Jihova Utena Kutukwatekesa Kusanguluka mu Kidi

1-2. (a) Athu avulu ene mudibhana ni ibhidi yebhi? (b) Ihi itwanda dilonga mu milongi yiyi?

LELU athu avulu abhanga yoso ni yoso phala kusanguluka. Sumbala abhanga nguzu yavulu, maji ne kiki ene kasanguluka. Avulu mudya ala ni kikote ku muxima, abanza kwila o ibhidi yanda nangenena kate ku hadyá ni hadyá. Sayi jiselevende ja Jihova adibhana we ni maka enya. Kuma twala “mu izuwa isukidilaku,” tukingila kubhita mu ima “yanda bhonza kudibhana nayu.”—2 Ti. 3:1.

² Mu milongi yiyi twanda dilonga se ihi itena kutuluwalesa ni ihi itena kutukwatekesa kusanguluka dingi. Maji kyadyanga, twanda mona se nanyi utena kutukwatekesa kusanguluka mu kidi.

NANYI UTENA KUTUKWATEKESA KUSANGULUKA MU KIDI?

3. O ibhangelu itulonga ihi yalungu ni Jihova? (Tala we o jifoto.)

³ Jihova, Nzambi wasanguluka. Mwene wamesena kwila tusanguluka we. Mukonda dya kiki mwene wabhange ima yavulu itusangulukisa. Mukifika, tusanguluka kyavulu kyoso kitumona jikolo javulu mu ixi, kumona o yama kutonoka ni kyoso kitudya o kudya kutwa wabhela kyavulu. Nzambi watuzolo kyavulu, yu wamesena kwila tusanguluka ku mwenyu!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Kyebhi Jihova kehela o hadi yene mu ngongo kumukatula o kusanguluka kwê? (b) Jihova utukwatekesa kukala ni ihi? (Jisálamu 16:11)

⁴ Sumbala Jihova o “Nzambi ya sanguluka,” wejiya kyambote o hadi yene mu ngongo. (1 Ti. 1:11) Maji mwene kehela o ima yiyi kumukatula o kusanguluka kwê. Wejiya we kwila kwakambe ngo bhofele o hadi yanda bhwa, mwene mwéne wanda zubha o hadi yiyi. Ni mwanyu woso wamukingila o kithangana kyanda zubha o ima yiyi. Kindala Jihova wejiya kwila twamutala hadi, yu wamesena kutukwatekesa. Mwene utukwatekesa kyebhi? Ukexilu umoxi wene mubhanga kiki, o kutukwatekesa kusanguluka. (Tanga Jisálamu 16:11.) Twanda mona kyebhi Jihova kya kwatekesa Mon’ê Jezú kusanguluka.

5-6. Mukonda dyahi mu ibhangelu yoso ya Jihova, Jezú o muthu wabeta dingi kota mukusanguluka?

⁵ Mu ibhangelu yoso ya Jihova, o wabeta kota mu kusanguluka, Jezú Kidistu. Mukonda dyahi? Mukonda dya ima iyadi: (1) “Mwéne o kidifwanganu kya Nzambi” ni kwila mwene ukayela o idifwa ya Tat’ê ni kuyuka kwoso. (Kol. 1:15; 1 Ti. 6:15) (2) Jezú Kidistu o muthu wabhiti dingi kithangana kyavulu ni Jihova, o fixi ya kusanguluka.

⁶ Jezú usanguluka mu kubhanga kima kyoso-kyoso kimubhinga Tat’ê. (Jisa. 8:​30, 31; Nzw. 8:29) Mukonda dya kiki Jihova wamuzolo kyavulu.—Mat. 3:17.

7. Ihi itena kutukwatekesa kusanguluka mu kidi?

⁷ Etu wetu se tusuluka mu kuzukama kwa Jihova o fixi ya kusanguluka, twanda sanguluka dingi. Kyoso kituya ni kudilonga dingi yalungu ni Jihova, twanda kayela o phangu ye. Kiki kyanda tukwatekesa kusanguluka dingi. Kyoso ki twijiya o vondadi ya Jihova ni kwila mwene watuzolo, twanda sanguluka we.a (Jisá. 33:12) Maji se tuluwala mu tu ithangana twofele mba mu ithangana yavulu, o kwila kiki kilombolola kuma Jihova katuzolo? Kana! Jihova wejiya kwila mu ngongo mumu, sayi ithangana twanda luwala kyavulu ni kwila twanda kala ni ndolo kumuxima. (Jisá. 103:14) Kindala twanda mona o ima itena kukatula o kusanguluka kwetu ni ihi itena kutukwatekesa kuvutuka mukusanguluka.

KANA KWEHELA KIMA KYOSO-KYOSO KUKATULA O KUSANGULUKA KWÉ

8. O ibhidi ku mwenyu itena kutubhangesa kudivwa kyebhi?

⁸ Ibhidi ku mwenyu. O kwila eye wamutala hadi mukonda dya izukutisu, divuwa, wadyama, uhaxi, mba mukonda dya kukuka? O maka ya atena kukatula o kusanguluka kwetu benge-benge se kitwejiya kyebhi kitwanda kwabatula. O Bibidya yamba kwila “ki kata muxima, ni nzumbi ya muthu idisuwata.” (Jisa. 15:13) Sayi kafunga amwixana Betu, mu mivu iwana o jitata jê ni phangye umoxi afu. Mwene wambe: “Ngadivu ubheka, kyedile kala seku muthu utena kungikwatekesa. Sayi bhabha ngiluwala kyavulu mukonda ande dya jitata jami ni phangyami kufwa ngamesenene kubhita nawu dingi kithangana, maji kingatena.” Mu kidi o ibhidi ku mwenyu itena kutuluwalesa kyavulu.

9. Ihi itena kutukwatekesa kuvutuka mukusanguluka? (Jelemiya 29:​4-7, 10)

⁹ Ihi itena kutukwatekesa kuvutuka mukusanguluka? O kukamba kudikwatenena mu ima kitutena ku ilungulula ni kusakidila o ima itwala nayu kya. O athu ku mundu azwela kwila phala kusanguluka ku mwenyu twatokala kukala ni ima yoso itwamesena. Maji kiki kikidi. Mukifika, Jihova watendelesa o Jijude a abalakalele ku Babilonya phala kusanguluka ni ima yakexile nayu mu ixi yenyoyo sumbala ni ibhidi yeji dibhana nayu. (Tanga Jelemiya 29:​4-7, 10.) Ihi itwadilongo mu kifika kiki? Sota kumona o ima yambote iwala nayu ku mwenyu, anga sanguluka ni ima yiyi. Lembalala kwila Jihova nuka wanda kubwazeka, mwene wanda kukwatekesa jinga. (Jisá. 63:7; 146:5) Sayi phange yamuhatu amwixana Effie, wabhiti mu kiluwezu yu wakituka kinema wambe: “Jihova, o mwiji wami ni jiphange mu kilunga angikwatekesa kyavulu. Ngamesena kwalondekesa kwila ngasakidila kyavulu mu ima yoso yabhange. Mukonda dya kiki ngibhanga yoso ni yoso phala kusuluka ni kusanguluka.”

10. Mukonda dyahi tutena kusanguluka né mwene kyoso kitukala ni maka?

¹⁰ Né mwene kyoso kitukala ni maka, tutena kusanguluka.b (Jisá. 126:5) Mukonda dyahi? Mukonda o kusanguluka kwetu kikwijila mu ima itwala nayu. Sayi phange muboki wathembu yoso, amwixana Madiya wambe: “Kyoso kitukala ni maka, tusanguluka mukonda tulembalala o ima yatukanena Jihova. Kiki ki kilombolola kwila nuka twanda dila mba kuzwela se kyebhi kitwamudivwa. Maji o Tat’etu yadyulu utena kutukwatekesa kusuluka mu kusanguluka, sumbala ni ibhidi itwala nayu.” Lembalala kwila o hadi itwamutala kindala kiyanda nangenena katé ku hádya ni hádya, kwakambe ngo Jihova wanda izubha.

11. Mukonda dyahi o phangu ya poxolo Phawulu ituswinisa?

¹¹ Sayi bhabha tutena kubanza kwila twala ni maka mukonda Jihova waluwala n’etu. Mu kithangana kiki, o kima kitena kutukwatekesa o kuxinganeka ku misoso ya jiselevende ja Jihova adibhanene we ni ibhidi. Tala o phangu ya poxolo Phawulu. Jezú mwéne wamusolo phala kuboka o njimbu yambote “ku akwa jixi jengi, ku jisobha ni ku an’a Izalayele.” (Ika. 9:15) Yu wexile ujitu wa katunda! Né kiki Phawulu wadibhele ni ibhidi yavulu. (2 Ko. 11:​23-27) O kwila o ibhidi yoso yiyi yalondekesa kwila Nzambi waluwalele ni mwene? Kana! O kukolokota kwa Phawulu kwalondekesa kwila Jihova wexile mu mukwatekesa ni kwila wamuzolele. (Lom. 5:​3-5) Eye we wamusidivila Jihova ni ufiyele woso sumbala ni ibhidi i wamudibhana nayu. Mu kiki dyelela kwila Jihova wakuzolo ni kwila wamukukwatekesa.

12. Kyebhi o kukamba kubhanga o ima i twamesena kubhanga mu sidivisu ya Jihova, kitena kutuluwalesa?

¹² Kitwamutena kubhanga o ima i twamesena kubhanga mu sidivisu ya Jihova. (Jisa. 13:12) Etu twazolo Jihova, tusakidila we o ima yoso yene mubhanga kokwetu, mukonda dya kiki tusuwa jimbambe mu nzumbi. Maji se tufikisa kubhanga kima, kitutena kukibhanga, tutena kuluwala. (Jisa. 17:22) Sayi phange yamuhatu, muboki wathembu yoso, amwixana Loza, wambe: “Ngamesenene kudilonga mu Xikola ya Akunji a Utuminu phala kuya musidivila mu ixi yengi mba kuya mu kikalakalu kya kutunga ku Ramapo. Maji o ima ku mwenyu wami yalunguluka, kingatena dingi kukumbidila o jimbambe jiji. Ngaluwalele kyavulu. Kutuxixima kyavulu kyoso kitumesena kubhanga dingi mu sidivisu ya Jihova, maji kitutena kubhanga kiki.” Jiselevende javulu ja Jihova, adivwa we kiki.

13. Se kitwamutena kubhanga o ima i twamesena kubhanga, ihi itena kutukwatekesa kuvutuka mukusanguluka?

¹³ Ihi itena kutukwatekesa kuvutuka mukusanguluka? Lembalala kwila Jihova kene mutubhinga phala kubhanga kima kitutena kukibhanga. Jihova katubhana ngo valolo mukonda dya ima itutena kubhanga mu sidivisu yê. Mwene wamesena kwila tuditulula ni kukala jifiyele. (Mik. 6:8; 1 Ko. 4:2) Mwene ubhana dingi valolo mu idifwa yetu, o ima itubhanga ndenge. Kitutokala kukingila kubhanga o ima kitutena ku ibhanga.c Maji, né mwene se kiwamutena kubhanga o ima i wamesena kubhanga, xinganeka mu ima i utena kubhanga. Mu kifika eye utena kukwatekesa o minzangala mu kilunga ni kuswinisa o adyakime. Eye utena kukunda muthu kubhata dyê, kumuxinda mba kumutumikisa kanjimbu phala kumuswinisa. Jihova usanguluka kyoso ki ubhanga o ima i utena kubhanga, mwene wanda kukwatekesa kusanguluka! Lembalala kwila mu Palayizu, eye wanda tena kusidivila Jihova, mu ukexilu kiwakifikile! Mana Loza twamutumbula kudima, wambe: “Kyoso kingiluwala, ngibanza kiki: ‘Nganda kala ni mwenyu wakalelaku.’ Ni kikwatekesu kya Jihova, nganda tena kubhanga yoso i ngamesena.”

14. Ihi dingi i tena kutuluwalesa?

¹⁴ Kudisuwa ngo etu ni kumesena kudisangulukisa. Mu internete o athu alondekesa kwila phala kusanguluka mu kidi, atokala kudisuwa ngo ene ni kutonoka. O athu a aswinisa kusumba ima mu ithangana yoso, kwenda jinjila javulu phala kwijiya jixi jamukwa. Kidi kwila ki kituxye kutonoka, mukonda Jihova watubhange mu ukexilu yu, mwene wamesena kwila tusanguluka ku mwenyu. Maji athu avulu amesenene kusanguluka bhukaxi ka kutonoka ngo ni kudisuwa, ku pholo dya kwenda amono kwila o ima yiyi kiyatena kwasangulukisa mu kidi. Sayi phange muboki wathembu yoso, amwixana Eva, wambe: “Kyoso ki udisuwa ngo eye, wanda mesena kukala dingi ni ima yavulu.” Mu kiki se udisuwa ngo ni kumesena kudisangulukisa, eye wanda luwala.

15. Ihi itutena kudilonga ku phangu ya Solomá?

¹⁵ Tutena kudilonga ku phangu ya Sobha Solomá. Mwene wasoto kusanga o kusanguluka mu kusuwa ngo o jihanji jê. Solomá wexile mudya kudya kwambote, kwivwa mimbu yambote ni kusumba imbamba yakatunda. Maji o ima yiyi kiyamusangulukisa. Mwene wambe: “O mesu ka zumbuka mu kumona, o mátwi we k’ezala ni kwívwa.” (Ndo. 1:8; 2:​1-11) O ixinganeku ya mundu yu yalungu ni kusanguluka, ixinganeku ya makutu. Yedi kala yala ni valolo maji ki itena kwabhekela o kusanguluka kwa kidi.

16. Kyebhi o kuswinisa akwetu kutukwatekesa kuvutuka mukusanguluka? (Tala we o jifoto.)

¹⁶ Ihi itena kutukwatekesa kuvutuka mukusanguluka? Jezú watulongo kwila “o kubhana kusangulukisa dingi, o kutambula ndenge.” (Ika. 20:35) Sayi kafunga amwixana Aleku, wambe: “Ngibhanga ima yofele phala kukwatekesa akwetu. Kyoso kingikwatekesa akwetu, kingibanza mu ima i ngamesena. Kiki kingisangulukisa dingi.” Ihi i utena kubhanga phala kukwatekesa akwenu? Se wamumona muthu wamudibhana ni ibhidi, mukwatekese. Nange kiwanda tena kubatula o maka mê, maji eye utena kumuswinisa mu kumubhana matwi, kumukwatela henda ni kumulembalesa phala kubhakula o ibhidi yê yoso kwa Jihova. (Jisá. 55:22; 68:19) Utena we kumukwatekesa kumona kwila Jihova kamubwazeka. (Jisá. 37:28; Iza. 59:1) Utena kumwambatela kudya mba kutunda-nê phala mutonoke, mba kuboka-nê, mukonda o kuboka kutukwatekesa kusanguluka. Ehela Jihova kuswinisa o jiselevende jê, bhukaxi ké. Kyoso kitukwatekesa akwetu, twanda sanguluka mu kidi!—Jisa. 11:25.

17. Ihi i twatokala kubhanga se twamesena kusanguluka mu kidi? (Jisálamu 43:4)

¹⁷ Se tusuluka mu kuzukama kwa Jihova, twanda musangulukisa. O Bibidya yamba kwila Jihova mwéne o “kusanguluka [kwetu] kwa dikota.” (Tanga Jisálamu 43:4.) Né mwene se tukala ni maka, kitwanda kala ni woma mba hele. Tukolokotyenu mu kuditwanena kwa Jihova, o Nzambi wene mutusangulukisa!—Jisá. 144:15.