyela o ituxi yê. Sayi ya abanza kwila kuma Jihova mukwa “kuloloka” mwene wanda kwehela o mukwa ituxi kusuluka mu kilunga kye ne mwene se kadyela o kituxi kye. Maji Jihova kalondekesa o henda ye mukexilu yu. Kidi kwila Jihova mukwa kuloloka, maji mwene kaxikina o maukexilu yayibha. (Jud. 4) O itumu ye yalungu ni kyawabha ni kyayibha ki yalunguluka.—Jisa. 13:20; 1 Ko. 15:33.

¹⁵ Mu kiki twadilongo kwila Jihova kamesena kwila kukala muthu ufwa. Mwene wamesena kubhulula o athu oso. Mwene wamesena kwila o athu alungulula o ixinganeku ya ni ibhangelu ni kumusidivila. (Ize. 33:11; Tanga 2 Phetele 3:9.) Kyenyiki kyoso o muthu ku kilunga kwakwakolindu kyexile mudyela o kituxi kye ni kulungulula o ukexilu wa mwenyu wê Jihova wexile mu tendelesa o kilunga kutambulula o muthu mu kilunga ni kumoloka we.

16. Kyebhi ki udivwa mu ukexilu wa batula o maka mu kilunga kya Kolindu?

¹⁶ O ukexilu wa batula o maka mu kilunga kya kolindu ya dyanga itukwatekesa kumona o henda ni kuyuka kwa Jihova. (Jisá. 33:5) O kudilonga o ima yiyi itukwatekesa kumuximana dingi tusakidila kyavulu o ukexilu we wa kufúndisa, kuma twakwa ituxi, twabhindamena o muloloki wê. Tusakidila kyavulu o sata yakukula, mukonda bhukaxi kasata yiyi Jihova uloloka o ituxi yetu. Tusanguluka kyavulu mu kwijiya kwila Jihova wazolo kyavulu o mundu we ni kwila wamesena ngo o mbote ya!

17. Ihi itwanda dilonga mu milongi ya kayela?

¹⁷ Se o muthu uta kituxi mu izuwa yetu kyebhi o tufunga mu kilunga atena kukayela o phangu ya henda ya Jihova ni kukwatekesa o muthu kudyela? Kyebhi o kilunga kyatokala kudivwa kyoso o tufunga kyasola kukatula o muthu mu kilunga? Mba kutambula dingi o muthu mu kilunga? Twanda tabhwijila o ibhwidisu yiyi mu milongi ya kayela.