“Solenu Se Mwanda Sidivila Nanyi”

1. Phala kusanguluka mu kidi, ihi itwatokala o kubhanga ni mukonda dyahi? (Izaya 48:​17, 18)

TAT’ETU ku dyulu watuzolo kyavulu, mwene wamesena kwila tusanguluka ku mwenyu lelu ni ku hádya. (Ndo. 3:​12, 13) Mwene watubhange ni mauhete akatunda, maji mwene katubhange ni uhete wa kuditumina mudyetu, mba katubhange ni uhete wakusola kyawabha ni kyayibha mu dyetu. (Ndo. 8:9; Jel. 10:23) Mwene wejiya kwila phala kukala ni kusanguluka kwa kidi twatokala ku musidivila ni kubelesela o itumu ye yoso.—Tanga Izaya 48:​17, 18.

2. Satanaji wamesena kutuxikinisa mu ihi, maji ihi yabhange Jihova?

² Satanaji wamesena kutuxikinisa kwila tutena kusanguluka sé Jihova, ni kwila o athu atena kuditunda kyambote mukuditumina mudya. (Dim. 3:​4, 5) Phala kulondekesa kwila satanaji mukwa makutu, Jihova wene mukwehela athu kuditumina mudya mu kithangana kyofele. Kikubhonzo-we kyavulu kumona o kuluwala kwa athu kwijila mukonda dya kuditumina mudya. O Bibidya izwela yalungu ni athu avulu, mayala ni ahatu asangulukile mukonda dya kusidivila Jihova. Ku athu oso ya o wabetele dingi kota mu kusanguluka Jezú Kidistu. Mu milongi yiyi twanda dilonga se mukonda dyahi Jezú wasolo kusidivila Jihova. Mukusuluka, twanda dilonga se mukonda dyahi twatokala kubheza o Tat’etu ya dyulu. Mukusukaku, twanda lembalala se ima yebhi ya tubhangesa kusola kusidivila Jihova.

MUKONDA DYAHI JEZÚ WA SOLO KUSIDIVILA JIHOVA

3. Satanaji wa mesenene kubhana ihi kwa Jezú, maji Jezú wa solo kubhanga ihi?

³ Kyoso Jezú kyexile mu ixi, mwene wabhingile kusola se weji sidivila nanyi. Kyoso Jezú kyamu batizala, mukubhita tu ithangana Satanaji wambe kwila weji mubhana o mautuminu oso angongo se Jezú u mubheza ngo lumoxi. Jezú wa mwambela, wixi “Tunda bhabha Satanaji! Kuma kyósoneke: ‘Mu kubheza, kikale ubheza ngó Jihova Nzambi yé, mwéne ngó u mu sidivila.’” (Mat. 4:​8-10) Mukonda dyahi Jezú wa solo kiki? Tala o ima yamubhangesa kusola kiki.

4-5. Ima yebhi yabhangesa Jezú kusola kusidivila Jihova?

⁴ O kima kyabeta kota kyabhangesa Jezú kusola kusidivila Jihova o henda. Jezú wazolo kyavulu Tate ni muxima we woso. (Nzw. 14:31) Kumbandu yengi Jezú u sidivila Jihova mukonda kyene o kima kya tokala. (Nzw. 8:​28, 29; Dij. 4:11) Mwene wejiya kwila Jihova mwene watubhana o mwenyu, tutena kumudyelela ni kwila mwene watubhana ima yavulu yambote. (Jisá. 33:4; 36:9; Tiy. 1:17) Jihova wene mutanga jinga o kidi kwa Jezú ni kwila mwene wabhana o ima yoso yala nayu Jezú. (Nzw. 1:14) Maji Satanaji kadifu ni Jihova. Mwene wabhangesa o athu kuta kituxi ni kufwa, mwene mukwa lwimbi mukwa makutu. (Nzw. 8:44) Kuma Jezú wejidile o ima yoso yiyi, mwene nuka waxinganeka kukala kala Satanaji ni ku bhukumukina Jihova.—Fil. 2:​5-8.

⁵ O kima kyamukwa kyabhangesa Jezú kusola kusidivila Jihova o kuxinganeka mu ima yeji bhita se mwene usola kusidivila Jihova. (Jih. 12:2) Mwene wejidile kwila se usuluka mu ufiyele we, weji zelesa o dijina dya Tate, ni kwila weji bhangesa kuzubha o kituxi ni kalunga kya bheka Satanaji.

MUKONDA DYAHI TWATOKALA KUBHEZA JIHOVA

6-7. Mukonda dyahi athu avulu lelu kamusidivila Jihova? Maji mukonda dyahi twatokala kumubheza?

⁶ Athu avulu lelu kamusidivila Jihova mukonda kejiya luwa o idifwa yambote ya Jihova, ene kejiya o mbote yene mwabhangela Jihova. Ene a difu ni athu yo a abokele kwa poxolo Phawulu mu mbanza ya Atena, ene wa kejidile Nzambi.—Ika. 17:​19, 20, 30, 34.

⁷ Phawulu wa jimbulula ku athu mu mbanza ya Atena kwila o Nzambi yakidi “ubhana ku athu oso mwenyu ni kubhwima ni ima yoso.” Mwene wambe dingi: “Mukonda dya mwene twala ku mwenyu, twene mukwenda, etu twalaku.” Nzambi mwene o mubhangi “wabhange o ifuxi yoso mungongo,” mukonda dya kiki mwene wa fwama o kumubheza.—Ika. 17:​25, 26, 28.

8. Jihova nuka wanda bhanga ihi?

⁸ Kuma Jihova o mubhangi wa ngongo yoso mwene o sukeku utena kubhanga yoso yamesena, se mwene wa kimesenene weji tujijidika kumu sidivila. Maji, Jihova nuka wanda bhanga kiki. Muveji dya kiki, mwene utulondekesa mu maukexilu avulu kwila mwene wene kumwenyu. Mwene ulondekesa izuwa yoso kwila wazolo muthu ni muthu, mwene wamesena kwila athu oso akala makamba mê kate ku hádya ni hádya. (1 Ti. 2:​3, 4) Mukonda dya kiki, Jihova wa mutulonga phala tulonge we akwetu, yalungu ni ima yambote yanda bhanga ku athu ni kyebhi mwene kyanda bhanga kiki. (Mat. 10:​11-13; 28:​19, 20) Mwene watubhana o kilunga mututena ku mubheza, watubhana we tufunga twa henda phala kutu kwatekesa.—Ika. 20:28.

9. Mu ukexilu webhi Jihova wene mulondekesa kwila wazolo o athu oso?

⁹ Jihova ulondekesa o henda ye mukubhana ima yambote kate mwene ku athu yo kaxikina kwila mwene weneku. Xinganeka ngo, mumivu yavulu athu avulu asola kubhanga o ima yamona mudya kwila yawabha mba yayibha, muveji dya kubelesela Jihova. Maji ne kiki ni henda yoso Jihova wene mwabhana o ima yoso ya bhindamena phala kudikila o myenyu ya ni kukatula mbote mu ima yiyi. (Mat. 5:​44, 45; Ika. 14:​16, 17) Mukonda dya ukexilu wa abhange Jihova, ene atena kukala ni makamba ni mwiji a azolo, ene wa atena kuvwala ana, kukalakala ni kukatula mbote mu ikalakalu ya. (Jisá. 127:3; Ndo. 2:24) O ima yoso yiyi ilondekesa kwila, o Tatetu ya dyulu wazolo o athu oso. (Mak. 34:6) Kindala twanda lembalala o ima yatubhangesa kusola kusidivila Jihova, ni kyebhi mwene kyene mubesowala o athu yo asola kumusidivila.

MUKONDA DYAHI TWA SOLO KUSIDIVILA JIHOVA?

10. (a) Kyebhi o kima kya beta kota kitubhangesa kusidivila Jihova? (Matesu 22:37) (b) Mbote yebhi i wene mukatula mukonda dya mwanyu wa Jihova? (Jisálamu 103:​13, 14)

¹⁰ Kala Jezú, etu tusidivila Jihova benge-benge mukonda dya henda yetu kwa mwene. (Tanga Matesu 22:37.) Etu tuzukama dingi kwa Jihova kyoso kitudilonga yalungu ni idifwa ye. Mukifika, xinganeka o mwanyu wene mutukwatela Jihova. Kyoso o akwa Izalayele kya bhukumukina Jihova mwene wa adyondela: “Bilukenu-ze, kindala, kala muthu a xe njila yê ya yibha.” (Jel. 18:11) Jihova ulembalala kwila etu tu akwa ituxi. (Tanga Jisálamu 103:​13, 14.) Kyoso ki uxinganeka ku muloloki wa Jihova, kiki kikubhangesa kumesena kumusidivila kate ku hádya ni hádya.

11. Ima yebhi itubhangesa kusidivila Tatetu ya dyulu?

¹¹ Etu we tusidivila Jihova mukonda kiki kyene o kima kya tokala. (Mat. 4:10) Kyoso kitusidivila Jihova ni ufiyele woso tuzelesa o dijina dye, tulondekesa kwila Dyabhu mukwa makutu, ni kwila tusangulukisa o muxima wa Tatetu. Se tusola kusidivila Jihova lelu twanda tena kumusidivila kate ku hádya ni hádya!—Nzw. 17:3.

12-13. Ihi itwadilongo ku musoso wa Jane ni Pamela?

¹² O ana-ndenge ni minzangala atena we kuzola Jihova. Kyoso kyanda ya ni kukula, o henda yiyi yanda dibandekesa. Tala yabhiti ni phange jiyadi ja xitu a exana Jane ni Pamela.a Kyoso kyamateka o kudilonga o Bibidya, mana Jane wexile ni 11 yamivu, o mana Pamela wexile ni 10 dya mivu. Sumbala o jitata ja kamesenene kudilonga o Bibidya, maji ehela Jane ni Pamela kudilonga ni jimbangi ja Jihova, maji ne kiki ene atokalele kuya ku disukilu dya semana mungeleja ni jitata jâ. Jane wambe: “O ima ingadilongo mu Bibidya ni Jimbangi ja Jihova yangikwatekesa kulenga o jitendasa ja jikoleka jami, jitendasa ja kunwa jidroga ni kubhanga undumbu.”

¹³ Mukubhita tumivu, kiyadi kyâ akituka aboki. Mivu ku pholo, ene akituka aboki ya thembu yoso ya exile mulanga o jitata jâ akukile kya. Mana Jane ujimbulula kyebhi kya divu mukubanza mu yoso yabhangele kya Jihova phala o mbote yâ: “Eme ngadilongo kwila Jihova ulanga o makamba mê ni ufiyele woso ni kwila ‘Jihova wejiya oso amutokala’, kala kizwela o divulu dya 2 Timote 2:19.” Se phata Jihova ulanga yo asola kumuzola ni kumusidivila!

14. Kyebhi kitutena kukwatekesa kuzelesa o dijina dya Jihova mu ima ituzwela ni mu ima itubhanga? (Tala we o jifoto.)

¹⁴ Etu twamesena kwila o athu ejiye kuma o ima yayibha yene mukwivwa yalungu ni Jihova, makutu. Xinganeka mu kifika kiki: Eye wala ni dikamba dye mukwa henda, mukwa kubhana ni mukwa kuloloka. Maji, se wivwa muthu wamuzwela kwila kamba dye muthu wa ibha ni kwila mukwa makutu, ihi i wanda bhanga? Eye wanda muzokela. Kyene kimoxi we, kyoso Satanaji ni yo ala ku mbandu ye, asota kuxidisa o dijina dya Jihova mukutanga makutu alungu ni Jihova, etu tumuvutwila mukutanga o kidi kyalungu ni Jihova ni kuzokela o Dijina dyê ni kuswina kwoso. (Jisá. 34:1; Iza. 43:10) Tulondekesa kwila twasolo kusidivila Jihova ni mwenyu wetu woso mu ibhangelu yetu ni mu ima ituzwela.

15. Ima yebhi yambote yabhiti ku mwenyu wa Phawulu kyoso mwene kya lungulula o ukexilu wa mwenyu wê? (Filipe 3:​7, 8)

¹⁵ Etu twala polondo phala kulungulula o ukexilu wa mwenyu wetu, phala kusangulukisa Jihova ni kubhanga dingi mu sidivisu ye. Mukifika, poxolo Phawulu wexile ni kididi kya ungana mu ngeleja ya Jijudé maji ne kiki mwene weha o ngeleja yiyi phala kukituka dixibulu dya Jezú ni kusidivila Jihova. (Nga. 1:14) Mukonda dya kiki mwene watambula mabesá avulu yu watambula we o ujitu wa kutumina ni Jezú ku dyulu. Mwene nuka wadyela mukonda dya kusola kusidivila Jihova etu wetu nuka twanda dyela mu kubhanga kiki.—Tanga Filipe 3:​7, 8.

16. Ihi itwa dilongo ku musoso wa mana Julia? (Tala we o jifoto.)

¹⁶ Se tubhangesa kwila o sidivisu yetu kwa Jihova ikale o kima kya beta kota ku mwenyu wetu, mwene wanda tubesowala lelu ni ku hádya. Tala o musoso wa phangyetu wa muhatu a mwixana Julia. Kyoso kyexile hanji mona-ndenge, mwene wexile mukwimba mu ngeleja yê. Kuma wexile mukwimba kyambote, exile mu mulonga phala kukituka ngimbidi ya fuma. Mu kubhita kithangana mwene wexile kya ni fuma, mu kiki wexile mukwimba mu ididi ya katunda. Kyoso kyexile hanji mu dilonga mu xikola ya kwimba, sayi koleka yê wa mutangela yalungu ni Nzambi, wa mujimbulula kwila Nzambi wala ni dijina, dijina dyê Jihova. Kikwalaleka kyavulu, mana Julia wamateka kudilonga o Bibidya luyadi ku semana. Mwene wasolo kungastala o kithangana ni nguzu yê mukusidivila Jihova muveji dya kukala ngimbidi ya fuma. Kwa mubhonzele kubhanga kiki. Mana Julia wambe: “Athu avulu exile mungitangela kwila ngatobho, mukonda dya kweha kwimba phala kusidivila Jihova, maji ngamesenene kyavulu kusidivila Jihova ni mwenyu wami woso.” Kyebhi kya divwa mwene lelu, mukonda dya kusola kusidivila Jihova mu 30 a mivu ku dima? “Nga sanguluka kyavulu mu kusola kusidivila Jihova, nga dyelela kwila ku hádya Jihova wanda ngibhana o ima yoso ingabhidamena.”—Jisá. 145:16.

SULUKA MU KUSIDIVILA JIHOVA

17. Kuma twala mu izuwa isukidilaku ihi yatokala o kubhanga yo kasolo luwa kusidivila Jihova ni yo asolo kya kusidivila Jihova?

¹⁷ Etu twala mu izuwa isukidilaku wa mundu yu wa ibha. Poxolo Phawulu wa soneka: “Kuma ‘kwakambe ngó bhwofele’ o ‘muthu wa mukwiza wanda bhixila kyá, mwene kanda laleka dingi kana.’” (Jih. 10:37) Kiki kilombolola ihi? O kithangana phala o athu kusola kusidivila Jihova kyabutu kya. (1 Ko. 7:29) Etu twa solo kusidivila Jihova, twa tokala kusuluka mu kukolokota mu ibhidi, mukonda “o thembu yabutu kyá.”

18. Jihova ni Jezú amesena kwila tubhanga ihi?

¹⁸ Jezú waswinisa o athu kukala maxibulu mê ni kusuluka mu kumukayela. (Mat. 16:24) Se twamusidivila kya Jihova mu mivu yavulu kitwatokala kubhwila. Twatokala kubhanga nguzu phala kusuluka mu kusidivila Jihova. Twejiya kwila kitena kubhonza maji ne kiki twanda sanguluka, twanda tambula mabesá avulu mukusidivila Jihova né mwene kindala!—Jisá. 35:27.

19. Ihi i wadilongo ni ima yabhiti ni manu Gene?

¹⁹ Sayi athu abanza kwila se asidivila Jihova kanda tena kuzediwa. Se u munzangala, o kwila udivwa kuma kubhonza kyavulu kusidivila Jihova? Phangyetu ya diyala munzangala amwixana Gene wambe: “Mukonda dya kukala mbangi ya Jihova, ngexile mudivwa kwila kingatokalele kutonoka. Kyedile kala o mizangala ngakudile nayu kumoxi exile muya mu jifesa, kutonoka, kuditangesa ni kubhanga jijoko ja ujibhanganga, maji eme ngexile ngo mungastala o kithangana kyami mu kuya mu yonge ni musidivisu ya kuboka.” Ihi yabhiti ni manu Gene mukonda dya kubanza kiki? Mwene wambe: “Ngamateka kubhanga ima yayibha mukaswekele, ngafikile kwila ngasangulukile. Maji o kusanguluka kuku ki kwanangenena, mukonda kingexile ni kusanguluka kwakidi. Ngamateka kuxinganeka mu itumu ya Bibidya ingakambele ku ibhana valolo. Mukiki ngasolo kuvutuka mu kusidivila dingi Jihova ni muxima woso. Tunde mukithangana kyenyokyo ngatena kumona kyebhi Jihova kyene mutambwijila o misambu yami.”

20. Twatokala kukala polondo phala kubhanga ihi?

²⁰ O mukwa Jisálamu wembi kwa Jihova: “U zediwa muthu woso eye wa mu solo, anga u mu bhixidisa kokwé, phala n’a tunge mu kithâdi kyé; mbé tu ikute jinge ni jimbote’ojo ja dibhata dyé, ja Tembulu yé ikôla.” (Jisá. 65:4) Twamesena kusuluka mu kuswina kala kyabhange Josuwé, mwene wambe: “Maji eme ni dibhata dyami dyoso, twanda sidivila Jihova.”—Josu. 24:15.