Sanguluka ni Ima i Wala Nayu

1. O muthu wasanguluka ukala kyebhi? O muthu wasangula kabhanga ihi?

O KWILA eye u muthu wasanguluka? O muthu wasanguluka, watululuka, udikwatenena mu ima yala nayu kya. Mwene ki mukwa njinda, mba uluwala mukonda dya ima kala nayu. Maji kiki ki kilombolola kwila o muthu wasanguluka kanda tandanganya ni mwenyu wê. Mu kifika, ki kituxi kumesena kubhanga dingi mu sidivisu yetu kwa Jihova. (Lom. 12:1; 1 Ti. 3:1) Sumbala wamesena kubhanga dingi, o muthu wasanguluka kaluwala se katambula luwa o ujitu wamesena.

2. Ima yebhi yayibha itena kubhita se tweha kusanguluka ni ima itwala nayu kya?

² Kyoso kitukamba kusanguluka ni ima itwala nayu kya, tutena kusola kyayibha. O athu kasanguluka ni ima yala nayu atena kukalakala ji ola javulu phala kukala ni jimbote kijabhindamena. Tuluwala kyavulu mu kwijiya kwila sayi jiphange anyanene kya kitadi mba ima yamesenene. Ene atena kubanza kiki: ‘Ngatokala kukala ni kima kiki,’ ‘Ngakingila kya ithangana yavulu,’ mba ‘Nganda nyana kindala, kupholo dya kwenda ngana vutula o kitadi.’ Kima kyoso-kyoso kutubhangesa kunyana, kiluwalesa Jihova, kixidisa we o dijina dyê. (Jisa. 30:9) Sayi athu aluwala kyavulu mukonda dya kukamba kutambula maujitu amesenene, mukonda dya kiki eha kusidivila Jihova. (Nga. 6:9) Kyebhi o selevende ya Jihova kyatena kubhanga kiki? O maka enyá: Bhofele-bhofele, mwene weha kusanguluka ni ima yakexile nayu.

3. Ihi i tutena kudilonga mu divulu dya Filipe 4:​11, 12?

³ Etu enyoso tutena kusanguluka ni ima itwala nayu kya. Poxolo Phawulu wasoneka: “Mu ithangana yoso ngadilongo o kusanguluka ni ima ingala nayu.” (Tanga Filipe 4:​11, 12.) Kyoso kyasoneka o izwelu yiyi, mwene wexile mu kaleya. Mwene wadilongo kusanguluka ni ima yexile nayu. Se tubhanga nguzu phala kusanguluka ni ima itwala nayu, o izwelu ya Phawulu ni ibhidi yadibhana nayu ku mwenyu wê, yanda tulondekesa kwila tutena we kusanguluka. Kitutokala kubanza kwila ki kyanda tubhonza kusanguluka ni ima itwala nayu. Maji twabhingi kudilonga kusanguluka ni ima itwala nayu. Kyebhi? Twanda dilonga idifwa yanda tukwatekesa kukala ni ukexilu yu.

SAKIDILA O IMA I WALA NAYU KYA

4. Kyebhi o kukala tu akwa kusakidila kutukwatekesa kusanguluka ni ima itwala nayu? (1 Tesalonika 5:18)

⁴ O mukwa kusakidila, usanguluka ni ima yala nayu kya. (Tanga 1 Tesalonika 5:18.) Mu kifika, se tusakidila mukonda dya kukala ni ima itwabhindamena, kitwanda tandanganya ni ima kitwala nayu. Kyoso kitusakidila Jihova mu maujitu utwala nawu kindala, twanda bhanga yoso itutena mu ikalakalu yiyi, mu veji dya kubanza kyavulu mu maujitu utwamesena kukala nawu. Mukonda dya kiki o Bibidya yamba kwila twatokala kusakidila Jihova mu misambu yetu! Kyoso kitukala ni ukexilu wa kusakidila, twanda kala ni “kutululuka kwa Nzambi kusomboka o kitongolwelu kyoso.”—Fil. 4:​6, 7.

5. Ima yebhi yeji bhangesa o akwa Izalayele kusakidila Jihova? (Tala we ofoto.)

⁵ Tala yabhiti ni akwa Izalayele. Mu ithangana yavulu exile mudikalanganza ni Jihova mukonda dya kudya kwexile mudya ku Ijitu. (Dya. 11:​4-6) Kidi kwila o mwenyu mu kikangalakata wabhonzele. Ihi yeji tena kwa akwatekesa kusanguluka? Ene eji xinganeka mu yoso yabhangele kya Jihova phala ene. Ene atokalele kubanza kwila mu ixi ya Ijitu exile mwa atalatala kyayibha ni kwabeta. Jihova wabheka dikwinyi dya mabhebhu ku akwa Ijitu, anga wabhulula o akwa Izalayele. Kyazubha kwa abhulula, o akwa Izalayele “atambula o ima ku akwa Ijitu,” phalata, ulu ni izwatu. (Mak. 12:​35, 36) Kyoso o akwa Izalayele kyabhixila ku ndundu ya Kalunga ka Kusuka, Jihova wajikula o kalunga. Kyoso kyakexile mu kikangalakata, izuwa yoso mwene wa adikila ni maná. Ebhi exile o maka? Ki kwila kwa akambele kudya, maji ene kexile musakidila Jihova mu kwa abhana o ima yexile nayu kya.

6. Ima yebhi itena kutukwatekesa kukala ni ukexilu wa kusakidila?

⁶ Ihi itena ku kukwatekesa kukala ni ukexilu wa kusakidila? Kyadyanga, izuwa yoso xinganeka mu ima i kusangulukisa. Eye utena kusoneka ima iyadi mba ima itatu. (Kud. 3:​22, 23) Kyakayadi, sakidila o athu ene mu kubhanga o mbote. O kima kyabeta dingi kota, sakidila Jihova izuwa yoso. (Jisá. 75:1) Kyakatatu, o makamba mé atokala kukala ni ukexilu wa kusakidila. Mukonda se muthu ukala ni ukexilu wa kusakidila, eye we wanda kala ni ukexilu yú. Maji se ene ki akwa kusakidila, eye we kiwanda sakidila akwenu. (Mate. 1:​26-28; 2 Ti. 3:​1, 2, 5) Se tukala ni ukexilu wa kusakidila, kitwanda dikwatenena mu ibhindamu yetu.

7. Ihi yakwatekesa mana Asi kusanguluka dingi?

⁷ Tala yabhiti ni phange ya muhatu watungu mu ixi ya Indonésia, amwixana Asi. Mwene wambe: “Mu kithangana kya uhaxi wa COVID-19, ngamateka kudisokelesa ni jiphange mu kilunga. Mukonda dya kiki, ngaluwalele.” (Nga. 6:4) Ihi yamukwatekesa kulunguluka? Mana Asi wambe: “Kizuwa ni kizuwa, ngamateka kusoneka o mabesá ungexile mutambula. Ngexile we muxinganeka mu mbote ya kubhanga mbandu ya kilunga kya Nzambi. Mukusuluka, ngasakidila Jihova mu ima yoso yiyi. Kiki kya ngikwatekesa kusanguluka dingi.” Se kiwasanguluka ku mwenyu wé o kwila utena kubhanga, yabhangele mana Asi?

LENDUKA

8. Ihi yabhiti ni Mbaluke?

⁸ O seketa ya Jelemiya, amwixana Mbaluke, sayi kithangana waluwalele. Mbaluke wexile ni kikalakalu kyabhonzo. Mwene watokalele kukwatekesa Jelemiya kutangela o akwa Izalayele ihi yeji bhita ni ene mukonda dya kubhukumukina Jihova. Maji mu veji dya kudikwatenena mu ima yamesenene Jihova kwila mwene ubhanga, Mbaluke wamateka kuxinganeka kyavulu mu ima yamesenene kubhanga. Bhukaxi ka Jelemiya, Jihova watangela Mbaluke: ‘Eye wamusota ima yonene. Kana kwisota dingi.’ (Jel. 45:​3-5) Jihova wexile muzwela kwa Mbaluke: “Sanguluka ni ima i wala nayu.” Mbaluke waxikina o kikwatekesu kya Jihova, yu wasuluka ni ku musidivila.

9. Kala kyamba o divulu dya 1 Kolindu 4:​6, 7, o kulenduka kwanda tukwatekesa kuxikina ihi? (Tala we o jifoto.)

⁹ Sayi bhabha, selevende imoxi ya Jihova utena kubanza kwila mwene watokala kutambula kikalakalu kimoxi. Mwene utena kubanza kiki mukonda wala ni mauhete avulu, ukalakala ni nguzu yoso mba wamusidivila kya Jihova mu mivu yavulu. Maji kubhita kwila, akwa éne atambula o maujitu amesena mwene. Ihi itena kumukwatekesa phala kaluwale? Mwene utena kubanza mu izwelu ya poxolo Phawulu itusanga mu divulu dya 1 Kolindu 4:​6, 7. (Tanga.) Jihova mwene watubhana o maujitu oso ni mauhete utwala nawu. Mwene katubhana o maujitu yá mukonda twabeta-kota, akwetu ndenge. Yoso yiyi ijila ngo mu ngalasa yê.—Lom. 12:​3, 6; Efe. 2:​8, 9.

10. Kyebhi kitutena kulenduka?

¹⁰ Tutena kulenduka mu kukayela o phangu ya Jezú. Mwene wasukula o inama ya jipoxolo né mwene wejidile kwila wexile Mon’â Nzambi ni kwila wexile ni ungana wavulu. Poxolo Nzwá wasoneka: “Mu kwijiya kwila o Tata wa bhakwile o ima yoso bhu maku mê ni kwila, watundile kwa Nzambi yu weji vutuka kwa Nzambi, . . . wamateka kusukula o inama ya maxibulu.” (Nzw. 13:​3-5) Jezú weji banza kwila o jipoxolo jê, éne atokalele kusukula o inama yê. Kyoso kyexile mu ixi, mwene kabanze kwila mukonda dya kukala Mon’â Nzambi watokalele kukala ni kitadi kyavulu ni inzo yafwama. (Luk. 9:58) Jezú walendukile, wasangulukile we ni ima yexile nayu. Mwene watuxila phangu yambote.—Nzw. 13:15.

11. Kyebhi o kulenduka kwakwatekesa manu Diniji kusanguluka ni ima yala nayu?

¹¹ Sayi phange watungu ku Holanda, amwixana Diniji, wambe kwila wene mubhanga nguzu phala kukayela o kulenduka kwa Jezú, maji kwene mu mubhonza. Mwene wambe: “Sayi bhabha ngiluwala mu kumona phange kutambula o ujitu ungamesena kukala nawu, mukonda ngibanza kwila éme ngafwama ku utambula. Kyoso kiki kibhita, ngene mudilonga yalungu ni kulenduka. Mu JW Library^®, ngaxindi o jivelusu jizwela yalungu ni kulenduka phala ngitene kujitanga dingi. Mu mutelembe wami mwala madiskulusu azwela yalungu ni kulenduka, ngene mwa evwa mu ithangana yoso.a Ngadilongo kwila yoso i ngibhanga phala Jihova, ngi ibhanga phala o kiximanu kyê, kana phala o kiximanu kyami. Mu henda yê, Jihova utwehela kubhanga kama, o kijingu kyoso phala mwene ngo.” Se eye umateka kuluwala, bhanga nguzu phala kulenduka. Kiki kyanda kolesa o ukamba wé ni Jihova ni ku kukwatekesa kusanguluka ni ima i wala nayu.—Tiy. 4:​6, 8.

XINGANEKA MU IKANENU YA JIHOVA

12. Ikanenu yebhi itusangulukisa? (Izaya 65:​21-25)

¹² Tusanguluka kyoso kituxinganeka mu ikanenu ya Jihova. Mu divulu dya Izaya, Jihova ututangela kwila wejiya o ibhidi yoso itudibhana nayu, maji ututangela we kwila wanda zubha o ibhidi yoso yiyi. (Tanga Izaya 65:​21-25.) Twanda tunga mu jinzo jafwama, jakondama. Twanda kala ni ikalakalu yanda tusangulukisa, twanda dya kudya kwambote. Kitwanda kala dingi ni woma wa kwila kima kyayibha kyanda bhita n’etu mba ni twana twetu. (Iza. 32:​17, 18; Ize. 34:25) Tutena kudyelela kwila o ima yiyi yanda bhita mwene.

13. Mukonda dyahi kindala kyene o kithangana kitwabhingi kuxinganeka dingi mu kidyelelu kyetu, mu ukulu ndenge?

¹³ Kindala twabhingi dingi kuxinganeka mu kidyelelu kyetu, mu ukulu ndenge. Mukonda dyahi? Mukonda twala mu “izuwa isukidilaku,” twala mu ‘ithangana yabhonzo kudibhana nayu.’ (2 Ti. 3:1) Mukonda dya kiki, izuwa yoso Jihova utukwatekesa kukolokota mu kutwendesa, mu kutubhana we o nguzu itwabhindamena. (Jisá. 145:14) O kidyelelu kitwala nakyu kitukwatekesa kyoso kitwamudibhana ni ibhidi. Nange eye wamudibhana ni ibhidi phala kulanga o ibhindamu ya mwiji wé. O kwila kiki kilombolola kwila eye wanda kala u ngadyama katé ku hadya ni hadya? Kana ngana! Jihova ukanena kwila mu Palayizu wanda kubhana yoso i wabhindamena, ni ima yamukwa i wakambe kuxinganeka. (Jisá. 9:18; 72:​12-14) Nange eye wamukwivwa jindolo javulu mukonda dya uhaxi, mba wala ni kikote ku muxima. O kwila wanda suluka ni kwivwa jindolo katé ku hádya ni hádya? Kana! Mukonda ku mundu wobhe kikwanda kala dingi ndolo né kufwa. (Dij. 21:​3, 4) O kidyelelu kiki kitukwatekesa kukamba kuluwala ni kukala ni njinda mukonda dya ibhidi itwamudibhana nayu kindala. Tutena kutululuka né mwene se atutalatala kyayibha, twafundu muthu wakazola, twahaxila mba twamudibhana ni kibhidi kyengi. Mukonda dyahi? Mukonda “o hadi i twa mubhita nayu ki yanda nangenena,” ku mundu wa ubhe yene yoso yanda bhwa.—2 Ko. 4:​17, 18.

14. Kyebhi kitutena kukolesa o kidyelelu kyetu?

¹⁴ Kuma o kidyelelu kyetu kitukwatekesa kusanguluka, kyebhi kitutena kukikolesa? Xinganeka ku maka yá: Sayi athu phala kumona kyambote o ima yala dikanga, ene abhingi kuta mawana. Etu we twatokala kubhanga ima yanda tukwatekesa kumona kwila o Palayizu, kidi mwene. Kyoso kitudibhana ni ibhidi phala kudikila o miji yetu, tutena kuxinganeka mu kithangana kyoso ki kwanda kala dingi wadyama mu ngongo. Kyoso kituluwala mukonda kitwala hanji ni ujitu utwamesena, tutena kuxinganeka kwila o maujitu ya kanda kala dingi ni valolo kyoso kitwanda kala tu athu ayuka ni kusidivila Jihova ku mazunda ni mazunda a mivu. (1 Ti. 6:19) Kyoso kitubanza kyavulu mu ibhidi itwamudibhana nayu kindala, kiki kitufidisa kubanza mu ikanenu ya Jihova. Mukiki-phe, se mu ithangana yoso tuxinganeka mu kidyelelu kyetu, twanda mona kwila o Palayizu, ki nzoji kana.

15. Ihi i wadilongo ku musoso wa mana Kidistina?

¹⁵ Tala kyebhi o kidyelelu kyene mukwatekesa mana Kidistina, muhatu wa manu Diniji, amutumbula kudima. Mwene wambe: “Ngala ni uhaxi ubotomokesa o mukutu wami. Mu kiki ngenda ngo mu kyalu kya malola. Mu ithangana yavulu ngikala ku hama. Izuwa yoso ngivwa jindolo. O dotolo wangitangela kwila kinganda disanza dingi. Kyoso kyangitangela o maka enyá, ni lusolo eme ngabanze: ‘O kyamumona mwene ku hádya, kikyene kingamumona eme!’ Eme ngixinganeka mu Palayizu, kiki kingitululukisa. Lelu ngatokala kukolokota ku uhaxi wami, maji ku hadya nganda disanza!”

“KI KWENE KUBHINDAMA KWA YÁ A KALA NI WOMA WÊ”

16. Mukonda dyahi Sobha Davidi wambe kwila “ki kwene kubhindama kwa yá a kala ni woma wê”?

¹⁶ Né mwene se tusanguluka ni ima itwala nayu, twanda dibhana hanji ni ibhidi. Sobha Davidi wafundu twana tutatu. Mwene amutatela, mu mivu yavulu Sobha Sawulu wexile mu musota phala ku mujibha. Né mwene ni ibhidi yiyi, mwene wambe kiki yalungu ni Jihova: “Ki kwene kubhindama kwa yá a kala ni woma wê.” (Jisá. 34:​9, 10) Mukonda dyahi mwene wexile ni kidyelelu kiki? Mukonda twejiya kwila sumbala Jihova katufidisa kubhita mu ibhidi, Mwene utubhana jinga itwabhindamena. Kiki kyene kyabhange ni Davidi. (Jisá. 145:16) Kala Davidi tutena kudyelela kwila Jihova wanda tukwatekesa kudibhana ni ibhidi yetu yoso. Mu kiki kitubhingi kutandanganya.

17. Mukonda dyahi eye wamesena kusanguluka ni ima i wala nayu?

¹⁷ Jihova wamesena kwila tusanguluka ni ima itwala nayu. (Jisá. 131:​1, 2) Mu kiki, bhanga nguzu phala kukala u mukwa kusakidila, kulenduka ni kuxinganeka mu ikanenu ya Jihova. Se ubhanga kiki, eye we wanda zwela kiki: “Èwá! nga tambula undundu wa wabha kyavulu!”—Jisá. 16:​5, 6.