Xikina Kwila Jihova Wakuzolo

1. Mukonda dyahi eye wadibhakula kwa Jihova? (Tala we ofoto.)

O KWILA wamulembalala o kizuwa ki wabhakula o mwenyu wê kwa Jihova? Eye wa kanena kwa Jihova kuta o Utuminu we kupholo wa mwenyu we ni kumuzola ni muxima wé woso, ni mwenyu wé woso, ni kilunji kyé kyoso, ni nguzu yé yoso. (Mál. 12:30) Tunde o kithangana kyenyokyo, o henda ye kwa mwene yadibandekesa dingi. Kyebhi kiweji tambwijila se akubhwidisa: “O kwila eye wazolo mwene Jihova?” Ni kusanguluka kwoso weji tambwijila: “Eme ngazolo Jihova kima kyoso-kyoso mba muthu woso-woso ndenge!”

2-3. Jihova wamesena kwila tukala ni kidyelelu kyahi? (Jelemiya 31:3) Ihi itwanda dilonga mu milongi yiyi?

² Maji kyebhi kiweji tambwijila se akwibhwidisa: “O kwila Jihova wa kuzolo mwene?” O kwila weji tandanganya phala kutambwijila, mu kubanza kwila eye kiwafwama kukuzola kwala Jihova? Sayi phange ya muhatu watale hadi yavulu mu undenge we wambe: “Eme ngazolo Jihova ngixikina kiki ni kidi kyoso maji mu ithangana yavulu ngikala ni phata se Jihova wangizolo mwene.” Kyebhi ki utena kwijiya se ihi ibanza Jihova yalungu neye?

³ Jihova wamesena kwila uxikina nikidi kyoso kuma mwene wakuzolo. (Tanga Jelemiya 31:3.) Mukidi Jihova mwene wakubheka mu kilunga kye. Kyoso kiwadibhakula kwa mwene watambula ujitu wala ni valolo yavulu: O henda yakalelaku ya Jihova. Kiki kilombolola kwila mwene wakuzolo kyavulu ni kwila nuka wanda kubhwazeka. O henda yiyi ibhangesa kwila o abhezi a Jihova neye we kwa exana kala ‘mundu we mba makembu mê.’ (Mal. 3:​17, nota.) Jihova wamesena kwila eye ukala kala kyakexile poxolo Phawulu. Ni kixikanu kyoso mwene wasoneka kwila Jihova wamuzolele kyavulu. Kyoso kyambe: “Ngi xikina kwila, sé-ku kima kitena kufidisa Nzambi ku tuzola. Né kalunga, né mwenyu, né jianju, né jinguvulu, né ima ya kindala, né ima yanda kwiza, né kutena, né ima yéne bhulu, né ima yala bhoxi, kanaku kima kyoso-kyoso kitena ku tufidisa kutambula o henda ya tulondekesa Nzambi.” (Loma 8:​38, 39) Mu milongi yiyi, twanda dilonga se ihi itutena o kubhanga phala kudyelela dingi kwila Jihova watuzolo ni ihi itena kutukwatekesa kubhanga kiki.

MUKONDA DYAHI KIMA KYAMBOTE KUDYELELA KWILA JIHOVA WATUZOLO?

4. Kyebhi kitutena kudifikidila ku mubhetu umoxi wa Satanaji?

⁴ Kyoso kitukala ni kidyelelu kya kwila Jihova watuzolo twanda tena kudifikidila ku “mubhetu” umoxi wa Dyabhu. (Efe. 6:11) Satanaji wanda bhanga yoso ni yoso phala kutubhangesa kweha kusidivila Jihova. O mubhetu wabetakota wa Satanaji, o kutuxikinisa kwila Jihova katuzolo. Kana kujimba kwila Satanaji ututendala kyoso kitwaluwala. Mukifika mwene ubhanga kiki kyoso ki tukala ni kikote mukonda dya ima yabhiti mu ukulu, mukonda dya ima yamubhita kindala mba mukonda dya ima yanda bhita ku hadya. (Jisa. 24:10) Satanaji wadifwangana ni hoji idya o kyama kyoso kyala ubheka we. Mukiki kyoso kitwaluwala Satanaji ututendala anga utubhangesa kweha kusidivila Jihova. Maji se tukolokota mukukolesa o kidyelelu kyetu mu kwila Jihova wa tuzolo twanda tena kuzoka ni Satanaji ni kudifikidila ku mibhetu yê.—1 Ph. 5:​8, 9; Tiy. 4:7.

5. Mukonda dyahi twatokala kudivwa kwila Jihova watuzolo ni kwila utubhana valolo?

⁵ Kyoso kitudyelela kwila Jihova watuzolo tumuzukama dingi. Mukonda dyahi tuzwela kiki? Jihova watubhange ni ukexilu wa kuzola ni wa kutuzola. Kyoso o muthu kyatuzola etu wetu tumuzola. Mukiki, kyoso Jihova kyatuzola ni kutubhana valolo etu wetu tumuzola. (1 Nz. 4:19) Kyoso kitumuzola dingi mwene we wanda tuzola kyavulu. Mukiki o Bibidya yamba: “Zukamenu kwa Nzambi, mwene wanda mi zukama we.” (Tiy. 4:8) Maji kyebhi kitutena kukolesa o kidyelelu kyetu kya kwila Jihova watuzolo?

IHI ITENA KUTUKWATEKESA KUXIKINA O HENDA YA JIHOVA?

6. Phala kuxikina o henda ya Jihova ihi itwabhingi o kubhinga ku musambu?

⁶ Suluka mukusamba kwa Jihova phala kukukwatekesa kuxikina kwila mwene wakuzolo. (Luk. 18:1; Lom. 12:12) Bhinga kwa Jihova phala kudimona kala kyene mu kumona, bhanga kiki ithangana yoso se kwabhingi. Kidi kwila kubhonza kuxikinisa o muxima we wene mukutatela izuwa yoso. Maji lembalala kwila Jihova wabeta kota o muxima we ndenge. (1 Nz. 3:​19, 20) Mwene wakwijiya dingi kyambote eye ndenge mwene umona kokwe o ima ki utena kwimona. (1 Sam. 16:7; 2 Mal. 6:30) Mutangele kyebhi ki wamudivwa anga mubhinge phala mwene na kukwatekese kuxikina kwila mwene wakuzolo. (Jisá. 62:8) Kyoso kituzubha o kusamba sayi ima itwabhingi o kwibhanga twanda mona se ima yebhi.

7-8. Kyebhi o Jisalamu jilondekesa kwila Jihova watuzolo?

⁷ Dyelela mu ima izwela Jihova. Bhukaxi ka nzumbi ikola Jihova wa bhangesa o athu kusoneka mu Bibidya, o idifwa ye. Tala kyebhi Davidi kya soneka kwila Jihova watuzolo kyavulu: “Jihova wa zukama kwa yá a toloka mixima, u bhulula oso a talamana mu nzumbi.” (Jisá. 34:18) Kyoso ki uluwala kyavulu utena kubanza kwila seko muthu utendela o kibhidi kiwamudibhana nayu. Maji Jihova uzukala kokwe mukonda mu ithangana yiyi mwene umona kwila eye wabhidamena dingi o kikwatekesu kye mu ithangana yamukwa ndenge. Musalamu yamukwa Davidi wasoneka: “O masoxi mami moso, eye wa a bhake mu kisudi kyé.” (Jisá. 56:8) Jihova umona kyoso ki uluwala ni kyoso ki wamutala hadi. Mwene utandanganya kyavulu neye, wivwa o ndolo i wamukwivwa. Kala o menya ala ni valolo yavulu phala o muthu wamukwenda ku kikangalakata, o masoxi metu ala ni valolo yavulu phala Jihova. O divulu dya Jisálamu 139:​3, dyamba: ‘Jihova jinjila jami joso ja dimonekena kokwé.’ Jihova umona yoso i ubhanga maji mwene udikwatenena mu ima yambote i wene mubhanga. (Jih. 6:10) Mukonda dyahi? Mukonda mwene ubhana valolo mu yoso i ubhanga phala kumusangulukisa.a

⁸ Bhukaxi kajivelusu jiji ja Bibidya Jihova wamukutangela: “Ngamesena kwila uxikina kuma ngakuzolo kyavulu, ngakusuwu we kyavulu.” Maji kala kitwamono ku dimatekenu Satanaji wamesena kukuxikinisa kwila Jihova kakuzolo. Mu kiki se ukala ni phata yalungu ni henda ya Jihova kokwe dibhwidise: ‘Nganda xikina kwa nanyi, kwa “tata ya makutu” inga kwa “Nzambi ya kidi”’?—Nzw. 8:44; Jisá. 31:5.

9. Kidyelelu kyebhi kibhana Jihova kwa yo amuzolo? (Makatukilu 20:​5, 6)

⁹ Xinganeka kyebhi Jihova kyadivwa yalungu ni athu amuzolo. Xinganeka mu ima yazwela Jihova kwa Mozé ni ku akwa Izalayele. (Tanga Makatukilu 20:​5, 6.) Jihova ukanena kwila wanda suluka mukulondekesa o henda ye yakalelaku kwa yo amuzolo. O izwelu yiyi itubhana o kidyelelu kya kwila Jihova wanda suluka mukuzola yo amuzolo. (Neh. 1:5) Mukiki se umateka kukala ni phata yakwila Jihova wa kuzolo dibhwidise: ‘O kwila ngazolo Jihova?’ Mu kiki se wazolo Jihova yu wamubhanga yoso ni yoso phala kumusangulukisa mwene ukudyelelesa kwila wanda kuzola kyavulu. (Dan. 9:4; 1 Ko. 8:3) Mu kiki-phe se kiwale ni phata ya kwila eye wazolo Jihova, mukonda dyahi weji kala ni phata ya kwila Jihova wakuzolo? Xikina ni kidi kyoso kwila mwene wanda kuzola jinga nuka wanda kuxisa.

10-11. Jihova wamesena kwila eye umona kyebhi o kukula? (Ngalásya 2:20)

¹⁰ Xinganeka mu kukula. O kukula kwa Jezú Kidistu wene o ujitu wabeta dingi kota wabhana Jihova ku athu. (Nzw. 3:16) O kwila o ujitu yu phala eye we? Kyene! Mukifika, poxolo Phawulu wabhangele ima yavulu yayibha, maji ne kiki mukusuluka wakituka Kidistá, mwene wabhingile kubhânga ni ixinganeku ye yayibha. (Lom. 7:​24, 25; 1 Ti. 1:​12-14) Maji mwene wexile mumona kwila o kukula ujitu wamubhana Jihova. (Tanga Ngalásya 2:20.) Lembalala kwila Jihova mwene watumina poxolo Phawulu kusoneka o izwelu yiyi, ni kwila yoso yala mu Bibidya phala kutulonga. (Lom. 15:4) Mu kiki o izwelu ya Phawulu ilondekesa se kyebhi Jihova kyamesena kuma umona o kukula kala ujitu benge-benge phala eye. Kyoso eye ki umona o ujitu mu ukexilu yu, eye ukolesa o kidyelelu kye kwa Jihova kwila wakuzolo kyavulu.

¹¹ Etu tusakidila Jihova mu kutumikisa mone Jezú mu ixi phala kutufwila, o kima kyamukwa kyabhangesa Jezú kwiza mu ixi o kulonga o athu yalungu nikidi kyalungu ni Nzambi. (Nzw. 18:37) O kidi kiki kyalungu we ni henda ya Jihova ku twana twê.

KYEBHI JEZÚ KYATUKWATEKESA KUXIKINA O HENDA YA JIHOVA

12. Mukonda dyahi tutena kuxikina mu yoso yexile muzwela Jezú yalungu ni Jihova?

¹² Kyoso kyexile mu ixi Jezú wa wabhelele kujimbulula ku athu, o idifwa ya Jihova Nzambi. (Luk. 10:22) Sayi ima yavulu itubhangesa kuxikina mu ima yoso yazwela Jezú yalungu ni Jihova. Ande dya kwiza mu ixi, Jezú wexile ni Jihova ku dyulu, ku mazunda ni mazunda a mivu. (Kol. 1:15) Jezú wejidile kwila Jihova wamuzolo mwene we wamono kwila Jihova wazolo kyavulu o twana twê afiyele. Maji kyebhi Jezú kyatukwatekesa kukala ni kidyelelu kya kwila Jihova watuzolo?

13. Jezú wamesena kwila tukala ni kidyelelu kyebhi kyalungu ni Jihova?

¹³ Jezú wamesena kwila tudyelela kuma Jihova watuzolo. Mudivulu dya Matesu, dya Máluku, dya Luka ni dya Nzwá, Jezú wexana Jihova kala “Tata” mu 160 ajiveji ndenge. Kyoso kyayi ni kudizwelesa ni akayedi ye Jezú wexana Jihova kala “Tata yenu.” (Mat. 5:16; 6:26) Mu Bibidya de estudo mu dimi dya Phutu, mu divulu dya Matesu 5:16 mwala milongi yamba: “O jiselevende ja Jihova atungile ande dya Jezú kwiza mu ixi, mukuzwela yalungu ni Jihova mba mukusamba kwa mwene exile mutumbula majina avulu a ujitu kala ‘Mutenya yoso,’ ‘Sukeku’ ni ‘Mubhangi Wonene’. Maji mu ithangana yavulu Jezú watumbula o kizwelu ‘Tata’, o kizwelu kiki kikyabhonzele kukitendela, athu avulu akexile mukitumbula. Mukubhanga kiki, Jezú walondekesa kwila Nzambi wamesena kuma o abheziye azukama kwa mwene. Kiki kilondekesa kuma Jezú wamesena kwila tudyelela ni kidi kyoso kuma Jihova watuzolo: Mwene Tat’etu mukwa henda wazolo kyavulu o twana Twê. Twanda mona phangu jiyadi jilondekesa kyebhi Jezú kyatumbula o kizwelu “Tata” phala kuzwela yalungu ni Jihova.

14. Kyebhi Jezú kyalondekesa kwila kala muthu mudyetu wala ni valolo yavulu bhu pholo ya Jihova? (Matesu 10:​29-31) (Tala we ofoto.)

¹⁴ Kya dyanga tala yazwela Jezú mu divulu dya Matesu 10:​29-31. (Tanga.) O tudyédye tunjila twofele kitutena kuzola ne kubheza Jihova. Ne kiki Tatetu ubhana valolo yavulu ku tunjila tutu wejiya o kithangana kyoso kamoxi ki ka lawuka. Xinganeka o valolo yatubhana nayu Jihova ni kyebhi mwene kyene musuwa muthu ni muthu umusidivila ni henda yoso! Mukuzwela yalungu ni kizwelu “katé mwene ni ndemba ya mítwe yenu yokondale”, o milongi yala mu Bibidya de estudo mu velusu ya 30 yamba: “Jezú mukulondekesa kwila Jihova watwijiya kyambote katemwene mu ima yofele-fele ilondekesa kwila Jihova watusuwu kyavulu.” Se phata, Jezú wamesena kwila tuxikina ni muxima woso kuma kala muthu mudyetu wala ni valolo yavulu kwa Tatetu ya dyulu.

15. O izwelu ya Jezú mudivulu dya Nzwá 6:44 itulonga ihi yalungu ni Tatetu ya dyulu?

¹⁵ Mudivulu dya Nzwá 6:44 Jezú watumbula we o kizwelu “Tata.” (Tanga.) Jihova mu henda ye mwene wa kubheka mukilunga kye. Mukonda dyahi mwene wabhange kiki? Mukonda Tatetu ya dyulu wamono kwila eye wala ni muxima wambote wala we ni idifwa yambote. (Ika. 13:48) O nota mu Bibidya de estudo mu divulu dya Nzwá 6:44 yamba: “Nange Jezú wexile muzwela yalungu ni izwelu itusanga mu divulu dya Jelemiya, o velusu ya milongi yiyi: ‘Eme nga ku bheka ko kwami ni henda yakalelaku.’” (Jel. 31:3; sokesa ni Hozeya 11:4) Xinganeka mu dilombolwelu dya izwelu yiyi. O Tatetu ya dyulu o Tata yahenda wamusuluka mu kumona o idifwa ye yambote ne mwene se kiwamutena kwimona.

16. (a) Ihi itulonga Jezú yalungu ni Jihova, ni mukonda dyahi twatokala kudyelela kwa Jezú? (b) Kyebhi ki utena kukolesa o kixikanu kye kwila Jihova mwene o Tata wabeta kota itutena kukala né? (Tala o kaxa “O Tata Twamubhindamena Kyavulu.”)

¹⁶ Mukuzwela kwila Jihova Tatetu, kyedikala Jezú wamuzwela kiki: “Jihova ki Tata yami ngo kana; maji mwene we Tata yé. Ngidyelela kwila mwene wakuzolo utandanganya kyavulu neye.” Mukiki, se sayi ithangana eye ki uxikina kwila Jihova wakuzolo dibhwidise: ‘Kikota kudyelela mu izwelu ya Jezú o muthu wejiya kyambote Tatetu muthu woso woso ndenge ni kwila uzwela jinga o kidi?’—1 Ph. 2:22.

SULUKA MUKUKOLESA O KIDYELELU KYE

17. Mukonda dyahi twatokala kusuluka mu kubhanga yoso ni yoso phala kukolesa o kidyelelu kyetu kyakwila Jihova watuzolo?

¹⁷ Etu twabhingi kubhanga yoso ni yoso phala kukolesa o kidyelelu kyetu kyakwila Jihova watuzolo. Kala kitwamono mu milongi yiyi Satanaji nguma yetu, mukwa makutu mwene wamesena kwila tuzoza mu nzumbi ni kwila tweha kusidivila Jihova. Mwene ubhana yoso ni yoso phala kuzozesa o kidyelelu kyetu kyakwila Nzambi watuzolo. Kitwatokala kubwa kumubhetu yu!—Jobe 27:5.

18. Kyebhi ki utena kukolesa o kidyelelu kye kyakwila Jihova wa kuzolo?

¹⁸ Phala kukolesa o kidyelelu kye kyakwila Jihova wa kuzolo suluka mukusamba phala mwene na kukwatekesa kuxikina kwila wakuzolo. Xinganeka mu jivelusu ja Bibidya jilondekesa kwila Jihova wakuzolo kyavulu ni kwila usuwa yo wa muzolo. Lembalala kwila kyoso o muthu uzola Jihova, Jihova wanda muzola we. Kana kujimba kwila o sata ya kukula ujitu wa Jihova phala eye. Dyelela mukikanenu kya Jezú kya kwila Jihova Tata yé ya dyulu. Mukiki, se o muthu ukwibhwidisa: “O kwila waxikina kuma Jihova wakuzolo?” Eye utena kumutambwijila ni lusolo: “Ni kidi kyoso mwene wangizolo! Kizuwa ni kizuwa ngibhanga yoso ingitena phala kulondekesa kwila ngamuzolo we!”