Xikina o Muloloki wa Jihova

1-2. Ihi yene mubhanga Jihova ni athu adyela o kituxi mu kidi? (Tala we yakapa.)

SOBHA Davidi waluwalele kyavulu mukonda dya ituxi yatele. (Jisá. 40:12; 51:​3, ni izwelu yala kuthunda dya dyalwilu 51). Mwene wakexile muditatela mukonda dya ima ya ibha yabhangele, maji mwene wadyela o ituxi yê yu walungulula o ukexilu wa mwenyu wê anga Jihova wamuloloka. (2 Sam. 12:13) Mukonda dya muloloki wa Jihova, Davidi wasangulukile dingi.—Jisá. 32:1.

² Kala Davidi, etu we tutena kusanguluka mukonda dya muloloki wa Jihova. Ne mwene se tuta kituxi kyadikota, tudyelela kwila mwene wanda tuloloka se tudyela o kituxi kyetu mu kidi, se tusamba kwa mwene phala kutuloloka, tuzwela ni tufunga ni kubhanga yoso ni yoso phala kitutondale dingi! (Jisa. 28:13; Ika. 26:20; 1 Nz. 1:9) Kima kyambote kwijiya kwila kyoso Jihova kyatuloloka, mwene kanda kutufundisa dingi mukonda dya kituxi kitwatele!—Ize. 33:16.

3-4. Kyebhi mana Jennifer kyadivu kyoso kyamubatizala, ni ihi itwanda dilonga mu milongi yiyi?

³ Sayi Bhabha kutubhonza kyavulu kuxikina kwila Jihova watuloloka. Tala yabhiti ni phangyetu yamuhatu amwixana Jennifer, jitata jê Jimbangi ja Jihova. Kyoso kyexile munzangala mwene wakexile mu bhanga ima ya ibha, maji o jitata jê kejidile o ima yexile mu bhanga mwene. Mivu ku pholo wavutuka kwa Jihova ya amubatizala. Mwene wambe: “Mu ukulu ngexile muta undumbu wavulu ngexile ngi mukwa njinda, o kunganyala kitadi kyexile o kima kyabeta dingi kota phala eme, mu kusuluka ngadyela o kituxi kyami, ngabhingi o muloloki wa Jihova. Ngejidile kwila o sata ya kukula yangizelesa dingi. Sumbala ngabhingile kya o muloloki wa Jihova, maji kingaxikinine kwila mwene wa ngiloloka.”

⁴ O kwila sayi bhabha kukubhonza we kuxikina kwila Jihova wakuloloka kya? Maji Jihova mukwa jihenda. Davidi wejidile kwila Jihova wamuloloka. Jihova wamesena kwila etu we tukala ni kidyelelu kiki. Mu milongi yiyi twanda mona se mukonda dyahi kima kyambote kuxikina kwila Jihova watuloloka ni ihi itena kutukwatekesa kukala ni kixikanu kiki.

MUKONDA DYAHI KIMA KYAMBOTE KUXIKINA KWILA JIHOVA WATULOLOKA KYÁ?

5. Satanaji wamesena kwila tuxikina mu ihi? Bhana phangu.

⁵ Kyoso kituxikina kwila Jihova watuzolo ni kwila utuloloka, ki twanda kwivwa o makutu a Satanaji. Lembalala kwila Satanaji wamesena kubhanga yoso ni yoso phala twehe kusidivila Jihova. Phala kubhanga kiki, mwene usota kutuxikinisa kwila Jihova nuka wanda tuloloka. Xinganeka ku maka a diyala mu kilunga kya Kolindu, amukatwile mu kilunga mukonda dya kuta undumbu. (1 Ko. 5:​1, 5, 13) Ku pholo dya kwenda kyoso mwene kyadyela o kituxu kye Satanaji wamesenene kwila o jiphange mu kilunga akamba kumuloloka ni kukamba kumutambulula mu kilunga. Satanaji wamesenene we kwila o diyala wadyela o kituxi uxikina kwila Jihova kamuloloka. Mu kiki o kikote kyê ku muxima kyeji mubhangesa kubwila ni kweha kusidivila Jihova. Maji etu o “jindunge jê twa j’ijiya kyambote.”—2 Ko. 2:​5-11.

6. Se twamuditatela hanji mukonda dya kituxi twatele mu ukulu, ihi itwatokala kubhanga?

⁶ Kyoso kituxikina kwila Jihova watuloloka kya kitwanda ditatela dingi. Kyoso ki tuta kituxi, tuditatela. (Jisá. 51:17) Kiki kima kyambote mukonda o kitongolwelu kyetu kyanda tulondekesa se kyebhi kitutena kuvutuka mu kubhanga o ima yambote. (2 Ko. 7:​10, 11) Maji kyoso kituditatela mu ithangana yavulu, tutena kuluwala ni kweha kusidivila Jihova. Se tu xikina kwila Jihova watuloloka kya, kitwanda ditatela kyavulu. Kyenyiki twanda sidivila Jihova ni kusanguluka kwoso ni kitongolwelu kyazele. (Kol. 1:​10, 11; 2 Ti. 1:3) Mu kiki kyebhi kitutena kulungulula o ukexilu wetu ni kuxikina kwila Jihova watuloloka?

IHI ITENA KUTUXIKINISA KWILA JIHOVA WATULOLOKA KYA?

7-8. Ihi yazwela Jihova kokwetu yalungu ni mwene ni kidyelelu kyebhi kitutena kukala nakyu? (Makatukilu 34:​6, 7)

⁷ Xinganeka mu ima yazwela Jihova yalungu ni mwene. Mu kifika tala yazwela Jihova kwa Mozé ku mulundu wa Sinayi.a (Tanga Makatukilu 34:​6, 7.) Sumbala Jihova wala ni idifwa yavulu wambe kwa Mozé kwila mwene “Nzambi ya jihenda, ukokoloka mu kuthathamana.” Se muthu uta kituxi anga udyela o kituxi kyê, o kwila Jihova kanda muloloka? Jihova wanda muloloka mwene! Se kabhange kiki weji kala Nzambi ya ibha, mu kiki Jihova katena kubhanga kiki.

⁸ Tutena kudyelela kwila se Jihova wazwela kuma Nzambi ya Jihenda, tutena kumudyelela mwene mukonda mwene wamuzwela o kidi, Jihova kene mutanga makutu. (Jisá. 31:5) Kyenyiki tutena kuxikina mu ima yoso yazwela mwene. Se wamumona kwila wamuditatela kyavulu, dibwidise: ‘O kwila ngixikina kuma Jihova Nzambi ya jihenda, ukokoloka mu kuthathamana ni kwila uloloka woso udyela o kituxi kyê?’ Se kyene utena we kudyelela kuma mwene wakuloloka we.

9. O divulu dya Jisálamu 32:​5, itulonga ihi yalungu ni muloloki wa JIhova?

⁹ Xinganeka mu ima itutangela Jihova mu Bibidya yalungu ni muloloki wê. Mu kifika tala yazwela Davidi yalungu ni muloloki wa Jihova. (Tanga Jisálamu 32:5.) Davidi wasoneka: “Eye wa ngi loloka o kituxi ni mulonga.” O kizwelu “kuloloka” mu velusu yiyi, mu dimi dya Hebalayiku, kilombolola we “kuzangumuna” mba “kwambata.” Kyoso Jihova kyaloloka o kituxi kya Davidi, kyedile kala mwene wazangumuna o kituxi kya Davidi yu wa kyambata mu kididi kyengi. Mukonda dya kiki Davidi watululukile, kuma kexile dingi muditatela. (Jisá. 32:​2-4) Etu wetu tutena kudivwa kala kyadivwile Davidi. Kyoso kitudyela mu kidi, kitutokala dingi kuditatela, muveji dya kiki twatokala kuxikina kwila Jihova wazangumuna kya o ituxi yetu yu wayambata bhu kididi kyengi.

10-11. O izwelu “u lenguluka kuloloka,” itulonga ihi yalungu ni Jihova? (Jisálamu 86:5)

¹⁰ Tanga Jisálamu 86:5. Mu velusu yiyi Davidi wambe kwila Jihova “u lenguluka kuloloka.” Kiki kilombolola kwila kyoso kituta kituxi Jihova ka lenguluka mu kukala ni njinda, maji mwene wala polondo phala kuloloka yo udyela ni muxima woso. Mukonda dyahi mwene ubhanga kiki? O velusu yamba dingi: “Wene mu lendukila kyavulu oso a dikola kokwé.” Kala kitwadilongo mu milongi yatundumu, Jihova wakanena kulondekesa henda yakidi kwa yo amuzolo ni kwila nuka wanda kwa abwazeka. Mukonda dya henda yê yakalelaku, Jihova uloloka kyavulu yo adyela o ituxi yâ. (Iza. 55:7) Se kwamu kubhonza kuxikina o muloloki wa Nzambi, dibhwidise: “O kwila ngixikina kuma Jihova uloloka oso adyela ni muxima woso? O kwila ki ngitena we kuxikina kwila mwene wangiloloka kyoso ki ngamubhingi muloloki?”

¹¹ O kwijiya kwila Jihova wejiya kuma twakwa ituxi, kutuswinisa. (Jisá. 139:​1, 2) Kindala twanda mona izwelu yamukwa ya Davidi itukwatekesa kuxikina o muloloki wa Jihova.

IHI ILEMBALALA JIHOVA YALUNGU NETU?

12-13. Kala kilondekesa Jisálamu 103:​14, Jihova ulembalala ihi? O kiki kimubhangesa kubhanga ihi?

¹² Tanga Jisálamu 103:14. Davidi wambe kwila Jihova ulembalala kuma “twala tumavu.” Ni izwelu yiyi, Davidi walondekesa se mukonda dyahi Jihova uloloka yo adyela o ituxi yâ. Mwene wejiya kwila tumavu. Twanda dilonga se ihi ilombolola o izwelu yiyi.

¹³ Davidi wambe kwila Jihova wejiya kyambote “kyoso kyatusokejeka.” Jihova wabhange Adá ni “mavu.” Mwene wejiya se wabhange o athu ni ihi ni ihi yabhindamena. Ene abhindamena kudya, kuzeka ni kubhwima. Kate mwene o athu ayuka, abhindamena o ima yiyi. (Dim. 2:7) Maji etu twala tu mavu mu ukexilu wengi, mukonda dya kituxi kya Adá ni Eva. Jihova kejiya ngo kwila tu mavu, maji Davidi wambe kwila mwene ulembalala, mwene ututalatala jinga ni henda yoso. Didi dyene o dilombolwelu dya izwelu ya Davidi, Jihova wejiya kwila sayi bhabha twanda tondala. Kyoso kitutondala, maji tudyela ni muxima woso, mwene utuloloka.—Jisá. 78:​38, 39.

14. (a) Ihi dingi yazwela Davidi yalungu ni muloloki wa Jihova? (Jisálamu 103:12) (b) Ihi itutena kudilonga ku muloloki wa Jihova? (Tanga o kaxa “Kyebhi Jihova Kyaloloka o Ituxi Yetu Anga Uyijimba?.”)

¹⁴ Ihi dingi itutena kudilonga yalungu ni muloloki wa Jihova? (Tanga Jisálamu 103:12.) Davidi wambe kwila kyoso Jihova kyatuloloka, Mwene uta o ituxi yetu dikanga dyavulu. O dikanga didi, dyadifwangana ni dikanga dyalanadyu o kididi kutundila dikumbi ni kufwila o dikumbi, o ididi iyadi yiyi nuka yanda disanga. Kiki kitulonga ihi yalungu ni ituxi yaloloka kya Jihova? Sayi divulu dyamba kiki yalungu ni velusu yiyi: “Nzambi utakula o ituxi yetu dikanga dyavulu. Kiki kyedi kala o dizumba dya kituxi kiki dyajimuka kya. Kyenyiki, tutena kudyelela kwila Nzambi nuka dingi wanda banza yalungu ni kituxi kiki ni kwila nuka wanda tulembalesa-kyu.” Kiki kitukwatekesa kumona kwila kyoso Jihova kyatuloloka, seku dingi kima kyanda mubhangesa kutufundisa mba kututatela mukonda dya kituxi kyatuloloka kyá.—Ize. 18:​21, 22; Ika. 3:19.

15. Ihi itwatokala kubhanga se twamusuluka mukuditatela mukonda dya ituxi itwatele mu ukulu?

¹⁵ Kyebhi o izwelu ya Davidi itusanga mu divulu dya Jisálamu 103 itukwatekesa kuxikina o muloloki wa Jihova? Se ngamuditatela mukonda dya ituxi ngatele mu ukulu, ngatokala kudibhwidisa: “O kwila ngamujimba o ima ilembalala Jihova, kifwa Jihova wejiya kuma ngala ngimavu ni kwila wanda loloka akwa ituxi kala eme? O kwila ngamu xinganeka hanji mu ituxi yaloloka kya Jihova?” Jihova kene mudikwatenena mu ituxi yetu, etu we twatokala kubhanga kiki. (Jisá. 130:3) Kyoso kituxikina kwila Jihova watuloloka kya, kitwanda suluka mu kuditatela ni kwila twanda sidivila Jihova ni kisangusangu kyoso.

16. Ta kifika kitukwatekesa kumona kwila kitwatokala kutonginina kyavulu o ituxi itwatele mu ukulu. (Tala we ofoto.)

¹⁶ Xinganeka mu kifika kiki: Kyoso muthu kyamu kwendesa dikalu, sayi bhabha mwene wanda bhindamena kumona mu lumwenu phala namone o ilwezu yala kudima, maji mwene katokala kutonginina mu lumwenu lulu mu ithangana yoso, mwene watokala kutala ku pholo. Kyene we kimoxi sayi bhabha twatokala kuxinganeka mu ilwezu itwatele mu ukulu phala kitutene ku ibhanga dingi, maji phe kitwatokala kutonginina mu ithangana yavulu mu ilwezu yiyi phala kituluwale anga tweha kusidivila Jihova. Mu veji dya kiki twatokala kutala o ima yala ku pholo, o ikanenu ya Nzambi yalungu ni mundu wa ubhe. Ku mundu wa ubhe, o ima yabhiti kya kitwanda ibanza dingi.—Iza. 65:17; Jisa. 4:25.

SULUKA MUKUXIKINISA O MUXIMA WÉ

17. Mukonda dyahi twatokala kusuluka mu kuxikinisa o muxima wetu kwila Jihova watuzolo ni kwila wanda tuloloka?

¹⁷ Twatokala kuxikinisa o muxima wetu kwila Jihova watuzolo ni kwila mwene utuloloka. (1 Nz. 3:19) Mukonda dyahi? Mukonda Satanaji wamubhanga yoso ni yoso phala kutuxikinisa kwila Jihova katuzolo ni kwila nuka wanda tuloloka kabasa kima kibhanga mwene. Satanaji wamesena kutubhangesa kweha kusidivila Jihova. Tutena kukingila o jitendasa jiji mukonda mwene wejiya kwila o kithangana kyê kyabutu kya. (Dij. 12:12) Etu kitwanda mwehela kututolola!

18. Ihi iwatokala kubhanga phala kuxikina kwila Jihova wakuzolo ni kwila ukuloloka?

¹⁸ Phala kuxikina kwila Jihova wakuzolo, kayela o jindunge jitwadilongo mu milongi yatundumu. Phala kuxikina kwila Jihova wanda kuloloka, xinganeka mu ima izwela Jihova mu maka mê yalungu ni mwene, xinganeka mu ima yazwela o asoneki a Bibidya yalungu ni muloloki wa Jihova, kana kujimba kwila Jihova wejiya kuma twala tumavu. Mwene wanda tena kutuloloka mukonda mwene mukwa henda. Lembalala kwila mwene utuloloka. Mu kiki kala kyazwela Davidi yalungu ni muloloki wa Jihova, eye we wanda zwela kiki: Jihova ngakusakidila mu kuloloka o ituxi yami!—Jisá. 32:5.