Ihi Itwatokala Kubhanga se Eye Mba Akwenu Amumitalatala Kyayibha?

1-2. Athu avulu adivwa kyebhi kyoso kya atalatala kyayibha mba kyamona akwa amwatalatala kyayibha? Ihi itwanda dilonga?

LELU athu avulu ene mwatalatala kyayibha mukonda dya kukala jingadyama, mukonda dya ixi mwa avwalela, mukonda dya pholo yâ mba mukonda dya ima yengi. Amukwa atala hadi mukonda dya jingenji mba jinguvulu akwa lwimbi. O ima yiyi ibhangesa etu ni akwetu kutala hadi.

² Athu avulu akala ni njinda mukonda dya kwatalatala kyayibha mba mukonda dya kumona we akwa amwatalatala kyayibha. Athu oso amesena kwila a atalatala kyambote ni kukala ni kutululuka. Sayi athu asota kubatula o maka amona mu ngongo yoso mba mu ixi yâ. Ene abhukumukina o jinguvulu jâ mba asola jinguvulu jengi akanena kubatula o maka mâ. Maji etu tu Jikidistá, atulongo kukamba kubhanga mbandu ya mundu yu ni kudyelela kwila o Utuminu wa Nzambi wanda zubha o kuyibha kwoso. (Nzw. 17:16) Maji ne kiki tuluwala mba tukala ni njinda kyoso kitumona o athu amwatalatala kyayibha. Tutena kudibhwidisa: ‘Ihi ingitena o kubhanga kyoso kikubhita o ima yiyi? O kwila sayi kima kingitena kubhanga kindala?’ Phala kutambwijila o ibhwidisu yiyi, kyadyanga twanda dilonga se kyebhi Jihova ni Jezú kya divwa kyoso o athu kya atalatala kyayibha.

JIHOVA NI JEZÚ KENE MUTALATALA KYAYIBHA O ATHU

3. Mukonda dyahi kikituxe kukala ni njinda kyoso kyatutalatala kyayibha mba kyoso kyatalatala kyayibha akwetu? (Izaya 5:7)

³ O Bibidya ijimbulula se mukonda dyahi kitwa wabhela kwila o athu atutalatala kyayibha mba atalatala kyayibha akwetu. Kiki kibhita mukonda Jihova watubhange mukidifwanganu kyé, ‘mwene wazolo o kufúndisa kwa kidi ni kutetuluka.’ (Jisá. 33:5; Dim. 1:26) Jihova kene mutalatala kyayibha o athu, mwene we kamesena kwila o athu aditalatala kyayibha! (Mate. 32:​3, 4; Mik. 6:8; Zak. 7:9) Mukifika, mu izuwa ya polofeta Izaya Jihova wevu o “jingololo” ja athu avulu akwa Izalayele akexile mwatalatala kyayibha kwala akwa Izalayele ni akwa. (Tanga Izaya 5:7.) Jihova wakastikala yo asulukile ni kubhukumukina o itumu yê, ya akexile mutalatala kyayibha akwa.—Iza. 5:​5, 13.

4. Kyebhi kya divwa Jezú kyoso kyamona muthu amumutalatala kyayibha? (Tala we ofoto.)

⁴ Kala Jihova, Jezú wazolo we o kuyuka yu wazembe o kuyibha. Sayi kizuwa Jezú wamono diyala wexile ni lukwaku lwakate. Jezú wamukwatela henda yu wasake o lukwaku lwê. Maji kyoso o atwameni ajingeleja kyamono kyokyo, njinda ya akwata. Ene ambe kwila Jezú kexile mubelesela o kijila kya Sábhalu. Ene kasangulukile mukumona kwila o diyala kexile dingi mutala hadi. Kyebhi Jezú kyadivu ni ukexilu wâ? Mwene “wa luwala kyavulu anga ukala ni njinda, mukonda dya kukola kwa mixima yâ.”—Mál. 3:​1-6.

5. Mukonda dyahi kitwatokala kukala ni njinda mu ithangana yavulu kyoso kitumona ima yayibha?

⁵ Kikale Jihova kikale Jezú akala ni njinda kyoso kyamona athu amutalatala kyayibha akwa. Mukonda dya kiki kikima kyayibha kyoso we kitudivwa kiki. (Efe. 4:​26, tanga o nota de estudo “Fiquem irados” mu Bibidya ya Phutu.) Maji twatokala kulanga o njinda yetu ni kulembalala kwila kitutena kuzubha o hadi. Se tukala ni njinda mu ithangana yavulu, twanda kata mba twanda kala ni kikote ku muxima. (Jisá. 37:​1, 8; Tiy. 1:20) Kyenyiki-phe ihi itwatokala o kubhanga se amututalatala kyayibha mba amutalatala kyayibha akwetu? Tutena kudilonga ku phangu ya Jezú.

IHI YABHANGE JEZÚ KYOSO KYAMONO ATHU AMWATALATALA KYAYIBHA?

6. Kyoso Jezú kyexile mu ixi o athu exile mwatalatala kyebhi? (Tala we ofoto.)

⁶ Kyoso Jezú kyexile mu ixi wamono athu avulu kwatalatala kyayibha. Mwene wamono kwila o atwameni a jingeleja exile mubhonzesa kyavulu o mwenyu wa athu. (Mat. 23:​2-4) Mwene wejidile we kwila o jinguvulu akwa Loma exile mutalatala kyayibha o athu. Jijudé javulu kamesenene dingi kwila a atumina ku jinguvulu akwa Loma. Sayi ya asokejekele ibuka yexile mubhânga ni akwa Loma. Maji Jezú kabhangele mbandu ya ibuka yiyi. Kyoso kyamono kwila o athu amesenene kumubhanga sobha, mwene wayé.—Nzw. 6:15.

7-8. Mukonda dyahi Jezú kazubha o hadi yexile mutala o athu ni maka exile mumona mu ngongo? (Nzwá 18:36)

⁷ Jezú kexile mudita mu maka a jinguvulu phala kuzubha o hadi yexile mutala o athu. Mukonda dyahi? Mukonda mwene wejidile kwila o athu kala ni kutena, né uhete wa kuditumina mudyâ. (Jisá. 146:3; Jel. 10:23) Ene we katena kuzubha o ima itubhekela o hadi. Satanaji, muthu wayibha kyavulu, mwéne wamutumina o mundu yú. O athu ene mukayela o phangu yê. (Nzw. 8:44; Efe. 2:2) Né mwene o athu ambote katena kubatula o maka a ngongo yiyi, ene katena we kubhanga ngo mbote mu mbote mukonda akwa ituxi wa.—Ndo. 7:20.

⁸ Jezú wejidile kwila o Utuminu wa Nzambi wene ngo wanda zubha o ima itubhekela o hadi. Mukonda dya kiki, mwene wakalakala kyavulu “mu kuboka ni kutula o njimbu yambote ya Utuminu wa Nzambi.” (Luk. 8:1) Mu kubhanga kiki mwene waswinisa yó akexile “ni nzala ni dinyota dya ima yayuka,” kwila o kuyibha kweji bhwa. (Mat. 5:​6, tanga we o nota de estudo; Luk. 18:​7, 8) Seku nguvulu mu ixi yanda bheka o mbote yiyi. Maji o Utuminu wa Nzambi, o unguvulu ki watokala “mu ngongo mumu,” wene ngo wanda zubha o maka oso.—Tanga Nzwá 18:36.

KAYELA O PHANGU YA JEZÚ KYOSO KI UMONA KWILA O ATHU AMWATALATALA KYAYIBHA

9. Ihi ikuxikinisa kwila o Utuminu wa Nzambi wene ngo wanda zubha o maka oso?

⁹ Etu twala “mu izuwa isukidilaku” ya mundu yu. Lelu kwene dingi maka avulu, kyoso Jezú kyexile mu ixi, ndenge. Maji kala kyabhiti mu izuwa ya Jezú, Satanaji ni athu ayibha, ene mubhekela hadi ku athu avulu. (2 Ti. 3:​1-5, 13; Dij. 12:12) Kala Jezú, twejiya kwila o Utuminu wa Nzambi wene wanda bwika Satanaji ni kuzubha o kuyibha kwoso. Kuma twene muboka yalungu ni Utuminu wa Nzambi, kitwene musola jinguvulu mba kubhukumukina o jinguvulu, ni tutene kuzubha o kuyibha. Tala yabhiti ni phange amwixana Diminga.a Ande dya kumateka kudilonga o Bibidya, wexile mubhukumukina o jinguvulu, natene kuzubha o kuyibha. Maji mukusuluka, mwene wamateka kudibhwidisa se o ima yexile mubhanga, yexile ima yambote. Mwene wambe: “Kyoso kingexile mukala mu kavwanza, ngexile mudibhwidisa se ngatokalele mwene kubhanga o ima yoyo. Maji kindala, ngejiya kwila o Utuminu wa Nzambi wanda zubha o maka oso. Ngejiya kwila Jihova ngo wala ni kutena kwa kuzubha o ibhidi yoso, eme kana!”—Jisá. 72:​1, 4.

10. Kala kyamba o divulu dya Matesu 5:​43-48, mukonda dyahi kitwene mubhukumukina o jinguvulu? (Tala we ofoto.)

¹⁰ Athu avulu adibunda mu ibuka ya athu ene mubhukumukina o jinguvulu. Avulu mudyâ akituka akwa njinda, abhukumukina o ijila, atalesa we ahadi ku akwa. Maji kikyene kyatulongo Jezú. (Efe. 4:31) Sayi phange amwixana Mingyedi wambe: “Ngejiya kwila kyoso o kibuka kya athu kyamubhukumikina o jinguvulu, mu kithangana ni mbandu ene atena kukala ni njinda, kubula ni kunyana o ima, katé mwene ni kudikwama mudyâ.” Maji Jezú utulonga kuzola athu oso, katé mwene yó atuzukutisa. (Tanga Matesu 5:​43-48.) Kuma tu Jikidistá, twatokala kubhanga yoso ni yoso phala kukayela o phangu ya Jezú.

11. Mukonda dyahi sayi bhabha kutubhonza kukayela o phangu ya Jezú kyoso kyatutalatala kyayibha?

¹¹ Sumbala twejiya kwila o Utuminu wa Nzambi wanda zubha o maka oso mu ngongo, sayi bhabha kutubhonza kukayela o phangu ya Jezú kyoso kyatutalatala kyayibha. Kiki kyene kyabhiti ni phange amwixana Nzwana. O athu amutalatala kyayibha mukonda dya kikonda kyê. Mwene wambe: “Ngakexile ni njinda, ngaluwalele we kyavulu. Ngamesenene kwila o athu yó a akastikala. Mu kiki ngabanze kubokona mu kibuka kya athu kawabhelele yo abhanga katombo mukonda dya ixi mba mukonda dya kikonda. Ngexile mubanza kwila mu kubhanga kiki, ngeji divwa kyambote.” Maji mu kubhita kithangana, mana Nzwana walungulula o ixinganeku yê. Mwene wambe: “Ngamono kwila mu veji dya kudyelela kwa Jihova, ngamateka kudyelela ku athu. Mukonda dya kiki, ngasolo kweha kudilunga ni athu atokalele mu ibuka yiyi.” Sumbala tukala ni njinda kyoso kyatutalatala kyayibha mba kyoso kyatalatala kyayibha akwetu, twatokala kudilanga phala o njinda yiyi ki itubhangese kudita mu maka a jinguvulu.—Nzw. 15:19.

12. Mukonda dyahi twatokala kudilanga ku ima itwivwa, itutala ni ima itutanga?

¹² Ihi itena kutukwatekesa kutululuka kyoso etu mba akwetu, kya atalatala kyayibha? Kima kimoxi kitena kutukwatekesa o kudilanga ku ima itwivwa, itutala ni ima itutanga. Sayi athu ata misoso mu internete phala kubhangesa akwa kubhukumukina o jinguvulu. Mu ithangana yavulu, o jinjimbu jitwene mu kwivwa kijakidi. Né mwene se o njimbu itwamukwivwa ya kidi, kitwanda tena kubatula o maka mu kusuluka mu kwivwa o njimbu yiyi. Se tungastala kithangana kyavulu mu kwivwa ni kutala o jinjimbu jiji, twanda lalamana kyavulu ni kukala ni njinda yavulu. (Jisa. 24:10) Kate mwene tutena kweha kuta o Utuminu wa Nzambi ku pholo dya mwenyu wetu ni kujimba kwila o Utuminu yu wene ngo wanda zubha o maka oso mu ngongo.

13. Kyebhi o kutanga o Bibidya izuwa yoso ni ku ixinganeka, kyanda tukwatekesa kwijiya se ihi i twatokala kubhanga kyoso kyatutalatala kyayibha?

¹³ Kutanga o Bibidya izuwa yoso ni ku ixinganeka, kyanda tukwatekesa kwijiya se ihi i twatokala kubhanga kyoso kyatutalatala kyayibha. Sayi phange amwixana Elena, waluwalele kyavulu kyoso kyamono athu akwa dyembu dyê, amwatalatala kyayibha. Mwene wadivu kiki mukonda wamono kwila o athu exile mubhanga o ima yiyi, kexile mwakastikala. Mwene wambe: “Eme mudyami ngadibhwidisa: ‘Mu kidi o kwila ngixikina kuma, Jihova wanda batula o maka oso yá?’ Mu kithangana kyenyokyo ngatange o divulu dya Jobe 34:​22-29. O divulu didi dya ngilembalesa kwila Jihova umona o ima yoso. Mwéne ngo wejiya ni kidi kyoso kyawabha ni kyayibha ni kwila mwéne ngo wanda zubha o maka oso.” Kyoso kituya ni kukingila o Utuminu wa Nzambi kubatula o maka oso, twanda dibhana hanji ni kuyibha. Kyebhi?

IHI ITUTENA KUBHANGA KINDALA?

14. Ihi itwatokala kubhanga? (Kolose 3:​10, 11)

¹⁴ Kitutena kulungulula o ukexilu wa athu wa kutalatala akwa, maji etu tutena kutalatala kyambote o athu. Kala kitwadilongo kya, tukayela o phangu ya Jezú mu kulondekesa henda. Tutena kuxila katé mwene yó atutalatala kyayibha. (Mat. 7:12; Lom. 12:17) Jihova usanguluka kyoso kitutalatala kyambote athu oso.—Tanga Kolose 3:​10, 11.

15. Ihi ibhita ni athu kyoso kyadilonga o Bibidya?

¹⁵ O kima kyabeta-kota kitwatokala kubhanga o kulonga athu yalungu ni Bibidya. Mukonda dyahi? Mukonda o “kwijiya Nzambi” kutena kubhangesa o athu kulungulula o ukexilu wâ wayibha ni kukala akwa henda. (Iza. 11:​6, 7, 9) Tala yabhiti ni phange amwixana Zuze. Ande dya kukituka mbangi ya Jihova, mwene wadibundu mu kibuka exile mubhânga phala kukatula o jinguvulu ja ixi yâ, mukonda afikile kwila kexile mutumina kyambote. Mwene wambe: “Eye kutena kukwatekesa o athu kulungulula o ukexilu wâ mu kubhânga nawu. Phala kulungulula o ukexilu wami, kikwabhingile muthu kubhânga n’eme, ngalunguluka ngo mukonda dya ima ingadilongo mu Bibidya.” O yadilongo manu Zuze yamubhangesa kweha kubhânga ni jinguvulu. Kyoso o athu kyadilonga o Bibidya, ene eha kutalatala kyayibha akwa.

16. Mukonda dyahi twatokala kuzwela ni athu yalungu ni Utuminu wa Nzambi?

¹⁶ Kala Jezú, twala ni hanji yavulu phala kutangela o athu kwila o Utuminu wa Nzambi wene ngo wanda zubha o maka oso mu ngongo. O kidyelelu kiki kitena kuswinisa yó amwatalatala kyayibha. (Jel. 29:11) Mana Diminga, amutumbula kudima wambe: “O kudilonga o Bibidya kwangikwatekesa kumona kwila, Nzambi ngo wanda zubha o hadi yoso mu ngongo. Kiki kingikwatekesa kutululuka kyoso kyangitalatala kyayibha, mba kyoso kingimona akwetu kwatalatala kyayibha. Jihova utukonda o malamba bhukaxi ka Bibidya.” Etu wetu tutena kukonda o malamba a akwetu bhukaxi ka ikanenu ya Bibidya. Se udilonga kyambote izwela o Bibidya yalungu ni hadi, wanda xikina kwila Nzambi ngo wanda zubha o maka oso. Kiki kyanda ku kukwatekesa kulonga o athu mu xikola mba ku salu, se mukonda dyahi twene mutala hadi ni kwila kwakambe ngo, Jihova wanda zubha o hadi yoso.b

17. Kyebhi Jihova kyatukwatekesa kudibhana ni kuyibha?

¹⁷ Satanaji mwene “o nguvulu ya mundu yú.” Maji twejiya kwila Satanaji ‘anda mubwika,’ o kikanenu kiki kitukwatekesa kya, lelu. (Nzw. 12:31) Bhukaxi ka Bibidya, Jihova ututangela se mukonda dyahi kwene hadi yavulu, maji ututangela we kwila kyoso kyatutalatala kyayibha, ukala ku mbandu yetu. (Jisá. 34:​17-19) Bhukaxi ka phangu ya Jezú, tudilonga se ihi itwatokala kubhanga kyoso kyatutalatala kyayibha. Kwakambe ngo bhofele, o Utuminu wa Nzambi wanda zubha o kuyibha kwoso ni kwila seku muthu wanda tala dingi hadi. (2 Ph. 3:13) Tukolokotyenu mu kubhanga yoso ni yoso phala kuboka yalungu ni Utuminu wa Nzambi, ni kukingila ni hanji yoso o kithangana kyoso, mu ngongo mwanda kala “kutetuluka ni . . . uyukilu.”—Iza. 9:7.