Kana Kulaleka Mukukwatekesa Muthu Wamesena Kwijiya Dingi Yalungu ni Nzambi

1. Ihi yene mubhanga o athu kyoso kyevwa o njimbu yambote? (Ikalakalu 13:​47, 48; 16:​14, 15)

MU IZUWA ya jipoxolo athu avulu axikina o njimbu yambote kyoso kya ivu mu veji yadyanga. (Tanga Ikalakalu 13:​47, 48; 16:​14, 15.) Lelo kyoso o athu kyevwa o njimbu yambote mu veji yadyanga, asanguluka we. Amukwa kudimatekenu kaxikina, maji ku pholo dya kwenda axikina. Ihi itwatokala kubhanga kyoso kitusanga athu “a fwamena kutambula o mwenyu wakalelaku”?

2. Kyebhi o kikalakalu kyetu kyadifu ni kikalakalu kya kidimakaji?

² O kikalakalu kya kubhanga maxibulu kyadifu ni kikalakalu kya kidimakaji. Kyoso kyamona kwila o idima yabhi kya, sé kulaleka mwene umateka kujibhongolola, maji mwene we usuluka mu kukalakala ni kulanga o idima kiyabhi luwa. Kyene we kimoxi, kyoso kitusanga muthu uxikina o njimbu yambote, ni lusolo lwoso twatokala kumukwatekesa kukituka dixibulu dya Kidistu. Maji etu we twatokala kusuluka mu kukwatekesa yo kaxikina o njimbu yambote mu veji ya dyanga. (Nzw. 4:​35, 36) Kyoso ki tumona kwila o muthu wamesena mba kana kwivwa o njimbu yambote, kikwanda bhonza kusanga ukexilu wa kumukwatekesa. Mu milongi yiyi twanda dilonga se ihi itwatokala kubhanga, phala kukwatekesa yo amesena kutubhana matwi. Twanda dilonga we se ihi itwatokala kubhanga phala kwa akwatekesa kusuluka mu kukula mu nzumbi.

KYEBHI KI TUTENA KUKWATEKESA MUTHU WAMESENA KWIVWA O NJIMBU YAMBOTE?

3. Mu sidivisu yakuboka ihi itwatokala o kubhanga se tusanga muthu wamesena kutubhana matwi? (1 Kolindu 9:26)

³ Mu sidivisu ya kuboka kyoso kitusanga muthu wamesena kutubhana matwi ni lusolo lwoso tumukwatekesa kwijiya Jihova ni kumuzukama. Mu kiki kyoso kituzwela ni muthu mu veji yadyanga, tumulonga o Bibidya ni kumwixana phala kuya mu yonge yetu.—Tanga 1 Kolindu 9:26.

4. Jimbulula kyebhi sayi kilumba kyakexile polondo phala kumateka kudilonga o Bibidya.

⁴ Longa o Bibidya. Athu avulu utuzwela nawu ala polondo phala kumateka kudilonga o Bibidya ni lusolo. Mu kifika sayi kizuwa mu kaxi ka semana, sayi kilumba mu ixi ya Canadá wazukama ku kadikalu ka madivulu, wakatula kadivulu ni dyambu Sanguluka katé Kuhádya ni Hádya! O phange ya muhatu wexile mukalakala ni kadikalu ka madivulu, wajimbulula kwila ni kadivulu kaka, mwene weji tena kudilonga o Bibidya sé kufuta. O kilumba waxikina yu wabhana o muxinda wa mutelembe wê, yu watambula we o muxinda wa phangyetu. Mu kizuwa kyenyokyo mu ngoloxi, o kilumba watumikisa njimbu kwa phangyetu yu wamwibhwidisa se kizuwa kyebhi kyeji tena kudilonga o Bibidya. Kyoso o phangyetu kya mwimbhwidisa se eji tena kudisanga ku disukilu dya semana, o kilumba watambwijila: “Mungu kinganda tunda. O kwila tutena kudilonga?” Ene amateka kudilonga o Bibidya kya Sesa. Mwene wayi mu kyonge ku disukilu dya semana yoyo, yu wasuluka mu kukula mu nzumbi ni lusolo.

5. Sayi ithangana ihi itwatokala kubhanga ande dya kumateka kulonga o Bibidya ku muthu? (Tala we o jifoto.)

⁵ Ko athu oso anda xikina kudilonga o Bibidya ni lusolo kala o kilumba kiki. Sayi bhabha étu twatokala kukwatekesa o muthu kuwabhela kudilonga o Bibidya. Tutena kubhanga kiki mu kuzwela yalungu ni ima yawabhela mwene. Se tukala ni ixinganeku yambote ni kumulondekesa kwila tumubhana valolo, mu kubhita tu ithangana nange mwene utena kumateka kudilonga o Bibidya. Ihi itwatokala kuzwela kyoso kituya mulonga o Bibidya? Twabhange o kibhwidisu kiki ku jiphange ala ni uhete wa kulonga o Bibidya. Tumone o ima yazwela ene.

6. Ihi itwatokala kuzwela phala o muthu nasuluke mukudizwelesa netu?

⁶ O jiphange jiji ajimbulula kwila sayi ididi kota o kukamba kuzwela o ima yiyi “kudilonga,” “kudilonga o Bibidya,” mba “eme nganda kulonga.” Ene amono kwila kota kuzwela kiki “kudizwelesa,” “kuta jitate,” mba “kutendela o Bibidya.” Phala o muthu kusuluka kudizwelesa, eye utena kuzwela kiki: “Kima kya kudiwana o ukexilu wa Bibidya kutambwijila o ibhwidisu yabeta dingi kota ku mwenyu wetu,” mba “o Bibidya ki phala ngo o athu ene muya mu ngeleja, yene ibhana jindunge jambote phala athu oso.“ Tutena we kuzwela: “Eye kiwanda ngastala kithangana kyavulu. Mu 10 mba 15 dya ithangana utena kudilonga ima yavulu itena ku kukwatekesa ku mwenyu wé.” Phala ki umukwatese woma, kana kuzwela kwila “o kudilonga o Bibidya kikutu,” mba “twanda dilonga mu jisemana joso.”

7. Kithangana kyebhi amoxi kyamona kwila amudilonga o kidi? (1 Kolindu 14:​23-25)

⁷ Mwixane phala o yonge yetu. Mu izuwa ya poxolo Phawulu athu avulu amono kwila akexile mudilonga o kidi kyoso kyayile mu yonge. (Tanga 1 Kolindu 14:​23-25.) Lelu we kyene kimoxi. Maxibulu avulu akula mu nzumbi kyoso kyamateka kuya mu yonge. Kithangana kyebhi kitwatokala kwixana o muthu phala kuya mu kyonge? O divulu Sanguluka katé kuhádya ni Hádya! mu disá dya 10 mwala kixanu. Maji kiwatokala kukingila kubhixila mu disá didi phala kwixana o muthu phala kuya mu yônge yetu. Mu kizuwa kyadyanga, eye utena kya kwixana o mukwa dibhata phala o kyonge kyetu ku disukilu dya semana. Nange utena kutumbula o dyambu dya diskulusu mba o maka anda zwela mu Mulangidi.

8. Ihi itwatokala kuzwela kyoso kitwixana muthu phala kuya mu yonge? (Izaya 54:13)

⁸ Kyoso o muthu kyaxikina kuya mu yonge yetu, mu jimbulule kwila o yonge yetu ki yadifu ni ima yamono mu jingeleja jengi. Sayi dixibulu dya Bibidya wabhange o kibhwidisu kiki ku mulongexi we: “O mwendexi wa Mulangidi wejiya o majina a athu oso?” O phangyetu wamutangela kwila kala kitwejiya o majina a jindandu jetu joso, etu tubhanga nguzu phala kwijiya o majina a jiphange jetu. O dixibulu wambe kwila kiki kikyene mubhita ku ngeleja ye. Tutena we kumujimbulula se mukonda dyahi twene muya mu yonge. (Tanga Izaya 54:13.) Etu twene muya mu yonge phala kubheza Jihova, kudilonga yalungu ni mwene ni kudiwsinisa mudyetu. (Jih. 2:12; 10:​24, 25) Mukonda dya kiki mu yonge yetu twene mudilonga maka a Nzambi, kana o ijila ya jingeleja. (1 Ko. 14:40) O ididi yetu ya ubhezelu, ididi yatululuka, tudilonga-mu ima yavulu. Kuma kitubhange mbandu ya mundu yu, mu yonge yetu kitwene muzwela o maka a jinguvulu, kitwene we muzwela yalungu ni ixinganeku yetu mba ibanzelu yetu. Kima kimoxi kitena kukwatekesa o dixibulu dyetu, o kumulondekesa o vidyu ni dyambu Ihi Iene mu Bhanga Bhu Kididi Kia Ubhezelu? ande dya kumwixana phala o kyonge. Kyenyiki kyoso kyandaya mu yonge, mwene wanda kwijiya kya se ihi yanda bhita-mu.

9-10. Ihi i tutena kuzwela ni muthu wala ni hele ya kuya mu kyonge? (Tala we ofoto.)

⁹ Sayi athu akala ni hele ya kuya mu yonge mukonda afika kwila twanda kwa ajijidika kukituka Jimbangi ja Jihova. Mutangele kwila twawabhela kutambula asonyi ni kwila kitwanda mujijidika kutambwijila mu yonge, kubhanga kima mba kukituka Mbangi ya Jihova. Athu oso atena kudivwa kyambote mu yonge yetu, kate mwene o ana-ndenge. Mwenyomo, o ana-ndenge ka asandula ku adyakime. O twana axikama kumoxi ni jitata jâ, adilonga kumoxi. Kyenyiki o jitata atena kwijiya se o twana twâ ala ni nanyi, atena we kwijiya se amudilonga ihi. (Mate. 31:12) Kitwene mubhinga kitadi. Mu veji dya kiki, tukayela o kitendelesu kya Jezú, kyambe: “Enu mwa tambula mu kingoho, bhanenu mu kingoho.” (Mat. 10:8) Eye utena we kutangela o muthu kwila mwene kabhingye kuta izwatu yate kyavulu, mba izwatu ya katunda. Nzambi kasuwu o pholo ya muthu, maji o muxima wê.—1 Sam. 16:7.

¹⁰ Se o muthu wamwixana uya mu kyonge, bhanga yoso i utena phala mwene nadivwe kyambote. Mulondekese ku tufunga ni ku jiphange jengi. Se mwene udivwa kyambote mu kyonge, nange wanda mesena kuvutuka dingi. Se mwene kala ni Bibidya, tangenu o jivelusu mu Bibidya yé. Ku mbandu ya mukwa, mukwatekese kutendela o diskulusu mba o jimbandu jamubhanga o jiphange.

KYEBHI KI UTENA KUKWATEKESA MUTHU WAMATEKA KUDILONGA O BIBIDYA?

11. Ihi i utena kulembalala kyoso ki uya ni kulonga o Bibidya ku muthu?

¹¹ Ihi i utena kulembalala kyoso ki uya ni kulonga o Bibidya ku muthu? Kana kulaleka kyavulu. Lembalala kwila o muthu wamumulonga, wala we ni ima yê phala kubhanga. Mu kifika, bhanga yoso ni yoso phala kubhixila ku dibhata dya dixibulu mu ola i mwaxindi, né mwene se athu ku dyembu dyé ala ni ukexilu wa kulaleka. Ku mbandu ya mukwa, kota se mu kizuwa kya dyanga ki mwanda dilonga, kimulaleke kyavulu. Sayi jiphange alongo kya o Bibidya ku athu avulu amba kwila, mu kizuwa kya dyanga kota o kuzubha kudilonga ni muthu ande dya kubhixila o kithangana ki mwaxindi, né mwene se o muthu wandala kudilonga dingi. Kana kuzwela kyavulu. Ehela o dixibulu nazwele dingi.—Jisa. 10:19.

12. Tunde ku dimatekenu, twamesena kukwatekesa o maxibulu metu mu ihi?

¹² Tunde ku dimatekenu, twamesena kukwatekesa o maxibulu metu kwijiya Jihova ni Jezú, ni kwa azola. Tutena kubhanga kiki mu kwatangela jinga izwela o Bibidya, kana o ibanzelu yetu. (Ika. 10:​25, 26) Poxolo Phawulu, phangu yambote ku maka yá. Mu kulonga o athu, mwene wexile mudikwatenena kwa Jezú Kidistu, weza mu ixi phala kutukwatekesa kwijiya ni kuzola Jihova. (1 Ko. 2:​1, 2) Phawulu wajimbulula we kwila kima kyambote kukwatekesa o maxibulu kukala ni idifwa yambote. O idifwa yiyi a isokesa ni ulu, phalata ni matadi amukwa a valolo. (1 Ko. 3:​11-15) O idifwa yatokala kukala nayu o maxibulu metu, yenyiyi: O kixikanu, o unjimu, o kutongoloka ni woma wa Jihova. (Jisá. 19:​9, 10; Jisa. 3:​13-15; 1 Ph. 1:7) Mu kulonga o maxibulu, kayela o phangu ya Phawulu, u akwatekesa kukala ni kixikanu kyakolo ni ukamba wambote ni Tat’â ya dyulu, Jihova.—2 Ko. 1:24.

13. Mu kulonga, kyebhi ki utena kukala u mukwa kutetuluka ni mukwa mwanyu? (2 Kolindu 10:​4, 5) (Tala we ofoto.)

¹³ Mu kulonga, kayela o phangu ya Jezú mu kukala u mukwa kutetuluka ni mukwa mwanyu. Kana kubhanga ibhwidisu ibhangesa dixibulu dyé kukala ni jisonyi. Se o dixibulu kamuxikina milongi imoxi, suluka kudilonga-nê. Ku pholo dya kwenda, sola kizuwa phala kuzwela-nê yalungu ni milongi yiyi. Kana kujijidika o dixibulu kuxikina mu ima yamudilonga, mubhane kithangana phala kuxinganeka ku maka umwamudilonga ni kulungulula o ixinganeku yê. (Nzw. 16:12; Kol. 2:​6, 7) O Bibidya isokesa o milongi ya makutu ni ilumbu itwamusota kubula. (Tanga 2 Kolindu 10:​4, 5; tanga o nota de estudo “demolir fortalezas.”) Kubhonza phala o dixibulu kweha kuxikina mu ima yene muxikina kya mu mivu yavulu. Mu kiki, watokala kukwatekesa o dixibulu dyé kutunga kilumbu kya ubhe, kifwa kumukwatekesa kudyelela kwa Jihova. Se ubhanga kiki, kikyanda bhonza phala o dixibulu kweha kuxikina mu milongi ya makutu.—Jisá. 91:9.

KYEBHI KITUTENA KUKWATEKESA YÓ AMATEKA KUYA MU YÔNGE?

14. Kyebhi kitwatokala kutalatala yó amateka kuya mu yônge?

¹⁴ Jihova kamesena kwila tukala tu akwa katombo, maji wamesena kwila tutalatala kyambote athu oso, kikale se jingadyama mba jimvwama, kabasa ixi mba dyembu mwa avwalela. (Tiy. 2:​1-4, 9) Mu kiki, kyebhi kitutena kukwatela henda kwa yó amateka kuya mu yônge?

15-16. Kyebhi kitutena kukwatekesa o asonyi kudivwa kyambote mu yônge?

¹⁵ Sayi athu aya mu yônge mukonda amesena ngo kwijiya o ima yene mubhita-mu, mba a exana kwa phange watokala mu kilunga kyengi. Kyoso ki umona muthu wa ubhe mu kididi kya ubhezelu, zwela-nê, musangese. Maji dilange, phala kumubhangese kudivwa kyayibha. Xikamenu kumoxi, tanga-nê o jivelusu ja Bibidya mba o madivulu utwamudilonga, mba utena kubhinga ku jiphange phala kumubhana Bibidya ni madivulu amukwa. Ku mbandu yengi, xinganeka maukexilu amukwa u utena kumukwatekesa kudivwa kyambote. Sayi diyala wayile mu kyônge, yu wambela o phange wamutambulula, kwila wexile mudivwa kyayibha mukonda kazwetele kala o jiphange jamukwa. Maji o phange wamubhangesa kudivwa kyambote, yu wamwambela kuma etu tu Jimbangi ja Jihova twadifu ni athu oso. Mu kubhita kithangana, o diyala didi amubatizala, maji nuka wajimbi o izwelu ya phange yoyo. Kyoso kituya ni kuzwela ni ajitu, ande dya kyonge ni kyoso kibhwa o kyonge, twatokala kwa akwatekesa kudivwa kyambote, maji kitutokala kudita mu maka mâ.—1 Ph. 4:15.

¹⁶ Kwala hanji ukexilu wengi ututena kukwatekesa o asonyi kudivwa kyambote mu yônge yetu. Mu itambwijilu yé ni mu jimbandu jé, kana kuzwela kyayibha yalungu ni athu kamusidivila Jihova. Kana kuzwela ima itena kwa abhangesa kudivwa kyayibha mba kweha kuya mu yônge. (Tit. 2:8; 3:2) Mu kifika, kitwatokala kuzwela kyayibha yalungu ni milongi yaxikina ene. (2 Ko. 6:3) O jiphange abhanga madiskulusu a katunda atokala kudilanga dingi ku maka yá. Ene atokala kujimbulula o izwelu ka itendela ku asonyi.

17. Ihi i twatokala kubhanga kyoso kitusanga o athu “a fwamena kutambula o mwenyu wakalelaku?”

¹⁷ Kala kizuwa kibhita twatokala kukalakala ni lusolo lwoso phala kubhanga maxibulu ni kusuluka mu kusota o athu “a fwamena kutambula o mwenyu wakalelaku.” (Ika. 13:48) Kyoso kitusanga o athu yá, kitutokala kukala ni hele ya kwa alonga o Bibidya ni kwa exana phala o yônge yetu. Mu kubhanga kiki, twamwakwatekesa kusanga o “njila yofele yambata ku mwenyu.”—Mat. 7:14.