Ihi Itutena Kudilonga ku Ima Yabhange Jezú ku 40 a Izuwa Ande Dya Kuya ku Dyulu?

1-2. Ihi ya bhiti ni maxibulu ayadi a Jezú exile muya ku Emawú?

MU KIZUWA kya 16 kya mbeji ya Nizá mu muvu wa 33 K.K., o maxibulu a Jezú aluwalele kyavulu, exile we ni woma. Maxibulu ayadi akexile muya mu sanzala a ixana Emawú. O dikanga phala kubhixilaku dyexile kwinyi ni umoxi dya jikilómetulu. Ene aluwalele kyavulu mukonda dya kufwa kwa Jezú. Ene exile ni kidyelelu kya kwila Jezú weji bhulula Izalayele. Maji o kima kiki kikyeji bhita dingi, maji kwabhiti kima ka kifikile.

² Jezú wa azukama anga umateka kwenda nawu kumoxi, maji ene kejidile se mwene nanyi. Ni kikote kumuxima o maxibulu amateka kujimbulula o ima ya bhiti ni Jezú. Yoso yexile muzwela o diyala ene keji tena kwijimba. Mwene wamateka kwajimbulwila o ima yasoneka Mozé ni Jipolofeta. Mwene wambe kwila o Mexiya watokalele kutala hadi ni kufwa. Kyoso o maxibulu ayadi kya bhixila ku mbanza ya Emawú, a mono kwila o diyala wexile Jezú. Nzambi wa mufukununa! Tutena kubanza o kusanguluka kwexile naku o maxibulu mukwijiya kwila o Mexiya a mufukununa!—Luk. 24:​13-35.

3-4. Ihi yabhiti ni maxibulu a Jezú, ni ihi itwanda mona mu milongi yiyi? (Ikalakalu 1:3)

³ Mu makwinyi awana a izuwa Jezú wamoneka veji javulu ku maxibulu mê. (Tanga Ikalakalu 1:3.) Mu izuwa yoso yiyi o kuluwala ni woma wexile nawu o maxibulu, wa kituka kisangusangu. O kusanguluka kuku kwakwatekesa kukala ni kuswina, ni kuboka o njimbu yambote ni kulonga o kidi ku athu.a

⁴ O kudilonga ya bhiti ku mwenyu wa Jezú mu kithangana kyokyo kyanda tukwatekesa kyavulu. Mu milongi yiyi twanda mona se ihi yabhange Jezú mu izuwa yiyi phala (1) kuswinisa o maxibulu, (2) kwakwatekesa kutendela kyambote o Mikanda Ikola, ni (3) kwalonga se kyebhi kyeji kalakala ni maujitu eji tambula ku hádya. Twanda mona kyebhi kitutena kukayela o phangu ya Jezú mu mawukexilu atatu ya.

SWINISA AKWENU

5. Mukonda dyahi o maxibulu a Jezú abhindamene kiswinisu?

⁵ O maxibulu a Jezú abhindamene kiswinisu. Mukonda dyahi? Mukonda avulu mudya axisa jinzo, mwiji, kate mwene o mawenji mâ phala kukayela Jezú. (Mat. 19:27) Avulu mudya a akayele mu dilombe mukonda dya kukituka maxibulu a Jezú. (Nzw. 9:22) Ene abhange o ima yoso yiyi mukonda axikinine kwila Jezú mwene o Mexiya amukanene. (Mat. 16:16) Maji kyoso Jezú kyafu, ene aluwalele kyavulu, mukonda afikile kwila kexile dingi ni kidyelelu.

6. Ihi yabhange Jezú kyoso mwene kyafukunuka?

⁶ Jezú wejidile kyambote kwila o ndolo yexile nayu o maxibulu mê, kiyexile mulombolola kwila ene azozele mu nzumbi, mukonda mwene wejidile o ndolo ya kufunda dikamba dya kazola. Mukonda dya kiki mwene wamateka kuswinisa o makamba mê mu kizuwa kyafukunuka. Mukifika, mwene wamoneka kwa Madiya dya Manda kyoso Madiya dya Manda kyexile bhu kanga dya mbila ni kudila. (Nzw. 20:​11, 16) Mwene we wamoneka ku maxibulu ayadi utwatumbula kudima, wamoneka we kwa poxolo Phetele. (Luk. 24:34) Ihi itutena kudilonga ku phangu yiyi ya Jezú? Tumone yabhiti kyoso kyamoneka kwa Madiya dya Manda.

7. Kala kitwatange mu divulu dya Nzwá 20:​11-16, Jezú wamono Madiya kubhanga ihi? Ihi yabhange mwene kwa Madiya? (Tala we ofoto.)

⁷ Tanga Nzwá 20:​11-16. Mu kizuwa kya 16 ya mbeji ya Nizá, mu kamene kaselu sayi ahatu endele ku mbila kwa fundile Jezú. (Luk. 24:​1, 10) Madiya dya Manda kwene we kwexile. Kyoso kyabhixila ku mbila, mwene wamono kwila o kimbi kya Jezú kikyakexile-ko dingi. Mwene wayi ni lusolo mutangela kwa Phetele ni Nzwa o ima yabhitile yu wavutuka-ku dingi kumoxi ni ene. Ene kyoso kyamono kwila o kimbi kya Jezú kikyakexile mwene mu mbila o mayala avutuka kubhata. Maji Madiya waxala ku mbila, yu wasuluka ni kudila. Madiya kejidile kwila Jezú wexile mu mumona. Mwene wamono o muhatu yo wafiyele wexile mudila, mukonda dya kiki wamesenene ku muswinisa. Mu kyenyiki mwene wayi bhwakexile o muhatu, kazwele kyavulu maji o yazwela ya muswinisa kyavulu. Jezú wabhana kikalakalu kya katunda kwa Madiya. Mwene watokalele kuya mu tangela ku jiphange ja Jezú kwila, Jezú amufukununa.—Nzw. 20:​17, 18.

8. Kyebhi ki tutena kukayela o phangu ya Jezú?

⁸ Kyebhi ki tutena kukayela o phangu ya Jezú? Kala kyabhangele Jezú, etu we tutena kukwatekesa o jiphange jetu kusuluka mu kusidivila Jihova. Tutena kubhanga kiki mu kwabhana matwi kyoso kya muzwela o ibhidi ya mudibhana nayu ni kubhanga yoso itutena phala kwaximbakatesa. Tala yabhiti ni phange ya muhatu amwixana Jocelyn. Phangye ya muhatu wafu mu kilwezu. Phange Jocelyn wambe: “Eme ngakexile ni kikote ku muxima ngaluwalele kyavulu mu jimbeji javulu.” Maji sayi dikaza exana phange Jocelyn ku bhata dya, kyenyiki ene amubhana o kikwatekesu kyabhindamene. Amulondekesa henda, amutangela we kwila Jihova wamuzolo kyavulu. Phange Jocelyn wambe gingi: “Eme kingejidile ya kubhanga ngedile kala ngamuboba mu musanza wa kalunga. Maji Jihova wangibhulula bhukaxi ka dikaza didi. Ni kikwatekesu kya ngavutuka ndingi mu kukala ni kusanguluka mukusidivila Jihova.’’ Etu wetu tutena kuswinisa o jiphange jetu mukubhana matwi kyoso kyaya ni kuzwela o ibhidi ya mudibhana nayu. Twatokala kwaswinisa phala nasuluke mu kusidivila Jihova ni kusanguluka.—Lom. 12:15.

KWATEKESA AKWENU KUTENDELA O BIBIDYA

9. Maka ebhi adibhanene nawu o maxibulu ya Jezú? Ni kyebhi Jezú kya akwatekesa?

⁹ O maxibulu a Jezú axikinine mu Mak’â Nzambi ni kwila abhangele nguzu phala kubelesela Jihova. (Nzw. 17:6) Ne kiki, ene atandanganyele kyoso Jezú kyamujibha kala kifumbe. Jezú wejidile kwila o maxibulu exile ni kixikanu ni kwila ene azolele kyavulu Jihova, maji Jezú wamono kwila ene kexile mutendela luwa o maka osoneke mu Mikanda Ikôla. (Luk. 9:​44, 45; Nzw. 20:9) Mu kiki mwene wakwatekesa kutendela kyambote o dilombolwelu dya ima yakexile mutanga. Tala kyebhi mwene kyabhange kiki, kyoso kyamoneka ku maxibulu ayadi akexile muya mu sanzala a ixana Emawú.

10. Kyebhi Jezú kya kwatekesa o maxibulu mê kutendela kwila mwene wexile o Mexiya? (Luka 24:​18-27)

¹⁰ Tanga Luka 24:​18-27. Jezú wabhange ibhwidisu ku maxibulu me phala kwakwatekesa kutendela kwila mwene wexile o Mexiya. Mukonda dyahi? Mukonda mwene wamesenene kwijiya o ima yexile mubanza ene yalungu ni mwene. Kyene mwene kyabhitile. Ene azwela kwila Jezú weji kituka Sobha mu Izalayele ni kubhulula o Jijudé ku Loma. Jezú wa ehela kuzwela o ima yoso yexile mubanza. Mukusuluka, Jezú wa ajimbulwila bhukaxi ka Mikanda Ikôla kwila sayi ikanenu ya dikumbidile kya.b Mu usuku wenyu wadisange dingi ni maxibulu engi wa jibulula we o kilobolwelu kya ikanenu yiyi. (Luk. 24:​33-48) Ihi itutena kudilonga mu maka enya?

11-12. (a) Ihi itutena kudilonga mu ukexilu wa Jezú kulonga o Bibidya? (Tala we o jifoto.) (b) Kyebhi o mulongexi wa Bibidya wa manu Nortey kya mukwatekesa?

¹¹ Kyebhi kitutena kukayela o phangu ya Jezú? Mukulonga o Bibidya, bhanga ibhwidisu ku dixibulu dyé phala kumukwatekesa kuzwela kyebhi kya mudivwa. (Jisa. 20:5) Kyoso ki wanda tendela o ima ya mudibhana nayu, mulondekese Jivelesu ja Bibidya yanda mukwatekesa mu maka a mudibhana nawu. Kana kumutangela o ima ya tokala o kusola, mu kiki mwehele kusola o kima kya tokala o kubhanga. Tala o kifika kya phange amwixana Nortey watungu mu ixi ya Gana.

¹² Manu Nortey wamateka kudilonga o Bibidya, kyoso kyexile ni 16 a mivo. Maji o mwiji we kamesenene kwila mwene udilonga o Bibidya. Ihi ya bhange mwene phala kusuluka mu kudilonga o Bibidya? O phange wexile mu mulonga o Bibidya watangene o divulu dya Matesu kibatulu 10 yu wambe kwila o Kidistá ya kidi anda muzukutisa. Manu Nortey wambe: “Kyoso kyamateka o kungizukutisa, kingexile ni phata ya kwila ngasangele o kidi.” O mulongexi wa manu Nortey wamukwatekesa kuxinganeka mu divulu dya Matesu 10:16 mwene watokalele kukala mukwa kuxila, ni kudilanga kyoso kyaya ni kuzwela ni akwa yalungu ni Bibidya. Kyoso kya mubatizala, manu Nortey wamesenene kukala muboki wa thembu yoso, maji tat’ê wamesenene kwila mwene ubokona mu xikola ya katunda. Lwamukwa dingi o mulongexi we wa Bibidya kamutangela o kima kyatokalele o kubhanga. Muveji dya kiki mwene wamubhange ibhwidisu phala manu Nortey kuxinganeka mu jivelusu ja Bibidya phala mwene kusola o kima kyatokalele o kubhanga. Mu kubhanga kiki manu Nortey wasolo kukala muboki wa thembu yoso. Tat’ê wexile ni njinda yavulu mu kiki wamukaye kubhata. Yalungu ni ima yoso yiyi, ihi yambe manu Nortey? Mwene wambe: “Eme kingala ni phata ya kwila eme ngabhange o kima kya tokala.” Kyoso kituswinisa akwetu kuxinganeka mu ima yamba o Bibidya, twakwatekesa kukolesa o kixikanu kyâ ni kusuluka mu kusidivila Jihova.—Efe. 3:​16-19.

KWATEKESA O JIPHANGE JA MAYALA PHALA KULANGA KYAMBOTE O KILUNGA

13. Ihi yabhange Jezú ande dya kuya kudyulu phala o kikalakalu kya kuboka kisuluke? (Efezu 4:8)

¹³ Kyoso Jezú kyexile mu ixi mwene wabhangele yoso yamutumine Jihova. (Nzw. 17:4) Maji Jezú kexile mubanza kwila mwene ngo wejiya o kubhanga o ima. Maji ku mivu itatu ni kaxaxi mwene walongo o maxibulu mê. Wadyelele ku maxibulu mê, mwene walondekesa o kidi kiki mu kwabhana o kikalakalu kya kuboka ni kulonga o njimbu yambote, ni kulanga o jimbudi ja Jihova. Kyoso kyatambula o kikalakalu kiki nange amoxi mudya kexile luwa ni 30 a mivu. (Tanga Efezu 4:8.) O maxibulu a Jezú exile mu kalakala ni nguzu yoso. Mu kiki mu 40 a izuwa ande dya kuya ku dyulu mwene wa alongo kyambote. Kyebhi mwene kyabhange kiki?

14. Ihi yabhange Jezú phala kulonga o maxibulu mê mu 40 a izuwa ande dya kuya ku dyulu? (Tala we ofoto.)

¹⁴ Ni henda yoso Jezú wabhana itendelesu yabhindamene o maxibulu mê. Mwene wamono kwila sayi ithangana amoxi ku maxibulu exile mu kala ni phata yu wabhana itendelesu yalungu ni maka enya. (Luk. 24:​25-27; Nzw. 20:27) Jezú wathangela phala kudikwatenena mu kulanga o mundu wa Jihova, mu veji dya kudikwatenena mu kusota kungayala kitadi kyavulu. (Nzw. 21:15) Jezú watendelesa we o maxibulu mê phala kadisokese ni akwa mu ima yabhanga mu sidivisu ya Jihova. (Nzw. 21:​20-22) Ku mbandu yengi Jezú wa akwatekesa kulungulula o ixinganeku yayibha yalungu ni Utuminu wa Nzambi yu wa akwatekesa kudikwatenena mu sidivisu ya kuboka. (Ika. 1:​6-8) Ihi itena kudilonga o tufunga ku phangu ya Jezú?

15-16. (a) Mu ukexilu webhi o tufunga atena kukayela o phangu ya Jezú? Jimbulula. (b) Kyebhi phange Patrick kyamukwatekesa?

¹⁵ Kyebhi o tufunga kyatena kukayela o phangu ya Jezú? O tufunga atokala kulonga o jiphange joso kulanga o ibhindamu mu kilunga, katé mwene o minzangala.c Maji o tufunga kamesena kwila o jiphange amwalonga abhanga o ima ni kuyuka kwoso. O tufunga atokala kwalonga ni henda yoso. Se o tufunga abhanga o ima yiyi, o jiphange amwalonga anda kala athu alenduka, anda kala we polondo phala kukwatekesa akwa.—1 Ti. 3:1; 2 Ti. 2:2; 1 Ph. 5:5.

¹⁶ Tala yabhiti ni phange Patrick. Kyoso kyexile munzangala wexile muzwela kyayibha ni jiphange ja mala, mwene kexile muxila o jiphange ja ahatu. Sayi kafunga wamono kwila phange Patrick wabhindamene kulungulula ima ku mwenyu we, ni kuxila kwoso wamubhana kikwatekesu. Phange Patrick wambe: “O kafunga kaka wabhange kyambote mu kungikwatekesa mukonda eme ngexile muluwala kyavulu mu kumona jiphange jamukwa kutambula o maujitu ungamesenene kukala nawu. O kikwatekesu kya ngibhana o kafunga kya ngibhangesa kulenduka ni kudikwatenena mu kukwatekesa o jiphange mu kilunga mu veji dya kusota kukala ni maujitu mu kilunga.” Mu kiki, manu Patrick amusolo phala kukala kafunga kyoso kyexile ni 23 a mivu.—Jisa. 27:9.

17. Kyebhi Jezú kyalondekesa kwila wadyelele ku maxibulu mê?

¹⁷ Jezú watumina o maxibulu mê kuboka ni kulonga o Mak’â Nzambi. (Tala we o nota de estudo “ensinando-as” mu divulu dya Matesu 28:​20, mu Bibidya ya phutu.) Nange o maxibulu exile muxinganeka kwila keji tena kubhanga o kikalakalu kiki, maji Jezú, kexile ni phata ya kwila ene eji tena kubhanga o kikalakalu kiki, yu wambe: “Kala o Tata kya ngi tumikisa, eme wami, ngi mi tumikisa.”—Nzw. 20:21.

18. Kyebhi o tufunga kyatena kukayela o phangu ya Jezú?

¹⁸ Kyebhi o tufunga kyatena kukayela o phangu ya Jezú? O tufunga ala ni unjimu ejiya kwila atokala kubhana ikalakalu ku minzangala mu kilunga. (Fil. 2:​19-22) Mu kifika o tufunga atena kubhana ku minzangala, o ikalakalu ya kuzelesa ni kuyudika o ididi ya ubhezelu. O tufunga atena kubhana kikalakalu kwa phange ni kumulonga kyebhi kyatokala o kubhanga o kikalakalu kiki, ku pholo dya kwenda mwehelenu kubhanga o kikalakalu kiki ubheka wê. Phange amwixana Matesu amusolo kala kafunga wambe kwila, o tufunga amulongo kubhanga o ima mu kilunga, ene adyelele we kwila mwene weji tena ku ibhanga kyambote. Mwene wambe: “Kyoso ki ngexile mulweza ene exile mu ngilonga ukexilu wengi wabhebhuluka wa kubhanga o kikalakalu kiki.”d

19. Ihi i twamesena kubhanga?

¹⁹ Mu 40 a izuwa ande dya kuya ku dyulu Jezú waswinisa o maxibulu mê, wa alongo, wa abhana we itendelesu. (1 Ph. 2:21) Etu twamesena kyavulu kukayela o phangu ya Jezú, mwene wanda tukwatekesa kubhanga kiki, mukonda watukanena: “Eme nganda kala ni enu izuwa yoso, katé ku dizubhilu dya mundu.”—Mat. 28:20.