O Kwila Tutena Kusuluka mu Kudilonga ku Milongi Yadyanga ya Bibidya?

1. Kyebhi o milongi yadyanga ya Bibidya yalungulula o mwenyu wé?

O MILONGI yadyanga ya Bibidya yalungulula o mwenyu wetu. Mu kifika, kyoso kitwadilongo kwila o dijina dya Nzambi, Jihova, eye wamateka kuzukama kwa mwene. (Iza. 42:8) Kyoso ki wadilongo se ihi ibhita ni muthu kyoso kyafwa, eye kiwadibhwidisa dingi se o jindandu jé jafu kya amutala hadi. (Ndo. 9:10) Kyoso ki wadilongo kwila o ixi yanda kituka Palayizu, eye kiwene mutandanganya dingi ni ima yanda bhita ku hadya. Eye wejiya kwila kiwanda kala ku mwenyu ku 70 mba 80 amivu ngo, maji wanda kala ni mwenyu wakalelaku.—Jisá. 37:29; 90:10.

2. Mukonda dyahi katé mwene o Jikidistá jakulu mu nzumbi atena hanji kukatula mbote ku milongi yadyanga ya Bibidya? (2 Phetele 1:​12, 13)

² Etu twanda suluka mu kukatula mbote ku milongi yadyanga ya Bibidya. Mu mukanda wê wakayadi, poxolo Phetele wasonekena o Jikidistá ‘akolele kya mu ilongesu yakidi’ kifwa, akudile mu nzumbi. (Tanga 2 Phetele 1:​12, 13.) Maji mu kithangana kyenyokyo, mwexile alongexi a makutu amesenene kwa anganala. (2 Ph. 2:​1-3) Phetele wamesenene kuswinisa o jiphange phala kwa akwatekesa kudituna o makutu yá. Mu kiki, mwene wa alembalesa yalungu ni ima yadilongele kya. O milongi yiyi yeji kwa akwatekesa kukolokota fiyele kwa Jihova.

3. Kifika kyebhi kitukwatekesa kumona kwila o milongi ya dyanga ya Bibidya itena kukwatekesa katé mwene o Jikidistá akulu mu nzumbi?

³ Né mwene se twamusidivila kya Jihova mu mivu yavulu, tutena hanji kudilonga ima ya ubhe ku milongi yadyanga ya Bibidya. Xinganeka mu kifika kiki: Mamá ni mon’ê wa muhatu amulamba makovi. Kuma o mamá wejiya kulamba kyambote, o kudya kwê kwanda wabha dingi, o kudya kwa mona, ndenge, sumbala o makovi ene amoxi. Kyene we kimoxi, o muthu wamusidivila kya Jihova mu mivu yavulu utena kudilonga dingi ima yavulu ku milongi ya dyanga ya Bibidya, o muthu wamateka kusidivila Jihova kindala, ndenge. Kiki kibhita kyebhi? Tunde kyatubatizala nange o mwenyu wetu ni maujitu utwexile nawu mu kilunga kya Jihova, alunguluka. Maji o kuxinganeka mu ima itwadilongele kya mu ukulu kutukwatekesa kubanza mu maukexilu ututena kukumbidila o milongi yiyi mu maka utwamudibhana nawu kindala. Twanda dilonga milongi itatu ya Bibidya ni kumona se ihi itena kudilonga o Jikidistá akulu mu nzumbi.

JIHOVA MWENE O MUBHANGI WETU

4. O kwijiya kwila Jihova mwene o mubhangi wetu kwatubhangesa kudivwa kyebhi?

⁴ Twejiya kwila o ixi ni yoso yalamu a ibhange kwala Nzambi, njimu, muteni wa yoso. O Bibidya yamba: “Wabhange o ima yoso Nzambi.” (Jih. 3:4) Maji etu tutena kudilonga ima yamukwa mu milongi yiyi ya Bibidya. Kuma mwene watubhange, Jihova wejiya yoso yalungu netu. Mwene we utusuwa, wejiya o ima yabeta kota phala etu. Kyenyiki, mu kwijiya kwila Jihova mwene o Mubhangi wetu, tusanguluka dingi ku mwenyu.

5. Kidi kyebhi kya Bibidya kitukwatekesa kukala tu athu alenduka? (Izaya 45:​9-12)

⁵ O kwijiya kwila Jihova o mubhangi wetu kutukwatekesa kulenduka. Mukifika Jobe wexile ngo mudikwatenena mudye ni ku ibhidi yê. Phala kumukwatekesa, Jihova wa lembalesa Jobe kwila mwene wexile o muteni wa yoso. (Jobe 38:​1-4) Kiki kyabhangesa Jobe kumona kwila yoso ibhanga Jihova yayuka. Mukujimbulula kwila o athu katokala kudimona kwila ene abeta kota Jihova ndenge, Izaya wasoneka: “Manyi o utuma utena kwambela ngûmbi ye wixi: ‘Wa mu bhanga’hi?’”—Tanga Izaya 45:​9-12.

6. Kithangana kyebhi kyabeta kota o kuxinganeka ku unjimu ni mu kutena kwa mubhangi wetu? (Tala we o jifoto.)

⁶ Kyoso o kidista kyaya ni kukula munzumbi mwene utena kumateka kudidyelela ngo mwene, muveji dya kusota o kitendelesu kya Jihova ni kya Bibidya. (Jobe 37:​23, 24) Kyoso kiki kibhita, kima kyambote o kidista kuxinganeka kwila o unjimu ni kutena kwa Mubhangi kitutena kukisokesa. (Iza. 40:22; 55:​8, 9) Mukiki, o milongi yiyi yadyanga ya Bibidya yanda mukwatekesa kusuluka mu kulenduka ni kutendela kwila o ibanzelu ya Jihova yabeta dingi kota o ibanzelu ye ndenge.

7. Ihi yabhange mana Raela phala kuxikina kitendelesu kya ubhe?

⁷ Kulembalala kwila Jihova mwene o Mubhangi kyakwatekesa mana Raela, wa tungu mu ixi ya Eslovênia, kuxikina kitendelesu kya ubhe kya kilunga kya Jihova. Mwene wambe: “Sayi bhabha kungibhonza kuxikina o itendelesu ya yo atukala ku pholo. Mukifika, eme ngatale o Jihundu Jaubhe ja Kibuka Kya Utuminu ja 8 ja 2023. O kizuwa kyadyanga ki ngamono phange wexile ni mwezu kubhanga diskulusu, ngadivu kyayibha. Mukiki ngasambe kwa Jihova, ngamubhingi phala kungikwatekesa kuxikina o kitendelesu kiki kya ubhe.” Mana Raela watendela kwila mukonda dya kukala o Mubhangi wa dyulu ni ixi, Jihova utena kwendesa o kilunga kyê mu ukexilu wa tokala. Abha eye, o kwila sayi bhabha kukubhonza we kuxikina kitendelesu kya ubhe? Se kyene, o kima kyabeta kota ki watokala o kubhanga, o kulenduka ni kuxinganeka mu unjimu ni mukutena kwa Mubhangi wetu.—Lom. 11:​33-36.

NZAMBI KI MWENE WENE MUTUTALESA O HADI

8. O kwijiya kwila ki Jihova wene mututalesa o hadi kyakukwatekesa kudivwa kyebhi?

⁸ Mukonda dyahi Nzambi wehela o hadi? Mukonda dya kukamba kwijiya o kitambwijilu kya kibhwidisu kiki, avulu akala ni njinda ya Nzambi mba axikina kwila kikwene Nzambi! (Jisa. 19:3) Maji eye wa dilongo kwila ki Jihova wene mututalesa hadi, o athu atala hadi mukonda dya kituxi kitwalundula. Mukonda dya mwanyu wê, Jihova wene mukwehela mazunda ni mazunda a athu kumwijiya ni kwijiya we kwila mwene wanda zubha o hadi yoso. (2 Ph. 3:​9, 15) O kidi kiki kyakuswinisa, kyakolesa we o ukamba wé ni Jihova.

9. Mu ithangana yebhi itwabhingi kulembalala se mukonda dyahi Jihova wehela o hadi?

⁹ Twejiya kwila kima kyambote kukala ni mwanyu kyoso kituya ni kukingila Jihova kuzubha o hadi. Maji kyoso etu mba muthu twamuzolo ubhita mu ibhidi, amutalatala kyayibha, mba ufunda muthu wa kazola, tutena kubanza kwila Jihova wa mulaleka kyavulu phala kuzubha o hadi. (Haba. 1:​2, 3) Kyoso kitwamudibhana ni jiphaxi, kima kyambote kulembalala o ima ibhangesa Jihova kwehela o athu ambote kubhita mu ibhidi.a (Jisá. 34:19) Tutena we kuxinganeka mu kikanenu kya Jihova kya kuzubha o hadi yoso kate ku hádya ni hádya.

10. Ihi yene mukwatekesa mana Ana kudibhana ni ndolo ya kufunda mam’â?

¹⁰ O kwijiya o kidi kyalungu ni hadi kitena kutukwatekesa kukolokota. Mana Ana, watungu ku kikolo kya Mayote wambe: “Mivu kudima ngafundu mam’etu, kiki kyangiluwalesa kyavulu. Maji ngene mulembalala kwila Jihova kimwene wene mututalesa hadi. Maji mwene wala ni hanji yavulu ya kuzubha o hadi ni kufukununa o athu afu kya. O kuxinganeka mu kidi kiki kingitululukisa o muxima.”

11. O kwijiya se mukonda dyahi Jihova wa mukwehela o hadi utukwatekesa mu ukexilu webhi?

¹¹ O kwijiya kwila Jihova mukwa mwanyu ni kwila wehela o hadi, kutuswinisa kusuluka kubhanga o kikalakalu kya kuboka. Poxolo Phetele wajimbulula kwila o mwanyu wa Jihova ubhana kithangana phala o athu adyele ni kubhuluka. Mukusuluka mwene wambe: “Xinganekenu se mwafwama mukala mu athu akidifwa kyahi. Mwa tokala mukala mu athu ala ni wendelu wazele, ni kubhanga ima iximanesa Nzambi.” (2 Ph. 3:11) O kuboka kwa lungu ni “kubhanga ima iximanesa Nzambi”. Kala o Tatetu, etu twazolo o athu twamesena kwila ene akala ni mwenyu wa kalelaku ku mundu wa ubhe. Jihova wamusuluka mu kubhana kithangana ku athu atungu ku dyembu dyé phala ku musidivila. Eye wala ni ujitu wa kukalakala ni Nzambi ni kukwatekesa o athu ku musidivila ande dya dizubhilu!—1 Ko. 3:9.

TWATUNGU “MU IZUWA ISUKIDILA-KU”

12. Kutendela kwila twala “mu izuwa isukidila-ku” kitubhana kidyelelu kyahi?

¹² O Bibidya ijimbulula se kyebhi kyeji kala o athu “mu izuwa isukidila-ku.” (2 Ti. 3:​1-5) Twene mumona izuwa yoso o ukexilu wa ibha wa athu wene mudibandekesa kizuwa ni kizuwa, kiki kilondekesa kwila o kikanenu kiki kyamu dikumbidila. O kutendela o kidi kiki kitubhangesa kukolesa o kidyelelu kyetu ku mak’â Nzambi.—2 Ti. 3:​13-15.

13. Mukuxinganeka mu kifika kyate Jezú mu divulu dya Luka 12:​15-21, twatokala kudibhwidisa ihi?

¹³ O kwijiya kwila twala mu izuwa isukidilaku kitukwatekesa kudikwatenena mu ima ya beta dingi kota. Mu divulu dya Luka 12:​15-21 Jezú wate kifika kitukwatekesa ku dikwatenena mu ima yambote. (Tanga.) Mukonda dyahi o Bibidya yamba kwila o diyala didi dyexile “kyôwa”? Kimukonda dya kukala mvwama maji mukonda dya kudikwatenena mu ima yakambele valolo. Mwene wexile mu ‘lunda jimbote phala mwene, maji phala Nzambi mwene wexile ngadyama.’ Mukonda dyahi mwene watondala mu kubhanga kiki? Nzambi wa mwambela: “Usuku walelu, wanda fwa.” O kifika kiki kitulonga ihi? Kwakambe ngo bhofele o dizubhilu dya mundu yu dyanda bhixila kya. Mukiki twabhingi ku dibhwidisa: ‘O kwila o ima ingisola ilondekesa kwila ngamudikwatenena mu ima yabeta dingi kota? Ngene muswinisa o twana twami kusuwa mbambe yebhi? Ngene mungastala o kithangana, nguzu ni jimbote jami phala kulunda jimbote phala eme ngo inga ngamulunda jimbote ku dyulu?’

14. Kala kilondekesa o musoso wa mana Madikinya, mukonda dyahi kima kyambote kuxinganeka ku ima ilondekesa kwila twala mu izuwa isukidilaku?

¹⁴ Kyoso kituxinganeka ku ima ilondekesa kwila twala mu izuwa isukidilaku, kiki kitena kulungulula o ukexilu wa mwenyu wetu. Kiki kyene kyabhiti ni mana Madikinya. Mwene wambe: “Kyoso ki ngazubha o xikola ya kaxi, ngamesenene kyavulu kutokwesa o myenyu ya yama ni kukala ni kikalakalu kiki. Ngexile we ni mbambe ya kukala muboki wa thembu yoso ni kusidivila mu ididi mwabhindamena dingi aboki. Maji o makamba mami akulu mu nzumbi angibhana o ndunge ya kuxinganeka se o salu yiyi yanda ngikwatekesa kusuwa o mbambe ingaxindi. Ene angilembalesa kwila o dizubhilu dya mundu yu dya zukama ni kwila kumundu wa ubhe nganda kala ni kithangana kyasoko phala kudilonga o myenyu ya yama yoso. Mukiki ngasolo kudilonga ufunu weji ngibhana dingi kithangana. Mukubhanga kiki ngatena kukala muboki wa thembu yoso, mukusuluka ngayi musidivila mu ixi ya Equador, mu kididi mwabhindamene dingi aboki.” Lelo mana Madikinya ni mwadi wê amukunda o ilunga mu ixi yiyi.

15. Kyebhi o phangu ya Tiyaku ilondekesa kuma tutena kudyelela kwila o athu anda xikina o njimbu yambote? (Tala we o jifoto.)

¹⁵ Kuxinganeka kwila twala mu izuwa isukidilaku kitubhangesa kuboka ni kuswina kwoso né mwene se o athu katubhana matwi. Kima kyambote kwijiya kwila o athu atena kulunguluka. Tala yabhiti ni Tiyaku phange ya Jezú. Mwene wamono Jezú kukula, kukituka Mexiya ni mulongexi wa dikota. Mwene wakituka ngo dixibulu kyoso Jezú kya mufukununa!b (Nzw. 7:5; Nga. 2:9) Kana kuxinganeka kwila o jindandu jé ni athu kene mukubhana matwi nuka anda kituka Jimbangi ja Jihova. Nange ene anda xikina ngo mu ima i uzwela kyoso kyanda mateka o hadi ya dikota.c

SULUKA MUKUBHANA VALOLO MU ITENDELESU YA JIHOVA

16. Kyebhi o itendelesu ya Jihova itena kukukwatekesa? (Tala we o kaxa “Kwatekesa Akwenu Bhukaxi ka Milongi ya Bibidya.”)

¹⁶ Milongi yavulu itutambula a ibhange benge-benge phala o athu kejiya ima yavulu yalungu ni Bibidya. Mukifika, o madiskulusu a disukilu dya semana, o madivulu ni milongi yamukwa ni jividyu jitusanga mu jw.org, a ibhange benge-benge phala o athu ki Jimbangi ja Jihova. Né kiki o itendelesu yiyi ya Jihova itena kutukwatekesa. Yene ibandekesa o henda yetu kwa Jihova, ikolesa o kixikanu kyetu mu Bibidya itukwatekesa we kukala tu alongexi ambote a Bibidya.—Jisá. 19:7.

17. Mu ithangana yebhi itutena kuxinganeka mu milongi ya dyanga ya Bibidya?

¹⁷ Etu tu Jimbangi ja Jihova, tusanguluka kyavulu kyoso kitutambula milongi ya ubhe ya Bibidya. Maji tubhana valolo yavulu mu milongi ya dyanga ya Bibidya yatukwatekesa kukituka jiselevende ja Jihova. Se tumesena kudikwatenena mu ixinganeku yetu muveji dya kukayela o ilongesu ya kilunga, twatokala kulenduka ni kulembalala kwila o Mubhangi wetu mukwa unjimu ni Muteni’a yoso mwene wamukwendesa o kilunga. Se etu mba muthu twamuzolo wa mubhita mu ibhidi, kima kyambote kukala ni mwanyu ni kuxinganeka se mukonda dyahi Jihova wa mukwehela o hadi. Kyoso ki tusola se kyebhi ki twanda ngastala o kitadi ni kithangana kyetu kima kyambote kulembalala kwila twala mu izuwa isukidilaku. O itendelesu ya Jihova yanda suluka mu kutuswinisa, kutubhana nguzu ni unjimu.